પ્રધાનમંત્રી શ્રી નરેન્દ્ર મોદીએ આજે તેલંગાણાનાં મહબૂબનગરમાં રૂ. 13,500 કરોડથી વધારે મૂલ્યની વિવિધ વિકાસલક્ષી પરિયોજનાઓનો શિલાન્યાસ કર્યો હતો અને દેશને સમર્પિત કરી હતી. વિકાસ યોજનાઓમાં માર્ગ, રેલ, પેટ્રોલિયમ અને કુદરતી ગેસ અને ઉચ્ચ શિક્ષણ જેવા મહત્વપૂર્ણ ક્ષેત્રોનો સમાવેશ થાય છે. કાર્યક્રમ દરમિયાન પ્રધાનમંત્રીએ વીડિયો કોન્ફરન્સિંગ મારફતે એક ટ્રેન સેવાને પણ લીલી ઝંડી આપી હતી.

અહીં ઉપસ્થિત જનમેદનીને સંબોધતા પ્રધાનમંત્રીએ તહેવારોની મોસમનાં આગમન પર ભાર મૂક્યો હતો અને કહ્યું હતું કે, સંસદમાં નારી શક્તિ વંદન અધિનિયમ પસાર થવાથી નવરાત્રિ શરૂ થાય એ અગાઉ શક્તિ પૂજાની ભાવના સ્થાપિત થઈ ગઈ છે.

પ્રધાનમંત્રીએ આજે અનેક રોડ કનેક્ટિવિટી પ્રોજેક્ટનું ખાતમુહૂર્ત કરવા બદલ ખુશી વ્યક્ત કરી હતી, જે આ વિસ્તારમાં જીવનની કાયાપલટ કરશે. નાગપુર – વિજયવાડા ઇકોનોમિક કોરિડોર તેલંગાણા, આંધ્રપ્રદેશ અને મહારાષ્ટ્રમાં પરિવહન અને વ્યવસાયને સરળ બનાવશે. આ રાજ્યોમાં વેપાર, પર્યટન અને ઉદ્યોગને વેગ આપ્યો છે. તેમણે માહિતી આપી હતી કે, કોરિડોરમાં મુખ્ય આર્થિક કેન્દ્રોની ઓળખ કરવામાં આવી છે, જેમાં 8 વિશેષ આર્થિક ઝોન, 5 મેગા ફૂડ પાર્ક, 4 ફિશિંગ સીફૂડ ક્લસ્ટર, 3 ફાર્મા અને મેડિકલ ક્લસ્ટર્સ અને 1 ટેક્સટાઇલ ક્લસ્ટર સામેલ છે. તેનાથી હનામકોંડા, મહબૂબાબાદ, વારંગલ અને ખમ્મમ જિલ્લાના યુવાનો માટે અનેક માર્ગો ખુલશે.

પ્રધાનમંત્રીએ તેલંગાણા જેવા જમીનથી ઘેરાયેલાં રાજ્ય માટે અહીં ઉત્પાદિત ચીજવસ્તુઓને બંદરો સુધી લઈ જવા માટે રેલવે અને રોડ કનેક્ટિવિટીની જરૂરિયાત પર ભાર મૂક્યો હતો. તેમણે કહ્યું હતું કે, દેશનાં ઘણાં મહત્ત્વપૂર્ણ આર્થિક કોરિડોર તેલંગાણામાંથી પસાર થઈ રહ્યાં છે. આ બધા રાજ્યને પૂર્વ અને પશ્ચિમ કાંઠા સાથે જોડવાનું એક માધ્યમ બનશે. હૈદરાબાદ વિશાખાપટ્ટનમ કોરિડોરનો સૂર્યપેટ-ખમ્મમ સેક્શન પણ આમાં મદદ કરશે. તે પૂર્વ કોસ્ટ સુધી પહોંચવામાં મદદ કરશે. આ ઉપરાંત ઉદ્યોગો અને વ્યવસાયોના લોજિસ્ટિક્સ ખર્ચમાં પણ ઘટાડો થશે. જકલૈર અને કૃષ્ણા સેક્શન વચ્ચે બની રહેલી રેલવે લાઇન પણ અહીંના લોકો માટે ખૂબ જ મહત્વની બની રહેશે, એમ તેમણે કહ્યું હતું.

પ્રધાનમંત્રીએ તેલંગાણાનાં હળદરનાં ખેડૂતોનાં લાભ માટે કેન્દ્ર સરકાર દ્વારા રાષ્ટ્રીય હળદર બોર્ડની રચના કરવાની જાહેરાત કરી હતી. તેમણે ભારપૂર્વક જણાવ્યું હતું કે, રાષ્ટ્રીય હળદર બોર્ડ પુરવઠા શ્રુંખલામાં મૂલ્ય સંવર્ધન પર ધ્યાન કેન્દ્રિત કરશે અને ખેડૂતો માટે માળખાગત સુવિધામાં સુધારો કરવામાં મદદ કરશે. પ્રધાનમંત્રી મોદીએ તેલંગાણા અને સમગ્ર દેશમાંથી હળદરનું ઉત્પાદન કરતા તમામ ખેડૂતોને રાષ્ટ્રીય હળદર બોર્ડની રચના બદલ અભિનંદન પાઠવ્યા હતા.

ઊર્જા અને ઊર્જા સુરક્ષાનાં ક્ષેત્રમાં દુનિયાભરમાં તાજેતરમાં થયેલાં વિકાસ વિશે વાત કરતાં પ્રધાનમંત્રીએ ભારપૂર્વક જણાવ્યું હતું કે, સરકારે માત્ર ઉદ્યોગો માટે જ નહીં, પણ ઘરનાં લોકો માટે પણ ઊર્જા સુરક્ષિત કરી છે. તેમણે એલપીજી સિલિન્ડરની સંખ્યા વર્ષ 2014માં 14 કરોડથી વધીને વર્ષ 2023માં 32 કરોડ થઈ હોવાનું ઉદાહરણ આપ્યું હતું તથા તાજેતરમાં ગેસની કિંમતોમાં થયેલા ઘટાડાનો ઉલ્લેખ પણ કર્યો હતો. પ્રધાનમંત્રીએ કહ્યું હતું કે, "સરકાર દેશમાં એલપીજી વિતરણ નેટવર્કનાં વિસ્તરણને પ્રોત્સાહન આપી રહી છે." તેમણે નોંધ્યું હતું કે, હસન-ચેર્લાપલ્લી એલપીજી પાઇપલાઇન પ્રોજેક્ટ આ વિસ્તારમાં લોકોને ઊર્જા સુરક્ષા પ્રદાન કરવામાં મહત્ત્વપૂર્ણ ભૂમિકા ભજવશે. તેમણે ક્રિષ્નાપટ્ટનમથી હૈદરાબાદ વચ્ચે મલ્ટિપ્રોડક્ટ પેટ્રોલિયમ પાઇપલાઇનનો શિલાન્યાસ કરવાની વાત પણ કરી હતી, જે તેલંગાણામાં પ્રત્યક્ષ અને પરોક્ષ રીતે હજારો રોજગારીનું સર્જન કરવામાં મદદરૂપ થશે.

• પ્રધાનમંત્રીએ હૈદરાબાદ સેન્ટ્રલ યુનિવર્સિટીમાં ઘણી ઇમારતોનું ઉદઘાટન કર્યું હતું. કેન્દ્ર સરકારે હૈદરાબાદ યુનિવર્સિટીને 'ઇન્સ્ટિટ્યૂશન ઓફ એમિનન્સ'નો દરજ્જો આપીને ખાસ ફંડિંગ આપ્યું છે. પ્રધાનમંત્રીએ જાહેરાત કરી હતી કે, "ભારત સરકાર મુલુગુ જિલ્લામાં એક કેન્દ્રીય આદિવાસી વિશ્વવિદ્યાલયની સ્થાપના કરવા જઈ રહી છે. આ વિશ્વવિદ્યાલયનું નામ પૂજનીય આદિવાસી દેવીઓ સમમક્કા-સારક્કાના નામ પરથી રાખવામાં આવશે. સમમક્કા-સારક્કા સેન્ટ્રલ ટ્રાઇબલ યુનિવર્સિટી પર લગભગ 900 કરોડ રૂપિયાનો ખર્ચ કરવામાં આવશે. શ્રી મોદીએ આ કેન્દ્રીય આદિવાસી વિશ્વવિદ્યાલય માટે તેલંગાણાનાં લોકોને અભિનંદન આપ્યાં હતાં.

આ પ્રસંગે તેલંગાણાનાં રાજ્યપાલ સુશ્રી તમિલિસાઇ સૌંદરરાજન, કેન્દ્રીય મંત્રી શ્રી જી કિશન રેડ્ડી અને સાંસદ શ્રી બંદી સંજય કુમાર ઉપસ્થિત રહ્યાં હતાં.

પાશ્વ ભાગ

સમગ્ર દેશમાં આધુનિક રોડ ઇન્ફ્રાસ્ટ્રક્ચરના વિકાસના પ્રધાનમંત્રીના દ્રષ્ટિકોણને વેગ આપવા માટેના એક પગલામાં, કાર્યક્રમ દરમિયાન બહુવિધ માર્ગ પ્રોજેક્ટ્સનો શિલાન્યાસ અને રાષ્ટ્રને સમર્પિત કરવામાં આવ્યા હતા. પ્રધાનમંત્રીએ નાગપુર- વિજયવાડા ઇકોનોમિક કોરિડોરનો ભાગ એવા મુખ્ય રોડ પ્રોજેક્ટ્સનો શિલાન્યાસ કર્યો હતો. આ પ્રોજેક્ટ્સમાં – એનએચ - 163જીના વારંગલથી ખમ્મમ સેક્શન સુધી 108 કિલોમીટર લાંબો 'ફોર-લેન એક્સેસ કન્ટ્રોલ્ડ ગ્રીનફિલ્ડ હાઇવે' અને 90 કિલોમીટર લાંબો 'ફોર-લેન એક્સેસ કન્ટ્રોલ્ડ ગ્રીનફિલ્ડ હાઇવે' અને રાષ્ટ્રીય રાજમાર્ગ – 163જીનાં ખમ્મમથી વિજયવાડા સેક્શન સુધી 90 કિલોમીટર લાંબો 'ફોર-લેન એક્સેસ કન્ટ્રોલ્ડ ગ્રીનફિલ્ડ હાઇવે' સામેલ છે. આ માર્ગ પ્રોજેક્ટ્સ આશરે ૬૪૦૦ કરોડના ખર્ચે વિકસાવવામાં આવશે. આ પ્રોજેક્ટથી વારંગલ અને ખમ્મમ વચ્ચેનાં પ્રવાસનાં અંતરમાં આશરે 14 કિલોમીટરનો ઘટાડો થશે. અને ખમ્મમ અને વિજયવાડા વચ્ચે આશરે ૨૭ કિ.મી.

પ્રધાનમંત્રીએ રાષ્ટ્રીય રાજમાર્ગ – 365બીબીના ખમ્મમ સેક્શનને 59 કિલોમીટરની લંબાઈ ધરાવતા સૂર્યપેટને ચાર માર્ગીય બનાવવાનો માર્ગ પ્રોજેક્ટ દેશને સમર્પિત કર્યો હતો. આશરે રૂ. 2,460 કરોડનાં ખર્ચે નિર્મિત આ પ્રોજેક્ટ હૈદરાબાદ – વિશાખાપટ્ટનમ કોરિડોરનો એક ભાગ છે અને ભારતમાલા પરિયોજના અંતર્ગત વિકસાવવામાં આવ્યો છે. તે આંધ્રપ્રદેશના ખમ્મમ જિલ્લા અને દરિયાકાંઠાના વિસ્તારોને વધુ સારી કનેક્ટિવિટી પણ પ્રદાન કરશે.

આ પરિયોજના દરમિયાન પ્રધાનમંત્રીએ 'જકલૈરનાં 37 કિલોમીટર દૂર-કૃષ્ણા ન્યૂ રેલવે લાઇન'નું લોકાર્પણ કર્યું હતું. 500 કરોડ રૂપિયાથી વધુના ખર્ચે તૈયાર કરવામાં આવેલા આ નવા રેલ લાઈન સેક્શનમાં પછાત જિલ્લા નારાયણપેટના વિસ્તારોને પહેલીવાર રેલવે મેપ પર લાવવામાં આવ્યા છે. પ્રધાનમંત્રીએ વીડિયો કોન્ફરન્સિંગ મારફતે ક્રિષ્ના સ્ટેશનથી હૈદરાબાદ (કાચેગુડા) – રાયચુર–હૈદરાબાદ (કાચેગુડા)ની ટ્રેન સેવાને લીલી ઝંડી પણ આપી હતી. આ ટ્રેન સેવા તેલંગાણાના હૈદરાબાદ, રંગારેડ્ડી, મહબૂબનગર અને નારાયણપેટ જિલ્લાઓને કર્ણાટકના રાયચુર જિલ્લા સાથે જોડશે. આ સેવાથી મહબૂબનગર અને નારાયણપેટના પછાત જિલ્લાઓમાં કેટલાક નવા વિસ્તારોને પ્રથમ વખત રેલ કનેક્ટિવિટી મળશે, જેનાથી આ વિસ્તારમાં વિદ્યાર્થીઓ, દૈનિક મુસાફરો, મજૂરો અને સ્થાનિક હેન્ડલૂમ ઉદ્યોગને લાભ થશે.

દેશમાં લોજિસ્ટિક્સ કાર્યક્ષમતામાં સુધારો કરવાના પ્રધાનમંત્રીના દ્રષ્ટિકોણને અનુરૂપ, કાર્યક્રમ દરમિયાન મહત્વપૂર્ણ ઓઇલ અને ગેસ પાઇપલાઇન પ્રોજેક્ટ્સનો શિલાન્યાસ અને રાષ્ટ્રને સમર્પિત કરવામાં આવ્યા હતા. પ્રધાનમંત્રીએ 'હસન-ચેર્લાપલ્લી એલપીજી પાઇપલાઇન પ્રોજેક્ટ' દેશને સમર્પિત કર્યો હતો. આશરે રૂ. 2170 કરોડના ખર્ચે નિર્મિત એલપીજી પાઇપલાઇન કર્ણાટકમાં હસનથી ચેરલાપલ્લી (હૈદરાબાદના ઉપનગર) સુધી, આ વિસ્તારમાં એલપીજી પરિવહન અને વિતરણનું સલામત, ખર્ચ-કાર્યક્ષમ અને ઇકો-ફ્રેન્ડલી માધ્યમ પ્રદાન કરે છે. તેમણે ક્રિષ્નાપટ્ટનમથી હૈદરાબાદ (મલકાપુર)સુધી 'ભારત પેટ્રોલિયમ કોર્પોરેશન લિમિટેડ (બીપીસીએલ)ની મલ્ટિપ્રોડક્ટ પેટ્રોલિયમ પાઇપલાઇન'નો શિલાન્યાસ પણ કર્યો હતો. 425 કિલોમીટરની આ પાઈપલાઈન 1940 કરોડના ખર્ચે તૈયાર કરવામાં આવશે. આ પાઇપલાઇન વિસ્તારમાં સુરક્ષિત, ઝડપી, કાર્યદક્ષ અને પર્યાવરણને અનુકૂળ પેટ્રોલિયમ ઉત્પાદનોનું માધ્યમ પ્રદાન કરશે.

પ્રધાનમંત્રીએ 'હૈદરાબાદ યુનિવર્સિટીની પાંચ નવી ઇમારતો' એટલે કે સ્કૂલ ઑફ ઇકોનોમિક્સનું પણ ઉદઘાટન કર્યું હતું. સ્કૂલ ઓફ મેથેમેટિક્સ એન્ડ સ્ટેટિસ્ટિક્સ; સ્કૂલ ઓફ મેનેજમેન્ટ સ્ટડીઝ; વ્યાખ્યાન હોલ સંકુલ – III; અને સરોજિની નાયડુ સ્કૂલ ઓફ આર્ટ્સ એન્ડ કોમ્યુનિકેશન (એનેક્સી). હૈદરાબાદ યુનિવર્સિટીમાં ઇન્ફ્રાસ્ટ્રક્ચરનું અપગ્રેડેશન એ વિદ્યાર્થીઓ અને ફેકલ્ટીને સુધારેલી સુવિધાઓ અને સુવિધાઓ પ્રદાન કરવા તરફનું એક પગલું છે.

CB/GP/JD