নবেম্বর ১৬,২০২৩দা ইন্দোনেসিয়াগী জাকারতাদা রক্ষ মন্ত্রী শ্রী রাজনাথ সিংহ ১০শুবা অসিয়ান দিফেন্স মিনিস্তরস মিতিং-প্লস শরুক য়াখ্রে। মহাক্কী ৱারোলদা, অসিয়ানগী মরুওইবা অমসুং লমদম অসিদা ৱারি শানবা অমসুং ৱাখল তামিন্নবা হেনগৎহনবদা মসিনা লৌরিবা থৌদাং থাগৎপা ফোঙদোকখি। য়ুনাইতেদ নেসন্স কনভেন্সন ওফ লো ওফ সি(য়ু এন সি এল ও এস).১৯৮২ য়াওনা মালেমগী আইনশিংগী মতুংইন্না মালেমগী সমুদ্রগী শরুকশিংদা জহাস হোনবা, মথক লান্না পাইবা অমসুং আইন্না য়াবা ললোন-ইতিক পাংথোকপগী মনিংতম্বদা ভারতনা থাজবা থম্লি।

তোঙান-তোঙানবা মরী লৈনবশিংগী মরক্তা ৱাখল তামিন্নবা পুরক্নবা লমদম অসিগী সেকুরিতিগী থবকশিং খন্ন-নৈনবা অমসুং চাউখৎ-থৌরাংগী মমি তাহন্নবা শ্রী রাজনাথনা তকশিনখি। লমদম অসিদা মেরিতাইম সেকুরিতি হেনগৎহন্নবা অসিয়ান দিফেন্স মিনিস্তরস মিতিং-প্লসগা লোয়ননা থবক ওইনা পাংথোকপা হিরমশিংদা মতেং পাংনবা থাজবা মহাক্না থমখি।

মুক্নবনা মীওইবগী পুন্সি কয়া মাঙহল্লিবা অমসুং হিংনবগী লম্বীশিং মাঙহল্লিবা, লমদম অসিগী অমসুং মালেমগী থাক্তা তুংদু-লৈতাবদা অকায়বা পীরিবা অমসুং চীঞ্জাক অমসুং ইনর্জি ফংহনবদা অপনবা পীরিবা অসিগী মতাংদা শ্রী রাজনাথ সিংহনা হায়খি লমদম অসিদা শান্তি, নুংঙাই-য়াইফবা অমসুং সেকুরিতি পুরক্নবা অসিয়ান অমসুং প্লস কন্ত্রিশিংগী মরক্তা মপুংফানা মতেং পীন্নবা ভারতনা থাজবা থম্লি। মহাত্মা গান্ধীগী মমিং চৎলবা ৱারোল “ শান্তি ফংনবা অতোপ্পা লম্বী অমতা লৈতে, শান্তি হায়বসিনা অমতা ঙাইরবা লম্বীনি” মহাক্না পনখি।

রক্ষ মন্ত্রী হায়খি লমদম অসিগী অমসুং মালেমগী শান্তি অমসুং তুংদু-লৈতাবা পুরক্নবা ৱারি শানবা অমসুং দিপ্লোমেসিগী পাম্বৈদা থাজবা থম্লি। যুগ অসি লালগী মতম নত্তে হায়বা পাউজেল অসি মালেমগী মীয়ামদা ভারতনা পীবা পাউজেলনি। ঐখোয় অমসুং মখোয়গী মরক্তা হায়বা ৱাখল্লোন অসি থাদোক্কদবনি। 

য়ু.এন পিছ কিপ্লিং ওপরেসনশিং অমসুং সমুদ্রগী প্লাস্তিক পোল্লুসন থেংননবা থবকশিংদা ভারত-অসিয়ান্না পায়খৎলিবা থবকশিংদা অসিয়ান মেম্বর লৈবাকশিংনা থৱায় য়াওনা শরুক য়াবদা শ্রী রাজনাথ সিংহনা থাগৎপা ফোঙদোকখি। চহি অসিগী মেদা পাংথোকখিবা অহানবা অসিয়ান-ইন্দিয়া মেরিতাইম এক্সরসাইজদা অসিয়ান মেম্বর লৈবাকশিং শরুক য়াখিবা অমসুং ২০২০-২০২৩ সাইকলদা ভারত অমসুং ইন্দোনেসিয়ানা কো-চিয়ারশিং ওইরিবা হুমেনিতরিয়ান এসিস্তেন্স এন্দ দিজাস্তর রিলিফ(হাদর)গী এক্সপার্ত ৱার্কিং গ্রুপতা শরুক য়াবদা মহাক্না থাগৎপা ফোঙদোকখি।

অসিয়ান লমদম য়াওনা মালেমগী শান্তি অমসুং সেকুরিতিদা তেরোরিজমগী অচৌবা শিংনবা অমা লৈরবা অসি থেংন্নবা এ.দি.এম.এম-প্লসনা হৌদোকপা কাউন্তর-তেরোরিজমগী এক্সপার্ত ৱার্কিং গ্রুপকী কো-চিয়ার ওইনবা ৱাফম ভারতনা পুখৎখি। লমদম অসিগী লৈবাকশিংদা তেরোরিজমগী অচৌবা শিংনবা অমা লৈবদগী ৱাফম অসি অসিয়ান দিফেন্স মিনিস্তরস মিতিং-প্লসনা শৌগৎখি।

*******