ঙসি জপানগী ওসাকাদা পাংথোকপা জি-৭ ত্রেদ মিনিস্তরশিংগী মীফমদা কম্মর্স অমসুং ইন্দস্ত্রি, কঞ্জুমর এফেয়ার্স, ফুদ অমসুং পব্লিক দিস্ত্রিবিউসন অমসুং তেক্সতাইলগী য়ুনিয়ন মিনিস্তর শ্রী পিয়ুস গোয়াল শরুক য়াখ্রে। সপ্লাই চেন রিসিলিয়েন্স ফগৎহন্নবগী মতাংদা শ্রী গোয়ালনা মরুওইবা ৱাফম অমা ফোঙদোকখ্রে অমসুং হিরম অসিদা পাউতাক কয়া পীখি। মহাক্না হায়খি কোবিদ-১৯ লায়চৎ অমসুং মালেমগী হৌজিক ওইরিবা ফিবম অসিনা মরম ওইদুনা হৌজিক লৈরিবা সপ্লাই চেনশিংদা অকায়বা থোকহনবদগী পোৎ-চৈগী মমল হেনগৎলে অমসুং মালেমগী ওইনা পোৎকী মমল হেনগৎলে।

শ্রী গোয়ালনা পব্লিক-প্রাইভেদ পার্তনরশিপ, মরুওইবা ইনফ্রাস্ত্রকচরদা শেন থাদবা অমসুং সপ্লাই চেনশিংগী অনৌবা থবকশিং অমসুং দিজিতেল ওন্থোকপগী মতাংদা থবক পায়খৎনবা পুক্নিং থৌগৎখ্রে। সপ্লাই চেন মখল কয়া থোক্না খায়দোকপা অমসুং হিরম অসিদা থবক তৌরিবা মীওইশিং স্কিল পীবা অমসুং রি-স্কিল্লিংগী তঙাইফদবশিং শ্রী গোয়ালনা ফোঙদোকখি। ঙমখৈ ৱাংমা লান্না ললোন-ইতিক অমসুং সপ্লাই চেনশিং পাংথোক্নবা চৎন-কাংলোনশিং শেম্নবা সরকারশিং মতেং পীন্নবা শ্রী গোয়ালনা তকশিনখি। জি-২০গী নিউ দিল্লি দিক্লারেসন্দা পনখিবা জি.ভি.সি মেপ্পিং তৌনবা জেনেরিক ফ্রেমৱার্ককী ৱাফম মহাক্না নিংশিংখি। 

মীফম অদুদা সরকারশিং, প্রাইভেদ সেক্তর অমসুং মালেমগী লুপশিং হায়বদি ও.ই.সি.দি, দব্লিউ.তি.ওগী মীহুৎশিং শরুক য়াখি। প্রাইভেদ সেক্তর অয়াম্বনা খুদোংথিবা কয়া মায়োক্নবা ঙম্বা সপ্লাই চেনশিং শেমগৎপগী মতাংদা মখোয়না থেংনবা অফবা থবকশিংগী মতাংদা পাউদমখি। ইন্দিয়াদা মখোয়না থেংনবশিংগী মতাংদা সুজুকিনা পাউদমখি। কমদৌনা মখোয়না থাজনিঙাই ওইবা অমসুং ভেন্দরদা য়ুম্ফম ওইদুনা সপ্লাই চেন শেমগৎপগে হায়বগী মতাংদা সুজুকিনা পনখি অমসুং ভারত্তা মখোয়গী সপ্লাই চেনশিংদা চাদা ৯৫ লৈবাক মনুংদা পুথোকচবা ঙমখি হায়না পনখি। মখোয়না থিজিনবা অমদা মালেমগী ভেলু চেনশিংদা ভারতনা শরুক য়াবা হেনগৎলক্লে হায়না ই.আর.আই.এনা পনখি।

অস্ত্রেলিয়া, চিলি, ইন্দোনেসিয়া অমসুং কেনিয়াগী মিনিস্তরশিংনা মখোয়গী ওইবা ৱাফমশিং ফোঙদোকখি অমসুং হিরম অসিদা পাউতাকশিং পীখি।

শ্রী গোয়ালনা মিনিস্তর কয়াগা নাকল অনিগী ওইনা উনখি।  শ্রী গোয়ালনা জপানগী ইকোনোমি, ত্রেদ অমসুং ইন্দস্ত্রিগী মিনিস্তর নিসিমুরা য়াসুতোসি, য়ু.কেগী বিজিনেস অমসুং ত্রেদকী সেক্রেতরি ওফ স্তেৎ কেমি বাদেনোক, অস্ত্রেলিয়াগী ত্রেদ অমসুং তুরিজম মিনিস্তর দোন ফারেল, য়ুনাইতেদ স্তেৎ ত্রেদ রিপ্রসেন্তেতিপ, এম্বেসেদর কেথেরিন তাই, জর্মনিগী ইকোনোমিক এফেয়ার্স অমসুং ক্লাইমেত এক্সনগী মিনিস্তর উদো ফিল্লিপ উনখি। মরুওইবা ৱাফমশিং হায়বদি লৈবাক অনিগী ললোন-ইতিক, নন-তরিফকী অথিংবশিং লৌথোকপা, হৌজিক চৎথরিবা ফ্রি ত্রেদ এগ্রিমেন্তগী ফিবমগী মতাংদা অনৌবা পাউশিং পীনবা অমসুং দব্লিউ.তি.ওগী পাংথোক্কদৌরিবা মিনিস্তরশিংগী মীফমগী মতাংদা খন্নখি। শ্রী গোয়ালনা দব্লিউ.তি.ওগী দিরেক্তর জেনেরেল ঙোজি অমসুং মিতসুই, জপান অমসুং জপান-ইন্দিয়া বিজিনেস কোওপরেসন কম্মিতি(জি আই বি সি সি)গী চিয়ারমেন তাতসুও য়াসুনাগাৱা উনখি।

জি-৭ অসি মালেমগী মরুওইবা লৈবাক তরেৎনা শাবা সরকারশিংগী ফোরম অমনি। জি-৭দা মালেমগী লন-থুমগী তঙ্খায় অমা, জি.দি.পিগী চাদা ৩০-৪০ অমসুং মালেমগী অপুনবা মীশিংগী চাদা ১০ লৈরি। ওসাকাদা পাংথোকপা ত্রেদ মিনিস্তরশিংগী মীফমদা শরুক য়ানবা জ-৭না চেবাউ পীরকপা লৈবাকশিংগী মনুংদা ভারত য়াওরি।

****