মরুপশিং,

ঐহাক্না খ্বাইদগী অহানবমক্তদা অদোম খুদিংমক অমসুং মালেম শিনবা থুংবগী মীপুম খুদিংগী মফমদা অমসুং অখন্নবা ওইনা, খৃস্তিয়ন খুন্নাইগী মীওইশিংদা ঙসিগী য়াইফরা নুমিৎ অসিগীদমক্তা খৃস্তমাস!!!

ঙসিগী য়াইফরবা নুমিত্তা অদোম পুম্নমক্না ঐহাক্কী লৈফমদা লাকপীবসি ঐহাক্কী ওইনা য়াম্না নুংঙাইবা ৱাফ অমনি। ঐখোয় পুম্নমক্না অমত্তা ওইনা খৃস্তমাস পাংথোকমিন্নসি হায়না ইন্দিয়ন মাইনোরিতী ফাউন্দেসন্না ৱাহৌদোক থম্লকপা মতমদা ঐহাক্না ঐহাক্কী লৈফমদা পাংথোকপদি করি কায়বগে হায়খিবনি। মদুদগী ঙসিগী থৌরম অসি মফমসিদা পাংথোক্লিবনি। মসিদি ঐহাক্কী ওইনা য়াম্না নুংঙাইবা পুংফম অমনি। মসিদা অনিলজীনা ঐহাক্কী মতেং য়াম্না পাংখি, ঐহাক্না মহাক্কী মফমদা তৌবীমল খঙবা উৎচরি। ৱাহৌদোক অসিবু ঐহাক্না হরাওনা য়াজখিবনি। মসিগী তাঞ্জা অসিগীদমক্তা ঐহাক্না মাইনোরিতী ফাউন্দেসনবু থাগৎচরি।

ঐহাক্কা খৃস্তিয়ণ খুন্নাইগা লৈনরিবা মরী অসিদি অনৌবা নত্তে, য়াম্না লিরবা অমনি, য়াম্না নক্ননা লৈনবা মরীনি। গুজরাতকী মুখ্য মন্ত্রী ওইরিঙৈ মতমদা ঐহাক্না খুন্নাই অসিগী লুচিংবা কয়াগা য়াম্না তোয়না উন্নজখি অদুগা ঐহাক্না মীখল লেপখিবা মনিনগর অসিদসু মখোয়গী মশিং য়াম্না লৈ। মসিনা মরম ওইরগা ঐহাক অমসুং মখোয়গা য়াম্না নক্নবা মরী লৈনদুনা লাক্লিবনি। চহি খরগী মমাংদা, ঐহাক্না হোলী পোপকা উন্নবগী খুদোংচাবসু ফংজখি। মদুদি ঐহাক্কী কাওবা নাইররোইদবা মিৎকুপশিংগী মনুংদা অমা ওইরবনি। ঐখোয়না মালেম অসিবু নুংঙাইবা মফম অমা ওইহন্নবা সোসিএল হার্মোনী, গ্লোবেল ব্রদর্হুদ, ক্লাইমেত চেঞ্জ অমসুং ইনক্লুসিব দিবেলপমেন্তকুম্বা হীরম কয়াদা মতম শাংনা ফমিন্নদুনা ৱারী শান্নখিবনি।

মরুপশিং,

খৃস্তমাস হায়বসিদি প্রভু জীসুনা পোকখিবা নুমিৎকীদমক্তা নুংঙাইবা ফোংদোকপা নুমিৎ অদুবুনি। নুমিৎ অসিদি মহাক্কী পাউজেল অমসুং ভেল্যুশিংবু নীংশিংবগী নুমিৎনি। জীসুনা মীনুংশি খঙবা অমসুং অতোপ্পগী সেবাগী ভেল্যু খঙবা পুন্সি অমা হিংখি। পুম্নমক্কী মফমদা অচুম্বা ৱায়েল ফংবা, সোসিএল হার্মোনী লৈবা অমসুং ইনক্লুসিব ওইবা খুন্নাই অমা শেম্নবা মহাক্না হোৎনখি। মসিগুম্বা ভেল্যু অসিমক্না ঐখোয়গী লৈবাক্কী চাউখৎপগী খোঙজেলগী ভেল্যু ওইরিবনি, মসিনা ঐখোয়গী লমজিং মৈরা ওইরিবনি।

মরুপশিং,

খুন্নাইগী পুন্সি মহিংগী হীরম কয়াদা, ঐখোয়বু অমত্তা ওইনা পুনশিনবা ভেল্যু কয়া অমা ঐখোয়না উবা ফংই। খুদম ওইনা হায়রবদা, ঈশ্বরনা ঐখোয়গী মফমদা খুদোল অমা পীবি হায়না শেংলবা বাইবলদসু পল্লি, লোয়ননা, মদুনা ঐখোয়দা পীরিবা পাঙ্গল খুদিংবু ঐখোয়না অতোপ্পগী সেবাগীদমক্তা শিজিন্নগদবনি হায়নসু হায়বীরি। মসিগী সেবা অসিমক্না খ্বাইদগী চাউবা ধর্মনি। শেংলবা বাইবলদা অচুম্বা চৎপা হায়বসিদা অহেনবা মিৎয়েং চঙলি। অচুম্বনা ঈশ্বর ফংনবা লম্বী তাকপীগনি হায়নসু মসিনা ঐখোয়দা তাকপীরি। চুনবা থৌওং অমসু অমুক্তা য়েংবীয়ু, ঐখোয়না ইশাবু পাপ্তগী কোককচনবগীদমক্তা শেংলবা থাইনগী লাইরিক খুদিংদা অচুম্বনা করিনো হায়বা খঙনবা মিৎয়েং লোইনা চঙনরি। ঐখোয়গী মান্নবা ভেল্যু অমসুং হেরিতেজতা মিৎয়েং চঙদুনা, ঐখোয়না অমত্তা ওইনা তুংলমচত্তা চংশিনবা য়াগনি। 21শুবা চহি চাগী মতমগা চুনবা ভারতকীদমক্তা মসিগুম্বা তেংবাংনবা, নুংশী চানবা অমসুং অমত্তা ওইনা হোৎনমিন্নবগী ইথিলনা ভারতপু অনৌবা থাক্তা পুগনি।

মরুপশিং,

লাইরবা মুত্থৎনবা হোৎনরিবশিংদা থৌজানবীয়ু হায়না হোলী পোপ্না মহাক্কী খৃস্তমাসকী ৱারোলদা জীসুগী মফমদা থৌনিজখি। লাইরবনা মীওই অমগী মশাগী থাজবদা য়াম্না শোকহল্লি হায়না মহাক্না খল্লি। হোলী পোপকী মসিগুম্বা ৱারোলদা ঐখোয়গী চাউখৎপগী মন্ত্রা ওইরিবা ৱাখল্লোন অসিগী মমি তারি। ঐখোয়গী মন্ত্রদি করিনো, সবকা সাথ, সবকা বিকাস, সবকা বিশ্বাস অমসুং সবকা প্রয়াস হায়বসিনি।

চাউখৎপগী খুদোংচাবা খুদিংমক মীপুম খুদিংগী মফমদা ফংহন্নবা অমসুং মসিদগী কনামত্তা চিত্থহৌদনবা হায়দুনা সরকারনা হোৎনদুনা লাক্লি। খৃস্তিয়ন খুন্নাইগী মীওইশিংগী মফমদা, মরু ওইনা, লাইরবা অমসুং শোত্থরবশিংগী মফমদা হায়রিবা খুদোংচাবশিং অসি ফংলি। ঐহাক্না ঙসিসু নীংশিংলি, ঐখোয়না ফিশরীজকী ওইবা তোঙানবা মন্ত্রালয় অমা হৌদোকপা মতমদা, খুন্নাই অসিগী ঙামী কয়ানা মসিগী খোঙথাং খুদিংবু শৌগৎখিবনি, ঐহাকপুসু ইকায় খুম্নবীখি, মসিনা ঐহাকপু য়াম্না নুংঙাইহনখি।

মরুপশিং,

খৃস্তমাসকী ঙসিগী য়াইফরবা পুংফম অসিদা লৈবাক্কী খৃস্তিয়ন খুন্নাইনা তমখিবা শরুক খুদিংমকপু ঐখোয়না নীংশিংলি হায়না ফোংদোকচরি। খৃস্তিয়ন খুন্নাইনা নিংতম লান্দা মশক থোকপা থৌদাং কয়া য়াখি। ইহৌ অসিদা খুন্নাই অসিগী ৱাখল খনবা মীওই অমসুং লুচিংবা কয়াসু শরুক য়াখি। নন কোওপরেসন মুবমেন্ত অসি সেন্ত স্তেফেন কোলেজকী প্রিন্সিপল, শুশিল কুমার রুদ্রগী লমজিং লমতাক্কী মখাদা শেমখিবনি হায়না গান্ধী মশানা হায়খিবসু লৈরবনি।

মরুপশিং,

খৃস্তিয়ন খুন্নাইনা সমাজতা মাইকৈ তাক্নবা মশক থোকপা থবক কয়া পাংথোক্তুনা লাক্লি। মখোয়না সমাজ সেবাদা মাঙ থানা শরুক য়াদুনা লাক্লি, অদুগা অদোমগী খুন্নাই, লাইরবা অমসুং শোত্থরবশিংগী সেবাগীদমক্তা মাঙজিল থানা থোক্তুনা লাক্লি। এজুকেসন অমসুং হেল্থকেয়রগুম্বা মরু ইবা সেক্তরদা, খুন্নাই অসিগী চাউরবা লুপশিংনা ঙসিসু অচৌবা তেংবাং কয়া পাংলি।

মরুপশিং,

ইং 2047 ফাওবদা চাউখৎপা ভারত অমা ওইহন্নবা পান্দম অমা থম্লি, পান্দম অসিগা লোয়ননা ঐখোয়না ঐখোয়গী চাউখৎপগী খোঙচৎ অসিদা খোঙজেল য়াঙনা চঙশিল্লি, লেপ্তনা হোৎনরি। খোঙচৎ অসিদা ঐখোয়গী মফমদা খ্বাইদগী চাউনা তেংবাংলিবা মরুপশিংদি ঐখোয়গী নহাশিংনি। লেপ্তনা চাউখৎনবগীদমক্তা, ঐখোয়গী নহাশিংনা ৱাখল, হকচাং অমসুং ইমোসন চঙ-চঙ লাওনা লৈবা হায়বসি য়াম্না মরু ওইবা ৱাফম অমা ওইরি। মসিগুম্বা ৱাখল্লোন কয়াগা লোয়ননা চঙশিনবা খোঙথাং কয়া, খুদম ওইনা হায়রবদা, ফিত ইন্দিয়া, মিল্লেত শিজিন্নবা, ন্যুত্রিসন্দা মিৎয়েং চঙবা, মেন্তেল হেল্থকী মতাংদা এৱিয়র্নেস পুরকপা অমসুং নিশাগী মাইয়োক্তা চঙশিনবা ইহৌ কয়ানা জন আন্দোলন ওইনখ্রবনি। ঐহাক্না খৃস্তিয়ন খুন্নাইগী লুচিংবশিং, মরু ওইনা, এজুকেসন অমসুং হেল্থকেয়রগা মরী লৈনবশিংবু হীরমশিং অসিগী মতাংদা মীয়ামদা য়ারিবমখৈ খঙহনবীনবা হোৎনবীয়ু হায়না ঐহাক্না থমজরি।

মরুপশিং,

খৃস্তমাস্তা খুদোলপোৎ পীনবগী চৎনবী অমা লৈদুনা লাক্লি। ঐহাকসু হৌজিক্তা, য়াম্না শেংলবা খুদোল অমা ফংলে, অদুনা, লাক্কদৌরিবা চারোন-শুরোনশিংদা অফবা গ্রহ অমবু খুদোল ওইনা মতৌ করম্না পীগদগে হায়না ঐখোয়না ঙসিগী থৌর অসিদা খন্নবা চুম্মি। তুং কোইনা চৎপা হায়বসি ঙসিগী মতমগী খ্বাইদগী তঙাই ফদবা থৌওংনি। সস্তেনেবল ওইবা পুন্সি মহিং অমা হিংনবগীদমক্তা মসিনা মিসন লাইফকী মপুং ওইবা ৱারোল ওইরিবনি। মসিদি ভারতনা লুচিংবা মালেমগী ওইবা খোঙথাং অমনি।

মসিগী খোঙথাং অসিনা প্রো-প্লানেত পীপল অমসুং প্রো-প্লানেত লাইফস্তাইল হিংনবা ঐখোয়দা ইথিল পীরি। অদুগা, সম্পতজীনা অপীকপা লাইরিকশিংদা অশংবা মচু পুরক্নবা হায়রিবা অদুগী পাম্বৈসু মসিনা ওইরিবনি। খুদম ওইনা হায়রবদা, বাইও দিগ্রেদেবল ওইবা পোৎলমশিং অমুক্কা হন্না শিজিন্নবা অমসুং রিসাইকল তৌবা, মিল্লেত-শ্রী অন্নদা মায় ওনশিনবা, কার্বন ফুতপ্রিন্ত য়ারিবমখৈ হন্থহনবা পোৎলমশিং শিজিন্নবা, মসিগুম্বা পোৎলমশিংবু ঐখোয়না ঐখোয়গী নোংমগী পুন্সিগী য়াওদ্রবা য়াদ্রবা শরুক ওইহনবা তাবনি, মসিনা অচৌবা অহোংবা অমা পুরক্কনি। অদুগা ঐহাক্না থাজৈ, খৃস্তিয়ন খুন্নাইনা সমাজকীদমক্তা খনবা অসিনা মরম ওইরগা, মখোয়না মিসন অসিদা মশক থোকপা শরুক তম্বা ঙমগনি, লুচিংবা ঙমগনি হায়না ঐহাক্না থাজবা থম্মি।

মরুপশিং,

ভোকেল ফোর লোকেলগী হীরম অমসু লৈরি। ঐখোয়না লোকেলগী পোত্থোকশিংবু খুমাং চাউশিলহনবা মতমদা, ভারত্তা শাবা পোত্থোকশিংগী এম্বেসেদর ওইরকপা মতমদা, মসিসু লৈবাক্কী সেবাগী মখল অমা ওইরিবনি। ভোকেল ফোর লোকেলগী মন্ত্রনা মায় পাকপদগী, লৈবাক্কী অপীকপা ইন্দস্ত্রী লাক্ষ কয়াগা ইমপ্লোয়মেন্তকা মরী লৈনখি, মশানা মশাবু থবক পীজবগী থৌওং কয়াগা মরী লৈনখি। অদুনা, খৃস্তিয়ন খুন্নাইগী মীওইশিংনা লোকেলগী ভোকেল ওইবগী মতাংদা লেপ্তনা লৌশিং ফংনবা হোৎনবীয়ু হায়না ঐহাক্না থমজবা পাম্মি।

মরুপশিং,

ঐহাক্না অমুক্কা হন্না হায়জরি, হন্দক্কী কুহ্মৈগী কুমজা অসিনা ঐখোয়বু অপুনবা লৈবাক অমা ওইবগী পাঙ্গল পীবীবা ওইসনু, লৈবাক মীয়াম্বু হান্নদগী হেন্না নুংশিনহনবা ওইসনু হায়বগী অপাম্বা থমজরি। মসিগী কুহ্মৈ অসিনা ঐখোয়গী দাইবর্সিতীবুসু অমত্তা ওইহন্দুনা থম্বা মরী অমা ওইহনগনি, মরী অসিবু মপাঙ্গল হেন্না লৈহনগনি।

ঐহাক্না অদোম খুদিংবু য়াইফ পাউজেল পীজরি, থম্মোই শেংনা থাগৎচরি। অদোম্না ঙসি মতম কাইথোকপীদুনা লাকপীবা, মুম্বাইদগী অখন্ননা চেন্দুনা মফমসিদা লাকপীবা অসিদা ঐহাক্না নুংঙাইবা ফাওজৈ। ঐহাক্না অদোমগী মরক্তগী মীওই কয়াগী মফমদগী লেপ্তনা থৌজাল ফংদুনা লাক্লি, উন্নদুনা লাক্লি, ৱারী ৱাতাই শাদুনা লাক্লি। অদুবু, ঙসিদি, অদোমগা পুন্না উন্নজবগী খুদোংচাবা ফংজরে।

ঐহাক্না অদোম্বু অমুক্কা হন্না থাগৎপা পামজৈ। ঙসিগী য়াইফরবা থৌরম অসিদা মশাগী মেঙলবা খোঞ্জেলনা, ৱাখল্লোন্না ঙসিগী থৌরম অসিবু হেন্না নুংঙাইহনবগীদমক্তা ঐহাক্না অঙাংশিং অসিবুসু থাগৎচরি। ঐহাক্না অঙাংশিং অসিগী মফমদা য়াইফ পাউজেলসু পীজরি।

পুম্নমকপু থাগৎচরি।

***