صدر جمہوریہ ہند، محترمہ دروپدی مرمو نے کل 19 بچوں کو خواتین اور بچوں کی ترقی کی وزارت، حکومت ہند کی طرف سے قائم کردہ ”پردھان منتری راشٹریہ بال پرسکار“ سے نوازا۔ اس موقع پر 22 جنوری 2024 کو وگیان بھون، نئی دہلی میں منعقدہ خصوصی تقریب میں خواتین اور بچوں کی ترقی کی مرکزی وزیر محترمہ اسمرتی زوبن ایرانی، خواتین اور بچوں کی ترقی کے وزیر مملکت ڈاکٹر منجپرا مہندر بھائی، معززین، اعلیٰ حکام، آنگن واڑی کارکنان اور مختلف اداروں کے چھوٹے بچے بھی موجود تھے۔

اس سال ایوارڈ حاصل کرنے والوں میں بہادری، سائنس اور ٹیکنالوجی اور اختراع کے زمرے میں ایک ایک بچہ، سماجی خدمت کے زمرے میں چار، کھیلوں کے زمرے میں پانچ اور آرٹ اینڈ کلچر کے زمرے میں سات بچے شامل ہیں۔ ایوارڈ کی تقریب کا آغاز قومی ترانے سے ہوا اور یہ قومی سالمیت کا دل کو چھو لینے والا منظر تھا کیونکہ ہر بچے نے روایتی لباس میں یہ ایوارڈ حاصل کیا، جو ملک کے زرخیز ثقافتی ورثے کی علامت ہے۔

ایوارڈ حاصل کرنے والوں کو مبارکباد دیتے ہوئے صدر جمہوریہ ہند نے کہا کہ یہ بچے کثیر صلاحیتوں کے حامل ہیں اور اپنی محنت سے ان میں اپنی شناخت بنانے کی صلاحیت ہے۔ انہوں نے کہا کہ بچوں کو صحیح سمت دکھائی جانی چاہیے تاکہ وہ اپنی صلاحیتوں اور جوش کا بہترین استعمال کر سکیں۔

صدر جمہوریہ نے مزید کہا کہ نوجوان ہندوستان کے لیے ایک قیمتی وسائل کی نمائندگی کرتے ہیں، جو نہ صرف ملک کی ترقی میں بلکہ عالمی ترقی میں بھی نمایاں تعاون کرنے کی صلاحیت کو محفوظ رکھتے ہیں۔ انہوں نے کہا کہ حکومت نئے دور کی مہارتوں، مستقبل کی ٹیکنالوجی اور مصنوعی ذہانت کو ترجیح دے رہی ہے تاکہ ہمارے نوجوان مستقبل کے چیلنجوں کا سامنا کرنے کے لیے تیار رہیں۔

ایودھیا میں رام مندر کی تقدیس کے مبارک دن پر، صدر جموریہ نے اجتماع کو بھگوان رام کے صبر، بزرگوں کا احترام، ہمت، اور بحران کے وقت پرسکون رہنے کی خوبیوں کی یاد دہانی کرائی۔ انہوں نے بچوں کو بھگوان رام کے نظریات اور رامائن کی اقدار کو اپنی زندگی میں اپنانے کی ترغیب دی۔

اجتماع سے خطاب کرتے ہوئے خواتین و اطفال کی ترقی اور اقلیتی امور کی مرکزی وزیر محترمہ اسمرتی زوبین ایرانی نے ایوارڈ حاصل کرنے والوں کو مبارکباد دی اور قوم کی تعمیر میں بچوں کے تعاون کو تسلیم کرنے اور ان کی عزت افزائی کی اہمیت پر زور دیا۔ انہوں نے ان ہزاروں بچوں کا بھی شکریہ ادا کیا جنہوں نے پی ایم آر بی پی کے لیے اپنی گہری دلچسپی دکھاتے ہوئے قومی ایوارڈ پورٹل میں آن لائن اپنی نامزدگیاں پُر کی تھیں۔ انہوں نے کہا کہ ہمارے بچے نہ صرف ہندوستان کو کامیابی کی راہ پر گامزن کریں گے بلکہ ہندوستان کو دنیا کی ایک ممتاز طاقت بھی بنائیں گے۔ مرکزی ڈبلیو سی ڈی وزیر نے اس بات پر روشنی ڈالی کہ کس طرح پہلی بار قومی سطح کے ایوارڈ میں شاندار کارناموں کو تلاش کرنے کے لیے مصنوعی ذہانت کا استعمال کیا گیا۔

انہوں نے 18 مختلف ریاستوں اور مرکز زیر انتظام علاقوں کے 19 ایوارڈ یافتگان کے خاندانوں سے بھی اظہار تشکر کیا جنہوں نے مثالی ہمت، استقامت اور مہارت کا مظاہرہ کیا۔ مرکزی ڈبلیو سی ڈی وزیر نے بچوں کو مبارک باد دی اور امید ظاہر کی کہ وہ وزیر اعظم ہند کے ’وکست بھارت‘ کے وژن کو پورا کرنے کے لیے بنیادی تعمیر کا کام کریں گے۔

استقبالیہ خطبہ ایم او ڈبلیو سی ڈی کے سکریٹری جناب اندریور پانڈے نے دیا۔ انہوں نے نوجوان چیمپیئنز کو مبارکباد دی، مستقبل کے لیے نیک تمناؤں کا اظہار کیا اور انہیں کامیابی کی نئی بلندیوں کو حاصل کرتے رہنے کی ترغیب دی۔

ہر سال، حکومت ہند 5 سے 18 سال کی عمر کے بچوں کی غیر معمولی کامیابیوں کا اعتراف کرتے ہوئے انہیں ’پردھان منتری راشٹریہ بال پرسکار (پی ایم آر بی پی) سے نوازتی ہے۔ ہر ایوارڈ یافتہ کو صدر کی طرف سے ایک میڈل اور سرٹیفکیٹ دیا گیا۔

ایوارڈ کے لیے نامزدگیاں حکومت ہند کے ایوارڈ پورٹل www.awards.gov.in پر آن لائن موڈ میں موصول ہوئی تھیں۔ کل 1879 درخواست دہندگان موصول ہوئے جن میں سے 1597 غور کے لیے موزوں پائے گئے۔ ایوارڈ یافتہ افراد کا انتخاب خواتین اور بچوں کی ترقی کی وزیر کی صدارت میں قومی سلیکشن کمیٹی نے کیا تھا۔

پردھان منتری راشٹریہ بال پرسکار 2024 کے ایوارڈ یافتگان

https://twitter.com/smritiirani/status/1749459714327687207?t=ghYABfAweeacuzl9hi37IA&s=08

کتابچہ دیکھنے کے لیے یہاں کلک کریں

*********

ش ح۔ ف ش ع- م ف

U: 3926