ওরিসাগী রাজ্যপাল রঘুবর দাস জি, চীফ মিনিস্তর, ঐগী মরুপ নবিন পাতনাইক জি, কেন্দ্রগী মন্ত্রীমন্দলগী ঐগী মরুপ ধর্মেন্দ্র প্রধান, অশ্বিনি বৈষ্ণব, বিশেশ্বর তুদু, সংসদকী ঐগী মরুপ নিতিস গঙ্গা দেব জি, আই.আই.এম সম্বলপুরগী দিরেক্তর প্রোফেসার মহাদেব জাইশ্বাল, অতোপ্পা শক্নাইরবশিং, ইবেম্মাশিং অমসুং ইবুংঙোশিং !

ঙসি অসি ওরিসাগী চাউখৎপগী খোঙচৎকী য়াম্না মরুওইবা নুমিৎ অমনি। লুপা করোর লিশিং ৭০ রোমগী চাউখৎ-থৌরাংগী প্রোজেকশিং অসিগীদমক ঐনা ওরিসাগী মীয়াম নুংঙাইবা ফোঙদোকচরি। মসিদা লাইরিক-লাইশু, রেল, লম্বী, ইলেক্ত্রিসিতি, পেত্রোলিয়মগা মরী লৈনবা প্রোজেকশিং য়াওরি। হায়রিবা প্রোজেকশিং অসিদগী ওরিসা খুন্নাইগী কাংলুপ খুদিংমক হায়বদি লায়রবা, শিন্মীশিং, থবক তৌবশিং, দুকান ফম্বশিং, ললোনবশিং অমসুং লৌমীশিংদা কান্নবা পীগনি। প্রোজেকশিং অসিনা ওরিসাদা খুদোংচাবশিং পীবগা লোয়ননা, মখোয়না রাজ্য অসিগী নহারোলশিংদা অনৌবা থবক লিশিং কয়া ফংহনগনি।

মরুপশিং,

ঙসি লৈবাক অসিনা হান্নগী উপ প্রধান মন্ত্রী লাল কৃষ্ণ অদভানিদা ভারত রত্ন পীনবা ৱারেপ লৌরে। ভারতকী উপ প্রধান মন্ত্রী, হোম মিনিস্তর অমসুং ইনফোর্মেসন অমসুং ব্রোদকাস্তিংগী মিনিস্তর ওইনা, সংসদকী মেম্বর অমা ওইনা চহি কয়া ইকায়খুম্নরবা অদভানি জিনা পাংথোকখিবা থবকশিং লৈবাক অসিদা লাম্বা লৈতে। লৈবাক্কীদমক মখোয়গী পুন্সি কৎথোকখিবা মীওইশিং লৈবাক অসিনা কৈদৌঙৈদা কাউবা লৈতে হায়বদু অদভানি জিদা ইকায়খুম্নবা উৎলিবা অসিনা খুদম অমনি। ঐনা লেপ্তনা লাল কৃষ্ণ অদভানি জিদগী নুংশিবা অমসুং লমজিংবা ফংবদা ঐ লাইবক য়াম্না ফবনি। ইকায়খুম্নরবা এদভানি জি পুন্সি শাংনা হিংনবা ঐ য়াইফ-পাউজেল পীজরি অমসুং ওরিসাদগী লৈবাক অসিগী মীয়ামগী মহুৎশীন্দুনা ঐনা মহাক থাগৎপা ফোঙদোকচরি।

মরুপশিং,

ওরিসা অসি লাইরিক তমফম অমসুং স্কিল দিবলপমেন্তগী মরুওইবা মফম অমা ওইনা শেমগৎনবা ঐখোয়না লেপ্তনা হোৎনরি। হৌখিবা চহি ১০দা ওরিসাগী লিংখৎখিবা অনৌবা ইন্সতিতুসনশিংনা রাজ্য অসিগী নহারোলশিংগী মরাইবক অহোংবা পুরক্লে। রাজ্য অসিদা আই.এস.আর.এ ব্রহ্মাপুর, ভুবনেশ্বরদা ইন্সতিতুৎ ওফ কেমিকেল তেক্নোলোজি লিংখৎলে। হৌজিক আই.আই.এম সম্বলপুরনা অনৌবা মেনেজমেন্তগী ইন্সতিতুৎ অমা ওইনা ওরিসাগী থৌদাং হেনগৎহল্লে। চহি অহুমগী মমাঙদা, করোনা লাইচৎ মনুংদা আই.আই.এম কেম্পস অসি উরেপ-উয়ুং তম্নবা ঐনা খুদোংচাবা ফংখিবা অদু ঐ নিংশিংলি। খুদোংচাদবা কয়া মায়োক্নরবশু, চিংলেম্লবা কেম্পস অসি হৌজিক লোইরে। অদোম্না হরাওবা ঐনা উবদা কেম্পস অসি কয়া য়াম্না অদোম পাম্লবগে হায়বা ঐ খঙলে। মসি শাবদা শরুক য়াখিবা মরুপ খুদিংমক ঐনা থাগৎচরি।

মরুপশিং,

ভারতকী রাজ্য খুদিংমক চাউখৎলবা মতমদা চাউখৎলবা ভারত অমগী পান্দম ফংবা ঙমগনি। মরম অদুনা, ঐখোয়না চহি কয়া ওরিসাগী মতেং পাংলি। কেন্দ্র সরকারগী থবকশিংনা  মরম ওইদুনা, ঙসি পেত্রোলিয়ম অমসুং পেত্রোকেমিকেলশিংগী লমদা ওরিসা অনৌবা থাকশিং য়ৌবা ঙম্লে। হৌখিবা চহি ১০দা, ওরিসাদা পেত্রোলিয়ম অমসুং পেত্রোকেমিকেল সেক্তরদা লুপা করোর লাখ ১.২৫ থাদখ্রে। হৌখিবা চহি ১০দা, ওরিসাদা রেলৱেগী বজেত শরুক ১২ হেন্না পীখ্রে। হৌখিবা চহি ১০দা, প্রধান মন্ত্রী গ্রামিন সরক য়োজনাগী মখাদা ওরিসাগী খুঙ্গংশিংদা কিমি লিশিং ৫০গী লম্বীশিং শেমখ্রে। রাজ্য অসিদা কিমি লিশিং ৪গী অনৌবা নেসনেল হায়ৱেজশিং শেমগৎলে। হায়রিবা প্রোজেকশিং অসিনা ঝারখন্দ অমসুং ওরিসাগী মরক্তা চৎথোক-চৎশিনগী খুদোংচাবা ফগৎহল্লে অমসুং লম্বী চৎপদা চঙবা মতম হন্থহল্লে। লমদম অসি মাইনিং, পৱার অমসুং স্তিল ইন্দস্ত্রিগী মমিং চৎলিবনি। মসিগী অনৌবা লম্বী-থোং অসিনা লমদম অসিদা অনৌবা ইন্দস্ত্রিশিং লিংখৎনবা, অনৌবা থবক লিশিং কয়া ফংহন্নবা খুদোংচাবশিং পীরে। ঙসি সম্বলপু-তালচের রেল সেক্সন দবল ওইহনবা, সোনপুর সেক্সন্দা ঝর-তারভাদগী অনৌবা রেল লাইন শেমগৎপা শঙ্গারে। পুরি-সোনপুর এক্সপ্রেসকী খুৎথাংদা ঙসিদগী সোনপুর জিলা রেলনা শম্নরে। মসিনা ভক্তশিং ভাগবান জগনাথ দর্শন তৌবা চৎপা লাইহল্লগনি। ওরিসাগী ইমুং খুদিংমক মমল হোংবা মৈ মরাংকাইনা ফংহন্নবা ঐখোয়না লেপ্তনা থবক পায়খৎলি। মসিগী পান্দমদা ঙসি সুপর ক্রিতিকেল অমসুং উলত্রা সুপর ক্রিতিকেল থর্মেল প্লান্তশিং শঙ্গাবনি।

মরুপশিং,

হৌখিবা চহি ১০দা কেন্দ্র সরকারনা শেমখিবা থৌশিলশিংগী কান্নবশিং উরিসানা য়াম্না ফংলে। মাইনিংগী লমদা ঐখোয়না অনৌবা অওনবশিং পুরকখিবগী কান্নবা ওরিসা ফংলে। মাইনিং পোলিসিদা অহোংবা পুরকপদগী ওরিসাগী শেন্থোক শরুক ১০ হেনগৎলে। মমাঙদা মাইনিংগী থবক তৌরিবা মফমশিং অমসুং রাজ্যশিংনা মিনরেল পুথোকপগী কান্নবশিং ফংলমদে।

ঐখোয়না মসিগী থৌশিল অসি হোংদোক্লে। কেন্দ্রগী বিজেপি সরকারনা দিস্ত্রিক মিনরেল ফাউন্দেসন শেম্লে। মসিনা মিনরেলদগী লাকপা ইনকমগী শরুক খর হায়রিবা মফম অদুগী চাউখৎ-থৌরাংদা শীজিন্নরে। মসিদগী ওরিসানা লুপা করোর লিশিং ২৫ হেন্না ফংলে। হায়রিবা শেনফম অসি মাইনিংগী থবক পাংথোক্লিবা মফম অদুগী মীয়ামগী য়াইফনবা শীজিন্নরে। মসিগী কৎথোকপগী ৱাখল্লোনগা লোয়ননা ওরিসা চাউখৎনবা কেন্দ্র সরকারনা মখা তানা থবক তৌগনি হায়না ঐনা ওরিসাগী মীয়ামদা থাজবা পীরি।

মরুপশিং,

ঐ মফম অসিদগী , লমহাং অমদা অচৌবা থৌরম অমা শরুক য়ানবা চৎলগনি। মরম অদুনা মফম অসিদা মতম য়াম্না লৌররোই। অদুবু ঐ মফম অদুদা মতম খর লৌগনি অমসুং ৱাফম খর ফোঙদোক্কনি অমসুং মিনিত ১৫গী মতুংদা ঐ মফম অদুদা থুংগনি। অদোমগী চাউখৎ-থৌরাংগী থবকশিংগীদমক ঐনা অদোম অমুক হন্না নুংঙাইবা ফোঙদোকচরি। ঐগী নহারোল মরুপশিংদা অখন্নবা নুংঙাইবা ফোঙদোকচরি।

অদোম ঙমখৈ লৈতনা থাগৎচরি !

​ ****