ভারতকী চীফ জস্তিস, শ্রীমান দি.ৱাই. চন্দ্রচুরজী, কেন্দ্রগী লো মন্ত্রী, ঐহাক্কী মরুপ, শ্রী অর্জুন রাম মেঘ্বালজী, UKগী লোর্দ চেন্সেল্লর, শ্রী এলেক্স চাক, এত্তর্নী জেনেরেল, সোলিসিতর জেনেরেল, সুপ্রীম কোর্তকী ইকায় খুম্ননীংঙাই ওইরবা অতোপ্পা জজ, বার কাউন্সিলগী চেয়রমেন অমসুং মেম্বর, তোঙান-তোঙানবা লৈবাকশিং অমসুং ঐখোয়গী লৈবাক্কী রাজ্যশিংদগী লাক্লিবা মীথুংলেন, ইবেম্মা অমসুং ইবুংঙোশিং!

মালেম পুম্বগী লিগেল ফ্রেতর্নিতীগী শক্নাইরবা মীওইশিংগা উন্নবা, মখোয়গা ৱারি ৱাতাই শাবা ফংবসি ঐহাক্কী ওইনদি য়াম্না লাইবক ফবা অমসুং নুংঙাইবা পুংফম অমনি। ভারতকী কাচিন কোয়াদগীসু মীয়াম কয়া ঙসি লাকপীরি। কনফরেন্স অসিগীদমক্তা ইংলেন্দগী লোর্দ চান্সেল্লর অমসুং ইংলেন্দগী বার এসোসিএসনগী দেলিগেতশিংসু ঙসি ঐখোয়গী মরক্তা তিনবীরি। লোয়ননা, কম্মনৱেল্থ লৈবাক অমসুং অফ্রিকাগী লৈবাক কয়াগী মীহুৎশিংসু কনফরেন্স অসিদা শরুক য়ারি। মালেমগী উকিলশিংগী কনফরেন্স অসিনা ভারতকী বাসুদৈব কুতুম্বাকমগী ৱাখল্লোনগী শক্তাক অমদি খুদম অমসু মওং অমদা ওইরি। থৌরম অসিগীদমক্তা লেংবীরক্লিবা মালেমগী মীথুংলেনশিংবু ঐহাক্না তরাম্না ওকচরি। ঐহাক্না ভারতকী বার কাউন্সিলবুসু অখন্ননা থাগৎচরি, মখোয়না থৌরম অসিবু নীংথিনা পাংথোকপগী থৌদাং লৌবীরি।

 মরুপশিং,

লৈবাক অমা চাউখৎপা মতমদা লৈবাক্তুগী লিগেল ফ্রেতর্নিতীগী অচৌবা থৌদাং য়াওই। ভারত্তা জুদিসিএরী অমসুং বারনা ভারতকী আইনগী পথাপ্পু চহি কয়াদগী ঙাক শেন্দুনা লাক্লি। ঙসি ঐখোয়গী মরক্তা তিল্লীবা মালেমগী মীথুংলেনশিংগী মফমদা ঐহাক্না অখন্নবা ৱাফম খরা থমজবা পাম্মি। ভারতনা মতম খরগী মমাংদা নিং তম্বগী চহি 75 মপুং ফাখ্রে, মসিগী নিংতম লান অসিদসু লিগেল প্রোফেসনগী অচৌবা থৌদাং য়াওখি। নিংতম ইহৌ মনুংদা উকিল কয়া অমনা মখোয়না পায়রিবা কেস কয়া থাদোক্তুনা লৈবাক্কী ইহৌদা শরুক য়াবগী লম্বী ওইনা খন্নখি। ঐখোয়গী নুংশিজরবা লৈবাক্কী মপা, মহাত্মা গান্ধী, ঐখোয়গী সংবিধানগী মরু ওইবা আর্কিতেক বাবা সাহেব অম্বেদকর, লৈবাক্কী অহানবা রাস্ত্রপতি, দাঃ রাজেন্দ্র প্রসাদ, লৈবাক্কী অহানবা প্রধান মন্ত্রী, পন্দিৎ জৱাহর্লাল নেহরু, লৈবাক্কী অহানবা গৃহ মন্ত্রী, সর্দার বল্লব ভাই পতেল, নিংতম ইহৌ মনুংদা লৈবাক্কী মফমদা অচুম্বা মাইকৈ তাকপীখিবা লোকমান্যা তিলক ওইরো, বীর সাবর্কর ওইরো, মখোয়গুম্বা শক্নাইরবা মীওই কয়া অসি উকিল ঙাক্তনি। মসিনা হায়বদি, লিগেল প্রোফেসনগী এক্সপেরিএন্স কয়া অদুনা নিংতম্বা ভারতকী ফম্বাকপু পাঙ্গল লৈহনবদা য়াম্না তেংবাংখি হায়বনি। অদুগা, মালেম্না ভারত্তা থম্বা থাজবনা নোংম-নোংমগী হেনগৎলক্লিবা অসিদসু ভারতকী মীচঙ মীখায় নাইদবা ৱায়েল পথাপকী অচৌবা থৌদাং য়াওরিবনি।

ভারতনা পুৱারী ওইরবা ৱারেপ কয়া লৌরিঙৈ মতমসিদা ঙসিগী কনফরেন্স অসি পাংথোক্লি। ভারতকী পার্লিয়ামেন্তনা নুমিৎ খরনিগী মমাংদা, লোক সভা অমসুং বিধান সভাদা নুপীগী মফম চাদা 33 খাকপগী আইন অমগী অয়াবা পীখ্রে। নারীশক্তি বন্দন আইন অসিনা ভারত্তা নুপীনা লমজিংদুনা চাউখৎ থৌরাং পুরকপগী লমদা অনৌবা মাইকৈ তাক্লগনি, ইথিল পীগনি। নুমিৎ খরনিগী মমাংদা, পুৱারী ওইরবা G20 থৌরমদা, মালেম্না ঐখোয়গী গনতন্ত্র, দেমোগ্রাফী অমসুং দিপ্লোমেসীগী শক্তমসু উখ্রে। থা অমগী মমাংদা, ঙসিমক্কী নুমিৎ অসিদা থাগী খা থংবা পোলদা য়ৌবা ঙম্বা অমত্তা ঙাইরবা লৈবাক অমা ভারতনা ওইখি। মসিগুম্বা মায় পাকপা অমসুং মশাদা থাজবনা থল্লবা ভারতনা ইং 2047 ফাওবদা চাউখৎপা লৈবাক অমা ওইবগী পান্দম ফংনবগীদমক্তা য়াম্না কন্না হোৎনরি। মসিগুম্বা মপুং ওইবা পান্দম ফংনবগীদমক্তা, মীচঙ মীখায় নাইদবা, মনিং তম্বা জুদিসিএল পথাপ অমদা য়ুম্ফম ওইবগী মথৌ য়াম্না তাই। মালেমগী উকিলগী কনফরেন্স অসিনা ভারতপু মাইকৈ অসিদা পুবদা য়াম্না কান্নবা মতেং পীগনি হায়না ঐহাক্না থাজৈ। কনফরেন্স অসিগী মনুংদা, লৈবাক খুদিংনা মখোয়গী খ্বাইদগী ফবা থৌওংশিং তাক্নগনি হায়না ঐহাক্না থাজবা থমজরি।

মরুপশিং,

অমগা অমগা অরুবা মরী লৈনবা মালেম ওইবা ঙসিগী 21শুবা চহি-চা অসিদা ঐখোয়না হৌজিক হিংলি। লিগেল মাইন্দ নত্ত্রগা ইন্সতিত্যুসনশিংনা মশাগী জুরিসদিক্সনগী মতাংদা য়াম্না চেকশিল্লি। অদুবু, ঙমখৈ নত্ত্রগা জুরিসদিক্সন ইন্দবশিংগী মসিগুম্বা পাঙ্গলশিংগী মাইয়োক্তা ঐখোয়না লেপ্লি। শিংনবা অসিনা মালেমগী থাক্তা ওইরবনিনা, মসিগী ৱারোইশিনসু মালেমগী থাক্তা পুরকফম থোকই। সাইবর তেরোরিজম ওইরো, মনী লোন্দরিং ওইরো, আর্তিফিসিএল ইন্তেল্লিজেন্স ওইরো, হায়রিবশিং অসি লান্না শিজিন্নবগী ওইথোকপা য়াম্না লৈ, মসিগুম্বা হীরম কয়া অসিদা তেংবাংনবগীদমক্তা মালেমগী ওইবা ফ্রেমৱর্ক শেম্বা হায়বসি শুপ্নগী লৈঙাক্লোই নত্ত্রগা সরকার খক্কী থৌদাং নত্তে। মসিগীদমক্তা, তোঙান-তোঙানবা লৈবাক কয়াগী লিগেল ফ্রেমৱর্ক পুনশিনবগী মথৌ তাই। খুদম ওইনা হায়রবদা, ঐখোয়না এয়র ত্রাফিক্কী মতাংদা অমত্তা ওইনা তেংবাংনরি। অদোমগী আইন্দি অদোমগী মফমদা চৎনবনি, ঐখোয়গীনা ঐখোয়গীদা চৎনবনি হায়না লৈবাক খুদিংনা হায়নদে। পুম্নমক্না কম্মন রুল অমসুং রেগ্যুলেসন, প্রোতোকোল ইন্দুনা চৎনৈ। মতৌ অসুম্না, ঐখোয়না তোঙান-তোঙানবা দোমেনগী মালেমগী ওইবা ফ্রেমৱর্ক শেম্বা তাই। মালেমগী উকিলগী কনফরেন্স অসিনা মাইকৈ অসিদা শোইদনা খন্ন-নৈনফম থোকই, মালেমদা অনৌবা মাইকৈ তাকফম থোকই।

মরুপশিং,

য়াম্না মরু ওইবা হীরম অমদি অলতর্নেত দিস্প্যুত রিজোল্যুসন – ADR হায়বসিনি, তুশারজীনা মসিগী মতাংদা নীংথিনা তাকপীখ্রে। কম্মর্সিএল ত্রাঞ্জেক্সনগী কমপ্লেক্সিতী হেনগৎলক্লিবা অসিগা লোয়ননা মালেম শিনবা থুংবদা ADR চৎনবসু য়াম্না য়াঙনা হেনগৎলক্লি। কনফরেন্স অসিদা হীরম অসিগী মতাংদা খন্ন-নৈনগনি হায়না ঐহাক্কী ইফমদা পাউদম্বীরক্লে। ভারত্তদি শিংনবা কয়াগী ৱারোইশিন অসি পঞ্চায়তনা চহি কয়াদগী পুরক্তুনা লাক্লি, মসি ঐখোয়গী সংস্কারগী শরুক ওইদুনা লাক্লি। মসিগুম্বা ইনফোর্মেল ওইবা থৌওং অসিগী পরি নাইবা পথাপ অমা শেম্নবা ভারত সরকারনা মেদিএসন এক্ত শেমখি। শিংনবা কয়াগী ৱারোইশিন পুরকপগী ওইনদি ভারতলী লোক অদালতকী পথাপ অসি য়াম্না কান্নবা পাম্বৈ অমা ওইরিবনি। শিংনবা অমগী ৱারোইশিন পুরকপদা চাংচত্তা শুপ্নগী পৈশা 35খক চঙবগী মতৌ অমা ঐহাক্না গুজরাত্তা লৈরিঙৈদা উজখি। হায়বদি, মসিগুম্বা খুদোংচাবা অসি ভারত্তা লৈ হায়বনি। মমাংগী চহি 6তা য়ামদ্রবদা কেস লাখ 7তি লোক অদালতনা ৱায়েল পীখি।

মরুপশিং,

জস্তিস দেলিবরীগী হীরম অমসু লৈ, মসিগী মতাংদা য়াম্না ঙাঙনদে। মসিদি লোল অমসুং আইন লাইথোকহনবনি। আইন অসি মখল অনি থোক্না লান্থোকপা য়াই হায়না ঐখোয়না, ভারত সরকারনা খল্লি। অমনা – অদোম্না খঙনরিবা লোলদা দ্রাফ তৌবা, অনিশুবনা – লৈবাক্কী মীচম অমা হেক্তনা খঙবা ঙম্বা লোলদা। মখোয়না আইনবু য়াম্না লাইনা খঙফম থোকই। পথাপ অসিনা অহানবা থৌওংদা চত্থদুনা লাকপনা, ঐখোয়সু অনিশুবা থৌওংগী মতাংদা খন্নরি। অচুম্বা ৱায়েল পীবগী থৌওংদা আইন ইরিবা লোল, কোর্তকী থবক থৌরম চত্থরিবা লোলগী মখা য়াম্না পোল্লি। মমাংদদি, আইন দ্রাফ তৌবসি য়াম্না লুরম্মি। ঐখোয়না হৌজিক ভারত্তা আইন শেম্বা মতমদা মখোয়বু য়াম্না লাইনা খঙবা য়াহন্নবা অমসুং ভারতকী লোলশিংদা ফংহন্নবা য়াম্না কন্না হোৎনরি। অদোম্না দেতা প্রোতেক্সন লো উরম্বা য়ারে। মসিদসু ঐখোয়না লাইহন্নবা য়াম্না হোৎনখি, মীচম মীয়াম্না মসিগী ৱাহন্থোক অসি লায়না খঙবা ঙমগনি হায়না ঐহাক্না খল্লি। ভারতকী জস্তিস সীস্তেমদা অহোংবা য়াম্না লাক্লে হায়না ঐহাক খল্লি। কোর্তকী ৱায়েল খুদিংমক লিতিগেন্তকী লোলদা ফংহল্লগনি হায়না জস্তিস চন্দ্রচুরনা হায়খিবা অদুগীদমক্তা ঐহাক্না মহাকপু থাগৎচরি। মসি পাংথোকপদা চহি 75 চঙখ্রে। ৱায়েল খুদিংবু লোকেল লোলশিংদা ৱাহন্থোক হন্দোক্নবা ভারতকী সুপ্রীম কোর্তনা শিন-লাঙলিবা অসিগীদমক্তা ঐহাক্না মখোয়বু থাগৎপা পামজৈ। মসিনা ভারতকী মীচম মীয়ামদা চাউনা তেংবাংগনি। অনাবনা খঙবা লোল ঙাঙদ্রবদি, অনাবগী লাইনা কৈদৌনুংদা লাইয়েংবা য়ারোই, লাইয়েংসু লৈরোই।

মরুপশিং,

ঐখোয়না তেক্নোলোজী, রিফোর্ম, জুদিসিএলগী অনৌবা থৌওংদগী লিগেল প্রোসেস্পু করম্না ফগৎহনগনি হায়বগী মতাংদা লেপ্তনা হোৎনফম থোকই। তেক্নোলোজী চাউখৎলকপনা জুদিসিএরী সীস্তেমগী মাঙদা অচৌবা খুদোংচাবা অমা শেমদুনা থম্লবনি। তেক্নোলোজী চাউখৎলকপনা ঐখোয়গী ত্রেদ, ইনভেস্তমেন্ত অমসুং কম্মর্স সেক্তরদা চাউনা মতেং পাংখ্রবনি। অদুনা, লিগেল থবক্কা মরী লৈনবা মীওই খুদিংনসু তেক্নোলোজী রিফোর্মগী শরুক য়ারিবমখৈ ওইনবা হোৎনফম থোকই। মালেমগী উকিলগী কনফরেন্স অসিনা মালেম্না জুদিসিএল সীস্তেমদা থাজবা থম্বগী চাং হেনগৎহনবদা চাউনা তেংবাংগনি হায়না ঐহাক্না থাজবা থম্লি। ঐহাক্না থৌরম অসিগা মরী লৈনবা মীওই খুদিংগী মফমদা থৌরম অসিনা মায় পাকপা ওইয়ু হায়বা য়াইফ পাউজেল পীজদুনা মখোয়বু অমুক্কা হন্না থাগৎচরি।

***