প্রধান মন্ত্রী, শ্রী নরেন্দ্র মোদীনা ঙসি মহারাস্ত্রগী সোলাপুরদা চাউরাক্না লুপা করোর 2000গী AMRUT (অতল মিসন ফোর রিজুবিনেসন অমসুং অর্বান ত্রান্সফোর্মেসন) প্রোজেক্ত 8কী উরেপ উয়ুং তমখ্রে। PMAY-অর্বানগী মখাদা শাবা লোইশিনখিবা য়ুম 90,000 হেনবা অমসুং হেন্দলুমগী শিন্মী, ভেন্দর, পাৱর লুম, ফত্ত-হৌদি খোম্বা, বিরি শাবা, দ্রাইভরগুম্বা শিন্মী লিশিং কয়ানা বেনেফিশরী ওইবা সোলাপুরগী রাইনগর হাউজিং সোসাইতীগী য়ুম 15,000 অমগসু প্রধান মন্ত্রীনা মীয়ামগী মফমদা খুৎশিন্নখ্রে। মহাক্না ঙসিগী থৌরম মনুংদা মহারাস্ত্রগী PM-SVANIDHIগী বেনেফিশরী 10,000গী মফমদা অহানবা অমসুং অনিশুবা ইন্সতোলমেন্ত য়েন্থোকপসু হৌখ্রে।

প্রধান মন্ত্রীনা ঙসি তিনখিবা মীয়ামদা ৱা ঙাঙবদা, জনুৱারী 22দা অয়োধ্যাগী রাম মন্দিরদা পাংথোক্কদৌরিবা প্রান প্রতিস্থাগীদমক্তা খন্দুনা লৈবাক অসিনা ভক্তিগী ৱাখল্লোন্দা লৈনরি হায়খি। “ভগ্বান রাম্বু তেন্ত অমদা নীংবগী দিকেদ কয়াদগী মাইয়োক্নদুনা লাক্লিবা খুদোংচাদবশিং অদু হৌজিক্তি লোইশিল্লগনি”, পি.এম. মোদীনা হায়খি। সন্ত অমসুং লাইনীংবা কয়াগী পাউতাক্কী মতুং ইন্না মহাক্না নুমিৎ 11গী অনুস্থানগী কাঙলোনশিংবু মহাক্না থম্মোই শেংনা ইন্দুনা চৎলি হায়রদুনা মহাক্না মীয়ামগী থৌজালদগী প্রান পরতিস্থা পাংথোকপা ঙমগনি হায়বগী থাজবা লৈ হায়না মহাক্না ফোংদোকখি। প্রধান মন্ত্রীনা মহাক্কী নুমিৎ 11 চরা হেনবগী অখন্নবা ইরাৎ থৌনী অসি মহারাস্ত্রগী নাশিক্তা লৈবা পঞ্চবতীদগী হৌখিবনি হায়না অমুক্কা হন্না নীংশিংখি। মসিগুম্বা লাইনীংবগী পুঙফম অসিদা মহারাস্ত্রগী ইমুং লাক্ষ অমা হেনবনা ‘গৃহ প্রবেশ’ তৌরিবা অসিদা নুংঙাইবা ফাওই হায়না মহাক্না পাউদমখি। “মখোয়গুম্বা ইমুং লাক্ষ অমসিনা জনুৱারী 22গী নুমিদাং ৱাইরমদা মশাগী পক্কা য়ুমদা রাম জ্যোতী থানবা ফংগদৌরিবা অসি য়াম্না নুংঙাইবা ৱাফম অমনি”, মহাক্না হায়খি। প্রধান মন্ত্রীনা হায়জবদগী, মীয়াম্না মখোয়গী মোবাইল ফ্লাশ থান্নদুনা মখোয়গী রাম জ্যোতীগী ৱারেপ উৎনখি।

প্রধান মন্ত্রীনা ঙসি হৌদোকখিবা প্রোজেক্তশিংগীদমক্তা মহারাস্ত্র অমসুং লমদমসিগী মীয়াম্বু থাগৎখি। মহারাস্ত্রনা ঙসি মায় পাক্লিবা অসিদি মহারাস্ত্রগী মীয়াম অমসুং রাজ্য সরকারনা পায়খৎলিবা চাউখৎ থৌরাংগী থবকশিং অসিনা ওইহনবনি হায়না মহাক্না মখা তাখি।

“শ্রীরাম্না ঐখোয়গী ইফমদা ইশানা হাইদোকখিবা ৱাফম অমসুং শকখিবা ৱাশক কয়াদা থম্মোই শেংনা ইনগদবনি তাকপীরমখি”, প্রধান মন্ত্রীনা হায়খি অমসুং সোলাপুরগী লাইরবা লিশিং কয়াগীদমক্তা লৌখিবা ৱারেপ অসি ঙসিদি মঙফাওনরে হায়বগী নুংঙাইবসু ফোংদোকখি। মবুক্নিং নুংশিবনা লাকহৎলবা প্রধান মন্ত্রীনা পি.এম. অৱস য়োজনাগী মখাদা শেমগৎপা খ্বাইদগী চাউবা সোসাইতী অমা ঙসি শঙ্গারে হায়রদুনা মসিগুম্বা য়ুমদা লৈনীংবগী অপাম্বা কয়া মহাক্না অঙাং ওইরিঙৈদা ফাওখিবশিংবু অমুক হন্না নীংশিংখি। “ইমুং লিশিং কয়াগী মঙলান মঙফাওনবা মতমদা ঐহাকপু য়াম্না নুংঙাইহল্লি অমসুং মখোয়গী থৌজালনা ঐহাক্কী খ্বাইদগী তাঙবা লন্নি”, মিৎলুদগী পীরাং শিন্থবা প্রধান মন্ত্রীনা হায়খি। প্রোজেক্ত অসি লোইশিল্লকপা মতমদা মোদী মশামক্না মীয়ামগী মফমদা লাক্তুনা য়ুমশিং অসিগী শো খুৎশিন্নগনি হায়না প্রোজেক্ত অসিগী উরেপ উয়ুং তম্বা মতমদা মহাক্না হায়খিববু মহাক্না ঙসি অমুক্কা হন্না নীংশিংখি। “ঙসিদি, মোদীনা মহাক্কী গেরেন্তীবু থবক্না উৎলে”, মহাক্না মখা তাখি, “মোদীগী গেরেন্তী হায়বদি গেরেন্তীশিংবু মঙফাওনহনবা হায়বনি”। ঙসি য়ুম ফংলিবা মীওইশিং অসিগী চারোন শুরোন কয়ানা ময়ুম লৈজদবনা মরম ওইরগা অৱাবা কয়া মাইয়োক্নবা তাখিবনি অদুবু মসিগুম্বা অৱাবা কয়া অসি ঙসিদগীদি লোইরগনি অমসুং মখোয়গী তুংগী চারোন শুরোনশিংদি মসিগুম্বা শিংনবা অসি অমুক্কা হন্না মাইয়োক্নররোই হায়না প্রধান মন্ত্রীনা হায়খি। “জনুৱারী 22দা থানগদৌরিবা রাম জ্যোতীনা লাইরবা তান্থোক্নবা ইথিল অমা ওইরগনি”, প্রধান মন্ত্রীনা হায়খি। মহাক্না মীয়াম পুম্নমক্কী পুন্সিদা নুংঙাই য়াইফবনা থনবা ওইরসনু হায়বগী য়াইফ পাউজেল পীখি।

প্রধান মন্ত্রীনা ঙসি অনৌবা য়ুম ফংলিবা ইমুংশিংনা নুংঙাই য়াইফবা ওইরসনু হায়না থৌনীজখি। “শ্রীরামগী ৱাখল্লোনগী মতুং ইন্দুনা লৈবাক অসিদা লৈঙাকপগী অফবা পথাপ অমা লৈহন্নবা অমসুং পুকচেল শেংবগী মতৌনা পীক থলহন্নবগীদমক্তা ঐখোয়গী সরকারনা অহানবা নুমিৎমক্তগী হোৎনদুনা লাক্লি। সবকা সাথ, সবকা বিকাস, সবকা বিশ্বাস অমসুং সবকা প্রয়াসকী মন্ত্রবু ইথিল পীখিবা অসিদি রাম রাজ্যনি”, পি.এম. মোদীনা হায়খি। শ্রী মোদীনা রামচরিত মানসকী ৱারোল খরা পল্লদুনা সরকারনা মিৎয়েং চঙলিবা হীরম অসিদি লাইরবশিংগী য়াইফ য়ুম্বালনি হায়খি।

পক্কা য়ুম উমসুং অমাংশঙ লৈতবনা মরম ওইরগা লাইরবশিংগী পুন্সিদা মশাবু ইকায় খুম্নজবগী মতৌ লৈরমদবা মতম্বু পি.এম. মোদীনা নীংশিংখি। মসিনা মরম ওইরগা হৌজিক্কী সরকারনা য়ুম অমসুং অমাংশঙদা মিৎয়েং চঙবা হৌখি অমসুং ‘ইজৎ য়ুম’ করোর 10 অমসুং পক্কা য়ুম করোর 4বু মিসন মোদতা পীখিবনি।

মীয়াম্বু লান্না লমজিংবগী মহুত্তা, ঐখোয়গী সরকারনা চৎলিবা লম্বী অসিদি “শুবা নোম্বদা ইকায়দবা”, “মরোমদোম লেপচবা ঙম্বা শিন্মী” অমসুং “লাইরবশিংগী য়াইফ য়ুম্বাল” হায়বসিনি হায়না প্রধান মন্ত্রীনা হায়খি। “অদোম্না অচৌবা মঙলান মঙবীয়ু। অদোমগী মঙলান অসিনা ঐহাক্কী ৱারেপ্নি”, প্রধান মন্ত্রীনা হায়খি। মহাক্না মমল হোঙবা অর্বান য়ুম অমসুং মাইগ্রেন্ত শিন্মীশিংগী ভারা হোঙবা সোসাইতীগী মতাংদা পনখি। “ঐখোয়না অদোমগী থবক মফমশিংগী অনকপদা অদোমগী য়ুম পীনবা কন্না হোৎনরি”, প্রধান মন্ত্রীনা হায়খি।

অহমেদবাদনা ‘শ্রামিক’শিংগী শহর ওইরিবা অসিগা সোলাপুর শহরগা মান্নৈ হায়বা খুদম থম্লদুনা, প্রধান মন্ত্রীনা মহাক্কী ‘পুর্বশ্রম’গী মতমদা শহর অসিগা লৈনখিবা মরীদা মীয়ামগী পুক্নিং চীংশিল্লদুনা ইমুংগী ফিভম ফত্ত্রবসু মহাক্কী মফমদা চান-থক্নবা পীবিখিবা অদুদি পদ্মশালি ইমুংশিংনি হায়না পাউদমখি। প্রধান মন্ত্রীগী পুন্সি শেম্বদা মরু ওইবা থৌদাং লৌখিবা উকিল, লক্ষমনরাও ইনামদারগী খুৎনা লোনবা আর্তৱর্ক অমা মহাক্কী মফমদা খুদোল ওইনা তম্লকখিবা থৌওংবু মহাক্না নীংশিংখি অমসুং মসিনা মহাক্কী পুন্সিগী মরু ওইবা শরুক অমা ঙসিসু ওইরি হায়না মহাক্না হায়খি।

অচেৎপা ৱাখল্লোন লৈতবা অমসুং মরক্তা লৈবা মীওই কয়ানা খুদোংচাবা কয়া লৌনবনা মরম ওইরগা মমাংদা চলায়রম্বা লাইরবা মুত্থৎপগী থৌরাং কয়ানা অপাম্বা মহৈ ফংখিদবনি হায়না প্রধান মন্ত্রীনা হায়খি। থম্মোই শেংবা ৱাখল্লোন, লাইরবশিংবু মপাঙ্গল হাপ্পগী থৌওংবু শৌগৎপা পোলিসী অমসুং লৈবাক্কী মফমদা খোঙফম চেৎপনা মরম ওইরগা, সরকারগী স্কিমশিংগী কান্নবশিংবু বেনেফিশরীশিংগী মফমদা হকথেংননা য়ৌহনগনি হায়না মোদীনা গেরেন্তী পীখিবনি হায়না প্রধান মন্ত্রীনা হায়খি। হৌখিবা চহি 10দা, নুপী, লৌমী অমসুং নহাশিংগী একাউন্তশিংদা লুপা করোর লাক্ষ 30 হেনববু হকথেংননা হাপখ্রে হায়না মহাক্না হায়খি। জন ধন-আধার-মোবাইলগী JAM ত্রিনিতী শিজিন্নদুনা অরানবা বেনেফিশরী করোর 10বু মশক খঙদোক্লবা মতুংদা লৌথোকখি।

স্কিম কয়া অমা হৌদোক্তুনা লাইরবশিংগী য়াইফ য়ুম্বালদা সরকারনা খ্বাইদগী অহানবা মিৎয়েং থম্লিবা অসিদা মীয়ামগী পুক্নিং চীংশিল্লদুনা, প্রধান মন্ত্রীনা লৈবাক্কী মীওই করোর 25না হৌখিবা চহি 9দা লাইরবগী খয়াত্তগী মপান থোক্লকখি হায়খি। মসিদি ঐখোয়গী চহি 10গী তপস্যা অমসুং লাইরবগীদমক্তা থম্মোই শেংনা খোঙফম চেৎপগী মহৈনি হায়না মহাক্না হায়খি। মসিনা পাঙ্গল হাপ্পদা নত্তনা লাইরবগী অৱাববু মায়থীবা পীনবা ইথিল পীরিবনি হায়না মহাক্না হায়খি।

লাইরবশিংদা রিসোর্স অমসুং খুদোংচাবা পীরবদি মখোয়না লাইরবগী খয়াত্তগী শোইদনা থোক্লকপা ঙমগনি হায়বগী থাজববু প্রধান মন্ত্রীনা অমুক্কা হন্না ফোংদোকখি। মরম অদুনা, হৌজিক পাল্লিবা সরকার অসিনা রিসোর্স অমসুং খুদোংচাবশিং পীদুনা মখোয়গী য়াইফ য়ুম্বালগীদমক্তা থম্মোই শেংনা হোৎনরিবনি। লাইরবশিংনা খ্বাইদগী লুনা খনবদি নোংমগী চরা অনি ফংবা হায়বা ওইরম্বা মতমদু নীংশিংলদুনা, প্রধান মন্ত্রীনা লাইরবা অমত্তনা চরা হেল্লগা তুমদনবা সরকারনা লেম্না রাসন য়েনবগী প্রোগ্রাম হৌদোকখিবগী মতাংদা পাউদমখি। কোরোনা ভাইরসকী মনুংদা হৌদোকখিবা স্কিম অদু ঙসিদি অতোপ্পা চহি মঙা অমগা অমুক শাংদোক্লে হায়না মহাক্না মখা তানা পাউদমখি। লাইরবগী খয়াত্তগী থোক্লক্লবা মীওই করোর 25দা তেংবাংদুনা মখোয়বু লাইরবগী খয়াত্তা অমুক হন্না তাখিদনবা হোৎনবগী মতৌ তারিবা অসিদা প্রধান মন্ত্রীনা মিৎয়েং চঙখি। “মখোয়গুম্বা মীওই করোর 25 অসিনা ঐহাক্কী ৱারেপ অসিবু মঙফাওনহনগে হায়বা পান্দমগা লোয়ননা তুংলমচত্তা চঙশিল্লি অমসুং ঐহাক্না মখোয়গীদমক্তা লেপ্লি”, মহাক্না হায়খি।

প্রধান মন্ত্রীনা ৱান নেসন ৱান রাসন কার্দকী মতাংদা পল্লদুনা, মসিনা অয়াম্বা মতমদা চত্তুনা লৈবা মীওইশিংদা রাসন লেপ্তনা পীগনি হায়খি। মীওই অয়াম্ববু লাইরবগী খয়াত্তা ইন্থরিবা অসিগী মরু ওইবা মরম অমদি মেদিকেল এক্সপেন্দিচরনা ওই হায়না মহাক্না ফোংদোক্লদুনা মসিগীদমক্তা সরকারনা আয়ুশমান কার্দ পীরি, মসিগী মখাদা লুপা লাক্ষ 5 ফাওবগী লেম্না লাইয়েংবা য়াগনি অমসুং পথাপ অসিনা মেদিকেলগী চাদিংদা চাউরাক্না লুপা করোর লাক্ষ 1দি লাইরবশিংদগী কনবীরে হায়না মহাক্না পাউদমখি। মান্নবা মতৌ অমা ওইনা, জন ধন ঔশধী কেন্দ্রশিংদা হিদাক কয়া অমা চাদা 80গী দিস্কাউন্ত পীদুনা ফংহল্লি, মসিনা লাইরবশিংগী চাউরাকপা লুপা করোর লিশিং 30মুক কনখ্রে। জল জীবন মিসন্না লৈবাক মীয়াম কয়া অমবু ঈশিংদগী শন্দোকপা লাইনা কয়াদগী কনবীরি। খ্বাইদগী মশিং য়াম্বা বেনেফিশরীশিং অসিদি শোত্থবা অমসুং ত্রাইবেল খুন্নাইগীনি হায়না মহাক্না পাউদমখি। “লাইরবশিংনা পক্কা য়ুম, অমাংশঙ, মৈ অমসুং ঈশিংগী কন্নেক্সন ফংগদবনি, মসিগুম্বা খুদোংচাবা খুদিংমক্না সোসিএল জস্তিস্কী গেরেন্তী অমসু ওইরিবনি”, মহাক্না মখা তাখি।

“লাইরবশিংগী মফমদা ইকোনোমিক সেক্যুরিতী পীফম থোকই। মসিসু মোদীগী গেরেন্তীনি”, প্রধান মন্ত্রীনা লাইরবশিংগী ওইনা লুপা লাক্ষ 2গী এক্সিদেন্তকী কবর অমসুং লাইফ ইন্স্যুরেন্স ওইনা পীরিবা লাইফ ইন্স্যুরেন্স স্কিমগী মতাংদা পল্লদুনা হায়খি। লাইরবশিংগী তঙাই ফদবা মতমশিংদা লুপা করোর 16,000গী ইন্স্যুরেন্সকী কান্নবা পীখিবশিংবু মহাক্না পাউদমখি।

মোদীগী গেরেন্তীনা থৌজাল অমা ওইরক্লি, মরু ওইনা, বেঙ্ক গেরেন্তী পীবা ঙমদবা মীওইশিংগীনি হায়না শ্রী মোদীনা হায়খি। বেঙ্ক একাউন্ত লৈতবা মীওইশিংদি বেঙ্কতগী লোন ফংবা হায়বসি ওইথোক্লোই হায়না মহাক্না হায়খি। বেঙ্ক একাউন্ত হাংদুনা লাইরবা করোর 50বু বেঙ্কিং সীস্তেমগা মরী লৈনহনখিবা জন ধন একাউন্তকী মতাংদা মহাক্না পাউদমখি অমসুং ঙসিদি মসিগী বেনেফিশরী 10,000না PM SVANIDHIগী মখাদা বেঙ্কতগী তেংবাং কয়া ফংনখ্রে। শেন্দোই য়াম্না পীদুনা কৈথেলদগী লোন লৌরম্বা স্ত্রীত ভেন্দরশিংনা ঙসিদি গেরেন্তী অমত্তা য়াওদনা বেঙ্কতগী লোন ফংলে হায়না মহাক্না হায়খি। “হৌজিক ফাওবগী ওইনা, মখোয়গী মফমদা লুপা করোর কয়া পীথখ্রে”, মহাক্না মখা তাখি।

সোলাপুর অসিদি ইন্দস্ত্রীগী শহরনি, শিন্মী কয়াগী লমদম্নি, মখোয়গী তেক্সতাইলগীদমক্তা মমিং চৎলি হায়না প্রধান মন্ত্রীনা হায়রদুনা শহর অসিদা স্কুল য়ুনিফোর্ম তুবা খ্বাইদগী চাউবা MSMEগী ক্লস্তর লৈ হায়না মখা তাখি। য়ুনিফোর্ম তুবগী থবক তৌরিবা মখোয়গুম্বা বিশ্বকর্মা কয়াগীদমক্তা খল্লবা মতুংদা সরকারনা মখোয়গী মফমদা লোন, ত্রেনিং অমসুং মোদর্ন ইক্বিপমেন্ত পীনবগীদমক্তা পি.এম. বিশ্বকর্মা স্কিম পুদুনা লাকখি হায়না মহাক্না হায়খি। মহাক্না মতিক চাবা কেন্দিদেতশিংনা মিং চনবীনবা হায়খি অমসুং মোদীগী গেরেন্তীগী গারীনা লৈবাক শিনবা থুংনা চৎলি হায়না মখা তাখি।

আত্মানির্ভর ভারত অমা শেম্বগী তঙাই ফদবা অসিদা মহাক্না মিৎয়েং চঙলদুনা, প্রধান মন্ত্রীনা মিসন অসিদা স্মোল অমসুং কোত্তেজ ইন্দস্ত্রীনা লৌরিবা থৌদাংশিংগী মতাংদা পনখি। MSMEশিংবু শৌগৎনবা পায়খৎলিবা থবক কয়াগী মমিং পল্লদুনা, পি.এম. মোদীনা লাইচৎ মনুংদা পুরকখিবা পেকেজ অমসুং ৱান দিস্ত্রিক্ত ৱান প্রদক্ত স্কিমগী মতাংদা পনখি। ভোকেল ফোর লোকেল অমসুং মেদ ইন ইন্দিয়াগুম্বা কেম্পেনগী মতাংদা পল্লদুনা, ভারতকী পোত্থোকশিংনা হেন্না ফগৎলবা প্রোফাইল লৈদুনা অনৌবা খুদোংচাবা কয়া ফংবা হৌরক্লি হায়না মহাক্না হায়খি।

প্রধান মন্ত্রীনা ভারতনা মহাক্কী হৌজিক্কী সরকারগী অহুমশুবা তর্মগী মনুংদা মালেমগী খ্বাইদগী মকোক থোংবা শেন্মিৎলোন অহুমগী মনুংদা চল্লগনি হায়রদুনা অসুম্না হায়খি, “ঐহাক্না মসি শোইদনা ওইথোক্কনি হায়না মীয়ামদা হায়খিবনি অমসুং মসিসু তসেংবা ওইরগনি”। লৈবাক্কী শেন্মিৎলোন্না পাকথোক চাউথোক্লকপা অসিদা সোলাপুরগুম্বা শহরনা লৌরিবা থৌদাংদা মিৎয়েং চঙলদুনা শহরশিংদা অসিদা ঈশিং মাইশিং অমসুং ইরম নালাগী মতাংদা লেপ্পা লৈতনা ফিভম ফগৎলক্লিবা অসিদি দবল ইঞ্জিন সরকার লৈবননি হায়না মহাক্না হায়খি। শহরশিংগা অফবা শোরোক, রেলৱেজ অমসুং এয়রৱেজ কয়ানা শম্নহল্লিবা চাউখৎ থৌরাংগী থবক কয়া মহাক্না পনখি। “সন্ত গ্যানেশ্বর মহারাজ পলখি মার্গ নত্ত্রগা সন্ত তুকারাম পলখি মার্গ ওইরো, মসিগী থবকশিং অসিসু খোঙজেল য়াঙনা চঙশিল্লি। রত্নাগিরী, কোলহাপুর অমসুং সোলাপুর মরক্কী লেন মরিগী হাইৱেগী থবকসু অথুবা মতম লোইশিল্লগনি”, মহাক্না মখা তাখি। প্রধান মন্ত্রীনা মহাক্কী ৱারোল লোইশিনবা ওইনা, মীয়াম্না সরকারবু লেপ্তনা থৌজাল পীগনি হায়বগী থাজবা লৈ ফোংদোক্লদুনা মশাগী ওইবা পর্মানেন্ত য়ুম ফংলিবা মীওইশিংবু অমুক্কা হন্না থাগৎখি।

মহারাস্ত্রগী রাজ্যপাল, শ্রী রমেশ বাইস, মুখ্য মন্ত্রী, শ্রী একনাথ শিন্দে, উপ-মুখ্য মন্ত্রী, শ্রী দেবেন্দ্র ফদনাবিস অমসুং শ্রী অজিত পাৱার অমদি রাইনগর ফেদেরেসনগী ফাউন্দর শ্রী নরসৈয়া এদামসু ঙসিগী থৌরম অসিদা শরুক য়াখি।

Key development initiatives are being launched from Solapur today, which will benefit the citizens. https://t.co/J82WbVNoYu

— Narendra Modi (@narendramodi) January 19, 2024

हमारी सरकार पहले दिन से प्रयास कर रही है कि श्रीराम के आदर्शों पर चलते हुए देश में सुशासन हो, देश में ईमानदारी का राज हो: PM @narendramodi pic.twitter.com/gGdQlODHRW

— PMO India (@PMOIndia) January 19, 2024

हमने एक के बाद एक ऐसी योजनाएं लागू कीं, जिससे गरीब की मुश्किलें कम हों, उनका जीवन आसान बने: PM @narendramodi pic.twitter.com/I6mOz6seOq

— PMO India (@PMOIndia) January 19, 2024

जब हमारी सरकार ने गरीबों को सर्वोच्च प्राथमिकता देते हुए काम किया, गरीब कल्याण की अनेक योजनाएं शुरू कीं, तो इसके नतीजे भी निकले: PM @narendramodi pic.twitter.com/sxIwLNIHTk

— PMO India (@PMOIndia) January 19, 2024

विश्वकर्मा साथियों का जीवन बदलने के लिए हमने पीएम विश्वकर्मा योजना बनाई है: PM @narendramodi pic.twitter.com/SrKmh5SvBN

— PMO India (@PMOIndia) January 19, 2024

विकसित भारत के निर्माण के लिए आत्मनिर्भर भारत बनाना ज़रूरी है: PM @narendramodi pic.twitter.com/jq6HP0KEom

— PMO India (@PMOIndia) January 19, 2024

आज जिस प्रकार दुनिया में भारत की साख बढ़ रही है, उससे 'मेड इन इंडिया' उत्पादों के लिए भी संभावनाएं बढ़ रही हैं: PM @narendramodi pic.twitter.com/Mdpl0GLVr5

— PMO India (@PMOIndia) January 19, 2024

***