مرکزی وزیر مملکت برائے اسکل ڈیولپمنٹ اینڈ انٹرپرینیورشپ اور الیکٹرانکس اینڈ آئی ٹی جناب راجیو چندر شیکھر نے اپنے دورے کے دوسرے دن کیرالا میں اپنی مصروفیات کو جاری رکھتے ہوئے نالندہ آڈیٹوریم، کالی کٹ میں سی اے طلبہ کے لیے ستسنگ 2023 میگا کانفرنس سے خطاب کیا۔ انسٹی ٹیوٹ آف چارٹرڈ اکاؤنٹنٹس آف انڈیا کے زیر اہتمام منعقد ہونے والی اس تقریب کا موضوع ’’بصیرت – ان دیکھے کی دریافت!‘‘  تھا۔

اپنے خطاب میں وزیر جناب راجیو چندر شیکھر نے اس بات پر زور دیا کہ کس طرح نیا بھارت نوجوان بھارتیوں اور اسٹارٹ اپس کے لیے مواقع پیدا کرنے کے لیے ٹکنالوجی کا فائدہ اٹھا رہا ہے۔ انھوں نے کہا، ’’ایک وزیر کی حیثیت سے، مجھے ملک بھر میں سفر کرنے، طلبہ کے ساتھ بات چیت کرنے اور ان کے خدشات پر تبادلہ خیال کرنے کا موقع ملا ہے۔ ایک ناقابل تردید حقیقت جو میں نے دریافت کی ہے وہ یہ ہے کہ اس نسل کے نوجوان بھارتی آزاد بھارت کی تاریخ میں سب سے خوش قسمت ہیں۔ آزاد بھارت کی تاریخ میں کسی بھی پچھلی نسل کے برعکس ان کے پاس ترقی اور کامیابی کے بے مثال مواقع ہیں۔ پچھلی نسل کے پاس یہ اختیارات نہیں تھے۔ گریجویشن کے بعد، وہ صرف دو یا تین انتخاب تک محدود تھے۔‘‘

گزشتہ دہائی کے دوران مواقع کی جمہوریت پر روشنی ڈالتے ہوئے وزیر موصوف نے کہا کہ آج کالی کٹ، وشاکھاپٹنم، بنگلورو، کوہیما، سورت یا کشمیر جیسے شہروں کے نوجوان بھارتیوں کے پاس زبردست مواقع ہیں۔ صرف پچھلے پانچ سالوں میں، ہم نے 1.2 لاکھ اسٹارٹ اپ اور 108 یونیکورن کے ابھرنے کا مشاہدہ کیا ہے۔ کامیاب ہونے کے لیے کسی گاڈ فادر یا مشہور سرنیم کی ضرورت نہیں رہی ۔ نیو انڈیا نے مواقع کو جمہوری بنایا ہے اور کامیابی کے لیے سازگار ماحول پیدا کیا ہے۔ چاہے سیمی کنڈکٹر ہو ، یا ویب 3، یا الیکٹرانکس، ایچ پی سی، یا ٹیکنالوجی سے متعلق کوئی بھی شعبہ، بھارتی ہر چیز میں مہارت حاصل کر رہے ہیں، اور نوجوان بھارتی ان مواقع کے حصول میں سب سے آگے ہیں۔

سی اے کے طلبہ کو ڈیجیٹل مہارتوں کو اپنانے کی ترغیب دیتے ہوئے جناب راجیو چندر شیکھر نے کہا کہ ’’ہمارے وزیر اعظم نے ڈگریوں اور علم کے ساتھ ساتھ مہارتوں کی اہمیت پر زور دیا، خاص طور پر کووڈ کے بعد تیزی سے ڈیجیٹلائزیشن، ڈیجیٹل ٹکنالوجی اور بے مثال الیکٹرونائزیشن کی دنیا میں۔ میں آج پر امنگ سی اے سے درخواست کرتا ہوں کہ وہ ڈیجیٹل مہارت حاصل کریں۔ ان مہارتوں کو موجودہ اکاؤنٹنسی علم کے ساتھ جوڑنا آپ کو ناقابل تسخیر بنا دے گا۔ بھارت ایک ناقابل تسخیر ملک ہے۔ آج ہر سی اے میں نہ صرف اپنی کامیابی بلکہ اپنے پیشے اور مجموعی بھارتی معیشت کی کامیابی کے لیے محرک بننے کی صلاحیت ہے۔‘‘

کالی کٹ سی ایس سی وی ایل ای ویلفیئر سوسائٹی کے ذریعہ منعقدہ ایک تقریب میں وزیر راجیو چندر شیکھر نے پی ایم وشوکرما یوجنا کے ذریعہ طے کردہ مقاصد کو آگے بڑھانے کے لیے کامن سروس سینٹر (سی ایس سی) 2.0 شروع کرنے کے مقصد کے بارے میں بات کی۔

وزیر موصوف نے کہا کہ پی ایم وشوکرما یوجنا ان کاریگروں کے لیے ایک اہم اسکیم ہے جنہیں دہائیوں سے نظر انداز کیا گیا ہے۔ یہ غیر ہنرمند کاریگروں کی تصدیق کرے گا، اور سی ایس سی ان کاریگروں کو اسکیموں سے جوڑنے میں بہت اہمیت رکھتے ہیں۔ اگرچہ سی ایس سی ملک بھر میں کامیاب رہے ہیں ، لیکن انھیں کیرالہ میں کچھ رکاوٹوں کا سامنا کرنا پڑا ہے ، جسے ہم حل کرنے کے خواہاں ہیں۔ ہم اس اقدام کے دائرہ کار کو مزید وسعت دیں گے، جدید بنائیں گے اور وسیع کریں گے۔

وزیر جناب راجیو چندر شیکھر نے بعد میں ہونے والی میٹنگوں میں ریاست کے ممتاز شہریوں سے بھی بات چیت کی ، جہاں انھوں نے وزیر اعظم کے "وکاسیت بھارت" کے وژن پر روشنی ڈالی۔

***

(ش ح – ع ا – ع ر)

U. No. 1702

(Release ID: 1981991) Visitor Counter : 1624