0 3

गोंय/मुंबई, 27 नोव्‍हेंबर 2023

गोंयांत सुरू आशिल्ल्या 54व्या भारतीय आंतरराष्ट्रीय चित्रपट महोत्सवांत भांगराळो मोर पुरस्कारा खातीर नामांकीत जाल्ले चित्रपट पळोवपा विशीं आंतरराष्ट्रीय जूरी वांगड्यांनी आपले अणभव खोलायेन उक्तायले. संवसारभरांतल्या नामनेच्या सिनेमा निर्मात्यांनी फाल्यां महोत्सवाच्या समारोप सुवाळ्यांत ह्या विभागांत जाहीर करपाचे आनी दिवपाचे पुरस्कार हांचेर जूरी वांगड्यांनी विचार व्यक्त केलो.

आंतरराष्ट्रीय जूरीचो भाग जावप आनी विंगड विंगड आनी आकर्शक कथांच्या वळेरेंतल्यान वेंचून काडप, हो तांकां एक व्हड वैयक्तीक अणभव मेळा, अशें जूरीन एकमतान सांगलें. भारताच्या आंतरराष्ट्रीय चित्रपट महोत्सवांत मेळिल्ल्या नोंदींचो आनी केल्ल्या निवडींची विविधताय पळयल्यार सुरवाती सावन व्हड प्रमाणांत वाड जाल्या, अशें तांणी सांगलें.

पत्रकार परिशदे वेळार उलयतना अंतर्गत जूरीचे वांगडी नामनेचो सिनेमा निर्मातो शेखर कपूर, जे जूरी अध्यक्षय आसा ताणें सांगलें, की निवड समितीन चित्रपटांचें उल्लेखनीय क्युरेशन केलां; तशेंच संवसारीक सिनेमा समृध्द करपी भारताच्या अतुलनीय आशयाचेर आनी तंत्रीक कुशळटायेचेर ताणें भर दिलो. “भारत संवसारांतलो सगळ्यांत व्हडलो साधना आनी तंत्रगिन्यानाचो आदार आशिल्लो देश आसा  आनी इफ्फी सारकिले महोत्सव उरिल्ल्या संवसाराक भारताची संस्कृताय समजून घेवपाक मदत करतात”, अशें श्री. शेखर हांणी सांगलें. भारतांत फिल्म निर्मितींत आर्टिफिशियल इंटेलिजन्सचो वाडत वचपी वापरा विशीं उलयतना तांणी म्हणलें, “सृजनशील वावरांक अंत ना.”

सहकार्य सुविधा दिवपाक चित्रपट महोत्सवांची म्हत्वाची भुमिका हाचेर भर दितना जेरोम पॅलार्डान सांगलें, की “वेगवेगळे चित्रपट सोदून काडप आनी सहकार्या खातीर नेटवर्किंग, हो चित्रपट महोत्सवांत वचपाचो सगळ्यांत व्हड फायदो. प्रभावी भागीदारींक उत्प्रेरक म्हूण फिल्म बाजारा सारकिल्या उपक्रमांची तोखणाय करून जेरोमान म्हणलें, “फिल्म बाजारा सारकिल्या विपणन उपक्रमांक लागून  प्रकल्प करपात  व्हड फरक पडटा.” तशेंच तांणी क्रिएटिव्ह माइंड्स ऑफ टुमॉरो (सीएमओटी) उपक्रमाची तोखणाय केली आनी फिल्म निर्मितींत तरणाट्या प्रतिभेक पोसवण दिवपाचो हो खरोच अद्भुत उपक्रम, अशें सांगलें.

जेरोम हांच्या विधानाक तेंको दिवन कॅथरीन डसर्ट हिणेंय सर्तींतल्या चित्रपटांची भरपूर प्रमाणांत भरसण आनी वितरक तशेच निर्मात्यांक जोडपाक फिल्म बाजाराची म्हत्वाची भुमिका हांचीय तोखणाय केली. सह-निर्मिती खातीर नवे प्रकल्प सोदून काडपाक येवपी वितरक आनी निर्मात्यांक हें खूब उपकाराचें आसा, अशें तांणी सांगलें. ह्या वर्सा संवसारांतल्या वेगवेगळ्या वाठारांतल्यान सर्ती खातीर ह्या महोत्सवांत चित्रपटांची निवड आशिल्ली.

हेलन लीक हांणी विंगड विंगड चित्रपट उद्देगांक एकठांय हाडपा खातीर महोत्सवाची भुमिका उजवाडायली. इफ्फीच्या विस्तारीत मंचा वरवीं भारतीय सिनेमाची वाडट्या जागतीक मान्यतायेचेर भर दितना हेलनान सांगलें, “इफफी वरवीं वेगवेगळ्या चित्रपट उद्देगांची भागीदारी खूब वाडल्या”, ह्या महोत्सवा वरवीं संवसारभर भारतीय सिनेमा विशीं जागृताय वाडत आसा.

जोसेफ लुईस आल्केन हांणी आपल्या उलोवपांत म्हणलें, “विविध कथा, संस्कृताय आनी शैलीचे चित्रपट पळोवप आनी न्याय दिवप हो एक व्हड अणभव आशिल्लो,” आनी महोत्सवाच्या सुवातींनी प्रेक्षकांचो प्रतिसाद अदभूत आशिल्लो, अशें सांगलें.

जूरीन ह्या महोत्सवाच्या आतिथ्याची उमेद आनी उदारताय हांची तोखणाय केली आनी तांच्या अणभवांत ताचें अमूल्य योगदान मान्य केलें.

आंतरराष्ट्रीय जूरी ‘भांगराळो मोर’ आनी दिग्दर्शका खातीर आनी निर्मात्या खातीर प्रमाणपत्रांचो आस्पाव आशिल्ल्या उत्कृश्ट चित्रपट पुरस्काराच्या विजेत्याक वेंचून काडटली. उत्कृश्ट चित्रपट सोडल्यार उत्कृश्ट दिग्दर्शक, उत्कृश्ट अभिनेतो (दादलो), उत्कृश्ट अभिनेत्री (बायल) आनी खाशेलो जूरी इनाम ह्या विभागांतलेय विजेते जूरी थारायतली.

इफ्फित 15 प्रशंसीत फिचर फिल्मांची निवड जाल्या, जी नव चित्रपट निर्मितीच्या वावराचे प्रतिनिधित्व करता. अंदूं ह्या महोत्सवांत विक्रमी  105 देशांतल्यान 2,926 नामांकना  मेळ्ळ्यात.

आंतरराश्ट्रीय जूरीची संक्षिप्त म्हायती:

1. शेखर कपूर (जूरी अध्यक्ष) 

एक फामाद फिल्म निर्मातो, अभिनेतो. निर्मातो शेखर कपूर हाका पद्मश्री, राष्ट्रीय चित्रपट पुरस्कार, बाफ्टा पुरस्कार, राष्ट्रीय समीक्षा मंडळाचो पुरस्कार, फिल्मफेयर पुरस्कार, गोल्डन ग्लोब आनी ऑस्कर पुरस्कार, अशे जायते पुरस्कार मेळ्ळ्यात. ताच्या फिल्मोग्राफींत मासूम (1983), मिस्टर इंडिया (1987), बॅंडिट क्वीन (1994), एलिझाबेथ (1998), द फोर फेथर्स (2002), एलिझाबेथ: द गोल्डन एज (2007), व्हाट्स लव गॉट टू डू विथ इट (2022) हांचो आस्पाव जाता.  भारतीय फिल्म आनी दूरचित्रवाणी संस्थेचे अध्यक्ष, 2020- 2023 ; वांगडी, कान्स  आंतरराष्ट्रीय जूरी 2010; अध्यक्ष,  इफ्फि जूरी 2015.

2. जोस लुईस आल्कायन 

1970 च्या दशकांत फ्लुओरेसेंट ट्यूब मुखेल प्रकाश म्हणून वापरपी पयलो सिनेमाटोग्राफर जोस लुईस आल्केन हाणें बेले इपोक (अकादमी पुरस्कार, उत्कृश्ट परकी भाशेचो चित्रपट, (1993), टू मच (1995), ब्लास्ट फ्रॉम द पास्ट (1999), आनी द स्किन आय लायव्ह इन (2011). ताच्या श्रेयाक मेळिल्ल्या जायत्या भोवमानांत नॅशनल फिल्म अॅवॉर्ड 1989 बेस्ट फोटोग्राफी खातीर गोया पुरस्कार 1989, 1992, 1993, 2002, 2007 बेस्ट सिनेमाटोग्राफी खातीर युरोपीय अकादमी पुरस्कार 2006, स्पॅनिश अकादमी ऑफ सिनेमा आर्ट्स अँड सायन्सेसचें भांगरा पदक 2011, ललित कलेंत मेरिट (2017, 2019). व्हिजन पुरस्कार, लॉझान आनी डी. आनी भांगरा पदक, व्हॅलाडोलिड महोत्सव.

3. जेरोम पॅलार्ड 

जेरोम पॅलार्ड हाणें शास्त्रीय संगीतकार, कला दिग्दर्शक आनी शास्त्रीय रेकॉर्ड लेबलाचे सीएफओ म्हणून काम केलां. डॅनियल टोस्कन डु प्लांटियर हाचेवांगडा ताणें सत्यजीत रे, मेहदी चारेफ, सौलेमेने सिसे, मॉरिस पियालाट आनी झां-चार्ल्स ताचेला हांचे फीचर चित्रपट सह-निर्मिती केल्यो. 1995 ते 2022 मेरेन ताणें कान्स महोत्सवांत सेवा दिली. मार्चे डु फिल्माचो कार्यकारी संचालक म्हूण ताणें सद्या संवसारांतलें मुखेल चित्रपट बाजारपेठ विकसीत केलें. ताणें cinando.com हें ऑनलायन संसाधन, संवाद आनी स्क्रीनिंग प्लॅटफॉर्म स्थापन केलें.

4. कॅथरीन डसर्ट 

15 देशातल्या सुमार 100 चित्रपटांची निर्माती/ सह-निर्माता, कॅथरीन शिजी लिंगहून के (2017), द मिसिंग पिक्चर (2013) आनी एक्सिल (2016) ह्या सिनेमाां खातीर फामाद आसा. तिच्या निर्मिती मदीं, आमोस गिताईची हाइफांतली लायला व्हेनिस 2020 वर्सा सर्त केल्ली. रिथी पान्हाची लेस इराडीयस (इरेडिएटेड) ही बर्लिन 2020 वर्सा बेस्ट डॉक्युमेंटरी जाली. जेरुसलेमांतली आमोस गिताईची ट्रॅमवे आनी रिथी पान्हाची ग्रेव्स विदाउट अ नेम व्हेनिसांत 2018 वर्सा एफ. जे लोकार्नो 2017  इस्वेंत उत्तीम पटकथा. गुरविंदर सिंगाची चौथी कूट (द फोर्थ डायरेक्शन) कान्स 2015  इस्वेंत खेळ्ळी. मिन बहादुर भाम (नेपाळ) कालो पोथी (द ब्लॅक हेन) हिका व्हेनिस 2015 इस्वेंत समीक्षक पुरस्कार फावो जालो; रिथी पान्ह हाच्या ‘द मिसिंग पिक्चर’ ह्या सिनेमाक कान्स 2013 वर्सा अन सर्टेन रिगार्ड इनाम मेळ्ळें.

5. हेलन लीक 

ऑस्ट्रेलियेची एक आदरणीय सृजनशील निर्माती हेलन लीक हिच्या फीचर श्रेयांत कार्निफेक्स (2022), स्वेर्व्ह (2018), वुल्फ क्रीक 2 (2013), हेवन’स बर्निंग (1997), आनी ब्लॅक अँड व्हाइट (2002) हांचो आस्पाव जाता. तिचे चित्रपट व्हेनिस, टोरोंटो, लंडन आनी सिट्जेस (कातालोनिया) ह्या सारक्या 30+ महोत्सवांनी आयल्यात. 2021 थावन ती स्क्रीन ऑस्ट्रेलीया मंडळाची संचालक आसा. 2022 थावन ती काउन्सिल फॉर ह्युमॅनिटीज, आर्ट्स अँड सोशल सायन्सेस (एच.ए.एस.एस.), फ्लिंडर्स युनिव्हर्सिटी, एडिलेडांत आसा, तेन्ना तिका ताची डिस्टिंग्विशड अलुम्नी म्हूण पुरस्कार फावो जालो. चित्रपटांतल्या म्हत्वाच्या सेवे खातीर तिका ऑर्डर ऑफ ऑस्ट्रेलिया (2020) पुरस्कार मेळ्ळा.

* * *

PIB Mumbai | S.Jan/M.Prabhugaonkar/D.Rane