భారతదేశం మరియు సౌదీ అరేబియా మధ్య పెరుగుతున్న రక్షణ సంబంధాలకు నిదర్శనంగా రక్షణశాఖ సహాయ మంత్రి శ్రీ అజయ్ భట్  ప్రపంచ రక్షణ ప్రదర్శన (డబ్ల్యూడిఎస్‌) 2024లో పాల్గోనే భారత ప్రతినిధి బృందానికి అధిపతిగా రియాద్‌కు విచ్చేశారు. ఐదు రోజుల పాటు జరిగే ఈ ప్రదర్శన ఫిబ్రవరి 04, 2024న ఇది ప్రారంభమైంది. పాల్గొనే కంపెనీల మధ్య అంతర్జాతీయ సహకారానికి కీలక వేదికగా పనిచేస్తున్న రక్షణ సాంకేతికతలో తాజా పురోగతులను ఇది ప్రదర్శిస్తోంది. ఫిబ్రవరి 08, 2024న ముగిసే ఆకట్టుకునే ఈవెంట్‌ను నిర్వహించినందుకు సౌదీ అరేబియా నాయకత్వానికి భారత ప్రభుత్వం తరపున రక్షణశాఖ సహాయమంత్రి తన శుభాకాంక్షలు తెలియజేశారు.

ఫిబ్రవరి 06, 2024న రక్షణశాఖ సహాయమంత్రి సౌదీ అరేబియా రక్షణ మంత్రి ప్రిన్స్ ఖలీద్ బిన్ సల్మాన్ బిన్ అబ్దుల్ అజీజ్ అల్-సౌద్‌తో ప్రదర్శనలో భాగంగా సమావేశాన్ని నిర్వహించారు. ద్వైపాక్షిక రక్షణ సహకారానికి సంబంధించిన పలు అంశాలపై వారు చర్చించారు. సౌదీ అరేబియా రక్షణ శాఖ సహాయ మంత్రి డాక్టర్ ఖలీద్ అల్-బయారీతో కూడా శ్రీ అజయ్ భట్  చర్చలు జరిపారు. ఇరు దేశాల మధ్య దీర్ఘకాలిక మరియు బహుముఖ రక్షణ సహకారాన్ని మరింత బలోపేతం చేసే మార్గాలపై ఆయన చర్చించారు. ఉమ్మడి శిక్షణ వ్యాయామాల పరిధిని పెంచడం, సాంకేతికత బదిలీ మరియు నైపుణ్యం మార్పిడితో సహా పరస్పర ఆసక్తి ఉన్న రంగాలలో సహకారం కోసం మార్గాలను అన్వేషించడంపై ప్రధానంగా చర్చలు జరిగాయి.

అలాగే రక్షణశాఖ సహాయమంత్రి సౌదీ అరేబియా యొక్క జనరల్ అథారిటీ ఫర్ మిలిటరీ ఇండస్ట్రీస్ (జిఏఎంఐ) అహ్మద్ అబ్దుల్ అజీజ్ అల్-ఓహలీతో సమావేశాన్ని నిర్వహించారు. సముచిత సాంకేతికతలతో పాటు రక్షణ ఉత్పత్తి, పరిశోధన & అభివృద్ధి వంటి విభిన్న రంగాలలో పరస్పర సహకారంతో ముందుకు సాగే మార్గాన్ని వారు చర్చించారు. డబ్ల్యుడిఎస్‌ 2024 సందర్భంగా సౌదీ అరేబియా మిలిటరీ ఇండస్ట్రీస్ (ఎస్‌ఏఎంఐ)  పెవిలియన్‌ను కూడా సందర్శించారు.

ఈ చర్చల్లో ఇరుపక్షాలు అభివృద్ధి చెందుతున్న భద్రతా రంగం గురించి లోతైన అవగాహనను పంచుకున్నాయి మరియు ప్రాంతీయ భద్రతను పరిరక్షించడంలో బలమైన భాగస్వామ్యం యొక్క పరస్పర ప్రయోజనాలను గుర్తిస్తూ బహుళ రంగాలలో ద్వైపాక్షిక రక్షణ సహకారాన్ని పెంచుకోవాలని నిర్ణయించుకున్నారు. భారతదేశం-సౌదీ అరేబియా భాగస్వామ్యం ప్రాంతీయ స్థిరత్వం మరియు ప్రపంచ భద్రతకు గణనీయంగా దోహదపడుతూ శక్తి నుండి బలానికి ఎదుగుతుందని శ్రీ అజయ్ భట్ విశ్వాసం వ్యక్తం చేశారు.

డిఫెన్స్ షోలో పాల్గొన్న భారతీయ రక్షణ కంపెనీల ప్రతినిధులతో కూడా శ్రీ అజయ్‌ భట్‌ సంభాషించారు మరియు వారి అద్భుతమైన అత్యాధునిక సాంకేతికతలు & వినూత్న పరిష్కారాల కోసం వారిని అభినందించారు. భారతీయ రక్షణ సంస్థల భాగస్వామ్యం పాదముద్ర పెరుగుదలకు దోహదం చేయడమే కాకుండా శాశ్వత భాగస్వామ్యాలను ఏర్పరచడం ద్వారా రెండు దేశాలలో రక్షణ పరిశ్రమను మరింత అభివృద్ధి చేస్తుంది.

డబ్ల్యూడిఎస్‌ 2024 సందర్భంగా శ్రీ అజయ్ భట్ మ్యూనిషన్స్ ఇండియా లిమిటెడ్ మరియు దాని స్థానిక భాగస్వామి మధ్య ఒక అవగాహన ఒప్పందంపై జరిగిన కార్యక్రమంలో కూడా పాల్గొన్నారు. సౌదీ అరేబియాలోని ప్రముఖ భారతీయ మరియు సౌదీ వ్యాపార ప్రముఖులతో జరిగిన బిజినెస్ నెట్‌వర్కింగ్ ఈవెంట్‌కు కూడా ఆయన హాజరయ్యారు.

భారతదేశం యొక్క ‘ఆత్మనిర్భర్ భారత్’ మరియు సౌదీ అరేబియా యొక్క ‘విజన్ 2030’ రెండు పక్షాలకు పరస్పర ప్రయోజనకరమైన జాతీయ కార్యక్రమాలు. రెండు కార్యక్రమాలు సాంకేతిక పురోగతులు, స్వదేశీ సామర్థ్యాలు మరియు విజ్ఞాన భాగస్వామ్యానికి ప్రాధాన్యతనిస్తాయి. రెండు వైపులా హైలైట్ చేసినట్లుగా ఈ రంగాలలో ముఖ్యంగా సహ-అభివృద్ధి మరియు రక్షణ సాంకేతికతల ఉమ్మడి ఉత్పత్తిలో సహకారానికి అపారమైన సంభావ్యత ఉంది. ఈ పర్యటన ద్వైపాక్షిక సంబంధాల యొక్క స్వాభావిక బలాన్ని పునరుద్ఘాటించింది. సహకారం కోసం కొత్త మార్గాలను తెరిచింది మరియు సురక్షితమైన మరియు సుసంపన్నమైన భవిష్యత్తు కోసం భాగస్వామ్య కట్టుబాట్లను పటిష్టం చేసింది.
 

***