অসমগী মুখ্য মন্ত্রী, শ্রী হিমন্তা বিস্বা শর্মা, ঐহাক্কী কেবিনেতকী মরুপ, শ্রী অনুরাগ থাকুরজী, অসম সরকারগী মন্ত্রীশিং, শক্নাইরবা মীথুংলেন, লৈবাক পুম্বগী তেলেন্ত লৈরবা নহা ওইরিবা শান্নরোইশিং!

ঐহাক্না অদোম পুম্নমক্কা খেলো ইন্দিয়া য়ুনিভর্সিতী গেম্স অসিদা পুনমিন্নবসিদা য়াম্না নুংঙাইবা ফাওই। গেম্স অসিগী হন্দক্কী তাঙ্কক অসি অৱাং নোংপোক্কী রাজ্য তরেৎকী তোঙান-তোঙানবা শহরশিংদা পাংথোক্লি। গেম্স অসিগী মাস্কোত, অশ্তলক্ষমীবু কুরাক অমা ওইনা উৎলি, অৱাং নোংপোক্কী রাজ্য নিপানগী মতিক্ক খুদম ওইরি। ঐহাক্না অৱাং নোংপোকপু ভারতকী অশ্তলক্ষমী হায়না তত্তনা কৌই, অদুগা কুরাক্না মাস্কোত ওইবসিনা লমদমসিগী অনিংবা-অপাম্বা হেনগৎলক্লিবা অসিবু তাক্লি। থৌরম অসিদা শরুক য়ারিবা মীপুম খুদিংদা ঐহাক্না য়াইফ পাউজেল পীজরি। লৈবাক্কী তোঙান-তোঙানবা মফমদগী ঙসি গৌহাতীদা পুল্লরিবা শান্নরোইশিং অদোম্না ঙসিদি অথোইবা ভারত অমগী মশক য়েক্লি। থৱাই য়াওনা শান্নবীয়ু, মায় পাক্নবা হোৎনবীয়ু, অদুগা মায়থীবা মতমদা অদোম্না মমল নাইদ্রবা পারা তমগদৌরিবনি হায়বা নিংশিংবীয়ু।

মরুপশিং,

অৱাংদগী খা ফাওবা অমসুং নোংপোক্তগী নোংচুপ ফাওবদা, লৈবাক্কী মফম খুদিংদা শান্নবগা মরী লৈনবা থৌরম কয়া পাংথোকপা হেনগৎলক্লিবা অসিদা ঐহাক্না য়াম্না নুংঙাইবা ফাওই। ঙসি ঐখোয়না অৱাং নোংপোক্কী লমদমসিদা খেলো ইন্দিয়া য়ুনিভর্সিতী গেম্স পাংথোকপগী থৌরম উরি। নুমিৎ খরনিগী মমাংদা, খেলো ইন্দিয়া ৱিন্তর গেম্স অসিসু লদাখনা য়ুম্ফম ওইদুনা পাংথোকখ্রে। মসিগী মমাংদা, খেলো ইন্দিয়া য়ুথ গেম্স অসিনা তমিল নাদুদা পাংথোকখি। মসিদগীসু মমাংদা, ভারতকী নোংচুপ থংবা সমুদ্র তোর্বানগী লমদম দিয়ুদা বীচ গেম্স পাংথোকখি। মসিগুম্বা থৌরমশিং অসিনা লৈবাক্কী কাচিন কোয়া খুদিংগী নহাশিংদা শান্নবদা শরুক য়াদুনা মীথোই মীহেনবা ঙম্বগী খুদোংচাবা কয়া পীরি। মরম অদুনা, ঐহাক্না অসম সরকার অমসুং অতোপ্পা রাজ্যশিংগী সরকারগী মফমদা মসিগুম্বা থৌরম পাংথোকপদা থৱাই য়াওবা উত্তুনা মরী লৈনবা থবকশিং পাংথোকপগীদমক্তা থাগৎপা ফোংদোক্লি।

মরুপশিং,

ঙসিদি, শান্নবগী মায়কৈদা খুন্নাই অসিনা হান্না য়েংলম্বা মিৎয়েংদগী খেন্নবা মিৎয়েং য়েংবগী মতৌ উরে। মমাংদা, মমা-মপা ওইবশিংনা মচাশিংবু অতোপ্পা মীওইদা শক্তাকপা মতমদা শান্নবদা ফংলকপা মায় পাকশিংগী মতাংদা পাউদম্বা তনবগী মতৌ লৈরম্মি। শান্নবদা মিৎয়েং চঙবনা মহৈ-মশিংদা মিৎয়েং চঙবগী চাং হন্থহল্লি হায়বা ৱাখল্লোন অমা চেন্নরম্মি। অদুবু, মসিগুম্বা মিৎয়েং অসি হৌজিক অফবা মওংদা অহোংবা লাক্লে। হৌজিক্কান্দি, মমা-মপাশিংনা মচাশিং অসি রাজ্য নত্ত্রগা লৈবাক্কী থাক্তা পাংথোকপা শান্ন-খোৎনবগী থৌরমশিংদা শরুক য়াবতা নত্তনা মালেমগী কম্পিতিসন্দা মনা ফংলক্লে হায়না চাউথোকচনা পাউদম্নরে।

মরুপশিং,

ঐখোয়না শান্ন-খোৎনববু শুপ্নগী খুমাং চাউশিলহনবতা নত্তনা মসিগীদমক্তা নুংঙাইবা ফোংদোকপা হায়বসি য়াম্না মথৌ তাই। মসিগুম্বা থৌদাং অসি শান্নরোইদগী হেন্দোক্তুনা খুন্নাইনা পাংথোক্কদবনি। মহৈ-মশিংদা থাক ৱাংবা মায় পাকপা ফংলকপা মতম খক্তা নত্তনা শান্নবদা মীথোই মীহেবশিংবুসু ঐখোয়না ইকায় খুম্নগদবনি। ঐখোয়না শান্নবদা মায় পাকপশিংবু ইকায়খুম্নবগী চৎনবী অমা হৌদোক্কদবনি। হীরম অসিগী মতাংদা ঐখোয়না অৱাং নোংপোক লমদমদগী ইথিল লৌবা য়াগনি। অৱাং নোংপোক্কী মফমশিংদা শান্ন-খোৎনবা অমসুং মসিদা হৈথোই শিংথোইবগী মতিকপু লুনা খন্নবগী থৌওং অসিদি মশক থোকপা থৌওং অমনি। এথকেতিক্সতগী ফুতবোল, বেদমিন্তন্দগী বোক্সিং, ৱেতলিফতিংদগী ছত্রং, লমদমসিগী শান্নরোইশিংনা মখোয়গী তেলেন্তকী মতেংদগী নোংমা নোংমগী অৱাংবা থাক্তা কাবগী চাং হেনগৎলক্লি। অৱাং নোংপোক্না শান্নববু হকচিন্না লৌবগী চৎনবী অমা শেমগৎখ্রে, তুর্নামেন্ত অসিদা শরুক য়ারিবা শান্নরোইশিংনা লৈবাক্কী মফমদা ইথিল পীনবা মমল নাইদ্রবা এক্সপেরিএন্স কয়া ফংগনি হায়বগী ঐহাক্না থাজবা থমজরি।

মরুপশিং,

খেলো ইন্দিয়া, TOPS, নত্ত্রগা মান্নবা খোঙথাংশিং ওইরো, ঙসিদি, ঐখোয়গী নহা ওইরিবা চারোন শুরোনশিংগীদমক্তা অনৌবা খুদোংচাবা কয়াগী ইকোসীস্তেম অমা শেম্লি। ত্রেনিং পীবদগীনা স্কোলার্শিপ পীবা ফাওবগী চুনবা অকোয়বগী ফিভম অমা লৈবাক অসিদা শান্নরোইশিংগীদমক্তা শেম্লা। হন্দক্কী চহিসিদা, লুপা করোর 3500কী রেকোর্দ ওইরবা শেনফম অসি শান্নবগীদমক্তা কাইথোকখ্রে। ঐখোয়না সাইন্তিফিক এপ্রোচকা লোয়ননা লৈবাক্কী শান্ন-খোৎনবগী তেলেন্তপু খুমাং চাউশিনহল্লি। মসিগী মহৈসু ময়েক শেংলে – ভারতনা ঙসিদি মমাংগী মতমগা চাংদম্নবদা কম্পিতিসন খুদিংদা মেদল লৌবগী চাং হেনগৎলক্লি। ভারতনা এসিয়ন গেম্স্তা হান্নগী রেকোর্দ থুগাইদুনা উৎখিবা পরফোর্মেন্স অমসুং মালেমগী থাক্তা চাংয়েংনবা ঙম্বগী মতিকপু মালেম্না ময়েক লানা উখ্রে। ভারতনা ৱর্ল্দ য়ুনিভর্সিতী গেম্সতা মশক থোক্না মায় পাকখি। ভারতনা ইং 2019দা মেদল 4 লৌখি, অদুবু ইং 2023দা ঐখোয়গী নহাশিংনা চাউথোকচনীংঙাই ওইরবা মেদল 26 লৌখি। মায় পাকপা অসি শুপ্নগী মেদল ফংবখক নত্তে, মসিদি সাইন্তিফিক এপ্রোচ অমসুং তেংবাং পীবা মতমদা ঐখোয়গী নহাশিংগী তৌবা ঙম্বগী মতিক হেনগতলক্লিবা অসিগী খুদম্নি।

মরুপশিং,

নুমিৎ খরনিগী মনুংদা, অদোম্না য়ুনিভর্সিতীদগী হেন্দোকপা মালেম অমদা খোঙদাগনি। মহৈ-মশিংনা ঐখোয়বু মালেমদা মাইয়োক্নবা ঙম্নবা শেম শাবীবা মতমদা, মালেমগী শিংনবশিং মাইয়োক্নবা ঙম্বগী থৌনা অসি শান্ন-খোৎনবনা পী হায়বসিসু অচুম্বনি। মায় পাকপা মীওইশিংদা তেলেন্ত লৈবখক নত্তনা কিউবা ৱাখল্লোন্সু চেল্লি। মখোয়না মতৌ করম্না লুচিংগদগে, তীম স্পিরিতকা লোয়ননা থবক তৌগদগে, অমসুং মনিং হল্লুরবা তুংদা মাঙজিল অমুক মতৌ করম্না থারক্কদগে হায়বা খঙই। মখোয়না প্রেসর মরক্তা চত্তুনা মীথোই মীহেনবা ঙম্মি, তঙাই ফদবা মতমদা মশাগী খ্বাইদগী অঙম্বা মতৌ উৎলি। মসিগুম্বা গুনশিং অসিউ শেমগৎপদা শান্নবনা অচৌবা থৌদাং য়াই। শান্নবদা খোঙদাবনা মসিগুম্বা গুন শেমগৎপা ঙমহল্লি। অদুনা ঐহাক্না হায়রি, “শান্ন মীওইশিংনা মায় পাকই”।

মরুপশিং,

ঐহাক্না ঙসিদি ঐখোয়গী নহা ওইরিবা মরুপশিগদা থবক অমা শিন্নবা পাম্মি, থবক অদুদি শান্নবগা মরী লৈনদে। অৱাং নোংপোক অসি মহৌশাগী ফজবগীদমক্তা মমিং চৎলি। গেম্স অসিগী মতুংদা, অদোম্না ইশাগী অকোয়বদা লৈবশিং খঙদোক য়েংথোকপগী খুদোংচাবা লৌবীয়ু। অদোমগী এক্সপেরিএন্সশিং সোসিএল মীদিয়াদা হেশতেগ #NorthEastMemories শিজিন্নদুনা হাপকৎলু। লোয়ননা, অদোম্না শান্নরিঙৈ মতমদা মফমসিগী লোলদা ৱাহৈ পরেং খরা তম্নবা হোৎনৌ। মফমসিগী মীওইশিংগা ৱারী শানবা ভাশিনী এপ শিজিন্নবীয়ু, মসিনা অদোমগী এক্সপেরিএন্স য়াম্না নুংঙাইহনগনি।

মরুপশিং,

অদোম্না থৌরম অসিদগী ফংগদৌরিবা এক্সপেরিএন্সশিগ অসিদি পুন্সিগী কাওঙমদবা ঙাক্তা ওইগনি হায়বা ঐহাক্না থাজৈ। ঐহাক্না পুম্নমক্কী মফমদা অমুক্কা হন্না য়াইফ পাউজেল পীজরি।

থাগৎচরি।

***