मुंबई, 13 ऑक्‍टोबर 2023

केंद्रीय क्रीडा आणि युवा व्यवहार मंत्री अनुराग सिंह ठाकूर यांनी आज संध्याकाळी मुंबईत क्रीडा क्षेत्रातील प्रमुख व्यक्ती आणि आंतरराष्ट्रीय क्रीडा महासंघांच्या प्रतिनिधींबरोबर द्विपक्षीय बैठका घेतल्या. मुंबईत होत असलेल्या 141 व्या आंतरराष्ट्रीय ऑलिम्पिक समितीच्या (IOC) सत्राच्या पूर्वसंध्येला या बैठका झाल्या.

केंद्रीय युवा व्यवहार आणि क्रीडा आणि माहिती तंत्रज्ञान मंत्री अनुराग सिंह ठाकूर यांनी पहिली द्विपक्षीय बैठक जागतिक रोइंग फेडरेशनचे अध्यक्ष जीन-क्रिस्टोफ रोलँड यांच्या बरोबर घेतली, तर दुसरी द्विपक्षीय बैठक अॅथलेटिक्स फेडरेशनच्या आंतरराष्ट्रीय संघटनेचे अध्यक्ष लॉर्ड सेबॅस्टियन को, यांच्याबरोबर झाली.

बैठकींचे ठळक मुद्दे पुढील प्रमाणे:

1. भारतीय क्रीडापटूंचे एकंदर आरोग्य आणि कामगिरी सुधारण्यासाठी क्रीडा विज्ञान आणि वैद्यक शास्त्राच्या ज्ञानाची देवाण घेवाण करणे.
2. प्रशिक्षण पद्धती आणि उपकरणांमध्ये नवोन्मेष आणण्यासाठी संशोधन उपक्रमांमधील सहयोग.
3. इतर क्षेत्रांप्रमाणे खेळांमध्ये डिजिटल प्रशिक्षणाचा वापर.

पंतप्रधान नरेंद्र मोदी, उद्या म्हणजेच, 14 ऑक्टोबर 2023 रोजी मुंबईतील जिओ वर्ल्ड सेंटरमध्ये  आंतरराष्ट्रीय ऑलिम्पिक समितीच्या (आयओसी)141 व्या सत्राचे उद्घाटन करतील.

आयओसी  सत्र, आंतरराष्ट्रीय ऑलिम्पिक समितीच्या सदस्यांची प्रमुख बैठक असते. ऑलिम्पिक खेळांच्या भविष्यकालीन बाबींबद्दल महत्त्वाचे निर्णय आयओसी सत्रांमध्ये घेतले जातात.

141 वे आयओसी सत्र भारतात होत असून जागतिक सहकार्याला चालना देण्यासाठी, क्रीडानैपुण्यता, मैत्री, आदर आणि उत्कृष्टतेच्या ऑलिम्पिक आदर्शांना पुढे नेण्यासाठी राष्ट्राच्या समर्पित वृत्तीचे ते प्रतीक आहे. यामुळे  विविध खेळांशी संबंधित भागधारकांमध्ये परस्परसंवाद आणि ज्ञानाचे आदानप्रदान करण्याची संधी प्राप्त होते.

या सत्राला  आंतरराष्ट्रीय ऑलिम्पिक समितीचे अध्यक्ष थॉमस बाख  आणि आयओसीचे इतर सदस्य, भारतीय ऑलिम्पिक संघटनेसह विविध क्रीडा महासंघांचे प्रमुख, भारतीय क्रीडाक्षेत्रातील प्रमुख  व्यक्ती आणि प्रतिनिधी उपस्थित राहणार आहेत.

* * *

PIB Mumbai | R.Aghor/Rajshree/Sonali K/D.Rane

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai