NEC শিল্লোং, IIM শিল্লোং অমসুং MDoNERগী মরক্তা দাঃ APJ কলাম সেন্তর ফোর পোলিসী রিসর্চ অমসুং এনালাইসীসকী থবক-থৌরমশিং মখা চত্থনবা অমসুং IIM শিল্লোংগা লৈনরিবা মরী হেন্না চেৎশিলহন্নবা MoU অমা MDoNERনা ৱেব লিঙ্ককী খুত্থাংদা শরুক য়াদুনা শিল্লোংগী NEC সেক্রেতরিএত্তা 13-02-2024দা খুৎয়েক পীনখ্রে। MoU অসি MDoNERগী জোইন্ত সেক্রেতরী, শ্রী অংশুমন দে; NECগী সেক্রেতরী শ্রী মোজেজ কে চলাই অমসুং IIM শিল্লোংগী দাইরেক্তর, প্রোফঃ DP গোয়লনা MDoNERগী সেক্রেতরী, শ্রী চঞ্চল কুমার অমসুং MDoNER অমসুং IIM শিল্লোংগী অতোপ্পা সেনিয়র ওফিসর য়াওনা খুৎয়েক পীনখিবনি।

দাঃ APJ কলাম সেন্তর ফোর পোলিসী রিসর্চ অমসুং এনালাইসীস অসি IIM শিল্লোং, দোনর মন্ত্রালয় অমসুং নোর্থ ইস্তর্ন কান্সিলগী মরক্তা ওক্তোবর 15, 2016দা খুৎয়েক পীনখিবা ত্রাইপার্তাইত এগ্রীমেন্ত অমগী মখাদা লিংখৎখিবনি। থৌওং অসিনা সেন্তর অসিবু স্তেত-ওফ-দি-আর্ত সেন্তর অমা ওইহন্নবা অমসুং অৱাং নোংপোক ভারত অমসুং ইমপ্লিমেন্তিং এজেন্সীশিংদা লমদমসিগী চাউখৎ থৌরাং য়াৎপা, ইন্নোভেসনবু খুমাং চাউশিলহনবা অমসুং লমদমসিগী খ্বাইদগী ফবা থৌওংশিংগী রিপোজিতরী অমা ওইহনবদা তেংবাংনবা পান্দম থম্লি। থৌরম অসিদা ৱা ঙাঙবদা, IIM শিল্লোংগী দাইরেক্তর, প্রোফঃ DP গোয়লনা নুংঙাইবা ফোংদোক্লদুনা মহাক্না লৈখিদ্রবা রাস্ত্রপতি, দাঃ APJ অবদুল কলামগী শক্নাইরবা পুন্সি অমসুং মহাক্কী চাউখৎ থৌরাংগী মিৎয়েংশিংগী মতাংদা মহাক্না মীয়ামদা পাউদমখি। দাঃ কলাম সেন্তর অসিনা হৌখিবা চহি খরসিদা ইকুই কুইদনা পাংথোকখিবা মরু ওইবা থবক থৌরমশিংগী মতাংদা পাউদমখি। MoU অসিবু পাকথোক চাউথোকহনবনা মরু ওইবা এজেন্সী অহুমগী মরী চেৎশিনবগা লোয়ননা মসিনা অৱাং নোংপোক লমদমগী চাউখৎ থৌরাংদা খোঙফম চেৎলিবা অসিগী মপাঙ্গলসু হেনগৎহনগনি হায়না মহাক্না মখা তাখি।

NECগী সেক্রেতরী, শ্রী মোজেস চলাইনা সেন্তর অসিনা থাজবগী মতুং ইন্না মথৌ পাংথোক্লিবা অসিদা নুংঙাইবা ফোংদোকখি। লমদমসিগী অপাম্বা মশক খঙদুনা সেন্তর অসিগী মতিক হেন্না লৈহন্নবা কেন্দ্রনা পোলিসী অমসুং কাঙলোনগা মরে লৈনবা মিৎয়েং চঙবীনবা হায়জখি। দোনর মন্ত্রালয়না স্পোন্সর তৌদুনা NECগী খুত্থাংদা পায়খৎখিবা দাঃ APJ অবদুল কলাম সেন্তরগী এদমিনিস্ত্রেতিব বিলদিং শাবা লোইশিনখিবা অসিদসু মহাক্না নুংঙাইবা ফোংদোকখি। মহাক্না সেন্তর অসিবু হৌনবী মতুং ইন্না শঙ্গানবা দোনর মন্ত্রালয়গী পুক্নিং চীংশিনখি।

MDoNERগী সেক্রেতরী, শ্রী চঞ্চল কুমারনা সেন্তর অসিগীদমক্তা মীয়াম্বু থাগৎখি অমসুং মসিনা লমদমসিগী মরু ওইবা থিঙ্ক তেঙ্ক অমা ওইরক্কনি হায়বগী থাজবা ফোংদোকখি। লমদম অসিগী এদমিনিস্ত্রেসন্দা অচৌবা শাফু পপীগদবা অমসুং অফবা গবর্নেন্স অমা পুরকপা ঙমগদবা থৌওং অমা ওইনা, IIM শিল্লোংগী মায়কৈদগী দাঃ কলাম সেন্তরগী খুত্থাংদা নোর্থ ইস্ত দিভেলপমেন্ত ফেল্লোশীপ অমা হৌদোকপগী তঙাই ফদবা লৈবসিদা মহাক্না মীয়ামগী পুক্নিং চীংশিনখি। সেন্তর অসিবু চাউখৎহনবদা MDoNERগী মায়কৈদগী পাংবা য়াবা মতেং খুদিংমক পাংগনি হায়বগী মহাক্না থাজবা পীখি।

ঙসিগী থৌরমসিদা ভর্চুএলগী খুত্থাংদা শরুক য়ারিবা IIM শিল্লোংগী বোর্দ ওফ গবর্নরগী মেম্বর, শ্রী অতুল কুলকরনীনা ওন্তোপ্রিনর্শিপ, এজুকেসন, পোলিসী শেম্বা নত্ত্রগা ত্রেনিং পীবা অমসুং গুদ গবর্নেন্স লৈহনবদা রাজ্য সরকারশিংদা তেংবাংবগী থৌওং ওইরো, মসিনা লমদমসিগী অপাম্বা ফংহনবদা দাঃ কলাম সেন্তরনা লৌরিবা মরু ওইবা থৌদাংশিংদা মিৎয়েং চঙখি।

MoU অসিবু পাকথোক চাউথোকহন্দুনা দাঃ কলাম সেন্তরনা হান্নদগী থৱাই হেন্না য়াওদুনা থবক তৌগনি।

দাঃ কলাম সেন্তরনা ১) ত্রেনিং অমসুং দিভেলপমেন্ত, ২) রিসর্চ অমসুং কন্সলতেন্সী, ৩) পোলিসী এদভোকেসী, ৪) নোলেজ দেস্তিনেসন, ৫) সিবিক ইনগেজমেন্ত য়াওনা মখাদা পীরিবা পান্দমশিং অসিগা লোয়ননা হীরম কয়াদা থবক তৌগনি।

• NERবু লৈবাক চাউখৎপদা মরু ওইবা শরুক তম্বা ঙমগদবা লমদম ওইহন্নবা খ্বাইদগী ফবা মেনেজমেন্ত প্রেক্তিস কয়া থবক্তা ওন্থোকপা, মেনেজমেন্ত ফ্রেমৱর্ক, আউতলুক অমসুং ব্যুজিনেস মোদেল শেমগদবা ৱাখল্লোন কয়া শিজিন্নদুনা নোর্থ ইস্তর্ন রিজন (NER)গী থিঙ্ক তেঙ্ক অমা ওইহনবা।
• NERগী রিসোর্সশিং শিজিন্নবগী থৌওংদা ইফিসিএন্সী অমসুং সস্তেনেবিলিতী লাকহন্নবা ইনপুত পীবা।
• NERগী চাউখৎ থৌরাংদা খোঙজেল হাপ্পগী MDoNER মিসন অসিগী পোলিসী অমসুং প্রোগ্রামশিংবু থবক্তা ওন্থোকপগী ফ্রেমৱর্ক শেম্বা অমসুং NERগী অতোপ্পা ইন্সতিত্যুসনশিংগা তানদুনা NERবু মপুং ওইনা চাউখৎহনবগী অশাংবা মতমগী পান্দম অমা শেম্বদা MDoNER/NECদা তেংবাংবা।
• লমদমসিগী ইন্সতিত্যুসনশিংদা করিকলম শেম্বা, কোর্স দিজাইন তৌবা অমসুং কেন্দ্র অমসুং রাজ্য সরকারশিংগী পোলিসী অমসুং প্রোগ্রামশিং থবক্তা ওন্থোকপগী শরুক ওইরিবা ওফিসিএলশিংগী মফমদা কেপাসিতী বিলদিং তৌবগী হ্যুমেন রিসোর্স দিভেলপমেন্তকী থৌওংবু খুমাং চাউশিলহনবা।
• NERগী চাউখৎ থৌরাংগা মরী লৈনবা হীরমশিংগী মখল কয়াগী লমদা অতোপ্পা ইন্সতিত্যুসন ওফ এক্সলেন্সশিংগা মরী শেমগৎপা অমসুং রিসর্চ, এনালাইসীস অমসুং কন্সলতেন্সীনচিংবা কয়া পুন্না পাংথোকমিন্ননবা ইন্সতিত্যুসনশিংগী নেতৱর্ক অমা শেমগৎপা।
• MDoNER, NEC অমসুং রাজ্য নত্ত্রগা ইন্দিভিজুএলশিংগা লোয়ননা NERগী চাউখৎ থৌরাংগী এজেন্দা শেম্বগী মতাংদা রিসর্চ অমসুং এনালাইসীস পাংথোকপা অমসুং NERগী খুঙ্গংশিংদা পায়খৎপা চাউখৎ থৌরাংগী প্রোগ্রাম/স্কিমশিংবু নীংথিনা চলায়নবগীদমক্তা অহাঙবা লৈবশিং মশক খঙদোকপা।
• মতিক লৈবা সেক্তরশিংদা ইন্নোভেসন অমসুং ওন্তোপ্রিনর্শিপ খুমাং চাউশিলহন্দুনা NERগী শেন্মিৎলোনগী চাউখৎ থৌরাংদা ইনোৎ হাপ্পগী থৌওংশিং শৌগৎপা।
• মার্কেত ইন্তেল্লিজেন্স খোমজিন্দুনা NERদগী তংদু লৈতাবা এক্সপোর্ত গ্রোথ লৈহন্নবা তঙাই ফদবা থৌওং মশক খঙদোকপা।
• NERদা থবক ওইনা শিজিন্নবা য়াবা অনৌবা ৱাখল্লোন অমসুং লৌশিং তানবদা তেংবাংবা।
• NECগী দাঃ কলাম সেন্তর অমসুং স্তেত-ওফ-দি-আর্ত রিসোর্স সেন্তর অসিনা অমনা অমগী থবকশিংদা তেংবাংদুনা অৱাৎপা লৈবশিং মেনশিনগনি, থৌওং অনি থোকহন্দনবা হোৎনগনি।

সেন্তর অসিনা NEC, রাজ্য অমসুং অৱাং নোংপোক লমদমগী মশক নাইবা ইন্সতিত্যুসনশিংগা লোয়ননা লৈবাক্কী থাক্তা লৈবা ইন্সতিত্যুসনশিংগা তেংবাংনদুনা লমদমসিগী শাহৌ লৌবা ঙম্বগী তসেংবা মতিকশিং শিজিন্নবা ঙম্নবা হোৎনগনি।

***