ভারতকী রাস্ত্রপতি, শ্রীমতি দ্রৌপদি মুর্মুনা ঙসি (ওক্তোবর ১৯,২০২৩) বিহারগী মোতিহারিদা লৈবা মহাত্মা গান্ধী সেন্ত্রেল য়ুনিভর্সিতিগী অহানবা কোনভোকেসন্দা শরুক য়াখ্রে অমসুং ৱা ঙাংখ্রে।

মহৈরোইশিংদা ৱা ঙাংলদুনা, রাস্ত্রপতিনা হায়খি মদুদি ভারত্তা মহাত্মা গান্ধীনা অহানবা চৎথখিবা সত্যগ্রহবু নীংশিংবা ওইনা লিংখৎখিবা য়ুনিভর্সিতি অসিগী মহৈরোইশিংনি। য়ুনিভর্সিতি অসিগী মহৈরোই অমা ওইনা, মখোয়গা মালেম পুম্বদা ইকাই খুম্নরিবা মমল নাইদ্রবা পুকৈ অমগা শম্নরে।

রাস্ত্রপতিনা হায়খি মদুদি গান্ধীজিনা থম্লম্বা লন অসিবু খঙননবা অমসুং লৌশিন্ননবগীদমক্তা অচম্বা অমসুং অচুম্বগী অফবা ফলশিং অদুবু খঙবা মথৌ তাই। অচম্বা অমসুং অচুম্বগী লম্বী অসিনা অশেংবা নুংঙাইবা, শান্তি অমসুং মিংচৎকী লম্বীনি হায়না মহাক্না আপিল তৌখি। মহাক্না মহৈরোইশিংবু ৱাখলদা, ৱাঙাংদা অমসুং থবকশিংদা বাপুনা তাকপীরম্বগী মতুং ইন্না অচুম্বগী লম্বীদা চৎননবগীদমক্তা পুক্নিং লেপ্ননবা হায়খি।

রাস্ত্রপতিনা হায়খি মদুদি গান্ধীজিনা অহিংশা, মীনুংশি, অফবা লমচৎ অমসুং ওইজবা থাদোকপগী ৱাখল্লোনশিংদা মীয়ামগী থাজবা হেনগৎহনখি। মহাক্না ঐখোয়গী সমাজ, রাজনিতি অমসুং স্পিরিচুৱেলিতিগা ভারতমচা ওইবগা অনিগী মরক্তা য়াম্না অকনবা মরি লৈনহনখি। মালেমদা লৈরিবা মীওই কয়ানা গান্ধীজিদা ভারতকী মশক উরি।

রাস্ত্রপতিনা পুৱারী ওইরবা চম্পারন সত্যগ্রহগী সমাজ শেমগৎলকপদসু য়াম্না শিংথানিঙাই ওইরবা ইথিল অমা লৈহনখি হায়না হায়খি। খোঙজং অদুদা, মীপুম খুদিংমক্না কাংলুপকী খেন্নবা থিদনা পুন্না থোংমিন্নবা অমসুং চামিন্নবা হৌরকখি। চহি ১০৬ লোমগী মমাংদা, গান্ধীজিনা হায়জবদগী, চম্পারনগী মীয়াম্না মান্নবা খুন্নাই অমসুং অপুনবগী শক্তি পুখৎলকখি অমসুং ব্রিতিশ সাসনবু মরু লুকহনখি হায়না মহাক্না ফোংদোকখি। ঙসি ফাওবদা, হায়রিবা মান্নবা খুন্নাই অমসুং অপুনবগী লম্বী অসিনা ঐখোয়বু অনৌবা অমসুং চাউখৎপা ভারতকী লম্বীদা পুগদৌরিবনি।

রাস্ত্রপতিগী ৱারোল অসিবু পাবীনবগীদমক মফম অসিদা নম্বীয়ু -

***