পার্লিয়ামেন্ততা ঙসি পুথোকখিবা ইন্তেরিম বজেৎকী মরী লৈননা লৌউ-শিংউ অমসুং লৌমীশিংগী য়াইফ য়ুম্বাল অসুং ত্রাইবেল এফিয়র্সকী কেন্দ্র মন্ত্রী, শ্রী অর্জুন মুন্দানা মশাগী ৱাখল্লোন ফোংদোকখ্রে। বজেৎ অসিনা চাউখৎ থৌরাংগী খোঙচত্তা ভারতকী লম্বী অমা শেম্বগা লোয়ননা মসিদা প্রধান মন্ত্রী শ্রী নরেন্দ্র মোদীজীগী গেরেন্তীগী মমি অমসু উবা ফংলি হায়না মহাক্না হায়খি। মোদী সরকারনা লৈবাক্কী লৌমী, লাইরবা, নুপী অমসুং নহাশিংগী পাঙ্গলগী চাউখৎ থৌরাং পুরক্নবগীদমক্তা ৱারেপ লৌখিবগা লোয়ননা ইন্তেরিম বজেৎ অসিদা হায়রিবা থৌওংশিং অসিগী মমি উবা ফংই হায়না মহাক্না মখা তাখি। মোদী সরকারনা পায়খৎলিবা মখল কয়াগী খোঙথাংশিংনা ঐখোয়গী লৌমীশিংগী পুন্সি মহিংগী থাকপু হেন্না ৱাংখৎহনগনি হায়না মহাক্না ফোংদোকখি।

ঐখোয়গী লৌমী, লাইরবা, নুপী অমসুং নহাশিংগী অপাম্বা অমসুং য়াইফ য়ুম্বালদা ঐখোয়না খ্বাইদগী অহেনবা মিৎয়েং চঙলি হায়না প্রধান মন্ত্রী শ্রী মোদীনা হায়খ্রবনি হায়না শ্রী মুন্দানা পাউদমখি। সবকা সাথ, সবকা বিকাস, সবকা বিশ্বাস অমসুং সবকা প্রয়াসকী ইথিল অসিসু হন্দক্কী ইন্তেরিম বজেৎ অসিদা মমি তারি। হৌখিবা চহি খরসিদা লৌমীশিংগী য়াইফ য়ুম্বালগীদমক্তা মশক থোকপা খোঙথাং কয়া মথং মথং পায়খৎখ্রে। খোঙথাংশিং অসিগী মরক্তগী প্রধান মন্ত্রী কিসান সম্মান নিধী (PM-KISAN) স্কিম অসি য়াম্না মরু ওইবনি, মসিগী মখাদা হৌজিক ফাওবগী ওইনা লৌমী করোর ১১.৮০না মরক্তা লৈবা মীওই অমত্তা য়াওদনা মখল কয়াগী কান্নবা কয়া হকথেংননা ফংনখি, নুং-পান ফাওনা উবা থৌওংগা লোয়ননা লৌমী কয়াগী বেঙ্ক একাউন্ততা লুপা করোর লাক্ষ ২.৮১ হকথেংননা হাপখি। প্রধান মন্ত্রী ফসল বিমা য়োজনাগী মখাদা চাউরাকপা লৌমী করোর ৪গী মফমদা সেক্যুরিতী কবর পীখি। মান্নবা থৌওং অমা ওইনা, লৌমীশিংদা কান্নবা পীনবগীদমক্তা e-NAM মন্দি ১৩৬১সু হৌদোকখ্রে, মসিদা লুপা করোর লাক্ষ ৩গী কারবার অসি ঙসি ফাওবগী মনুংদা পাংথোকখ্রে। মসিগুম্বা অতোপ্পা স্কিম কয়া অমসু হৌজিক লৈবাক শিনবা থুংবগী মফমশিংদা লেপ্তনা পায়খৎলি।

আত্মানির্ভর ওইল সীদ অভিয়ান অসিসু সরকারগী মরু ওইবা খোঙথাং অমনি হায়না কেন্দ্রগী মন্ত্রীনা হায়খি। ইং ২০২২দা লাউথোকখিবা খোঙথাং অমদা য়ুম্ফম ওইরদুনা, হঙ্গাম থাউ, গ্রাউন্দন্ত, সিসামে, সোয়াবীন অমসুং নুমিৎ লৈগুম্বা থাউ থোকপা মরুশিংদা ‘আত্মানির্ভরতা’ ফংনবগীদমক্তা থৌরাং অমসু য়াৎলগনি। মসিগী মনুংদা মহৈ-মরোং য়াম্না থোকপা মখল, মোদর্ন এগ্রিকলচরেল তেক্নিক পাক্তক্ননা শিজিন্নবা, মার্কেতকা মরী লৈনবা, পোত্থোক লৈবা, ভেল্যু এদিসন অমসুং ক্রোপ ইন্স্যুরেন্সকী মতাংদা রিসর্চ তৌবগী থৌরাংসু য়াওরি। লৌমীশিংদা তেংবাংবগা লোয়ননা, কেন্দ্র সরকারনা মহৈ-মরোং তাশিন খোমজিনবা, মোদর্ন স্তোরেজ, অফবা সপ্লাই চেন, প্রাইমারী অমসুং সেকেন্দরী প্রোসেসিং, মার্কেতিং অমসুং ব্রান্দিং য়াওনা মহৈ-মরোং লোক্লবা মতুংদা পাংথোকপা থবকশিংদা প্রাইভেত-পব্লিক ইনভেস্তমেন্তকী থবকশিংসু পুক্নিং থৌগৎকনি। মহাক্না হায়খিবদা, নেনো DAP (ফর্তিলাইজর) অসিবু এগ্রো-ক্লাইমেতিক জোন খুদিংমক্কী মখল কয়াগী মহৈ-মরোংশিংদা শিজিন্নরগনি। ঐখোয়গী দাইরী ফারমরশিংবু তেংবাংনবা পাক চাউবা প্রোগ্রাম অমসু শেম্লগনি। ইন্তিগ্রেতেদ এক্বা পার্ক মঙা অমসু ফিশরী চাউখৎহনবগা লোয়ননা শারগনি, অদুগা, প্রধান মন্ত্রী মতস্যা সম্পদা য়োজনা (PMMSY) অসিবুসু হেন্না খুমাং চাউশিনহল্লগনি।

প্রধান মন্ত্রী শ্রী নরেন্দ্র মোদীগী লুচিং মখাদা লৈবাক অসিনা হৌখিবা দিকেদ অসিদা চাউখৎ থৌরাংগী লম্বীদা খোঙজেল য়াঙনা চঙশিল্লি হায়না শ্রী অর্জুন মুন্দানা হায়খি। কেন্দ্রগী শেল-থুম মন্ত্রী, শ্রীমতি নির্মলা সিতারামন্না মহাক্কী বজেৎকী ৱারোলদা হীরম অসিগী মতাংদা মমুৎ তানা পনখ্রবনি। সরকার অসিনা মীয়ামদা তেক্সকী পোৎলুম অমত্তা পীদ্রে। ভারতকী শেন্মিৎলোন্না হৌখিবা চহি ১০ অসিদা মশক নাইবা অহোংবা কয়া উখ্রে। লৈবাক অসিগী মীয়াম্না তুংগী মতমদা অনৌবা থাজবা অমগা লোয়ননা য়েংনরি। মীপুম খুদিংগী য়ুম শাবগী মিৎয়েং শাল্লবা থৌরাং অসিসু হীরম অসিগা মরী লৈননা পনবা য়াবা থৌরাং অমা ওইরি। মথংগী চহি ৫তা অতোপ্পা য়ুম করোর অনি অমগসু পি.এম. অৱস য়োজনা (রুরেল)গী মখাদা শারগনি। কোবিদনা পুরকখিবা শিংনবা কয়াগী মরক্তা, সরকার অসিনা স্কিম অসিগী য়ুম করোর অহুম শাবগী পান্দমসু ফংগদবা য়াম্না ৱাত্ত্রে। মান্নবা থৌওং অমা ওইনা, ভারাগী য়ুম, স্লম, চাউল অমসুং অয়াবা পীদবা কোলোনীশিংদা লৈবা মিদ্দল ক্লাসকী মীওইশিংদা মশাগী য়ুম লৈবা নত্ত্রগা শাবদা তেংবাংগদবা স্কিম অমসু হৌদোক্লগনি।

ইন্তেরিম বজেৎ অসিনা রেলৱেগী মরু ওইবা ইকোনোমিক কোরিদোর প্রোগ্রাম অহুম, মিং ওইনা পল্লবদা, ইনর্জী, মিনরেল অমসুং সিমেন্ত কোরিদোর; পোর্ত কন্নেক্তিবিতীগী কোরিদোর অমসুং হাই ত্রাফিক দেন্সিতী কোরিদোর হৌরগনি হায়না লাউথোকখ্রে। মলতি-মোদেল কন্নেক্তিবিতী লৈহন্নবা পি.এম. গতিশক্তিগী মখাদা শকখঙলবা মসিগী প্রোজেক্তশিং অসিনা লোজিস্তিক্স ইফিসিএন্সী হেনগৎহল্লগনি অমসুং কোস্তসু হন্থহনগনি। অয়ুশমান ভারতপু পাকথোক চাউথোকপা ওইনা, অয়ুশমান ভারতকী মখাদা পীরিবা হেল্থ কবরেজ অসি আশাগী থৌমী, আঙ্গনৱারীগী থৌমী অমসুং মতেং পানবা মীওইশিংবুসু কোল্লগনি। লাক্ষপতি দিদি শেম্বগী পান্দম অসিসু করোর ২দগী করোর ৩দা হেনগৎলে। নুপী করোর ৯না শরুক য়ারিবা সেল্ফ হেল্প গ্রুপ লাক্ষ ৮৩ অসিনা নুপীশিংগী পাঙ্গল হাপ্পা অমসুং মরোমদোম লেপচবা ঙমহন্দুনা খুঙ্গংগী সোসিও-ইকোনোমিক লেন্দস্কেপ অসিদা অওনবা কয়া পুরক্লে। মখোয়না মায় পাকপদগী চাউরাকপা নুপী করোর ১বু লাক্ষপতি দিদি ওইহনবদা তেংবাংলি। মান্নবা থৌওং অমা ওইনা, রুফতোপ সোলারাইজেসনগী খুত্থাংদা, ইমুং করোর অমনা  ইলেক্ত্রিসিতী য়ুনিৎ ৩০০ থা খুদিংগী লেম্না ফংলগনি। রেলৱে পেসেঞ্জরশিংগী খুদোংচাবা, চত্থোক চৎশিন তৌবদা নুংঙাইবা অমসুং তেক্ত-কায়দবগী মতৌ ফগৎহন্নবা অচম্বা রেলৱে বোগী লিশিং নিফুবু বন্দে ভারতকী থাক্তা শেমদোক্লগনি। সরকার অসিনা ‘নেত জিরো’ কার্বন ইমিসনগী পান্দম ফংনবা খোঙফম চেৎলি। মাইকৈ অসিদা থাংজিনবা খোঙথাং অমা ওইনা, ইং ২০৭০ ফাওবদা ‘নেত জিরো’ ফংবগী ভারতকী পান্দম অসি ফংবা ঙম্নবা, অহানবগী ওইনা গিগা ৱাত ১গী কেপাসিতীগী ওফশোর ৱিন্দ ইনর্জী পুথোকপা ঙম্নবা ভাইএবিলিতী গেপ ফন্দিংগী খুদোংচাবা পীগনি। কোল গেসিফিকেসন অমসুং লিক্বিফিকেসনগী মেত্রিক তোন ১০০গী কেপাসিতী অসিসু ইং ২০৩০ ফাওবদা লৈরগনি। মসিনা নেচরেল গ্যাস, মীথানোল, এম্মোনিয়া ইম্পোর্ত তৌরিবা অসি হন্থহনগনি। কম্প্রেস নেচরেল গ্যাস (CNG) অসিবু ত্রান্সপোর্তকীদমক্তা অমসুং পাইপ নেচরেল গ্যাস (PNG) অসিবু য়ুমগী ওইনা শিজিন্ননবগীদমক্তা কম্প্রেস বাইও গ্যাস (CBG)পু তাঙ্কক নাইনা শোইদনা ব্লেন্দিং তৌবা হায়বসিসু মেন্দেতরী ওইহল্লগনি। বাইও গ্যাস কল্লেক্সন তৌবদা তেংবাংনবা বাইওমাস কল্লেক্সন মছিনরী লৈনবা শেলগী তেংবাংসু পীথগনি। গ্রীন দিভেলপমেন্তপু খুমাং হেন্না চাউশিলহন্নবা, বাইও মেন্যুফেকচরিং অমসুং বাইও ফাউন্দরীগী অনৌবা স্কিম অমসু হৌদোক্লগনি। মসিনা বাইওদিগ্রেদেবল পোলীমর, বাইও-প্লাস্তিক্স, বাইও-ফার্মাস্যুতিকেল্স অমসুং বাইও-এগ্রি ইনপুতকুম্বা অকোয়বগী ফিভমদা অকায়বা পীদবা পোৎলম কয়া ফংহনগনি। হেল্থকেয়র রিফোর্মগী শরুক অমা ওইনা, হৌজিক লৈরিবা হোস্পিতালগী ইনফ্রাস্ত্রকচরশিং শিজিন্নদুনা অহেনবা মেদিকেল কোলেজ কয়া অমসু লিংখৎলগনি।

***