রাস্ত্রপতিগী লোইশঙ

ভারতকী রাস্ত্রপতিনা বিহারগী মরিশুবা কৃষি রোদ মেপ হৌদোকখ্রে

Posted On: 18 OCT 2023 2:50PM by PIB Imphal

ভারতকী রাস্ত্রপতি, শ্রীমতি দ্রৌপদি মুর্মুনা ঙসি (ওক্তোবর 18, 2023) বিহারগী পত্নাদা বিহারগী মরিশুবা কৃষি রোদ মেপ (2023-2028) হৌদোকখ্রে।

রাস্ত্রপতিনা ঙসিগী থৌরমদা ৱা ঙাঙবদা, লৌউ-শিংউবনা বিহারগী খুনুংগী চৎনবীগী মরু ওইবা শরুক অমা ওইদুনা লাক্লি হায়খি। বিহারগী শেন্মিৎলোন্না মসিগী য়ুম্ফম ওইরিবনি। লৌউ-শিংউ অমসুং মরী লৈনবা সেক্তরনা রাজ্যসিগী চাউরাকপা তংখায় অমবু থবক পীবগা লোয়ননা রাজ্যসিগী GDPদসু মশক থোক্না শরুক তম্লি। মরম অদুনা, লৌউ-শিংউববু হীরম খুদিংদা চাউখৎহনবা হায়বসি য়াম্না মরু ওইবা ৱাফম অমনি। বিহার সরকারনা ইং 2008তগী হৌদুনা লৌউ-শিংউগী রোদ মেপ চত্থদুনা লাকখিবা অসিদা মহাক্না নুংঙাইবা ফোংদোকখি। লৌউ-শিংউগী রোদ মেপ য়ামদ্রবদা অহুম্বু থবক ওইনা পাংথোকখিবনা মরম ওইরগা, ফৌ, গেহু অমসুং চুজাক পুথোকপগী চাংনা রাজ্যসিদা চাউরাক্না তংখায়গী চাংদা হেনগৎহনখি হায়না মহাক্না পাউদমখি। চেংগুম, খোইহী, মখনা অমসুং ঙা পুথোকপদা বিহারনা মকোক থোংবা রাজ্য অমসু ওইরি। থবকশিং অসিবু তুংলমচত্তা পুবগী হীরমদা লৌউ-শিংউগী মরিশুবা রোদ মেপ হৌদোকপনা মরু ওইবা খোঙথাং অমা ওইরি হায়না মহাক্না হায়খি।

বিহারগী লৌমীশিং অসি লৌউবগী পথাপ্তা অনৌবা এক্সপেরিমেন্ত কয়া পাংথোকপগীদমক্তা মমিং চৎলিবনি হায়না রাস্ত্রপতিনা হায়খি। মসিনা মরম ওইরগা, নোবেল প্রাইজ ফংখ্রবা ইকোনোমিস্ত অমনা নালান্দাগী লৌমীশিংবু “সাইন্তিস্তশিংদগীসু হেনবা মীওই” হায়না কৌরম্লিবনি। লৌউবগী মতমগা চুনবা থৌওং কয়া শিজিন্নরবসু, বিহারগী লৌমীশিংনা নাৎকী চৎনবী অমসুং মখল কয়াগী মরুশিং শিজিন্নবগী থৌওং মাঙহন্দনা লাক্লিবা অসিদা রাস্ত্রপতিনা নুংঙাইবা ফোংদোকখি। মসিদি চৎনবীগা মোদর্নিতীগা চুননা চৎমিন্নবগী খুদম অমনি হায়না মহাক্না হায়খি।

ওর্গানিক পোত্থোকশিংগী অপাম্বা হেনগৎলক্লিবা অসিগী খুদোংচাবা লৌসি হায়না রাস্ত্রপতিনা বিহারগী লৌমীশিংদা হায়খি। ওর্গানিক ফার্মিংনা লৌউবদা শেল চঙবা হন্থহল্লি, অকোয়বগী ফিভমসু ঙাক শেন্দুনা থম্মি হায়না মহাক্না হায়খি। মসিনা লৌমীশিংগী শেন্থোক হেনগৎহনবা ঙম্বগী মতিক লৈবতা নত্তনা মীয়ামদা মচি লৈবা চিঞ্জাক ফংহনবদসু তেংবাংই। ওর্গানিক ফার্মিংবু হেন্না খুমাং চাউশিলহন্নবগীদমক্তা বিহার সরকারনা গঙ্গা তুরেলগী তোর্বান্দা লৈবা জিলাশিংদা ওর্গানিক কোরিদোর শেম্বা অসিদা মহাক্না নুংঙাইবা ফাওই হায়না পাউদমখি।

গ্লোবেল ৱার্মিং অমসুং ক্লাইমেত চেঞ্জ হায়বসিনা মীওইবা খুন্নাই অপুম্বনা মখা তানা হিংবগী লমদা শিংনবা অমা ওইরক্লি হায়না রাস্ত্রপতিনা হায়খি। মসিনা লাইরবশিংদা খ্বাইদগী হেন্না অৱাবা পী। হন্দক্কী চহি খরসিদা বিহারদা নোং য়াম্না লিক্না তাখি হায়না মহাক্না হায়খি। বিহার অসি ঈশিং মরাং কায়বা রাজ্যনি হায়না খন্নরম্লিবনি, অমসুং তুরেল অমদি পুখ্রিনা মখোয়গী শক্তাক ওইরিবনি হায়না মহাক্না হায়খি। শক্তাক অসিবু ঙাক্তুনা থম্নবগীদমক্তা ঈশিং য়োকশিনবগী হীরমদা অহেনবা মিৎয়েং চঙবগী মথৌ তারি। ক্লাইমেত রেজিলিএন্ত এগ্রিকলচরনা ক্লাইমেত চেঞ্জকী শিংনবশিংগা মাইয়োক্নবদা মরু ওইবা থৌদাং য়াবা ঙমগনি হায়না মহাক্না হায়খি। লৌউ-শিংউগী হৌজিক চৎনরিবা পেত্তর্ন অসিদা অহোংবা কয়া পুরক্তুনা, বাইও-দাইবর্সিতীগী খুমাং চাউশিলহনবা য়াই, ঈশিং থোকফম লান্না শিজিন্নবা হন্থহনবা য়াগনি, লৈহাও ফবগী মতৌ ঙাক শেন্দুনা থম্বা ঙমগনি, অদুগা খ্বাইদগী মরু ওইবা অমনা, মীয়ামগী পুখমদা চিঞ্জাক খল মান্ননা ফংহনবা ঙমগনি।

বিহারগী মরু ওইবা মহৈ-মরোং ওইরিবা চুজাক্তগী ইথানোল পুথোকপা য়াবা অসিদা রাস্ত্রপতিনা নুংঙাইবা ফোংদোকখি। ফোসিল ফুএলগী মখা পোল্লিবা অসিবু হন্থহনবা, অকোয়বগী ফিভম ঙাক শেনবা অমসুং লৈবাক্কী ইনর্জী সেক্যুরিতী লৈহন্নবগীদমক্তা মসিনা মরু ওইবা খোঙথাং অমা ওইগনি হায়না মহাক্না হায়খি।

চাউখৎপা ভারত অমগী মঙলান মঙফাওনহনবদা বিহারগী তেংবাংশিং অসি য়াম্না মরু ওই হায়না রাস্ত্রপতিনা হায়খি। মঙলান অসিবু অশেংবদা ওন্থোক্নবগীদমক্তা, ঐখোয়না অখুবা ৱাখল্লোন্দগী ৱাংমা লান্না লাকপা তাবনি। বিহারবু চাউখৎপা রাজ্য অমা ওইহন্নবগীদমক্তা হোলিস্তিক দিভেলপমেন্ত নত্তনা অতোপ্পা পাম্বৈ অমত্তা লৈতে। পোলিসী শেম্বা অমসুং বিহারগী মীয়াম্না রাজ্যসিগী চাউখৎ থৌরাংগীদমক্তা রোদ মেপ অমা শেম্লি অমসুং মসিবু ইন্দুনা চৎলি। লৌউ-শিংউবগী রোদ মেপ অমবু বিহারদা শেমদুনা থবক তৌরিবা অসি য়াম্না চাউথোকচনীংঙাই ওইবা ৱাফম অমনি হায়না মহাক্না হায়খি। হকশেল, এজুকেসন, পর কেপিতা ইনকম নত্ত্রগা হেপ্পিনেস ইন্দেক্স ওইরো, চাউখৎপগী পেরামীতর খুদিংদা রোদ মেপ শেমদুনা চাউখৎ থৌরাংগী লম্বীদা বিহারনা লেপ্তনা খোঙদাবা উবা মতমদা মহাক্না য়াম্না হেন্না নুংঙাইবা ফাওগনি হায়না মহাক্না ফোংদোকখি।

 রাস্ত্রপতিগী অপুনবা ৱারোলগীদমক্তা মফমসিদা নম্বীয়ু

 

***



(Release ID: 1969029) Visitor Counter : 53