নিউ দিল্লিগী প্রাগাতি মৈদানগী হোল নম্বর ৫ তা দিজিতেল ইন্দিয়া পেভিলিয়নদা তুংদা ওইরকপা য়াবা দিজিতেলগী থবকশিং অশেংবা ওইনা উবা ফংলে। নবেম্বর ১৪-২৭,২০২৩ ফাওবা পাংথোক্লিবা ৪২শুবা ইন্দিয়া ইন্তরনেসনেল ত্রেদ ফিয়ারদা মীয়াম্না খ্বাইদগী পাম্নবশিংগী মনুংদা দিজিলোক্কর, য়ু.পি.আই, ই-সঞ্জিবনি, ভাসিনি অমসুং মন কি বাত য়াওরি।

ইলেক্ত্রোনিক্স অমসুং ইনফোর্মেসন তেক্নোলোজি মিনিস্ত্রিনা লিংখৎপা দিজিতেল ইন্দিয়া পেভিলিয়ন অসি অনৌবা তেক্নোলোজিশিং মশক তাক্নবগী শিংথানিঙাই ওইরবা খুদোংচাবা মীয়ামদা ফংহল্লে। ইন্তরএক্তিব দিসপ্লেশিং উৎলি, চহি কাংলুপ খুদিংমক্কী মীওইশিংনা অখঙ-অহৈশিংদগী দি.আইগী থবকশিংগী মরক্তা খঙনবা খুদোংচাবা অমা পীরি। হৈনিংবা পোক্লবা মহৈরোয়শিং, ওফিস কারিবশিং, থৌনা ফরবী নুপী ওন্ত্রেপ্রেনিউয়রশিং, অহলশিং অমসুং দিজিতেলগী থবকশিং পামজবশিংদা অনৌবা ভারতকী অনৌবা তেক্নোলোজিশিং পেভিলিয়নদা উৎলি।

য়ু.পি.আই(য়ুনাইতেদ পেমেন্তস ইন্তরফেস) উৎলিবা অসিদা য়েংলবা লাক্লিবশিংনা শেন য়াওদনা চৎপগী কান্নবশিং খঙবা ঙমগনি। য়ু.পি.আই শীজিন্নবা য়াবা অনৌবা এ.তি.এম অমদগী য়ু.পি.আই মোদতা শেন লৌথোকপা য়াবগী খুদোংচাবশিং উৎলি। শেন লৌথোক্নবা মেছিনগী স্কৃন্দা উৎলিবা ক্বিউ.আর কোদ অমা কস্তমরশিংনা মখোয়গী য়ু.পি.আই এপ্পস শীজিন্নদুনা স্কেন তৌবা য়াগনি। মসিগী খ্বাইদগী নৌবা শেন লৌথোকপগী থবক অসি আই.সি.সি.দব্লিউ(ইন্তরওপরেবল কিয়ারলেস কেস ৱিদ্রোৱাল) মেকানিজমদা য়ুম্ফম ওইবনি অমসুং অথুবদা মতমদা এ.তি.এম মেছিন খুদিংমক্তা শীজিন্নবা য়াহল্লগনি। ফিজিকেল কার্দ দরকার ওইদ্রবা মরম্না, থবক অসিনা স্কিম্মিং অমসুং কার্দ ক্লোন্নিং য়াওনা খদ্রক্কী থবকশিং থিংবা ঙম্লগনি।

দিজিলোক্করগী খুৎথাংদা মীয়াম্না মরুওইবা দিজিতেল দোকুমেন্তশিং হায়বদি বার্থ সর্তিফিকেদশিং, ৱিলগী রেকোর্দশিং, দ্রাইভিং লাইসেন্স, মহৈ-মশিংগী সর্তিফিকেদশিং থমজিন্নবগী খুদোংচাবা অমা পীরি। দিজিতেল দোকুমেন্ত থম্নবগী অনৌবা মফম অমা ওইনা, চে-চাংশিং নাগরিক মিল্লিয়ন ২০০গী মখুত্তা চেকশিন্না থম্নবা খুদোংচাবা দিজিলোক্করনা পীরে। মসিগী অনৌবা মফম অসিনা লৈবাক ঙাকপগী থবকশিং লাইথোকহনবদা নত্তনা অঙম-অথৌশিংনা অয়েৎপা পীবগী থবকশিং হন্থহল্লে। দিজিতেল ইন্দিয়া পেভিলিয়নদা, দিজিলোক্কর এপ্প য়াওবা অচৌবা ফোন অমা থম্লি অমসুং মসিনা কমদৌনা মীয়াম্না চে-চাংশিং অপাম্বা মতমদা মফম অমদগী হেক্তা শীজিন্নবা য়াবগে হায়বা উৎলি।

ভারতমচা খুদিংমক মশাগী লোলদা ইরাই লাইনা ইন্তরনেত অমসুং দিজিতেলগী থবকশিংগী খুদোংচাবা লৌবা য়ানবা ভাসিনিনা পান্দম থম্লি অমসুং ভারতকী লোলশিংদা শেম্বা কন্তেন্ত হেনগৎহল্লে। মীওই খুদিংমক কোনশিনবগী মরুওইবা অদু ভাসিনিনা উৎলে। মখোয় মশাগী লোলদা কন্তেন্ত অদু হন্দোক্নবা ভিজিতরশিংনা ভাসিনি এপ্প দাউনলোদ তৌবা য়াগনি। তেক্স, ভোইস অমসুং কনভর্সকী খুৎথাংদা ওন্থোক্নবগী অয়াবা এপ্প অসিদা য়াওরে। ভারতকী লোল ২২দা হন্দোক্নবগী খুদোংচাবা তেক্স ফিচরনা পীরি অমসুং কনভর্স অমসুং স্পিক ফিচরনা লোল ১৩গী খুদোংচাবা পীরি।

ভিজিতরশিংনা ভোইস বেজ পেমেন্তশি কমদৌনা শীজিন্নগনি হায়বা নৎত্রগা ৱা ঙাংলিঙৈদা খুদক্তা লোল অমদগী লোল অমদা হন্দোকপা য়াবা এপ্প ভাসিনি লাইভ S2S (স্পিচ তু স্পিচ) তম্বা য়াগনি। S2S এপ্প অসিদা ভারতকী লোল ১১ অমসুং মালেমগী লোল ১৪ য়াওরি।

‘ভাসা দান’ অসি প্রোজেক ভাসিনিগী শরুক অমা ওইনা ভারতকী তোঙান-তোঙানবা লোলশিংগী মতাংদা মীয়াম্না লোনগী পুক্কৈদা হাপনিংবশিং হাপ্নবা থৌরাং অমনি। মশাগী লোলশিং ইনাকখুন্নবা লোলগী দেতাগী পুক্কৈ অমা দিজিতেল ওন্থোকপদা মতেং পাংনবা মীয়ামদা খঙহল্লি। মসিগী পান্দমদি ভারতকী লোলশিংগী অচৌবা দেতাসেতশিং শেম্বনি অমসুং মসিনা খুন্নাইগী য়াইফনবা তোঙান-তোঙানবা মরী লৈনবশিংনা এ.আই মোদেলশিং ত্রেন তৌবদা শীজিন্নবা য়াগনি।

মখা তানা, মীয়াম অমসুং কস্তমরশিং লনাই ওইনা ৱারি শান্নবা ‘য়োজনা সাথি’ না লার্জ লেঙ্গোই মোদেলশিং(এল এল এম), এ.আই অমসুং ওতোমেতিক স্পিচ রিক্কনিসন(এ এস আর)গী কান্নবা শীজিন্নরি। মসিগী মরুওইবা পান্দমদি সরকারগী স্কিমশিং, কান্নবা ফংবা য়াবা মীওইশিং অমসুং এপ্লিকেসন পীশিনবগী থবকশিংগী মতাংদা খঙবা হেনগৎহনবা অমসুং দিজিতেল অমসুং ফাইনান্সগী মরমদা খঙহনবনি।

খুঙ্গং অমসুং মনুং-হুঞ্জিনবা মফমশিংদা অনা-লায়য়েংগী খুদোংচাবা ফংহনবদা ই-সঞ্জিবানি(নেসনেল তেলিমেদিসিন সর্বিস)না অচৌবা থৌদাং লৌরি অমসুং মাঙজৌননা অনাবা মীওই মিল্লিয়ন ১৮০গী সেবা তৌখ্রে। ক্লাউদ অমসুং মাইক্রো সর্বিস  আর্কিতেকচরদা শেমগৎপা থবক অসি মখল অনি থোক্না লৈরি; ই-সঞ্জিবানি এ.বি-ঐচ.দব্লিউ.সিনা হব অমসুং স্পোক মোদেলদা থবক তৌরি, হেল্থ অমসুং ৱেলনেস সেন্তরশিংগী কম্মুনিতি হেল্থ ওফিসারশিংনা খুঙ্গংগী অনাবশিংদা তেলি-কন্সলতেসনগী খুদোংচাবা ফংহল্লি। অনিশুবদা, ই-সঞ্জিবানি ও.পি.দিনা অনাবশিংদা তেলিমেদিসিনগী খুদোংচাবা অমা পীরি অমসুং মখোয়গী স্মার্দফোনশিং অমসুং লেপতোপশিংগী খুৎথাংদা মখোয়গী য়ুমশিংদগী অনা-লায়য়েংগী থবকশিংগী খুদোংচাবা লৌনবা মীয়ামদা কান্নবা ফংহল্লি। মসিদা লৈবাক্কী তোঙান-তোঙানবা মফমশিংদা লৈরিবা ই-সঞ্জিবানি তেলিমেদিসিন ক্লিনিকশিংদা লৈরিবা দোক্তরশিংগা ত্রেদ ফিয়ার য়েংবা লাক্লিবশিংগা ৱারি শানবগী খুদোংচাবা পীরি।

মীয়ামগা ই-পাউ ফাওনবগী মালেমদা খ্বাইদগী চাউবা প্লেতফোর্ম ওইরিবা MyGov না মীয়াম হকথেংননা শরুক য়াবগী পান্দমশিং উৎলি। দিজিতেল ইন্দিয়া পেভিলিয়নদা, মীয়াম্না মমিং চৎলবা রেদিওগী থৌরম মন কি বাত শরুক য়ানবগী অফবা খুদোংচাবা অমা পীরি। থা অমগী অরোইবা নোংমাইজিং খুদিংগী অয়ুক পুং ১১ তাবদা ওল ইন্দিয়া রেদিওদা প্রধান মন্ত্রী শ্রী নরেন্দ্র মোদীনা ৱা ঙাংবা অসিদা, ভিজিতরশিংনা মখোয়গী পুক্নিং থৌগৎনিঙাই ওইবা ৱারিশিং প্রধান মন্ত্রীগা হকথেংননা ৱারি শানবা য়াগনি অমসুং তুংদা পাংথোক্কদবা মন কি বাতকী তাঙ্ককশিংগীদমক প্রধান মন্ত্রীগা খন্ন-নৈনবা য়াগনি। মেসেজ অমা রেকোর্দ তৌনবা, ভিজিতরশিংনা মন কি বাত বুত্তা চংবা য়াই, হিন্দী নত্ত্রগা ইংলিসতা মখোয়গী মেসেজশিং রেকোর্দ তৌনবা তোল-ফ্রি নম্বর 1800-11-7800 দা দাইল তৌগদবনি। থৌরাং অসিনা মীয়াম শরুক য়ানবা অমসুং মখোয়গী অনিংবশিং, অনৌবা ৱাখলশিং অমসুং শিংথাবা য়াবা মাইপাকপশিং শরুক য়ানবগী খুদোংচাবা পীরি।

দিজিতেল স্লিংসোতশিং শীজিন্নদুনা মীয়াম্না অনৌবা মওং অমদা ভিজিতরশিংনা ফিদবেক/মেসেজ পীবা য়াগনি। মসিগী হেনবা করি লৈরিবগে? দিজিতেল ইন্দিয়া সেলফি পোইন্তদা ভিজিতরশিংনা ফোতো অমা নমদুনা মদু তেলিপোর্ত তৌদুনা অনৌবা মফম অমদা খুদক্তা য়ৌহন্নবগী খুদোংচাবা পীরি।

তেক্নোলোজিগী তৌবা ঙম্বশিং খঙনবা অঙকপা খুদোংচাবা অমা দিজিতেল ইন্দিয়া পেভিলিয়ন্না ভিজিতরশিংদা পীরি। দিজিতেল নাগরিকশিংগা ৱারি শান্নবা অমসুং মীয়ামদা শক্তি পীনবা মওংদা একজিবিসন অসি শেম-শাবনি।

****