Kum shi bynta ka Special Campaign 3.0, ka sienjam jong ka Sorkar India ban kyntiew ia ka jingkhuid jingsuba, ban pynduna ka jingsahteng ki kam, ka jingpynskhem ia ka jingleh khuid, ka jingpynkhlain ia ka lad peit bniah, ka jingpeit ia ki jingtip ha ki ophis sorkar, ka jingpynkylla digital ia ki kot ki sla bad kiwei kiwei, ka Geological Survey of India (GSI), hapoh ka Tnat Mines, ka thmu ban pynlong ia ka jingpynkhuid ha khatsan tylli ki Geoheritage site ha kylleng ka ri.

Hapoh ka Special Campaign 2.0, ha u bnai Risaw 2022, ka GSI ka la pynlong 89 tylli ki prokram jingpynkhuid ha ki ophis jong ka ba don ha kylleng ka ri bad la sei 2,25,135 tylli ki file kiba rim bad ka la iohnong haduh T. 1,58,69,544 lyngba ka jingdie ia ki mar jot mar pei.

Ban rah shakhmat ia kane ka jingngeit jong ka Swachh Bharat Mission, ka GSI ka la plie ia ka campaign Swachhata Hi Seva ha ka 15.09.2023, bad ka la iashim bynta shitrhem ha ki prokram swachhata bapher bapher ha baroh ki ophis jong ka, kum ka jingpynkhreh ia ka Swachhata Divas ha ka 2 tarik Risaw 2023, kaba dei ka lyngkhuh sngi kha jong u Kpa ka Jaitbynriew.

Ka GSI ka la pynkhreh ban sdang ia ka Special Campaign 3.0, naduh ka 2 haduh 31 tarik Risaw 2023, ha ki Geoheritage site ban pynsaphriang ia ka jingngeit jong ka jingleh khuid hapdeng ki paidbah bad kumjuh ruh ban ai jinghikai ia ki halor ka jingdonkam ban pynneh pynsah ia ki geological heritage site jong ka ri. Kane ka Campaign kan iarap ruh ban plie ki lad ha kaba iadei bad ki kam jngoh kai na ka bynta ki jylla bad prat lynti na ka bynta ka jingkyntiew ia ka ioh ka kot ha ki thain.

Ka GSI ka la ithuh baroh khatsan tylli ki Geo- heritage site (Annexure-1) na ka bynta ka prokram jingpynkhuid ha kane ka samoi, da kaba sdang na Nighoj -Natural Potholes Geoheritage site ha Ahmednagar district jong ka jylla Maharashtra ha ka 2 tarik Risaw, 2023.

Shaphang ki Geo-heritage Site

Ka pateng ba riewspah jong ka India ka kynthup ym tang ki jingshna kiba itynnad naduh ki por hyndai, ka deiriti bad ki dustur tynrai hynrei ki jaka kiba itynnad. Kine ki jingaiei jong ka mariang ki dei ki dak jong ki jingjia hapoh ka pyrthei kiba paw ha ka sla pyrthei bad ruh ha ki jaka ba kham jylliew jong ka pyrthei. Ia kine ki jaka la ithuh kum ki Geo-heritage site bad ka Geological Survey of India kaba ialam lynti ha ki kam geoscientific survey bad ka jingwadbniah, ka niewkor bha ia ki sienjam jong ka ban pynneh ia kine ki jaka na ka bynta ki pateng ban wan.

Ka jingpynsaphriang jingtip shaphang ki Geological Heritage site ka dei kaba jia ha kylleng ka pyrthei lyngba ka Geo-tourism lane ka jingleit jngoh ia ki jaka ba kyrpang ha ki jaka ba la ioh jingithuh kum ki Geopark bad ruh ki jingtei kiba hyndai ban iada ia ki na ka jingjulor na ka mariang ne na kiwei kiwei ki daw. Ka Geological Survey of India ka shimti ia ka jingbahkhlieh ban lap ia ki jaka kiba kongsan ha ki kam geology lane ki jaka ba kyrpang kiba mih namar ki jingjia hapoh ka khyndew ha kane ka ri bad ruh ban ai jingtip shaphang ka jingpynneh ia ki. Haduh mynta, ka GSI ka la lap 92 tylli kine ki Geo-heritage site bad don na kine ba la ioh jingithuh ruh kum ki UNESCO world heritage site.

Shaphang ka Geological Survey of India

La seng ia ka Geological Survey of India (GSI) ha u snem 1831 ban wad ia ki jaka ba don u dewiong na ka bynta ki kam rel. Kat dang iaid ki snem, ka GSI ym tangba ka la kiew sha ka tyllong jong ka jingdon jingtip shaphang ka geo-science ba donkam ha ki bynta bapher bapher ha ka ri hynrei ka la kot ruh sha ka kyrdan jong ka kynhun geo-scientific kaba don burom ha ka pyrthei. Ki jingtreikam ba kongsan jong ka ki iadei bad ka jingthaw bad kyntiew ia ka jingtip shaphang ki kam geoscience bad ruh ka jingpeit ia ka jingdon ki mar poh khyndew. Ia kine ki jingthmu la lah ban pynurlong lyngba ki ground survey, ki survey na ka suinbneng ne ha ki jaka shong um, ka jingwad ia ki mar poh khyndew, ki kam geoscience, geo-technical, geo-environmental bad ki jingma kiba don ha ka mariang, ha ryngkat ruh ki kam glaciology, seismo-tectonic bad kiwei kiwei ki bynta jong ka geoscience.

Ka kam ba kongsan jong ka GSI ka dei ban ai jingtip bapher bapher kiba iadei bad ka geoscience kiba iarap ha ka jingthaw ia ki polisi shaphang ki jingdonkam ka ri kiba iadei bad ka ioh ka kot, ka imlang sahlang bad ki kam khaii. Kane ka kynhun ka leh ia kane ka kam lyngba ki survey geology, geophysical bad geochemical da kaba pyndonkam ia ki rukom treikam kiba katkum ka juk mynta bad ruh kiba jem dor. Ka GSI ka peit bniah mynta ia ka jingwad ia ki mar poh khyndew kiba kongsan ban kyntiew ia kine ki jingdon jingem bad ruh ban pynbiang ia ki lad ai jingtip lypa shaphang ki jingtwa khyndew.

Ia ka jinglah treikam survey bad shna map ka GSI la pynkhlain lyngba ka jingpynbun, ka jingpyniaid, ka jingiatreilang bad ka jingpyndonkam ia ki spatial database (ba kynthup ia kito kiba ioh lyngba ka remote sensing). Ka treikam kum ka ‘jaka buh’ na ka bynta kane bad ka pyndonkam ia ki teknoloji katkum ka juk mynta ban ai jingtip geoscience bad spatial data lyngba ka jingiatreilang bad kiwei kiwei kiba don bynta ha ki kam Geo-informatics.

Ka GSI, kaba don ka headquarter ha Kolkata, ka don hynriew tylli ki regional office ha Lucknow, Jaipur, Nagpur, Hyderabad, Shillong bad Kolkata bad ka don ruh ki state office ha jan man ki jylla jong ka ri. Ka GSI ka dei kaba iasoh ba ka tnat Mines.

Annexure-I

KA THUP JONG KI GEOHERITAGE/GEOTOURISM SITE BA LA JIED NA KA BYNTA KA SPECIAL CAMPAIGN 3.0

****