صدر جمہوریہ ہند، محترمہ دروپدی مرمو نے آج (27 نومبر، 2023) کو پر دیپ میں پر دیپ پورٹ اتھارٹی کے زیر اہتمام بوئتا بندنا کی تقریب میں شرکت کی۔ انہوں نے  ورچوئل طور پر ملٹی ماڈل لاجسٹک پارک کا افتتاح کرنے کے ساتھ ساتھ پورٹ ٹاؤن شپ اور اگلی نسل کے ویسل ٹریفک مینجمنٹ اینڈ انفارمیشن سسٹم کے لیے نئے ذخائر اور پانی کی صفائی کے پلانٹ کا سنگ بنیاد بھی رکھا۔

اس موقع پر خطاب کرتے ہوئے صدر جمہوریہ نے کہا کہ بالی یاترا کی تاریخی یادوں کو یاد کرتے ہوئے - ہر سال جاوا، سماترا، بالی وغیرہ کے جزائر پر تاجروں کے علامتی کشتی کا سفر قابل ستائش ہے۔ بالی یاترا ایک منفرد تہوار ہے جو اپنے شاندار ماضی کی یاد میں منایا جاتا ہے۔ قدیم زمانے سے منایا جانے والا یہ تہوار اوڈیشہ کی سمندری تجارت کی خوشحالی کی علامت ہے۔ یہ اوڈیشہ کے لوگوں کے بھرپور ثقافتی شعور کو بھی اجاگر کرتا ہے۔

صدر جمہوریہ نے کہا کہ سمندر ہندوستان کی تجارت، کامرس اور بین الاقوامی تعلقات کو مضبوط کرنے کا ایک بڑا ذریعہ رہا ہے۔ سمندر پر مبنی ادب نے ہندوستانی ثقافت کو بھی تقویت بخشی ہے۔ اوڈیشہ اور دیگر ساحلی ریاستوں میں بحری تجارت کی ایک طویل اور خوشحال روایت تھی۔ تجارت اور کامرس کے علاوہ ان تاجروں نے ہندوستانی فن اور ثقافت کو بیرون ملک پھیلانے میں بھی اہم کردار ادا کیا۔

صدر جمہوریہ نے کہا کہ بحری تجارت ہمارے ملک کی تجارت اور اقتصادی ترقی میں اہم کردار ادا کر رہی ہے۔ انہوں نے کہا کہ حجم کے لحاظ سے ہندوستان کی کل تجارت کا 95 فیصد اور قیمت کے لحاظ سے 65 فیصد سمندری نقل و حمل کے ذریعہ کیا جاتا ہے۔ انہوں نے کہا کہ ہندوستان کی بندرگاہوں کو عالمی معیارات کے مطابق زیادہ کارکردگی کے ساتھ کام کرنے کی ضرورت ہے۔ اس لیے ہندوستانی بندرگاہوں کے بنیادی ڈھانچے کو مزید مضبوط کرنے اور ان کی کارکردگی کو بڑھانے کی ضرورت ہے۔ انہوں نے کہا کہ ساگرمالا پروگرام اس سمت میں ایک قابل ستائش قدم ہے۔ انہوں نے کہا کہ حکومت ہند 'خوشحالی کے لیے بندرگاہیں' اور 'ترقی کے لیے بندرگاہیں' کے وژن کو پورا کرنے کے لیے کام کر رہی ہے۔

صدر جمہوریہ کو یہ جان کر خوشی ہوئی کہ پر دیپ پورٹ کی کارگو ہینڈلنگ کی صلاحیت پچھلی دہائی میں دوگنی ہو گئی ہے۔ یہ مشرقی ساحل پر سب سے بڑی بندرگاہ بننے کے لیے تیار ہے۔ اسے گلوبل میری ٹائم انڈیا سمٹ – 2023 میں ’پورٹ آف آپریشنل ایکسیلنس ایوارڈ‘ بھی ملا۔ انہوں نے یقین ظاہر کیا کہ آج ملٹی ماڈل لاجسٹک پارک کا افتتاح تجارت کی شفاف ترقی کو ایک نئی سمت دے گا۔ انہوں نے کہا کہ ویسل ٹریفک مینجمنٹ اینڈ انفارمیشن سسٹم  (وی ٹی ایم آئی ایس) سے چلنے والے نئے جدید سگنل اسٹیشن اس بندرگاہ کے ذریعہ نیویگیشن کو زیادہ محفوظ اور منظم بنائیں گے۔

۔۔۔۔۔۔۔۔۔۔۔۔۔۔۔۔۔۔۔۔۔

 (ش ح ۔ رض  ۔ت ع  (

1463