U Myntri Rangbah Duh, u Narendra Modi u la ai jingkren ha ka prokram kaba rakhe ia ka Janjatiya Gaurav Diwas, 2023 ha Khunti, Jharkhand. Ha kane prokram, u Myntri Rangbah Duh u la pyllait paidbah ia ka ‘Viksit Bharat Sankalp Yatra’ bad ka Pradhan Mantri Particularly Vulnerable Tribal Groups Development Mission. U la pyllait paidbah ruh ia ka bynta jingsiew ba 15 jong ka PM-KISAN. U Modi u la buh maw nongrim bad aiti sha ka ri ia ki projek ha Jharkhand kiba shongdor haduh T 7200 klur ha ki kam bapher bapher kum ka rel, surok, pule puthi, dewiong, Petroleum bad Natural Gas. U la leit jngoh ruh ia ka exhibition ba la pynlong ha kane ka sngi.

La pyni ruh ia ka khubor jong ka President jong ka India, ka Droupadi Murmu lyngba ka video ha kane ka prokram.

U Myntri Rangbah Duh u la ialam ruh ia ka jingbam smai Viksit Bharat Sankalp ha kane ka prokram.

U Myntri Rangbah Duh u la sdang ia ka jingai jingkren jong u da kaba kynmaw ia ka jingleit jong u sha ka shnong Ulihatu, ka jaka ha kaba la kha ia u Bhagwan Birsa Munda bad ruh sha ka Birsa Munda Memorial Park cum Freedom Fighter Museum ha Ranchi mynta ka sngi. U la kren ruh shaphang ka jingpyllait paidbah ia ka Freedom Fighter Museum ar snem mynshuwa ha kane ka sngi. U Modi u la ai khublei ia baroh ki briew jong ka ri ha kane ka Janjatiya Gaurav Diwas. U la ai khublei ruh halor ka sngi ba la thaw ia ka Jharkhand bad u la kdew sha ki jingnoh synniang jong u Myntri Rangbah Duh ba rim, u Atal Bihari Vajpayee ha ka jingsdang jong kane ka jylla. U la ai khublei ruh ia ki briew jong ka Jharkhand halor ki projek ka roi ka par ha ki kam bapher bapher kum ka rel, surok, pule puthi, dewiong, Petroleum bad Natural Gas ia kiba u la buh maw nongrim. U la ong ba u dap da ka jingkmen ba baroh ki lynti rel ha Jharkhand mynta ki dei kiba iaid da ka bording elektrik.

Ha ka jingkren jong ki jingeh kiba u Bhagwan Birsa Munda u la iakynduh na ka bynta ka burom jong ki riewlum, u Myntri Rangbah Duh u la ong ba ka Jharkhand ka don jingiadei bad shibun ki riewkhraw kiba dei ki riewlum. U la kren shaphang ki riewkhraw kum u Tilka Manjhi, Sidhu Kanhu, Chand Bhairav, Phulo Jhano, Nilambar, Pitambar, Jatra Tana Bhagat bad Albert Ekka kiba la wanrah burom ia kane ka jaka. U Myntri Rangbah Duh u la ong ba ki nongiakhun Adivasi ki la iashim bynta ha ka jingiakhih na ka bynta ka jinglaitluid ha baroh ki bynta jong ka ri bad u la jer kyrteng ia u Govind Guru na Mangarh Dham, Tantya Bhil na Madhya Pradesh, Bhima Nayak, Martyr Veer Narayan Singh na Chhattisgarh, Veer Gundadhur, Rani Gaidinliu na Manipur, Veer Ramji Gond na Telangana, Alluri Sitaram Raju na Andhra Pradesh, Rani Durgavati na Gond Pradesh. U la ong ba kine ki riewkhraw kim shym la ioh ia ka jingithuh ba ki dei ban ioh bad kumta, u la ong ba u kmen bha ban kynmaw ia kine ki riewkhraw ha ka Amrit Mahotsava.

Ha ka jingkren shaphang ka jingiadei jong u bad ka Jharkhand, u Myntri Rangbah Duh u la kdew sha ka Ayushman Yojana kaba la plie paidbah na Jharkhand. U Myntri Rangbah Duh u la ong ba ar tylli ki sienjam ba khraw ki dei kiba plie paidbah na Jharkhand mynta ka sngi. Kaba nyngkong ka dei ka Viksit Bharat Sankalp Yatra ka ban iarap ban pynurlong ia ki thong jong ka Sorkar bad ka PM Janjati Adivasi Nyaya Maha Abhiyan ka ban ai jingiada ia ki riewlum kiba don ha ka jingma ban duh jait.

U Modi u la ban jur halor ka jingdonkam ban peit bniah ia saw tylli ki ‘Amrit Stambh jong ka Viksit Bharat’ lane ki rishot jong ka India kaba la kiew shaphrang kiba long ka bor ki longkmie ne ka Nari Shakti, ki nongpynmih mar bam jong ka India, ki samla jong ka ri bad ki briew ka India kiba pdeng bad duna ka ioh ka kot. U la ong ba ka jingstet ka roi ka par ha India ka shong ha ka jinglah ban pynkhlain ia kine ki saw tylli ki rishot jong ka roi ka par. U Modi u la ong ba u sngew hun halor ki sienjam bad ki kam ba la pyndep ban pynkhlain ia kine ki saw tylli ki rishot ha kine ki 9 snem ba la dep jong kane ka Sorkar.

U Myntri Rangbah Duh u la kren shaphang ka jingjop jong ka Sorkar ban pyllait ia palat 13 klur ngut ki briew na ka jingduk. “Ka seva kaal jong ngi ka la sdang haba kane ka Sorkar jong ngi ka la wan ha ka bor ha u snem 2014,” u la ong da kaba bynrap ba ki don shibun bha ki briew ha ka ri ki bym shym la ioh ia ki jingshakri. U la ong ba ki ba duk ba suk ki la duh jingkyrmen namar ka rukom treikam torti jong ki Sorkar ba mynshuwa. “Kane ka Sorkar mynta ka la sdang treikam da ka mynsiem jong ka jingshakri,” u la ong da kaba bynrap ba ki ba duk ba suk bad ki ba shem jingeh ki la dei kiba kongsan tam jong kane ka Sorkar kaba la pynpoi ia ki jingshakri sha ki jyngkhang iing jong ki. U la ong ba ka dei ka rukom treikam jong kane ka Sorkar kaba la wanrah ia ka jingkylla. U Myntri Rangbah Duh u la pyntip ba shuwa u 2014, ka jingkhuid ha ki shnong ka long tang 40% katba mynta, ka ri ka thew ban pynpoi lut sha baroh ki jaka. Ha ka jingkren shaphang ki jingjop hadien u snem 2014, u Myntri Rangbah Duh u la kren shaphang ka jingdon ki connection LPG kaba la kiew na ka 50-55% ki shnong sha kumba 100% mynta, ka jingai ia ki dawai tika ia ki khynnah khyllung ka la poi sha ka 100% na ka 55%, ki longiing kiba ioh um kor ki long 70% na ka 17% hadien ba la ioh jinglaitluid ka ri. “U Modi u la peit bniah ia kito kiba shem jingeh,” u la ong.

U Modi u la ong ba ka Sorkar ka khlem ngop ha ka jingtynjuh ki soh kiba suk ban kheit hynrei ka la peit ia ki kam kiba la sahteng la bun bun snem. U la ai nuksa da ka jingpynpoi bording elektrik sha 18,000 tylli ki shnong kiba sah ha ka jingdum. Ia kane la leh ha ka rukom treikam kaba la buh da ka por katkum ka jingpynbna ba la ai na Red Fort. Ia ki dak jong ka pule puthi, ka koit ka khiah bad ka jingsuk ha ka jingim la kyntiew ha 110 tylli ki distrik kiba dang sahdien. Ka prokram Aspirational District ka la wanrah jingkylla ha kine ki distrik. Kine ki distrik ki dei kiba bun tam ki riewlum, u la ong. “Ia ka jingseisoh jong ka prokram Aspirational District mynta la pyniar lyngba ka prokram Aspirational Block”, u la ong.

U Myntri Rangbah Duh u la ong, “Ka jingplie lad ban ngeit ha kano kano ka niam ka wan tang haba ngi pynduh jait ia baroh ki lad ban peit bein ia kino kino ki briew jong ka ri,” da kaba bynrap ba ka hok ha ka imlang sahlang ka wan tang haba baroh ki ioh ia ki jingmyntoi na ki skhim Sorkar ha kajuh ka rukom. Kane ka dei ka mynsiem jong ka ‘Viksit Bharat Sankalp Yatra’ ka ban bteng haduh ka 26 tarik u Kyllalyngkot ha une u snem ban wan bad kaba sdang mynta ka sngi ha ka Jayanti jong u Bhagwan Birsa Munda. “Ha kane ka jingiaid lynti, ka Sorkar kan leit sha baroh ki shnong jong ka ri bad kan pynlong ba man u briew uba shem jingeh bad uba duk ba suk un ioh jingmyntoi na ki skhim Sorkar,” la ong u Myntri Rangbah Duh.

U Myntri Rangbah Duh u la kren shaphang ka jingpynlong ia ka Gram Swaraj Abhiyan ha u snem 2018 ha kaba la phah shi hajar ngut ki ophisar sha ki shnong ban ai jingtip shaphang hynniew tylli ki skhim ba kongsan jong ka Sorkar bad u la ong ba u ngeit skhem ba ka Viksit Bharat Sankalp Yatra kan long kaba seisoh kumne kumjuh. “Nga khmih lynti ia ka sngi ha kaba baroh kiba duk ba suk ki don ka card reshon ban ioh ei ia ka bam, ka gas connection na ka skhim Ujjwala, ka bording elektrik kaba poi sha ka iing jong ki, ka um kor ha iing, ka Ayushman Card bad ka iing kaba bha,” u la ong. U Myntri Rangbah Duh u la batai ruh shaphang ka jingthmu jong u na ka bynta ki nongrep bad ki nongbylla kiba ioh ia ka bai bam tymmen bad ki samla kiba shim bynta ha ka Mudra Yojna ban pynurlong ia ki jingthmu jong ki. "Ka Viksit Bharat Sankalp Yatra ka dei ka jingpynthikna u Modi ia ki ba duk ba suk, kiba shem jingeh, ki longkmie, ki samla bad ki nongrep jong ka ri,” u la ong.

U Modi u la ong ba ka nongrim kaba kongsan na ka bynta ka India kaba la kiew shaphrang ka dei ka PM JANMAN lane ka PM Janjati Adivasi Nyaya Maha Abhiyan. U la ong ba kadei ka Sorkar jong u Atal Bihari Vajpayee kaba la wanrah ia ka tnat kyrpang ia ki jaitbynriew riewlum bad kaba don la ka jong ka bynta ha ka mang tyngka. U la ong ba ka mang tyngka na ka bynta ka bha ka miat jong ki riewlum ka dei kaba la kyntiew 6 shah haba ianujor bad ki por kiba la dep. U Myntri Rangbah Duh u la ong ba hapoh ka PM JANMAN, ka Sorkar kan ai jingiarap ia ki riewlum bad ki jaitbynriew kiba sahdien kiba dang bun kiba sah ha ki jaka khlaw. U la ong ba ka Sorkar ka la lap 75 tylli kine ki jaitbynriew kiba don da ki lak kiba sah ha palat 22 tylli ki shnong hapoh ka ri. “Ki Sorkar mynshuwa ki la trei ban ioh ia ki jingkhein hynrei nga kwah ban pyniasoh ia ki jingim, ym ki jingkhein. Da kane ka jingthmu, ka PM JANMAN ka la sdang mynta ka sngi”, la ong u Myntri Rangbah Duh. U la pyntip ruh ba ka Sorkar Pdeng kan pynlut haduh T 24,000 klur ha kane ka campaign kaba heh.

U Myntri Rangbah Duh u la ai jingsngewnguh ia ka President Droupadi Murmu kaba la ieng skhem na ka bynta ka roi ka par jong ki riewlum. U la ong ba ka dei kaba ai mynsiem ia ka roi ka par kaba ialam lynti da ki longkmie. U Myntri Rangbah Duh u la kren shaphang ki sienjam ba la shim ban pynythikna ia ka roi ka par ba ialam lynti da ki longkmie ha kine ki snem ba la dep. “Ka Sorkar jong ngi ka la wanrah ia ki skhim na ka bynta ki longkmie da kaba peit ia baroh ki bynta jong ka jingim jong ki,” u la ong da kaba bynrap ba ki sienjam kum ka Beti Bachao Beti Padhao, la ki jong ki painkhana ia ki khynnah kynthei ha ki skul, PM Awas Yojana, ka jingplie ia ki Sainik School bad Defence Academy, ka jingshim 70% ki jingshim ram Mudra da ki longkmie, ka jingai jingiarap ia ki Self-help group bad ka Narishakti Vandan Adhiniyam ki la pynkylla ia ki jingim mynta. “Mynta ka dei ka jingleh niam kaba kyntang jong ka Bhai Dooj. Une u hymen shynrang u kular ia baroh ki para kynthei jong ka ri ba ka Sorkar jong ngi kan bteng ban weng ia ki jingeh hakhmat ka roi ka par jong ki para kynthei jong ngi. Ka Amrit Stambh jong ka bor ki longkmie kan don ka bynta kaba khraw ha ka jingtei ia ka India kaba la kiew shaphrang,” la ong u Myntri Rangbah Duh.

U Modi u la ong ba ka PM Vishwakarma Yojana ka pyni ba ka Sorkar Pdeng ka ieng skhem na ka bynta ka jingplie lad ia baroh ki sap jong ki briew ha kane ka jingiaid lynti sha ka India kaba la kiew shaphrang. U la ong ba kane ka skhim kan ai jinghikai katkum ka juk mynta bad ki atiar ia ki paralok Vishwakarma. “Yn pynlut 13 hajar klur ha kane ka skhim”, u la ong.

Ha ka jingkren shaphang ka bynta jingsiew kaba 15 jong ka PM Kisan Samman Nidhi kaba la pyllait mynta ka sngi, u Myntri Rangbah Duh u la ong ba palat T 2,75,000 klur ka dei kaba la phah sha ki account jong ki nongrep haduh mynta. U la kren ruh shaphang ka Kisan Credit Card na ka bynta ki nongri jingri bad ki nongri dohkha, ka jingpynlut haduh T 15,000 klur da ka Sorkar na ka bynta ka jingai dawai tika ia ki jingri, ka jingiarap pisa hapoh ka Matsya Sampada Yojana ban kyntiew ia ka kam ri dohkha bad ka jingseng jong 10 hajar tylli ki Farmer Produce Union ba thymmai ha ka ri kaba la ialam sha ka jingpynduna ka jinglut jingsep jong ki nongrep da kaba plié lad shuh shuh sha ki iew. U Myntri Rangbah Duh u la kren ruh shaphang u snem 2023 ba rakhe kum ka International Millet Year bad ki sienjam jong ka Sorkar ban pynpoi ia ki Shri Anna sha ki iew ha kiwei kiwei ki ri.

U Myntri Rangbah Duh u la ong ba ka roi ka par jong ka Jharkhand ka la wan namar ka jingduna ki kam pyntriem Naxalite ha ka jylla. U la ong ba shen ka jylla kan sa dap 25 snem bad kumta u la kyntu ia ka jingpynpoi salonsar ia 25 tylli ki skhim ha Jharkhand. U la ong ba kane kan pynstet shuh shuh ia ka roi ka par jong ka jylla bad ka jingsuk ha ka jingim. “Ka Sorkar ka ieng skhem na ka bynta ka jingpyniar ia ka pule puthi bad ka jingplie lad ia ki samla,” la ong u Modi ha kaba u la kren ruh shaphang ka national education policy kaba plié lad ia ki samla ba kin ioh jinghikai shaphang ki kor bad ka engineering ha ka ktien tynrai. U la ong ba ha kine ki 9 snem ba la dep la seng palat 300 tylli ki skul bah bad 5,500 tylli ki kolej ba thymmai ha kylleng ka ri. U la kren ruh shaphang ka Digital India campaign bad ka jingkiew ka India sha ka kyrdan kaba lai ha ka ioh ka kot ha kaba don shi lak tylli ki start-up. U Modi u la kren ruh shaphang ka jingplie paidbah ia ki hostel ba thymmai ha IIM Campus ha Ranchi bad IIT-ISM, Dhanbad.

Ha ka jingpynkut ia ka jingkren jong u, u Myntri Rangbah Duh u la ong ba u ngeit skhem ba ki saw tylli ki Amrit Stambh jong ka Amrit Kaal kiba long ka bor jong ki longkmie, ka bor jong ki samla, ka bor jong ki kam rep bad ka bor jong kiba duk ba suk jong ka ri kin kyntiew ia ka India sha ki kliar kiba thymmai bad kin pynkylla ia ka India sha ka ri kaba la kiew shaphrang.

U Lat ka Jylla Jharkhand, u C. P. Radhakrishnan, u Myntri Rangbah ka Jharkhand, u Hemant Soren, U Myntri Khynnah ka tnat Tribal Affairs, u Arjun Munda ki la iadon lang ha kane ka sngi ha ryngkat kiwei kiwei.

Ka Nongrim

Viksit Bharat Sankalp Yatra

Ka la dei ka jingpyrshang ba dang iai bteng jong u Myntri Rangbah Duh ban pynthikna ia ka jingpynpoi ia baroh ki skhim ba kongsan jong ka Sorkar da kaba pynthikna ba ki jingmyntoi na kine ki skhim ki poi sha baroh kiba dei ban ioh ia kine hja ka por kaba biang. Ha ka sienjam kaba heh na ka bynta ka jingpynurlong ia kane ka jing thmu, u Myntri Rangbah Duh u la pyllait paidbah ia ka ‘Viksit Bharat Sankalp Yatra’ ha ka Janjatiya Gaurav Diwas.

Kane ka Yatra kan peit bniah ia ka jingai jingtip ia ki briew shaphang ki jingmyntoi na ki skhim kiba iadei bad ka jingkhuid jingsuba, ki jingshakri ha ki kam pisa, ka bording elektrik, ka jingioh ia ka tyndong LPG, ki iing sah ia ki briew kiba duna jingioh, ka jingshngain ha ka jingioh mar bam, ka bam kaba tei met, ki lad ai jingsumar kiba shngain, ka um dih kaba khuid bad kiwei kiwei. Ia ka jingpynrung kyrteng ia kito kiba dei ban ioh jingmyntoi yn leh katkum ki jingshem ba ioh ha kane ka Yatra.

U Myntri Rangbah Duh u la pyllait paidbah ia ki kali IEC (Information, Education and Communication) ha Khunti, Jharkhand kaba long ka dak jong ka jingsdang jong ka ‘Viksit Bharat Sankalp Yatra’. Kane ka Yatra kan sdang shuwa na ki distrik ba don bun ki riewlum bad shuwa ka 25 tarik u Kyllalyngkot 2024 kan poi sha baroh ki distrik jong ka ri.

PM PVTG Mission

Ha kane ka prokram, u Myntri Rangbah Duh u la plie paidbah ruh ia ka - ‘Pradhan Mantri Particularly Vulnerable Tribal Groups (PM PVTG) Development Mission’. Ki don 75 ngut ki PVTG ha 18 tylli ki Jylla & UT kiba sah ha 22,544 ki shnong (220 tylli ki district) kiba don haduh 28 lak ngut ki nongshong shnong.

Kine ki jait bynriew ki sah ha ki jaka kiba jngai, kiba jynjar ban poi bad bun sien ha ki jaka khlaw bad kumta la pynkhreh ia ka mission ban pynbiang ia ki jingdonkam jong ki longiing PVTG kum ki surok bad ka jingiasoh bad ki lad telecom, ka bording, ki iing ba skhem, ka um kaba khuid, ka jingkhuid ha ka shnong ka thaw, ki lad sha ka pule puthi, ka koit ka khiah bad ka bam kaba tei bad ruh ki lad kamai jakpoh kiba iaineh.

Shuh shuh, yn pynthikna ia ka jingpynpoi ia ka PMJAY, Sickle Cell Disease Elimination, TB Elimination, 100% immunization, PM Surakshit Matritva Yojana, PM Matru Vandana Yojana, PM Poshan, PM Jan Dhan Yojana bad kiwei kiwei.

Ka bynta jingsiew ba 15 jong ka PM-KISAN bad kiwei kiwei ki sienjam na ka bynta ka roi ka par

Ha ka sienjam kaba pyni ia ka jingieng skhem u Myntri Rangbah Duh na ka bynta ka bha ka miat jong ki nongrep, la pyllait ia ka bynta jingsiew kaba 15 kaba kumba T 18,000 klur hapoh ka Pradhan Mantri Kisan Samman Nidhi (PM-KISAN) lyngba ka direct benefits transfer sha palat 8 klur ngut ki nongrep. Hapoh kane ka skhim, haduh mynta, la pynpoi palat T. 2.62 lak klur sha ki account jong ki nongrep ha ki 14 tylli ki bynta.

U Myntri Rangbah Duh u la aiti sha ka ri bad buh nongrim ia ki projek kiba shongdor kumba T 7,200 klur ha ki kam bapher bapher kum ka rel, surok, pule puthi, dewiong, Petroleum bad Natural Gas.

Ki projek ba la buh nongrim da u Myntri Rangbah Duh ki kynthup ka four laning jong ka 52 km ka bynta Mahagama - Hansdiha jong ka surok bah NH133; ka four laning jong ka 45 Km ka bynta Basukinath - Deoghar jong ka surok bah NH114 A; KDH-Purnadih Coal Handling Plant; ki jingtei ba thymmai ha IIIT Ranchi.

Ki projek ban plié paidbah bad yn aiti sha ka ri ki kynthup ia ka campus ba thymmai jong ka IIM Ranchi; ka Hostel ba thymmai jong ka IIT ISM Dhanbad; Petroleum Oil and Lubricants (POL) depot ha Bokaro; ki projek rel kum ka doubling jong ka bynta Hatia-Pakra, Talgaria - Bokaro, bad Jarangdih-Patratu. Shuh shuh, u Myntri Rangbah Duh u la aiti sha ka ri ia ka jingpyniaid bording pura ia baroh ki rel ha Jharkhand.

***