ভারত অমসুং সাউদী অরাবিয়াগী মরক্তা লৈরিবা দিফেন্সকী মরীনা মপাঙ্গল হেন্না কনখৎলকপগী খুদম অমা ওইনা রক্ষা রাজ্য মন্ত্রী শ্রী অজয় ভতনা হৌজিক চত্থরিবা ৱর্ল্দ দিফেন্স শো (WDS) 2024গী ভারতকী দেলিগেসনগী মকোক ওইনা রিয়াধকী খোঙচৎ চৎলি। ফেব্রুৱারী 4, 2024দগী হৌখিবা নুমিৎ মঙানিগী থৌরম অসিনা মসিদা শরুক য়ারিবা কম্পেনীশিংগী মরক্তা মালেমগী থাক্তা তেংবাংনবগী মরু ওইবা ফম্বাক অমা ওইনা থৌদাং লৌদুনা দিফেন্স তেক্নোলোজীগী খ্বাইদগী এদভান্স ওইবা পোত্থোকশিং উৎলি। রক্ষা রাজ্য মন্ত্রীনা ভারত সরকারগী মহুৎ শিন্দুনা ফেব্রুৱারী 8, 2024দা লোইশিনগদবা পুক্নিং হুনিংঙাই ওইরবা থৌরম অসিবু শীন-লাঙবগীদমক্তা সাউদী অরাবিয়াগী থৌবুরেলশিংবু থাগৎপা ফোংদোকখি।

রক্ষা রাজ্য মন্ত্রীনা ফেব্রুৱারী 6, 2024দা দাউদী অরাবিয়াগী দিফেন্স মন্ত্রী, প্রিন্স খলিদ বিন সলমান বিন অব্দুল অজিজ অল-সাউদকা শো অসিগী মনুংদা উন্নখি। মখোয়না বাইলেতরেল কোওপরেসনগী তোঙান-তোঙানবা হীরম কয়াগী ৱারী শাখি। শ্রী অজয় ভতনা সাউদী অরাবিয়াগী এসিস্তেন্ত দিফেন্স মন্ত্রী, দাঃ খালেদ অল-বায়রীগসু উন্নখি, মসিদা মখোয়না লৈবাক অনিগী মতম শাংনা লৈরক্লবা মরী অমসুং হীরম য়াম্বা দিফেন্স মরীবুসু হেন্না চেৎশিলহন্নবা ৱারী কয়া শান্নখি। খন্ন-নৈনবা অসিনা ম্যুচুএল ইন্তরেস্ত লৈনবা হীরমশিং, মিং ওইনা পল্লবদা, জোইন্ত ত্রেনিং এক্সর্সাইস পাংথোকপা হেনগৎপা, তেক্নোলোজী ত্রান্সফর অমসুং খঙ-হৈবা লৌশিং লান্নবগুম্বা হীরমশিংদা মিৎয়েং চঙখি।

অহেনবা মতৌ অমা ওইনা, রক্ষা রাজ্য মন্ত্রীনা সাউদী অরাবিয়াগী জেনেরেল ওথোরিতী ফোর মিলিতরী ইন্দস্ত্রীজ (GAMI)গী গবর্নর অহমদ অব্দুল অজিজ অল-ওহালীগা ৱারী শাখি। মখোয়না হৌজিক চৎনরিবা তেক্নোলোজী কয়াগী মথক্তা দিফেন্স প্রদক্সন, এইসর্চ অমসুং দিভেলপমেন্তকী মখল য়াম্বা হীরমশিংদা তেংবাংনবগী মতাংদা ৱারী শাখি। মহাক্না WDS 2024গী শরুক ওইরিবা সাউদী অরাবিয়ন মিলিতরী ইন্দস্ত্রীজ (SAMI)গী পেভিলিয়ন্দসু চঙদুনা মিৎয়েং তাখি।

ৱারী শাবগী থৌওং অসিদা নাকল অনিগী লুচিংবশিংনা সেক্যুরিতীগী হৌজিক ওইক্লিবা ফিভম কয়াবু মমুৎ তানা খঙমিন্নখি অমসুং রিজনেল সেক্যুরিতী ঙাক-শেনবগী মতাংদা মপাঙ্গল লৈবা পার্ত্নরশিপ লৈবনা নাকল অনিমক্তা কান্নবা পীরিবা অসিবু শকখঙবগা লোয়ননা সেক্তর কয়াদা লৈরিবা বাইলেতরেল দিফেন্স কোওপরেসন অসিবুসু হেন্না চেৎশিলহন্নবা ৱারেপ লৌমিন্নখি। শ্রী অজয় ভতনা ভারত-সাউদী অরাবিয়া মরীনা মপাঙ্গল হেনগৎপগা লোয়ননা লেপ্তনা খুমাং চাউশিনগনি হায়বগী থাজবা ফোংদোক্নবগা লোয়ননা মসিনা রিজনেল স্তেবিলিতী অমসুং গ্লোবেল সেক্যুরিতীদসু মশক থোকপা শরুক তমগনি হায়বগী ৱাফমসু য়ানবা পুরকখি।

রক্ষা রাজ্য মন্ত্রীনা দিফেন্স শো অসিদা শরুক য়ারিবা ভারতকী দিফেন্স কম্পেনীশিংগী মীহুৎশিংগা উন্নখি অমসুং মখোয়না উৎলিবা অৱাংবা থাক্কী তেক্নোলোজী অমসুং ইন্নোভেতিব সোল্যুসন কয়া অসিগীদমক্তা থাগৎপা ফোংদোকখি। ভারতকী দিফেন্স কম্পেনীশিংনা শরুক য়ারিবা অসিনা ফুতপ্রিন্ত হেনগৎহনবা খক্তা নত্তনা মতম শাংনা চৎপা পার্ত্নরশিপ অমা শেমদুনা লৈবাক অনিগী দিফেন্স ইন্দস্ত্রীবুসু চাউখৎহনগনি।

WDS 2024 মনুংদা, শ্রী অজয় ভতনা ম্যুনিসন ইন্দিয়া লিমিতেদ অমসুং মখোয়গী লোকেল পার্ত্নরশিংগী মরক্তা MoU অমগী খুৎয়েক পীনবগী থৌওংসু মিৎয়েং তাখি। মহাক্না সাউদী অরাবিয়াগী ভারত অমসুং সাউদীগী কারবার তৌবা শক্নাইবা মীওইশিংনা শরুক য়াবা ব্যুজিনেস নেতৱর্কিং থৌরম অমদসু শরুক য়াখি।

ভারতকী ‘আত্মানির্ভর ভারত’ অমসুং সাউদী অরাবিয়াগী ‘ভিজন 2030’ হায়বসি নাকল অনিমক্তা কান্নবা পীগদবা লৈবাক্কী ওইবা প্রোগ্রামশিংনি। খোঙথাং অনিমক্না তেক্নোলোজীগী লমদা খুমাং চাউশিনবা, মশাগী লৈবাক্কী তৌবা ঙম্বগী মতিক অমসুং লৌশিং লান্নবদা অহেনবা মিৎয়েং চঙলি। নাকল অনিমক্না ফোংদোকপগুম্না, হীরমশিং অসিদা, মরু ওইনা, দিফেন্স তেক্নোলোজী পুন্না পুথোকমিন্নবগী হীরমদা তেংবাংমিন্নবদা কান্নবা য়াম্না পীগনি। মসিগী খোঙচৎ অসিনা বাইলতরেল মরীগী নুংগী ওইবা পাঙ্গল উৎলি, তেংবাংনবগী অনৌবা থোঙ হাংদোক্লি অমসুং তেক্ত-কায়দবা অমসুং নুংঙাই য়াইফবা তুংগী মতম অমগী খোঙফম চেৎলিবা অসিবু মপাঙ্গল হেন্না কনখৎহল্লি।

***