ঐহাক্কী ইমুং-মনুংগী নুংশীরবা মীওইশিংবু নমস্কার! ‘মন কী বাত’কী অতোপ্পা তাঙ্কক অমা লাকপসিদা ঐহাক্না অদোমগী মফমদা ৱাফম খরা থমজবগী খুদোংচাবা অমুক ফংজরে। লৈবাক্কী মায় পাকপা, লৈবাক মীয়ামগী মায় পাকপা, মখোয়গী ইথিল পীনিংঙাই ওইরবা পুন্সি খোঙচৎ কয়া মীয়ামদা শেয়র তৌজগে। হৌজিক্কান্সিদা ঐহাক্না ফংলিবা চিথী খুদিংমক অয়াম্বনা হীরম অনিগী মতাংদা ওই। অহানবা অসিনা, চন্দ্রয়ান-3না মায় পাক্না থা লৈবাক্তা তাখিবা অমসুং অনিশুবা অসিনা, দিল্লীদা G20 মায় পাক্না শিনখিবা। ঐহাক্না লৈবাক্কী মফম খুদিং, খুন্নাইগী কাঙলুপ খুদিং অমসুং চহি মখল খুদিংগী মীওইশিংগী মফমদগী মশিং থীঙমদ্রবা চিথী কয়া ফংজখি। চন্দ্রয়ান-3গী লেন্দরনা থা লৈবাক্তা তাগদৌবগী ঙাইরিবা পুঙফমদা মীওই করোর কয়ানা থৌদোক অসিগী মিৎকুপ খুদিংবু পাম্বৈ কয়াগী খুত্থাংদা য়েংনবা খৌরাংনা ঙাইনদুনা লৈনখি। মীওই লাখ 80 হেনবনা থৌদোক অসিবু ISROগী য়ু-তুবকী লাইব চেন্নেলদা য়েংনখি, মসিমক রেকোর্দ অমনি। ভারত মীয়াম করোর কয়ানা চন্দ্রয়ান-3গীদমক্তা থৱাই কয়া য়াম্না য়াওবগে হায়বা মসিনা উৎলবনি। চন্দ্রয়ানগী মসিগুম্বা মায় পাকপা অসিগা মরী লৈননা লৈবাক অসিদা হৌজিক্কান ফজবা ক্বিজ কম্পিতিসন অমা পাংথোক্লি। মসিবু ‘চন্দ্রয়ান-3 মহাক্বিজ’ হায়না মিংথোল্লি। মাইগোব পোর্তেলদা চত্থরিবা ক্বিজ কম্পিতিসন অসিদা হৌজিক ফাওবদা মীওই লাখ 15 হেনবনা শরুক য়াখ্রে। মাইগোব হৌদোকখ্রবা মতুংদা পাংথোকপা ক্বিজ অমদা মশিং খ্বাইদগী য়াম্বা মীয়াম্না শরুক য়াবসি মসিনা ওইরি। অদোম্না করিগুম্বা মসিদা শরুক য়াদ্রিবা ওইরবদি, থেংথবীরগনু, মসিনা লোইশিনগদবা নুমিৎ তরুক ৱাৎলি, ঙসিমক শরুক য়াবীরো।

ঐগী ইমুংগী মীয়াম, চন্দ্রয়ান-3না মায় পাক্লবা মতুংদা G-20বু মায় পাক্না অমুক পাংথোকখিবনা ভারত মীয়ামগী নুংঙাইবগী চাংদা শরুক অনি হেনগৎলে। ভারত মন্দপমসু মীয়াম্না শকখঙবা অমা ওইরে। মীয়াম্না মসিগা লোয়ননা সেলফী নম্নরি অদুগা চাউথোকচবগা লোয়ননা পোস্তসু তৌনরি। সম্মিত অসিদা ভারতনা অফ্রিকাগী য়ুনিয়নবু G-20গী মপুং ওইবা মেম্বর ওইহন্দুনা মশাগী লুচিংবগী মতিক উৎখ্রে। ভারতনা নুংঙাই য়াইফরিঙৈ মতমদা, সিল্ক রুত অসি ভারত অমসুং মালেমদা ৱারি শাবগী হীরম অমা ওইরম্মি হায়বা অদোম্না খঙলবনি। সিল্ক রুতনা কারবারগী মরু ওইবা পাম্বৈ ওইরম্মি। হৌজিক্কী মতমসিদা, ভারতনা G-20দা অতোপ্পা ইকোনোমিক কোরিদোর অমগী ৱাহৌদোক থমখি অমসুং মদুদি ভারত-মিদ্দল ইস্ত-য়ুরোপ ইকোনোমিক কোরিদোরনি। কোরিদোর অসিনা মথংগী চহি চা কয়াগী ওইনা মালেমগী লল্লোন-ইতিক্কী ফম্বাক অমা ওইগনি, অদুগা কোরিদোর অসি ভারতকী লৈহাওদগী হৌদোকখিবনি হায়বা পুৱারীনা মতম পুম্বদা নীংশিংহৌরগনি।

মরুপশিং, G-20গী মনুংদা ভারতকী নহাগী শক্তিনা থৌদোক অসিগা মরী লৈনহনখিবগী মতাংদা অখন্নবা পাউদম অসি ঙসি থম্বগী মথৌ তারে। G-20গা মরী লৈনবা থৌরম কয়া লৈবাক্কী য়ুনিভর্সিতী কয়াদা চহি চুপ্পা পাংথোক্তুনা লাকখি। থৌদোক পরিং অসিগী শরুক অমা ওইনা, য়াম্না নুংঙাইবা থৌরম অমা, G-20 য়ুনিভর্সিতী কন্নেক্ত প্রোগ্রাম অসি হৌজিক দিল্লীদা পাংথোক্কদৌরি। লৈবাক শিনবা থুংবগী য়ুনিভর্সিতীগী মহৈরোইশিংনা প্রোগ্রাম অসিগী খুত্থাংদা পাউ ফাওনগনি, মরী লৈনগনি। IIT, IIM, NIT অমসুং মেদিকেল কোলেজকুম্বা ইকায় খুম্ননীংঙাই ওইরবা ইন্সতিত্যুসন কয়ানা মসিদা শরুক য়াগনি। অদোম্না করিগুম্বা কোলেজ তম্বা মহৈরোই অমা ওইরবদি, সেপ্তেম্বর 26তা পাংথোক্কদৌরিবা প্রোগ্রাম অসিদা মিৎয়েং তাবীয়ু অমসুং শরুক য়াবীয়ু হায়না ঐহাক্না হায়জনীংই। প্রোগ্রাম অসিদা ভারতকী তুংগী মতম অমসুং নহাশিংগী তুংগী মতমগী মতাংদা নুংঙাইরবা ৱাফম কয়া লান্নগদৌরি। ঐহাকসু কোলজকী মহৈরোইশিংগা ৱারি শানবা ঙাইরিবনি।

ঐহাক্কী ইমুংগী মীওইশিং, ঙসিদগী নুমিৎ নিনিগী মতুংদা, সেপ্তেম্বর 27দা ‘ৱর্ল্দ তুরিজম দে’ তারি। মীওই খরদি তুরিজম অসিবু শুপ্নগী লম কোয়বগী পাম্বৈ অমখক্নি হায়না খল্লি, অদুবু মসিগী অচৌবা থৌওং অমদি থবক পীবগা মরী চাউয়া লৈনৈ। সেক্তর অমদা শেল য়াম্না থাদদনা থবক য়াম্না পীবা ঙম্লবদি, সেক্তর অদু তুরিজম ওইগনি হায়নবা লৈরিবনি। তুরিজম সেক্তর চাউখৎহনবা মতমদা, লৈবাক অমগী মতাংদা অফবা ৱাখল্লোন লৈবা অমসুং মদুনা মীয়ামগী পুক্নিং চীংশিনবা হায়বসি য়াম্না মরু ওই। ভারতপু পাম্নবগী মতৌ অসি মমাংগী চহি খরদা য়াম্না হেনগৎলে, অদুগা G-20 মায় পাক্না পাংথোকখ্রবা মতুংদদি, মালেমগী মীয়াম্না ভারত্তা থৱাই চঙবগী মতৌ অসি অমুক্কা হেন্না হেনগৎলে।

মরুপশিং, দেলিগেত লাখ অমা হেনবনা ভারত্তা G-20গীদমক্তা লাকখি। মখোয়না মফমসিগী দাইবর্সিতী; তোঙান-তোঙানবা চৎনবী; চাবগী মখল য়াম্লবা মথেল অমসুং ঐখোয়গী হেরিতেজশিং নীংথিনা খঙনখি। লৈবাকসিদা লাকখিবা দেলিগেতশিংনা ফংখিবা নুংঙাইরবা এক্সপেরিএন্সশিং মখোয়গা লোয়ননা পুদুনা হন্নখি, মসিনা ঐখোয়গী তুরিজম্বু অমুক্কা হেন্না চাউখৎহনগনি। ভারত্তা ৱর্ল্দ হেরিতেজ সাইত কয়া লৈ অমসুং মখোয়গী মশিংসু লেপ্তনা হেনগৎলক্লি হায়বা অদোম খুদিংনা খঙনরবনি। নুমিৎ খরনিগী মমাংদা, শান্তিনিকেতন অমসুং করনাতকাগী হোয়শালা লাইশঙ অসিবু ৱর্ল্দ হেরিতেজ সাইতনি লাউথোকখ্রে। মসিগুম্বা নুংঙাইরবা মায় পাকপা অসিগীদমক্তা ঐহাক্না লৈবাক মীয়াম্বু থাগৎচরি। ঐহাকসু ইং 2018দা শান্তিনিকেতন্দা চৎপগী খুদোংচাবা ফংজখ্রে। শান্তিনিকেতনগা গুরুদেব রবিন্দ্রনাথ তেগোরগা মরী লৈনবনি। গুরুদেব রবিন্দ্রনাথ তেগোরনা শান্তিনিকেতনগী মোত্তো অসি সংস্কৃতকী অরিবা ৱারোলদগী লৌথোকপনি। ৱারোল অদুদি – “য়াত্রা বিশ্বম ভবাতয়েক নীদম” হায়বসিনি।

মসিনা হায়বদি, অপীকপা উচেক মহুম অমনা মালেম পুম্ববু মনুং চলহনবা ঙম্বা হায়বনি।

UNESCOগী মালেমগী হেরিতেজ লিস্তকী মনুং চনখ্রবা করনাতকাগী হোয়শালা লাইশঙ অসি 13শুবা চহি চাগী নীংথিরবা য়ুমশারোলগীদমক্তা মমিং চৎলি। লাইশঙশিং অসিবু UNESCOনা শকখঙবা অসিসু ভারতকী লাইশঙ শাবগী চৎনবীবু ইকায় খুম্নবনি। ভারত্তা লৈবা ৱর্ল্দ হেরিতেজ প্রোপর্তীগী অপুনবা মশিংনা হৌজিক 42 য়ৌখ্রে। ঐখোয়গী পুৱারী অমসুং নাৎকী ওইবা মফমশিং অয়াম্বা ৱর্ল্দ হেরিতেজ সাইত ওইনা মশক খঙহন্নবা ভারতনা কন্না হোৎনরি। ঐহাক্না মীয়ামদা হায়জরি...অদোম্না করিগুম্বা মফম অমদা চৎপগী থৌরাং য়াৎপা খুদিংদা ভারতকী দাইবর্সিতী য়েংনবা হোৎনবীয়ু। তোঙান-তোঙানবা রাজ্যশিংগী চৎনবী খঙবীয়ু। হেরিতেজ সাইতশিংদা চৎপীয়ু। অসুম্না তৌরবা মতুংদা, অদোম্না ঐখোয়গী লৈবাক্কী ফজরবা পুৱারী খঙবগা লোয়ননা লোকেল মীয়ামগী শেন্থোক হেনগৎহনবদা অদোম্না মরু ওইবা মতেংসু পাংগনি।

ঐহাক্কী ইমুংগী মীওইশিং, ভারতকী চৎনবী অমসুং ঈশৈ নোংমাই অসি হৌজিক্তি গ্লোবেল ওইরবনি। মালেম্না মসিবু পাম্বগী মতৌ অসি নোংম-নোংমগী হেনগৎলক্লিবনি। নুংশিরবা ইচানুপী অমনা শেম্বা ওদিও অমা ঐহাক অদোমগী মফমদা তাহনজগে।

####ওদিও ঈশৈ

অদোম্না মসি তাবদা ঙকই, নত্ত্রনে? কয়াদা খোইথুম্লবা খোঞ্জেলনো! ৱাহৈ খুদিংদা উবা ঙম্লিবা মহাক্কী ইমোসন অসিদা ঐখোয়না মহাক্না ইশ্বরবু পামজবগী মতৌ উবা ঙম্মি। মসিগী খোইথুম্লবা খোঞ্জেল অসি জর্মনীগী ইচানুপী অমগীনি হায়না ঐহাক্না হায়বা মতমদা, অদোম্না হেন্না অঙকপা ফাওগনি। ইচানুপী অসিগী মিংদি কস্মী কৌই। চহি 21 শুরবী কস্মী অসি হৌজিক্কান ইনস্তাগ্রামদা মমিং য়াম্না চৎলি। কস্মী অসি জর্মন্দা লৈবনি, মহাক ভারত্তা অমুক ফাওবা লাকখিদ্রি, অদুবু মহাক অসি মহাক্না অমুক ফাওবা লাকখিদ্রিবা ভারতকী ঈশৈ নোংমাইবু পামজবা মীওই অমনি। মহাক্না ভারতকী ঈশৈ নোংমাইবু পামজরিবা অসি ইথিল য়াম্না পীনিংঙাই ওই। মহাক অসি পোকপদগী মমিৎ তাঙলবনি, অদুবু মসিগুম্বা অরুবা শিংনবা অসিনা মহাকপু অতোপ্পদগী তোঙানবা মায় পাকপা ফংবদগী থিংবা ঙমদে। মহাক্না ম্যুজিক অমসুং ক্রিএতিবিতী কয়ামুক পামজগে হায়বদা মহাক্না অঙাং ওইরিঙৈদগী থৱাই য়াওবা হৌরক্লবনি। মহাক্না চহি 3 শুবদগী অফ্রিকাগী দ্রম থিনবা হৌরকখি। মহাক্না চহি 5-6 শুরকপা মতমদা মহাক্কী মফমদা ভারতকী ঈশৈ নোংমাই শক্তাকপীখি। ভারতকী ঈশৈ নোংমাইনা মহাকপু শুমহৎখিদুনা মহাক্না মসিদা মপুং ফানা লুপচখি। মহাক্না তব্লা থিনবসু তম্লে। খ্বাইদগী ইথিল পীনিংঙাই ওইরিবা অসিদি মহাক্না ভারতকী লোল কয়াদা ঈশৈ শকপা নীংথিনা হৈবা অসিনি। সংস্কৃত, হিন্দি, মলায়ালম, তমিল, কন্নর নত্ত্রগা অসমিজ, বেঙ্গালী, মরাথী, উর্দুগী নোৎ খুদিংমক মহাক্না মমুৎ তানা হৈরে। খঙদবা লোল অমদা ৱাহৈ পরেং অনি-অহুম মপুং ফানা খঙবা হায়বসি কয়াদা লুরমগনি অমুক্তা খন্দুনা য়েংসি, অদুবু কস্মীদদি লুদে। মহাক্কী মফমদদি মসিদি অঙাংনা শান্নবগুম্বনি। মহাক্না কন্নরদা শকপা ঈশৈ অমগা অদোমগীদমক্তা অমুক্কা তাহনগে।

###ওদিও ঈশৈ

জর্মনীগী কস্মীনা ভারতকী নাৎ অমসুং ঈশৈ নোংমাইবু পামজরিবা অসিবু ঐহাক্না তসেংনা থাগৎচনীংই। মহাক্না পাংথোক্লিবা খুদিংনা ভারত মচা খুদিংগী পুক্নিং শুমহৎকনি।

ঐহাক্কী ইমুংগী মীওইশিং, ঐখোয়গী লৈবাক্তা এজুকেসনবু সেবা অমনি হায়না মতম পুম্বদা খন্নৈ। চপ মান্নবা ইথিলগা লোয়ননা অঙাংশিংগী এজুকেসনগীদমক্তা হোৎনরিবা উত্তরাখন্দগী নহা খরগী মতাংদা ঐহাক্না খঙবা ঙম্লে। নাইনিতাল জিলাগী নহা খরনা অঙাংশিংগীদমক্তা “ঘোরা লাইব্রেরী” অমা হৌদোক্লে। লাইব্রেরী অসিগী খ্বাইদগী মশক নাইবা মওং-মতৌদি লাইব্রেরী অসিগী লাইরিকশিংনা খ্বাইদগী মনুং হঞ্জিনবা মফমগী অঙাংশিংদা য়ৌবা অসিনি, অদুগা মসিদা নত্তনা, সেবা অসি লেম্না পীরিবনি। লাইব্রীরী অসিগী মখাদা হৌজিক ফাওবদা নাইনিতালগী খুঙ্গং 12 কোল্লে। অঙাংগী এজুকেসনগা মরী লৈনবা অফবা থবক অসিগীদমক্তা লোকেল মীয়াম্না তেংবাংগে হায়না থোক্নরক্লি। মনুং হঞ্জিনবা মফমগী অঙাংশিংনা স্কুলগী লাইরিক্কী মথক্তা ‘শৈরেং’, ‘ৱারি’ অমসুং ‘মোরেল এজুকেসন’গী লাইরিকশিং পাবগী খুদোংচাবা ফংহন্নবা ঘোরা লাইব্রেরী অসিগী খুত্থাংদা হোৎনরি। মসিগুম্বা তোপ তোপ্পা লাইব্রেরী অসি অঙাংশিংনসু য়াম্না পাম্নরি।

মরুপশিং, ঐহাক্না হাইদ্রবাদতা লাইব্রেরীগা মরী লৈনবা মসিগা মান্নবা থবক অমগী মতাংদসু তারে। মফমসিদা, তরেৎশুবা ক্লাস্তা তম্লিবী ইচানুপী আকর্শনা সতিশনা অঙকপা থবক কয়া পাংথোক্লি। মশাগী শুপ্নগী চহি 11 অসিদা মহাক্না লাইব্রেরী অমখক নত্তনা লাইব্রেরী তরেৎ চলাইরি তাবদা অদোম ঙক্কনি। আকর্শনানা মহাক্কী মমা-মপাগা কেন্সর হোস্পিতাল অমদা চহি অনিগী মমাংদা চৎখিবা মতমদা মহাক্না মসিগী ইথিল ফংখি। মহাক্কী মপানা লৈজদ্রবশিংগী মতেং পাংবা চৎখিবনি। মফমদুগী অঙাংশিংনা ‘কলর তৌনবা লাইরিক’ পীবিয়ু হায়রকখি, মসিগী থৌওং অসিনা লাইফদীবিগুম্লবী পীক্লিবী ইচানুপী অসিগী থম্মোই শোকখিবদগী মহাক্না মখল খুদিংগী লাইরিক খোমজিনগে খনখিবনি। মহাক্না য়ুম্লোন্নবা, মরী মতা অমসুং মরুপশিংদগী লাইরিক খোমজিনবা হৌখি, অদুগা মহাক্না হাংদোকখিবা অহানবা লাইব্রীরী অদুদি কেন্সর হোস্পিতাল অদুগী অঙাংশিংগীদমক্তা হাংদোকখিবনি তাবদা অদোম্না নুংঙাইবা পোক্কনি। লৈত-লাইরবা অঙাংশিংগীদমক্তা ইচানুপী অসিনা তোঙান-তোঙানবা মফমশিংদা হাংদোক্লিবা লাইব্রেরী তরেত্তা পুন্না লাইরিক চাউরাক্না লিশিং 6 লৈরে। অঙাং কয়াগী তুংগী পুন্সি শেম্বদা পীক্লিবী আকর্শনানা পাংথোক্লিবা থবক অসিদি ইথিল পীনিংঙাই য়াম্না ওই।

মরুপশিং, ঙসিগী য়ুগ অসিদি দিজিতেল তেক্নোলোজী অমসুং ই-বুক্কী য়ুগনি হায়বসি অশেংবনি, অদুবু, লাইরিকশিংনা ঐখোয়গী পুন্সিদা অচানবা মরুপ অমগী থৌদাং লৌবদি লেপ্ত্রি। অদুনা, ঐখোয়না অঙাংশিংদা লাইরিক পানবা পুক্নিং থৌগৎকদবনি।

ঐহাক্কী ইমুংগী মীওইশিং, ঐখোয়গী স্কৃপচরশিংদা অসুম্না হায়রম্মি –

জীবেশু করুনা চাপী, মাইত্রী তেশু বিধিয়াতম।

মসিনা হায়বদি, অহিঙবা জিবশিংবু নুংশিবীয়ু অমসুং মখোয়বু অদোমগী মরুপ ওইহল্লু হায়বনি। ঐখোয়গী লাইবু পুরিবা জিব অয়াম্বা শা উচেক ঙাক্তনি। ঐখোয়না লাইশঙদা ইশ্বর খুরুম্বা চৎলি, অদুবু মখোয়বু পুদুনা চৎলিবা শাশিংগী মতাংদা কয়া য়াম্না খঞ্জিল্লুদে। মখোয়গুম্বা জিবশিং অসিসু ঐখোয়গী থাজবগী ময়োলদা লৈহনবখক নত্তনা, ঐখোয়না মখোয়বু মতম পুম্বদা ঙাক শেনগদবনি। মমাংগী চহি খরসিদা, লৈবাকসিদা কৈ, নোংশা, কবোকৈ অমসুং শমু মশিং মশক থোক্না হেনগৎপগী মতৌ উবা ফংই। পৃথিবী অসিদা লৈরিবা অতোপ্পা শাশিংবু কনবগী থবক কয়া অমসু পায়খৎলি। মসিগা মান্নবা থবক খরসু রাজস্থানগী পুস্করদা পায়খৎলি। মফমসিদা, সুখদেব ভতজী অমসুং মহাক্কী তীম্না লম্লক্কী শা কন্নবা তোপ-তোপ্পা থবক পায়খৎলি। মহাক্কী তীমগী মমিং করি কৌই খঙবরা? মহাক্কী তীমগী মমিংদি কোব্রা কৌই। মসিগুম্বা খুদোংথীনিংঙাই ওইরবা মিং অসিগী মরমদি, মহাক্কী তীম্না লমদম অসিদা মহু লৈরবা খারৌ কনবগী থবক পাংথোক্লি। তীম অসিদা মীওই মশিং য়াম্না লৈ, কোল অমখক ফংবদা মখোয়না মফমদুদা য়ৌশিল্লি অদুগা মখোয়গী মিসন মখা চত্থৈ। সুখদেবজীনা হৌজিক ফাওবদা মহু লৈরবা খারৌ লিশিং 30 হেনবগী পুন্সি কনখ্রে। মসিগুম্বা খোঙথাং অসিনা মরম ওইরগা মীয়ামগী পুন্সিদা থোক্কদবা খুদোংথীবদগীসু কল্লে, অদুগা মহৌশাগী খলবুসু ঙাক্লে। মখোয়গী তীম্না অতোপ্পা শা অনাবা কনবগী থবকসু পাংথোক্লি।

মরুপশিং, ওতো থৌবা মীওই, এম. রাজেন্দ্র প্রসাদসু তমিল নাদুগী চেন্নৈদা তোপ-তোপ্পা মখলগী থবক পাংথোক্লি। মহাক্না হৌখিবা চহি 25-30দগী খুনুগী সেবা তৌদুনা লাক্লি। মহাক মশাগী ময়ুমদসু খুনু 200 হেন্না লৈ। মফমসিদসু, মহাক্না উচেক খুদিংদা মচিঞ্জাক, ঈশিং পীজ-পীথক্লে, মখোয়গী হকশেলসু শেন্নরি। মহাক্না মসিদা শেল য়াম্না থাদৈ, অদুবু মহাক্কী থবক্তদি অপনবা অমত্তা লৈহন্দে। মরুপশিং, অফবা ৱাখল্লোনগা লোয়ননা মসিগুম্বা থবক তৌবা মীওই উদসিনা ঐখোয়বু নুংঙাইবা ফাওহল্লি। অদোম্না মসিগুম্বা ই-পাউ খঙবা লৈরবদি, মীয়ামদা শেয়র তৌবীয়ু।

ঐহাক্কী ইমুংগী নুংশিরবা মীওইশিং, হৌজিক্কী নিংতম্বগী অমৃত কাল অসিদি লৈবাক মীয়াম খুদিংনা মশাগী থৌদাং পাংথোকপগী মতম্নি। মশাগী থৌদাং পাংথোক্লবা মতমদা, ঐখোয়না ঐখোয়গী পান্দম ফংগদৌরিবনি। মসিগুম্বা থৌদাং খঙবগী মতৌনা ঐখোয়বু অমত্তা ওইহল্লিবনি। য়ু.পি.গী সমভলদা লৈবাক অসিনা মথৌদাং খঙবগী মতৌ উবা ফংলে, মসি ঐহাক্না মীয়ামদা খঙহঞ্জনীংই। অমুক্তা খনবীয়ু, খুঙ্গং 70 হেনবা, মীশিংনা লিশিংদা ওইবা অদুগা মখোয় পুম্নমক্না অমত্তা ওইদুনা পান্দম

অমা ফংনবা হোৎনমিন্নবা। মসি য়াম্না তোয়না থোক্তে, অদুবু সমভলগী মীয়াম্নদি মসিমক পাংথোক্লে। মীয়ামশিং অসিনা পুন্দুনা মীয়াম পুন্না শরুক য়ামিন্নবা অমসুং পুন্না হোৎনমিন্নবগী খুদম অমা থম্লে। তসেংবদি, দিকেদ কয়াগী মমাংদা, লমদমসিদা ‘সোত’ কৌবা তুরেল অমা চেল্লম্মি। অম্রোহাদগী হৌরক্তুনা সমভল ফাওদুনা বরাউন ফাওবা চেল্লম্মবা তুরেল অসি লমদম অসিগী পুন্সি পীবনি হায়না খঙনরম্মি। তুরেল অসিদা ঈশিং লেপ্তনা চেল্লম্মি, মসিনা মফমসিগী লৌমীশিংগা লৌউবগী য়ুম্ফম ওইরম্মি। মতমগী মতুং ইন্না, তুরেলগী ইচেল হন্থরকখি, তুরেল অসিনা চেল্লম্বা মফমশিংবু মীয়াম্না খোপচিন্নখি অমসুং তুরেল অসি মমৈথংদা মাঙখ্রে। তুরেলবু ইমানি খনবা ঐখোয়গী লৈবাকসিদা সমভলগী মীয়াম্নসু সোত তুরেলবু অমুক হিংগৎহল্লসি হায়বা ৱারেপ লৌখি। মমাংগী চহিগী দিসেম্বরদা গ্রাম পঞ্চায়ত 70 হেনবনা সোত তুরেলবু হান্নগুম্না হিংগৎহনবগী থবক হৌখি। গ্রাম পঞ্চায়তশিংগী মীওইশিংনা সরকারগী বিভাগশিংসু মখোয়গা লোয়ননা চৎমিন্নখি। চহিসিগী অহানবা থা তরুকখক্কী মনুংদা, মীয়াম অসিনা তুরেল অসিগী কিলোমীতর 100 হেনববু হান্নগী ফিভমদা হঞ্জিলহল্লে তাবদা অদোম্না নুংঙাইবা ফাওগনি। নোংজু থা হৌরকপা মতমদা, মীয়াম অসিগী হোৎনজমন মহৈ য়ানখি অমসুং সোত তুরেল অসি ঈশিংনা থনখি। থৌদোক অসি মফমসিগী লৌমীশিংগী নুংঙাইবগী অচৌবা পুংফম ওইখি। মীয়াম্না তুরেলগী তোর্বান্দা ৱা লিশিং 10 হেন্না থারে। মসিনা তুরেল মপালবু তেক্ত কায়দবা ওইহল্লি। তুরেল অসিদা কাঙ মচা পোকহন্দনবা গম্বুসিয়া ঙা লিশিং 10 হেনবসু থাদরে। মরুপশিং, ঐখোয়না ৱাখলবু চেৎলবদি, খ্বাইদগী চাউবা শিংনবসু মায়থীবা পীদুনা অওনবা পুরকপা ঙমগনি হায়বসি সোত তুরেলনা খুদম ওইনা তাক্লে। ইশাগী থৌদাংগী লম্বীদা চত্তুনা, অদোমসু অকোয়বদা লৈবা মসিগুম্বা অওনবা পুরকপগী পাম্বৈ ওইবা য়াগনি।

ঐহাক্কী ইমুংগী মীওইশিং, ৱাখলনবু চেৎলবা অমসুং করিগুম্বা অমা তম্নীংবগী অপাম্বা লৈরবদি, থবক অমত্তা অরুবা ওইদে। নোংচুপ বেঙ্গলগী শ্রীমতি শকুন্তলা সর্দারনা মসি অচুম্বনি হায়বা তাক্লে। ঙসিদি, মহাক অসি অতোপ্পা নুপী কয়াগী ইথিল ওইরে। শকুন্তলাজী অসি জঙ্গল মহলগী শতানালা খুঙ্গংদা লৈবনি। মহাক্কী ইমুংনা মতম শাংবদগী শিন্মী ওইদুনা ইমুংগী চরা তান্দুনা লাক্লি। মহাক্কী ইমুংনা নোংমগী পুন্সি হিংবখক্তদসু অৱাবা কয়া মাইয়োক্নখি। মদুদগী, মহাক্না অনৌবা লম্বী অমদা খোঙদারগে খনখি অমসুং মদুদা মায় পাক্তুনা মীপুম খুদিংবু অঙকপা ফাওহনখি। মহাক মসি মতৌ করম্না পাংথোকখিবগে খঙবরা? মদুগী পাউখুমদি, ফি তুনবা কোনগী মছিন। মহাক্না কোনগী মছিন শিজিন্নদুনা ‘সাল’ মনাদা ফজরবা দিজাইন শেম্বা হৌখি। মহাক্কী মহৈ অসিনা মহাক্কী ইমুংগী মরাইবক হোংদোকখি। মহাক্না শেম্বা দিজাইন অসিগী দিমান্দ নোংম-নোংমগী হেনগৎলক্লি। শকুন্তলাজীগী মহৈনা মহাকখক্কী নত্তনা ‘সাল’ মনা খোম্বা মীওই কয়াগী পুন্সিদা অহোংবা পুরকখি। হৌজিক্তি, মহাক্না নুপী কয়াদা ত্রেনিং পীরি। মতম অমদা শিন্মীগী খুৎশুমলদা হিংলম্বা ইমুং অমনা অতোপ্পদা থবক পীদুনা ইথিল পীবা হায়বসি অমুক্তা খন্থবীয়ু। মহাক্না মহাক্কী ইমুংবু মশানা লেপচবা ঙমহল্লে। মসিনা মহাক্কী ইমুংনা অতোপ্পা থবকশিংদা মিৎয়েং চঙবগী খুদোংচাবসু পীরে। মসিদগী অহেনবা অমসু থোকখ্রে। শকুন্তলাজীগী ফিভম হেক ফগৎলকপগা মহাক্না শেল তুংশিনবা হৌখি। মহাক্না মহাক্কী অঙাংশিংগী অফবা তুংগী মতমগীদমক্তা হৌজিক্তি লাইফ ইন্স্যুরেন্স প্লানশিংদা শেল থাদবসু হৌরে। শকুন্তলাজীবু থাগৎপগী পনখৈ লোইররোই। ভারত মীয়াম অসি মসিগুম্বা তেলেন্তনা থনবনি, মখোয়দা খুদোংচাবা অমা পীয়ু, মখোয়না অঙকপা থবক কয়া পাংথোক্তুনা উৎকনি।

মরুপশিং, দিল্লীদা G-20 সম্মিত পাংথোকখিবা মতমদা, মালেমগী লুচিংবা কয়ানা রাজঘাত্তা পুন্না লাক্তুনা বাপুগী মফমদা ইকায় খুম্নবা উৎখিবগী শক্তম কনানা কাওবা ঙমগনি। বাপুজীগী ৱাখল্লোন অসি হৌজিক্কী মালেমদা কয়া য়াম্না চুনরিবগে হায়বগী মসিনা খুদম ওইরিবনি। গান্ধী জয়ন্তীগী থৌরমদা লৈবাক শিনবা থুংবদা লু-নানবগী থৌরম কয়া পাংথোক্নবা থৌরাং তৌরিবসিদা ঐহাক্না নুংঙাইবা ফাওই। ‘স্বচ্ছতা হি সেবা অভিয়ান’ অসিবু কেন্দ্র সরকারগী ওফিসশিংদা থৱাই য়াওনা পাংথোক্নরি। ইন্দিয়ন স্বচচতা লীগতা মশক থোকপা শরুক য়াবগী মতৌ লৈরি। ঙসিদি, ঐহাক্না ‘মন কী বাত’কী খুত্থাংদা লৈবাক মীয়ামগী মফমদা হায়নীংবদি, ওক্তোবর 1, নোংমাইজিং নুমিৎকী অয়ুক্কী পুং 10 তাবা মতমদা লু-নাবগী অচৌবা থৌরম অমা পাংথোক্কনি। অদোমসু ইশাগী মতম কাইথোক্তুনা লু-নানবগা মরী লৈনবা কেম্পেন অসিদা শরুক য়াহন্নীংই। অদোমসু ইশাগী লৈরক, লৈকাই....পার্ক্তা ওইরো, তুরেল, পাৎ নত্ত্রগা মীয়ামগী মফম অমা হেক্তদা মসিগুম্বা লু-নানবগী কেম্পেন্দা শরুক য়াবা য়াগনি। অমৃত সরোবর সারিবা মফম খুদিংবুসু লু নালহনগদবনি। মসিগুম্বা লু-নানবগী থবক অসিমক্না গান্ধীজীগী মফমদা ইকায় খুম্নবা উৎপা ওইগনি। হন্দক্কী গান্ধী জয়ন্তীগী থৌরম অসিদা খাদীগী পোত্থোক অমদি শোইদনা লৈগে খনবীয়ু হায়না ঐহাক্না মীয়ামদা হায়জরি।

ঐহাক্কী ইমুংগী মীওইশিং, ঐখোয়গী লৈবাক অসিদসু কুহ্মৈগী মতম হৌরক্লে। অদোম পুম্নমক্না ইমুংগীদমক্তা করিগুম্বা খরা লৈগে খল্লমগনি। কনাগুম্বা অমনা নব্রাত্রী মনুংদা অফবা থবক অমা-অনিদি হৌগে শোইদনা খন্নরমগনি। মসিগুম্বা নুংঙাইবগী মতমসিদা, অদোম্না ভোকেল ফোর লোকেলগী মন্ত্রবু শোইদনা নীংশিংগদবনি। অদোম্না য়ারিবমখৈ ভারত্তা শাবা পোত্থোক লৈগদবনি, শিজিন্নগদবনি অমসুং অতোপ্পদা খুদোল তমগদবনি। অদোম্না নুংঙাইরিবা অদুনা অতোপ্পা ইমুং অমগী নুংঙাইবগী পাম্বৈ ওইগদৌরিবনি। অদোম্না লৈবা ভারতকী পোত্থোক খুদিংনা ঐখোয়গী শিন্মী, ক্রাফ পর্সন অমসুং অতোপ্পা বিশ্বকর্মা ইমুংগী ইচিল ইনাওশিংদা হকথেংননা কান্নবা পীগদৌরিবনি। হৌজিক্কান্দি, স্তার্তঅপ কয়া অমসু লোকেলগী পোত্থোকশিংবু শৌগৎলি। অদোম্না লোকেলগী পোত্থোক লৈবা মতমদা, মসিগুম্বা স্তার্তঅপ তৌরিবা নহাশিংদসু কান্নবা পীগদৌরিবনি।

ঐহাক্কী নুংশিরবা ইমুংগী মীওইশিং,

ঙসিগী ‘মন কী বাত’ অসিগীদি মসিদা লোইরে। ঐহাক্না মথংগী মন কী বাত্তা অদোমগা উন্নবা মতমদদি নব্রাত্রী অমসুং দসেরা লোইরগনি। মসিগী কুহ্মৈগী মতমসিদা, অদোম্না হরাও তয়াম্না কুহ্মৈ পাংথোকপা ওইবীয়ু। অদোমগী ইমুংদা নুংঙাই য়াইফবনা থনবা ওইসনু, মসি ঐহাক্কী অপাম্বনি। কুহ্মৈশিং অসিগীদমক্তা অদোমগী মফমদা য়াইফ পাউজেল পীজরি। ঐহাক্না অনৌবা থীম, লৈবাক মীয়ামগী মায় পাকপগী অনৌবা ৱারিগা লোয়ননা অদোমগা অমুক্কা উন্নরসি। মেসেজ লেপ্তনা থাবীরকউ, অদোমগী এক্সপেরিএন্স পাউদম্বা কাওবীগনি। ঐহাক্না মখোয়বু ঙাইদুনা লৈগনি।

অদোম্বু থাগৎচরি।

নমস্কার!

***