نائب صدر جمہوریہ ہند جناب جگدیپدھنکھڑ نے آج ملک کے تمام شہریوں سے ماحولیاتی تحفظ  کے تئیں اروناچل پردیش کے لوگوں کے نقطہ نظر کی تقلید کرنے کی اپیل کی ۔  انہوں نے کہا کہ ‘‘آپ کا طرز زندگی فطرت کے ساتھ بقائے باہمی کی مثال فراہم کرتا ہے۔’’   اروناچل پردیش کو ‘‘بھارت کا مائیکرو کاسم’’ قرار دیتے ہوئے، نائب صدر نے ریاست کی قدرتی خوبصورتی کی تعریف کی، اس کے ‘‘خوبصورت مناظر ،  اونچے اور دھند آلود پہاڑوں اور سرسبز جنگلات’’ کی طرف توجہ مبذول کرائی جس نے اسے سیاحوں کے لیے ایک بہترین مقام بنا دیا ہے ۔

ریاست کے اپنے پہلے دورے کے دوران آج ایٹا نگر میں اروناچل پردیش کے 38ویں یوم تاسیس کی تقریبات سے خطاب کرتے ہوئے نائب صدر نے ریاست کی نامیاتی پیداوار کی ساکھ اور صداقت کی تعریف کی ۔  اس طرح کی پیداوار کے لیے موجود بڑی قومی اور بین الاقوامی منڈیوں کو تسلیم کرتے ہوئے، جناب دھنکھڑ نے اس یقین کا اظہار کیا کہ سرکاری اسکیموں کو فعال کرنے سے اس طرح کے وسائل کی رسائی مزید بڑھے گی ۔

آٹھ شمال مشرقی ریاستوں یا ‘‘اشٹھ  لکشمیوں’’ کو ‘‘ہندوستان کا  زیور’’ قرار دیتے ہوئے  ، نائب صدر نے اس بات پر زور دیا کہ ہندوستان کا ثقافتی تانا بانا شمال مشرقی خطے کے بغیر نامکمل ہے ۔  خطے میں بنیادی ڈھانچے اور سڑک، ریل اور فضائی کنکٹیویٹی میں ‘‘غیر معمولی اور تیزی سے اضافے’’ کو اجاگر کرتے ہوئے، جناب دھنکھڑ نے کہا کہ یہ  تمام چیزیں ‘‘بھارت کے بدلتی ہوئی شکل’’ کے ساتھ ساتھ تعاون پر مبنی وفاقیت کے جذبے کی عکاسی کرتی ہیں ۔

‘کمزور پانچ’ معیشتوں میں سے ایک ہونے سے لے کر ‘سر فہرست پانچ معیشتوں’ میں سے ایک بننے تک ہندوستان کے سفر  کا ذکر  کرتے  ہوئے نائب صدر نے اقوام عالم میں ہندوستان کے بڑھتے ہوئے قد کو اجاگر کیا ۔  جی 20 کی ہندوستان کی قیادت کا ذکر کرتے ہوئے، جناب  دھنکھڑ نے کہا کہ ہندوستان کی صدارت کے دوران ایٹا نگر میں منعقدہ جی 20  تحقیقی اور اختراعی پہل  کے اجتماع نے دنیا کے سامنے ریاست کی صلاحیت کو ظاہر کیا تھا ۔

اروناچل پردیش سے تعلق رکھنے والے افراد جنہیں حالیہ برسوں میں پدم ایوارڈز سے نوازا گیا ہے، کی تعریف کرتے ہوئے نائب صدر  جمہوریہ نے کہا کہ موجودہ ماحولیاتی نظام میں مستحق افراد کو بغیر کسی سرپرستی یا اقربا پروری کے ان کی صلاحیتوں کے لیے پہچانا جا رہا ہے ۔  انہوں نے نوجوانوں پر بھی زور دیا کہ وہ ہندوستان کو ‘‘2047 تک وکست بھارت’’ کے درجے تک لے جانے کے سفر میں قدم رکھنے والے سپاہی کے طور پر اپنا کردار ادا کریں ۔

اروناچل پردیش کے گورنر، لیفٹیننٹ جنرل کیولیہ تری ویکرم پرنائک (ریٹائرڈ)؛ اروناچل پردیش کے وزیر اعلیٰ جناب  پیما کھانڈو؛ مرکزی وزیر جناب کرن رجیجو؛ اروناچل پردیش کے نائب وزیر اعلیٰ، جناب چونا مین؛ ممبر پارلیمنٹ (راجیہ سبھا)، محترمہ ایس فانگن کونیاک؛ اس موقع پر اروناچل پردیش قانون ساز اسمبلی کے اسپیکر جناب پاسنگ دورجی سونا اور دیگر معززین بھی موجود تھے ۔

نائب صدر  جمہوریہ کے خطاب کا متن یہاں ملاحظہ  کیاجا سکتا ہے ۔

*************

ش ح  ۔ م ع  ۔    ت ح

U- 5209