ଇଲେକ୍ଟ୍ରୋନିକ୍ସ ଏବଂ ଆଇଟି ମନ୍ତ୍ରଣାଳୟ ସୋସିଆଲ ମିଡିଆ ମାଧ୍ୟମ ଏକ୍ସ, ୟୁଟ୍ୟୁବ ଏବଂ ଟେଲିଗ୍ରାମ୍‌କୁ ନୋଟିସ ଜାରି କରି ଭାରତୀୟ ଇଣ୍ଟରନେଟରେ ସେମାନଙ୍କ ପ୍ଲାଟଫର୍ମରୁ ଶିଶୁ ଯୌନ ଶୋଷଣ ସମ୍ପର୍କିତ ବିଷୟବସ୍ତୁ (ସିଏସଏଏମ୍‌) ହଟାଇବାକୁ ଚେତାବନୀ ଦେଇଛି ।

ଏହି ପ୍ଲାଟଫର୍ମ ଗୁଡିକୁ ଦିଆଯାଇଥିବା ନୋଟିସ୍ ଗୁଡିକ ସେମାନଙ୍କ ପ୍ଲାଟଫର୍ମରେ କୌଣସି ସିଏସଏଏମ୍‌କୁ ତୁରନ୍ତ ଏବଂ ସ୍ଥାୟୀ ଭାବରେ ହଟାଇବା କିମ୍ବା ଆକସେସ୍‌କୁ ଅକ୍ଷମ କରିବା ଉପରେ ଗୁରୁତ୍ୱାରୋପ କରନ୍ତି । ଭବିଷ୍ୟତରେ ସିଏସଏଏମ୍‌ର ପ୍ରସାରକୁ ରୋକିବା ପାଇଁ ବିଷୟବସ୍ତୁ ମଡରେସନ୍ ଆଲଗୋରିଦମ୍ ଏବଂ ରିପୋର୍ଟିଂ ମେକାନିଜମ୍ ଭଳି ସକ୍ରିୟ ପଦକ୍ଷେପ ଗୁଡ଼ିକୁ କାର୍ଯ୍ୟକାରୀ କରିବାକୁ ସେମାନେ ଆହ୍ୱାନ ଦେଇଛନ୍ତି ।

ଏମଇଆଇଟିଆଇର ଏହି ନୋଟିସରେ କୁହାଯାଇଛି ଯେ ଏହି ଆବଶ୍ୟକତାକୁ ପାଳନ ନକରିବା ଆଇଟି ନିୟମ, ୨୦୨୧ର ନିୟମ ୩(୧)(ବି) ଏବଂ ନିୟମ ୪(୪)ର ଉଲ୍ଲଂଘନ ବୋଲି ବିବେଚନା କରାଯିବ ।

ମନ୍ତ୍ରଣାଳୟ ତିନୋଟି ସୋସିଆଲ ମିଡିଆ ମଧ୍ୟସ୍ଥିଙ୍କୁ ଚେତାବନୀ ଦେଇଛି ଯେ ନୋଟିସ୍ ପାଳନ କରିବାରେ ବିଳମ୍ବ ହେଲେ ଆଇଟି ଆଇନର ଧାରା ୭୯ ଅନୁଯାୟୀ ସେମାନଙ୍କ ସୁରକ୍ଷିତ ଆଶ୍ରୟ ସୁରକ୍ଷା ପ୍ରତ୍ୟାହାର କରାଯିବ, ଯାହା ବର୍ତ୍ତମାନ ସେମାନଙ୍କୁ ଆଇନଗତ ଦାୟିତ୍ୱରୁ ରକ୍ଷା କରୁଛି ।

କେନ୍ଦ୍ର ଦକ୍ଷତା ବିକାଶ ଏବଂ ଉଦ୍ୟମିତା ଏବଂ ଇଲେକ୍ଟ୍ରୋନିକ୍ସ ଏବଂ ଆଇଟି ରାଷ୍ଟ୍ର ମନ୍ତ୍ରୀ ଶ୍ରୀ ରାଜୀବ ଚନ୍ଦ୍ରଶେଖର କହିଛନ୍ତି ଯେ ଆମେ ଏକ୍ସ, ୟୁଟ୍ୟୁବ ଏବଂ ଟେଲିଗ୍ରାମ ଯେପରି ସେମାନଙ୍କ ପ୍ଲାଟଫର୍ମରେ କୌଣସି ଶିଶୁ ଯୌନ ଶୋଷଣ ବିଷୟବସ୍ତୁ ରଖିବେ ନାହିଁ ତାହା ସୁନିଶ୍ଚିତ କରିବାକୁ ନୋଟିସ ପଠାଇଛୁ । ଆଇଟି ନିୟମ ଅନୁଯାୟୀ ଏକ ସୁରକ୍ଷିତ ଏବଂ ବିଶ୍ୱସନୀୟ ଇଣ୍ଟରନେଟ୍ ନିର୍ମାଣ ନିମନ୍ତେ ସରକାର ସଂକଳ୍ପବଦ୍ଧ । ଆଇଟି ଅଧିନିୟମରେ ଆଇଟି ନିୟମ ଅନୁସାରେ ସୋସିଆଲ ମିଡିଆ ମଧ୍ୟସ୍ଥିମାନେ କଠୋରତାର ସହିତ ସେମାନଙ୍କ ପ୍ଲାଟଫର୍ମରେ ଅପରାଧିକ କିମ୍ବା ହାନିକାରକ ପୋଷ୍ଟକୁ ଅନୁମତି ଦେବେ ନାହିଁ ବୋଲି ଆଶା ରଖାଯାଇଛି । ଯଦି ସେମାନେ ତୁରନ୍ତ ପଦକ୍ଷେପ ନ ନିଅନ୍ତି, ତେବେ ଆଇଟି ଆଇନର ଧାରା ୭୯ ଅନୁଯାୟୀ ସେମାନଙ୍କ ସୁରକ୍ଷିତ ଆଶ୍ରୟ ପ୍ରତ୍ୟାହାର କରାଯିବ ଏବଂ ଭାରତୀୟ ଆଇନ ଅନୁଯାୟୀ ଏହାର ପରିଣାମ ଭୋଗିବାକୁ ପଡ଼ିବ ।

ମନ୍ତ୍ରୀ ଶ୍ରୀ ରାଜୀବ ଚନ୍ଦ୍ରଶେଖର ଭାରତୀୟ ଇଣ୍ଟରନେଟରୁ ଏଭଳି କ୍ଷତିକାରକ ବିଷୟବସ୍ତୁକୁ ହଟାଇବା ପାଇଁ ସ୍ୱର ଉତ୍ତୋଳନ କରିଛନ୍ତି, ଯାହା ଦ୍ୱାରା ଏହି ପଦ୍ଧତି ମନ୍ତ୍ରଣାଳୟର ନୀତି ଦୃଷ୍ଟିକୋଣରେ ପରିଣତ ହେବ ।

ସୂଚନା ପ୍ରଯୁକ୍ତି ବିଦ୍ୟା (ଆଇଟି) ଆଇନ, ୨୦୦୦, ସିଏସ୍‌ଏଏମ ସମେତ ଅଶ୍ଳୀଳ ବିଷୟବସ୍ତୁକୁ ସମ୍ବୋଧିତ କରିବା ପାଇଁ ଆଇନଗତ ଢାଞ୍ଚା ପ୍ରଦାନ କରିଛି । ଆଇଟି ଆଇନର ଧାରା ୬୬ଇ, ୬୭, ୬୭ଏ ଏବଂ ୬୭ବି ଅଶ୍ଲୀଳ କିମ୍ବା ଅଶ୍ଳୀଳ ବିଷୟବସ୍ତୁର ଅନଲାଇନ ପ୍ରସାରଣ ପାଇଁ କଠୋର ଦଣ୍ଡ ଏବଂ ଜରିମାନା ଲାଗୁ କରିଥାଏ ।

*

SSP