"படைப்பாற்றல், தனிப்பட்ட திறன்கள், நுண்ணறிவு மற்றும் உணர்திறன் ஆகியவை தற்போதைய இயந்திரங்கள் மற்றும் செயற்கை நுண்ணறிவு யுகத்தில் ஒரு நபரை பொருத்தமானவராகவும், வேலை செய்யத் தகுதியுள்ளவராகவும் மாற்றும் குணங்கள்" என்று பாதுகாப்புத் துறை அமைச்சர் திரு ராஜ்நாத் சிங் தில்லி கண்டோன்மெண்டில் உள்ள குடியரசு தின முகாமில் தேசிய மாணவர் படையினரிடையே உரையாற்றியபோது கூறினார். 

2024, ஜனவரி 20 அன்று. அடுத்த தலைமுறையை வழிநடத்தும் வகையில் தேசிய மாணவர் படை மாணவர்களை இந்தப் பண்புகளுடன் ஆயத்தப்படுத்தி, அவர்களின் ஒட்டுமொத்த வளர்ச்சியை உறுதி செய்ததற்காக அவர் பாராட்டு தெரிவித்தார்.

இன்றைய தொழில்நுட்பம் சார்ந்த சகாப்தத்தில் செயற்கை நுண்ணறிவின் எழுச்சி குறித்த தனது நுண்ணறிவுகளைப் பகிர்ந்து கொண்ட திரு ராஜ்நாத் சிங், காலப்போக்கில், விரும்பிய பணிகளை இயந்திரங்களால் நிறைவேற்ற முடியாத துறைகளில் ஒரு தொழிலை உருவாக்குவதில் மக்கள் அதிக கவனம் செலுத்தத் தொடங்குவார்கள் என்று உறுதிபடக் கூறினார். 

எவ்வாறாயினும், இயந்திரங்கள் உடல் மற்றும் அறிவுசார் பணிகளைச் செய்ய முடிந்தாலும், அவை ஆக்கப்பூர்வமாக இருக்க முடியாது, நனவை உருவாக்க முடியாது மற்றும் மனிதர்களைப் போல ஒருவருக்கொருவர் திறன்களை வளர்க்க முடியாது என்ற உண்மையை அவர் வலியுறுத்தினார். இந்த இடத்தில்தான் என்.சி.சி முக்கியப் பங்கு வகிக்கிறது என்றும் அவர் சுட்டிக்காட்டினார்.

"என்.சி.சி, அதன் பல்வேறு முயற்சிகள் மற்றும் திட்டங்கள் மூலம், கேடட்களை உடல், மன மற்றும் உணர்ச்சி ரீதியாக வலுவாக மாற்றுவதன் மூலமும், அவர்களின் சமூக திறன்களை வளர்ப்பதன் மூலமும், தேசபக்தி மற்றும் தேசிய பெருமை உணர்வை வளர்ப்பதன் மூலமும் அவர்களின் முழுமையான வளர்ச்சியை உறுதி செய்கிறது. படிப்புடன், கேடட்கள் இந்த பண்புகளை வளர்த்துக் கொள்வது மிகவும் முக்கியம். இது நாட்டின் முன்னேற்றத்தில் அவர்கள் 100% பங்களிப்பதற்கு உதவும்" என்றார்.

இந்த நிகழ்ச்சியில், தேசிய மாணவர் படை வீரர்களின் முன்மாதிரியான செயல்திறன் மற்றும் கடமை அர்ப்பணிப்புக்காக அவர்களுக்கு திரு. ராஜ்நாத் சிங், பதக்கங்கள் மற்றும் பாராட்டு சான்றிதழ்களை வழங்கினார். இந்த ஆண்டு, கர்நாடகா மற்றும் கோவா இயக்குநரகத்தின் மூத்த நிலை அலுவலர் மக்காதிரா கல்பனா குட்டப்பா மற்றும் ஜம்மு காஷ்மீர் மற்றும் லடாக் இயக்குநரகத்தின் ஜூனியர் நிலை அலுவலர் டெச்சென் சுஸ்கிட் ஆகியோருக்கு பாதுகாப்புத்துறை அமைச்சரின் விருதுகள் வழங்கப்பட்டன. 

வடகிழக்கு பிராந்திய இயக்குநரகத்தின் சார்பு அதிகாரி அமர் மொராங் மற்றும் உத்தரபிரதேச இயக்குநரகத்தின் மூத்த துணை அதிகாரி ஜோதிர்மயா சிங் சவுகான் ஆகியோருக்கு பாதுகாப்புத்துறை அமைச்சரின் பாராட்டு சான்றிதழ்கள் வழங்கப்பட்டன. நாட்டின் பல்வேறு பகுதிகளைச் சேர்ந்த தேசிய மாணவர் படை வீரர்கள் பங்கேற்ற இந்த பதவியேற்பு விழாவை ஒரே பாரதம் உன்னத பாரதம் என்பதற்கு மிகச்சிறந்த எடுத்துக்காட்டு என்று பாதுகாப்புத்துறை அமைச்சர் விவரித்தார். 

பாதுகாப்புத்துறை அமைச்சர் மற்றும் இதர சிறப்பு விருந்தினர்களுக்கு தேசிய மாணவர் படை வீரர்கள் வண்ணமயமான கலை நிகழ்ச்சிகளை வழங்கினர். தேசிய மாணவர் படை வீரர்களின் ஆற்றல் மற்றும் உற்சாகத்தை பாராட்டிய திரு ராஜ்நாத் சிங், அவர்களது செயல்பாடு சிறப்பாக இருந்தது என்று பாராட்டினார். 

முன்னதாக, தேசிய மாணவர் படையின் ராணுவம், கடற்படை மற்றும் விமானப்படை பிரிவுகளை பிரதிநிதித்துவப்படுத்தும் கேடட்கள் வழங்கிய ' அணிவகுப்பு மரியாதையை' பாதுகாப்புத்துறை  அமைச்சர் ஆய்வு செய்தார். இதைத் தொடர்ந்து குவாலியரின் சிந்தியா பள்ளி இசைக்குழுவின் நிகழ்ச்சி நடைபெற்றது. 17 தேசிய மாணவர் படை இயக்ககங்களின் கொடிப் பகுதியையும் பார்வையிட்ட அவர், பல்வேறு சமூக விழிப்புணர்வு கருத்துக்களை சித்தரித்தார். மேலும், கடந்த 75 ஆண்டுகளில் முன்னாள் மாணவர்களின் புகைப்படங்கள், மாதிரிகள் மற்றும் என்.சி.சி.யின் பிற சாதனைகளின் தொகுப்பைக் கொண்ட 'ஹால் ஆஃப் ஃபேம்' ஐ அவர் பார்வையிட்டார். 

தேசிய மாணவர் படையின் தலைமை இயக்குநர் லெப்டினன்ட் ஜெனரல் குர்பீர்பால் சிங் மற்றும் தேசிய மாணவர் படை மற்றும் பாதுகாப்பு அமைச்சகத்தின் மூத்த அதிகாரிகள் இந்நிகழ்ச்சியில் கலந்து கொண்டனர்.

 ***