খুরুমজরি!

গুজরাতকী চীফ মিনিস্তর শ্রী ভুপেন্দ্রভাই, রাজ্য সরকারগী মিনিস্তরশিং, আই.এফ.এস.সি.এগী চিয়ার্মেন কে. রাজারমন জি, শক্নাইরবা ফাইনান্সিএল ইন্সিতিতুৎশিং অমসুং তোঙান-তোঙানবা লুপশিংগী লুচিংবশিং, ইবেম্মাশিং অমসুং ইবুংঙোশিং।

ইনফিনিতি ফোরমগী অনিশুবা ইদিসন্দা ঐনা ময়াম পুম্নমক তরাম্না ওকচরি। লাইচৎনা মরম ওইদুনা, মালেম অসি তম্বা ঙমদবা ফিবম অমা মায়োক্নরিঙৈদা, দিশেম্বর ২০২১দা ইনফিনিতি ফোরম হৌদোকপদা ঐখোয় উনখিবা অদু ঐ নিংশিংলি। মালেমগী শেন-থুম চাউখৎপগী মতাংদা মীওই খুদিংমক নুংনাংখি অমসুং মদুগী অৱাবশিং অদু হৌজিক ফাওবা লৈরি। মালেমগী মুক্নবশিং, পোৎ-চৈগী মমল হেনগৎলকপা অমসুং শেন্দোল হেনগৎলকপনা পীরিবা অৱাবশিং অদোম নিংথিনা খঙলে।

অদুগুম্বা মতম মনুংদা, ভারত অৱাং-অনা থেংনবা ঙম্বা অমসুং চাউখৎপগী খুদম অমা ওইরক্লে। অসিগুম্বা ফিবম অমদা, জি.আই.এফ.তি সিতিদা ২১শুবা চহিচাগী শেন-থুমগী থৌশিলশিংগী খন্ন-নৈনবা পাংথোকপা হায়বসি ভারতকী চাউথোকচবা হেনগৎহনবনি। অতোপ্পা মাইপাকপা অমগীদমক ঐনা গুজরাতকী মীয়াম থাগৎপা পাম্মী। হন্দক য়ুনেস্কো ইন্তেজিবল কলচরেল হেরিতেচ তেগকী মখাদা ‘গারবা’ য়াওরক্লে। মসি শিংথানিঙাই ওইবা মাইপাকপা অমনি অমসুং  গুজরাতকী মাইপাকপা অসি লৈবাক অসিগী মাইপাকপনি।

মরুপশিং,

ভারতকী চাউখৎপগী ৱারি অসি থৌশিল, অফবা লৈঙাক অমসুং মীয়ামগী য়াইফনবা সরকারনা মরুওইনা লৌবদা য়ুম্ফম ওইবনি হায়বা মালেমদা উৎলে। শেনবা চহিগী অহানবা থা তরুক মনুংদা ভারতকী গ্রোথ রেত অসি চাদা ৭.৭ নি। সেপ্তেম্বর ২০২৩দা আই.এম.এফনা পনখিবগী মতুংইন্না, ২০২৩দা মালেমগী গ্রোথ রেত চাদা ১৬তা ভারতনা মতেং পাংগনি হায়খি। জুলাই ২০২৩দা, ৱার্ল্দ বেঙ্কনা ভারত্তা থাজবা থমখি অমসুং মালেমগী খুদোংচাদবা কয়া মরক্তা, ভারতকী শেন্মিৎলোন্দা থাজবা কয়া লৈখি। চহি অসিগী মার্চ থাদা, অস্ত্রেলিয়াগী প্রধান মন্ত্রীনা হায়খি গ্লোবেল সাউথ লমজিংবদা ভারতনা মাংজিল থাবা অদু খঙলে। ভারত্তা ৱাচৎ-ৱানোমগী থবকশিং হন্থরকপা অসিনা শেন থাদনবগী খুদোংচাবা হেন্না পীরে হায়না ৱার্ল্দ ইকোনোমিক ফোরম্না ফোঙদোকখ্রে।

ঙসিদি মালেম শীনবা থুংবনা ভারত্তা থাজবা থম্লে অমসুং মসি মরম লৈতনা থাজবা য়াবা নত্তে। মসি ভারতকী অকনবা ইকোনোমি অমসুং হৌখিবা চহি ১০দা লৈবাক অসিগী শেন্মিৎলোন মপাঙ্গল কনখৎলে অমসুং অওনবা অহোংবা কয়া পুরকখিবা অদুগী মমিনি। হায়রিবা অওনবশিং অদুনা লৈবাক্কী শেন-থুমগী য়ু্ম্ফমশিং থোল্লে। লাইচৎ মনুংদা, মালেমগী অতৈ লৈবাকশিংনা ফিসিকেল অমসুং মোনিতরি রিলিফতা মীৎয়েং চঙলিঙৈ মতমদা ঐখোয়না তুংকোইনা চাউখৎপা অমসুং শেন-থুমগী থবক পাংথোক চাউথোকহনবদা পুক্নিং চঙখি। 

মরুপশিং,

ঐখোয়গী অওনবশিংগী মরুওইবা পান্দম অমদি মালেমগী শেন্মিৎলোন্দা পুনশিনবা হেনগৎহনবা অসিনি।  হিরম কয়াদা এফ.দি.আই থৌশিল কোমথোকপা, নিয়মশিং ঙাক্নবগী পোৎলম হন্থহনবদগী মাইপাকপা কয়া উবা ফংলে অমসুং ঙসি এফ.তি.এ অহুম খুৎয়েক পীনরে। জি.আই.এফ.তি আই.এফ.এস.সি.এ লিংখৎপা, ভারতকী ফাইনান্সিএল মার্কেত অসি মালেমগী ফাইনান্সিএল মার্কেতশিংদা পুনশিন্নবা অসি ঐখোয়গী অচৌবা অওনবশিংগী শরুকনি। ইন্তরনেসনেল ফাইনান্সকী থবকশিং অমুক মশক তাক্কদবা অফবা ফিবম অমা শেমগৎনবা জি.আই.এফ.তি সিতিনা পান্দম থম্লি। মসিনা ইন্নোবেসন, মতিক চাবা অমসুং মালেমগী মতেং পীনবগী অনৌবা মশক কয়া তাক্কনি। য়ুনিফাইদ লিগুলেতর অমা ওইনা ২০২০দা ইন্তরনেসনেল ফাইনান্সিএল সর্বিসেস সেন্তরস ওথোরিতি লিংখৎলে। আই.এফ.এস.সি.এনা নিয়ম ২৭ শেম্লে অমসুং শেন-থুমগী অৱাবা মায়োক্নবা মনুংদা শেন থাদনবগী ফ্রেমৱার্ক ১০ হেন্না শেমখি। ইনফিনিতি ফোরমগী অহানবা ইদিসন্দা ফংখিবা পাউতাকশিংদগী, এপ্রিল ২০২২দা আই.এফ.এস.সি.এনা নোতিফাইত তৌখিবা মতুংইন্না ফন্দ মেনেজমেন্তগী থবকশিংগী কমপ্রেহেন্সিপ ফ্রেমৱার্ক অমা থবক হৌখি।

ইনফিনিতি ফোরমগী অহানবা ইদিসন্দা পীখিবা পাউতাকশিংদা য়ুম্ফম ওইদুনা থবক কয়া পায়খৎলে হায়বা খঙবদা অদোম অপেনবা পোক্কনি। খুদম ওইনা, ফন্দ মেনেজমেন্তগী থবকশিং য়াচল লাক্নবা অপুনবা ফ্রেমৱার্ক অমা আই.এফ.এস.সি.এনা এপ্রিল ২০২২দা লাউথোক্লে। হৌজিক ফন্দ মেনেজমেন্ত বোদি ৮০ আই.এফ.এস.সি.এদা রেজিস্তার তৌরে অমসুং দোল্লর বিল্লিয়ন ২৪ হেনবগী ফন্দশিং খোমগৎলে অমসুং ২০২৪ দগী জি.আই.এফ.তি আই.এফ.এস.সিদা মখোয়গী কোর্সশিং হৌনবা মালেমগী মাংজিল থাবা য়ুনিভর্সিতি অনি অয়াবা ফংলে। মে ২০২২দা আই.এফ.এস.সি.এনা এয়রক্রাফ শান্দোক্নবগী ফ্রেমৱার্ক পুথোকপদগী ঙসি য়ুনিত ২৬ থবক হৌরে।

মরুপশিং,

অদোমগী পাউতাকশিংদা য়ুম্ফম ওইদুনা অশুক য়াম্বা থবক পাংথোক্তুনা, অহানবা ইদিসন মাইপাকপা অসিদা, মথং করি পাংথোক্কনি হায়না মশানা ৱাহং হংলকপা তাবনি। জি,আই.এফ.তি আই.এফ.এস.সি.এগী স্কোপ হান্নগুম লৈগদরা? ঐগী পাউখুমদি লৈরোই। হান্নগী ফাইনান্স অমসুং ভেঞ্চরশিংগী থবকশিংগী ৱাংমদা জি.আই.এফ.তি আই.এফ.এস.সি.এ পুনবা সরকারনা থবক পায়খৎলি। ঐখোয়না জি.আই.এফ.তি সিতি অসি অনৌবা যুগকী মালেমগী ফাইনান্সিএল অমসুং তেক্নোলোজিগী থবকশিংগী মালেমগী নর্ব সেন্তর অমা ওইহনবা পাম্মী। জি.আই.এফ.তি সিতিনা পুথোকপা পোৎথোকশিং অমসুং থবকশিংনা মালেম্না মায়োক্নরিবা অৱাবশিং কোকহনবদা মতেং পাংগনি অমসুং মরী লৈনবশিংনা অচৌবা থৌদাং অমা লৌগনি।

মরুপশিং,

অইং-অশাগী খল হোংলকপগী থেংনরিবা অৱাবা অসি মালেম্না থেংনরিআ খ্বাইদগী চাউবা শিংনবা অমনি।  মালেমদা খ্বাইদগী চাউবা ইকোনোমিশিংগী মনুংদা অমা ওইনা ভারতনা মসিগী অৱাবশিং অসি খঙলে।  হন্দক পাংথোকখিবা কোপ-২৮ সম্মিৎতা ভারতনা থাজবশিং পীখ্রে অমসুং ভারত অমসুং মালেমগী পান্দমশিং ফংনবা চুনবা মমলদা শেন্থং মরাংকাইনা ফংহনগদবনি।

মালেমগী চাউখৎপা অমসুং তংদু-লৈতাবা পুরক্নবা তুংকোইনা চৎনবা য়াগদবা ম ওংদা শেন থাদবা দরকার ওই অমসুং ৱাফম অসি ভারতনা জি-২০গী প্রসিদেন্ত ওইরিঙৈ মনুংদা মরুওইনা লৌবা ৱাফম অমা ওইখি। মসিনা হেন্না মশা নানবা, হেন্না অৱা-অনা খাংবা ঙম্বা অমসুং কাংলুপ খুদিংমক কোনশিনবা খুন্নাইশিং অমসুং ইকোনোমিশিং শেমগৎনবা অওনবা পুরকপা ঙমগনি। ২০৭০দা নেত জিরো তার্গেত ফংনবা ভারতনা য়ামদ্রবদা দোল্লার ত্রিল্লিয়ন ১০ দরকার ওইগনি। আই.এফ.এস.সি.অসি স্তেনেবল ফাইনান্সকী মালেমগী মফম ওইহন্নবা ঐখোয়না পান্দম থম্লি। 

ভারতকী কার্বোন য়াম্না থাদোক্তবা ইকোনোমি অমা শেমগৎনবা দরকার ওইবা গ্রিন কেপিতেল লাক্নবা জি.আই.এফ.তি আই.এফ.এস.সি অসি মতিক চাবা চেন্নেল অমনি। শেন-থুমগী পোৎথোকশিং হায়বদি গ্রিন্দ বোন্দস, স্তেনেবল বোন্দস অমসুং স্তেনেবিলিতি লিঙ্ক বোন্দসনা মালেম শীনবা থুংবগী লম্বী হেন্না নুংঙাইহনগনি। ভারতনা হৌদোকপা গ্লোবেল গ্রিন ক্রেদিৎ ইনিসিএতিপ’ অসি কোপ-২৮তা মালেমগী য়াইফনবা থৌরাং অমনি হায়বা অদোম খঙলে। গ্রিন ক্রেদিৎকী মার্কেত মেকানিজম  অমা শেমগৎনবা খঙ হৈরবা লনাই মীওইশিংনা পাউতাক পীরকপদা  ঐনা থাগৎচগনি।

মরুপশিং,

ঙসি মালেমদা খ্বাইদগী য়াংনা চাউখৎলক্লিবা ফিনতেক মার্কেতশিংগী মনুংদা ভারত অমনি। ফিনতেক্তা ভারতকী থৌনা অসি  জি.আই.এফ.তি আই.এফ.এস.সিগী পান্দমগা মান্নৈ অমসুং মসিগী ফল ওইনা, লৈবাক অসি য়াম্না য়াংনা ফিনতেক্কী মফম অমা ওইরক্লে। ২০২২দা ফিনতেককী রিগুলেতোরি ফ্রেমৱার্ক অমা আই.এফ.এস.সি.এনা ফোঙখ্রে অমসুং আই.এফ.এস.সিগী ফিনতেক ইন্সেনতিপ স্কিম্না ইন্নোবেসন অমসুং ওন্ত্রেপ্রেনিউয়রশিপ চাউখৎহন্নবা ভারতকী অমসুং মপানগী ফিনতেকশিংদা গ্রান্তশিং পীরে। জি.আই.এফ.তি সিতি অসি মালেমগী ফিনতেক্কী থোঙ্গাল অমসুং মালেমগী ফিনতেক লেবোরেতোরি অমা ওইরকপা য়ানবা খুদোংচাবা লৈরে। ইনভেস্তরশিংনা মসিগী খুদোংচাবশিং য়াম্না লৌনবা ঐনা অদোমগী পুক্নিং চিংশিল্লি। 

মরুপশিং,

মসি লিংখৎখিবা চহি খরগী মনুংদা, জি.আই.এফ.তি আই.এফ.এস.সি অসি মালেমগী কেপিতেল চঙলক্নবগী মশক থোকপা থোংজিল অমা ওইরক্লে। ‘ত্রাই সিতি’গী ৱাখল্লোন হায়বদি পুৱারি ওইরবা অহমেদবাদ সহর অমসুং কোনুং গান্ধীনগর অনিগী মরক্তা লৈদুনা মসিনা অখন্নবা শম্নবা অমা লৈহল্লে। জি.আই.এফ.তি আই.এফ.এস.সিগী অৱাংবা থাক্কী দিজিতেল ইনফ্রাস্ত্রকচরশিংনা ললোন-ইতিক মপুংফানা পাংথোকপা হেনগৎহন্নবা মফম অমা পীরে। মসিগী মালেমগা শম্নবগী মতাংদা অদোম ফজনা খঙলে। জি.আই.এফ.তি আই.এফ.এস.সি অসিদা ফাইনান্সিএল অমসুং তেক্নোলোজিগী তাইবংদা খ্বাইদগী মতিক চাবা মীওইশিং চিংশিন্নবা য়োৎচাবী অমা ওইরে।

ঙসি আই.এফ.এস.সিদা ওপরেসনেল ইন্তাইতিস ৫৮, ইন্তরনেসনেল বুল্লিয়ন একচেঞ্জ য়াওনা একচেঞ্জ ৩, মপানগী বেঙ্ক ৯ য়াওনা বেঙ্ক ২৫, ইন্সুরেন্স ইন্তাইতিস ২৯, মপানগী য়ুনিভর্সিতি ২, কন্সলতিং ফার্মসিং, লো ফার্মশিং অমসুং সি.এ ফার্মশিং য়াওনা  প্রোফেসনেল সর্বিস প্রোভাইদর ৫০ হেনবা লৈরে। মথং চহি খরদা জি.আই.এফ.তি সিতি অসি মালেমদা খ্বাইদগী ফবা ইন্তরনেসনেল ফাইনান্সিএল সেন্তরশিংগী মনুংদা অমা ওইরগনি হায়না ঐনা থাজৈ।

মরুপশিং,

ভারত অসি গনতন্ত্রগী অচেৎপা গুনশিং লৈবা অমসুং ললোন-ইতিক্কী পুৱারিগী চৎনবীশিং লৈবা লৈবাক অমনি। ইনভেস্তর নত্ত্রগা কম্পেনি খুদিংমক্কী ভারত্তা মখল কয়াগী খুদোংচাবশিং লৈরি। ভারতকী চাউখৎপগী ৱারিগা জি.আই.এফ.তিগী পান্দমগা শম্নরে। নোংমগী এয়র ত্রাফিক অসি এয়র পেসেঞ্জর লাখ ৪ ওইরি, ২০১৪দা পেসেঞ্জর এয়রক্রাফ ৪০০ লৈরম্বদগী মশিং হেনগৎলক্তুনা হৌজিক ৭০০ য়ৌরে অমসুং হৌখিবা চহি ৯ দা ভারত্তা এয়রপোর্তশিংগী মশিং শরুক অনিদা হেনগৎলে। লাক্লিবা চহিশিংদা ঐখোয়গী এয়রলাইনশিংনা চাউরাক্না এয়রক্রাফ ১০০০ রোম লৈগদৌরি।

এয়রক্রাফ লিজরশিংদা জি.আই.এফ.তি সিতিনা তোঙান-তোঙানবা খুদোংচাবশিং পীরে। ঈশিং লম্বীশিংদা পোৎ-চৈ পুথোক-পুশিন তৌবা হেনগৎলকপা লোয়ননা ভারত্তা জহাজ মশিং হেনগৎলক্লে। মসিগী হোংলক্লিবা ফিবম অসিদা শেন তান্নবা খুদোংচাবা অমা আই.এফ.এস.সি.এগী সিপ লিসিং ফ্রেমৱার্কনা পীরে। আই.এফ.এস.সি.এগী সিপ লিসিং ফ্রেমৱার্ক, আই.তিগী হৈথোই-শিংথোইরবা য়াম্লবা মীওইশিং, দেতা ঙাক-শেন্নবা আইনশিং অমসুং জি.আই.এফ.তিগী দেতা এম্বেসিগী থবক্না লৈবাকশিং অমসুং ললোন-ইতিক্কী থবকশিংআ দিজিতেল কন্তিনুইতিগী অশোই-অঙাম থোক্তবা খুদোংচাবশিং ফংহল্লে। ভারতকী নহা ওইরিবা লৌশি লৈরবা মীওইশিং থাগৎচরি, ঐখোয় মালমগী অচৌবা কম্পেনিশিংগী গ্লোবেল কেপাবিলিতি সেন্তরশিংগী মফম অমা ওইরে।

মরুপশিং,

মথং চহি খরদা ভারত মালেমদা অহুমশুবা খ্বাইদগী চাউবা ইকোনোমি অমসুং ২০৪৭দা চাউখৎলবা লৈবাক অমা ওইরগনি। খোঙচৎ অসিদা কেপিতেলগী অনৌবা মওংশিং, দিজিতেল তেক্নোলোজিশিং অমসুং অনৌবা যুগকী শেন-থুমগী থবকশিংনা থৌদাং লৌরে। মসিগী মতিক চাবা চৎন-কাংলোনশিং, লাইনা শীজিন্নবা য়ারবা ইনফ্রাস্ত্রকচরশিং, পাক-চাউরবা ভারতকী মফম কয়াগী ইকোনোমি য়ৌশিনবা ঙম্বা, থবক পাংথোকপদা শেন য়াম্না চঙদবা অমসুং হৈথোই-শিংথোইবা মীওই কয়া মরাং কাইনা লৈবা অসিগা লোয়ননা লাম্বা লৈতবা খুদোংচাবা কয়া জি.আই.এফ.তি সিতিনা শেমগৎলে। মালেমগী মঙলানশিং মঙফাওনবা ঙম্নবা জি.আই.এফ.তি আই.এফ.এস.সিগা লোয়ননা ঐখোয় মাঙলোমদা চঙশিল্লসি। অথুবা মতমদা ভাইব্রেন্ত গুজরাত সম্মিৎশু পাংথোক্লগনি। মালেমনা মায়োক্নরিবা খুদোংচাদবশিং কোকহন্নবা পাম্বৈশিং পুথোক্নবা ঐখোয় পুন্না অনৌবা ৱাখল্লোনশিং থিদোকমিন্নরসি।

অদোম ঙমখৈ লৈতনা থাগৎচরি।

দিসক্লাইমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি। অশেংবা ৱারোল হিন্দীদা পীখি।

****