Ka Secretary jong ka Tnat Kam Jngoh Kai, ka V Vidyavathi ka la ong ba ka jingkyntiew ia ki kam jngoh kai ha ka thain shatei lammihngi ka dei ban peit bha ia ka jinglong kyrpang jong ka thain. Ka Vidyavathi ka la ong ia kane haba ka la ai jingkren ha ka Business Session ba la pynlong ha ka sngi ba ar jong ka ITM ha Shillong, Meghalaya ban iakren shaphang ki kam kiba iadei bad ka jingkyntiew ia ki kam jngoh kai ha ka thain shatei lammihngi. Ki nongmihkhmat na ki phra tylli ki jylla ka thain ki la ai jingtip shaphang ki jaka jngoh kai ba thymmai bad ki lad kiba don ha ki jylla jong ki. Ki la don ruh ki knowledge session bad ki panel discussion ba la iashim bynta da ki riewshemphang na ka Sorkar bad ki kynhun shimet shaphang ki jingkiew shaphrang bad ka jingkiew ki lad ka leit ka wan ha ka thain.

Ha ka jingai jingkren jong ka, ka Secretary ka la ong ba ka thain shatei lammihngi ka long kaba kyrpang namar ka jingitynnad ka jaka bad ki jingdon jingem kiba iadei bad ka kam jngoh kai. Kane ka thain ka dei kaba bun bha ki jingitynnad ka mariang bad kane ka plie lad bha ia ka Adventure Tourism. Ka Tnat Kam Jngoh Kai ka la pynkhreh ia ka National Strategy for Adventure Tourism bad ka la thung ia ka National Board for Adventure Tourism ban ialam lynti ia ka jingpyntreikam ia kane ka jingpynkhreh kam ban kyntiew ia ki kam jngoh kai ha ka ri. Ka Tnat Kam Jngoh Kai ka la pynkhreh ia ka Adventure Tourism Model Law kaba peit ia ki jingbahkhlieh, ki rukom treikam, ki jingdain kuna, ka jingpynrung kyrteng bad ka jingai ia ka insurance. La phah ia kane sha baroh ki Jylla/UT ba kin ai jingmut halor kane. Ka la kyntu ia ki jylla ka thain shatei lammihngi ba kin iashim bynta ha ka sienjam ban pynkhlain ia ka jingshngain ban pynlong ia ki kam adventure sports ha ka ri ba kynthup ruh ia ka thain shatei lammihngi.

Ka Secretary ka la ong ba da kaba ithuh ia ka jingkiew jong ka experiential tourism, ka Tnat Kam Jngoh Kai ka la pynkhreh ia ka National Strategy for the Promotion of Rural Homestays namar ki homestay ki ailad ia ki nongjngoh kai ba kin sah ha ki jaka kiba kham pher bad ki kyntiew ruh ia ka roi ka par da kaba plie lad seng kam lajong. Ka la kyntu ia baroh ki jylla ka thain ba kin peit ia ka jingpyntreikam ia ka Homestays strategy ban pynurlong ia ka thong vocal for local bad ruh ban kyrshan ia ka jingkyntiew ia ki kam jngoh kai ha ki jaka nongkyndong jong ka thain.

Ka International Tourism Mart ka dei ka prokram ba pynlong shisien shi snem da ka Tnat Kam Jngoh Kai jong ka Sorkar India da ka pali ha man ki jylla ka thain shatei lammihngi. Kane ka mart ka ai rynsan ia ki briew kiba iadon bynta ha kane ka kam ba kin iakynduh ia ki briew kiba iadon bynta ha kine ki kam na kylleng ka ri bad nabar ri. Ka Tnat Kam Jngoh Kai ka pdiang ruh ia ki lad pathai khubor bad ki nongpyniaid ia ki jingleitkai ha kane ka travel mart khnang ban pynsaphriang jingtip shaphang ki kam bad ka jaka jngoh kai kiba don ha ka thain shatei lammihngi khnang ban kyntiew ia ka kam jngoh kai ha ka thain.

*****