প্রধানমন্ত্রীগী লোইশঙ
লোক সভাদা সংসদকী অখন্নবা মীফমদা প্রধান মন্ত্রী ৱা ঙাংখ্রে
“ঙসি অসি ভারতকী সংসদকী চহি ৭৫ শুরবা খোঙচৎ নিংশিংনবা থৌরম অমনি”
“ঐখোয় অনৌবা শঙলেন্দা হোঙজিল্লগনি অদুবু মসিগী শঙলেন অসি তুংগী মীরোলশিং ইথিল পীগনি অমসুং ভারতকী গনতন্ত্রগী খোঙচৎতা মসি সনাগী তাঙ্কক অমা ওইরগনি”
“অমৃত কালগী অহানবা মঙালদা নৌনা থাজবা, মাইপাকপা অমসুং তৌবা ঙম্বশিং য়াওরে”
“লৈবাক অসিনা প্রসিদেন্ত ওইরিঙৈদা জি-২০দা অফ্রিকান য়ুনিয়ন য়াওহনবগীদমক ভারতনা মতম পুম্নমক্তা চাউথোকচবা ফাওগনি”
“জি-২০ মনুংদা, ভারত ‘বিশ্ব মিত্রা’ অমা ওইরে”
“হাওসকী অপুনবা মীফম অসিনা অকনবা থৌনাগা লোয়ননা মীয়ামগী অনিংবশিং ফোঙদোক্লে”
“চহি ৭৫ অসিদা, খ্বাইদগী চাউনা মাইপাকপদি মীচম মীয়াম্না মখোয়গী সংসদতা থাজবা হেনগৎলকপা অসিনি”
“সংসদতা তেরোরিস্তশিংনা লান্দারকপা অসি ভারতকী থৱায়দা লান্দারকপনি”
“হাওস অসি ঐখোয়গীনি, ভারতকী গনতন্ত্রদা অকা-অকুম কয়া লৈরবসু, মীয়ামগী থাজবশিংগী মফম ওইরি”
Posted On:
18 SEP 2023 1:35PM by PIB Imphal
ঙসি লোক সভাদা সংসদকী অখন্নবা মীফমদা প্রধান মন্ত্রী শ্রী নরেন্দ্র মোদী ৱা ঙাংখ্রে। অখন্নবা মীফম অসি সেপ্তেম্বর ১৮ দগী সেপ্তেম্বর ২০,২০২৩ ফাওবা চৎথগনি।
হাওসতা ৱা ঙাংবদা প্রধান মন্ত্রীনা হায়খি নৌনা শঙ্গারবা শঙলেন্দা হোঙজিন্দ্রিঙৈ মমাংদা ঙসি অসি ভারতকী সংসদকী চহি ৭৫ শুরবা খোঙচৎ নিংশিংনবা থৌরম অমনি। অরিবা সংসদকী শঙলেন অসি ভারতনা নিংতম্বা ফংদ্রিঙৈদা ইম্পেরিয়েল লেজিসলেতিপ কাউন্সিল ওইনা থবক তৌরমখি অমসুং নিংতম্বা ফংলবা মতুংদা ভারতকী সংসদ ওইনা শক খঙনখি।
মহাক্না হায়খি মসিগী শঙলেন অসি শানবা ৱারেপ মপান লমগী লৈঙাকপশিংনা লৌজরবসু, ভারতমচাশিংগী কৎথোকপা অমসুং চাদিং তৌখিবা শেনফম্না মসি শেমগৎখিবনি। চহি ৭৫গী খোঙচৎ অসিদা, হাওস অসিনা খ্বাইদগী ফবা মীফমশিং পাংথোকখ্র অমসুং মীওই খুদিংমক্না পাংথোকখিবা থবকশিং উখ্রে। ঐখোয় অনৌবা শঙলেন্দা হোঙজিল্লগনি অদুবু মসিগী শঙলেন অসি তুংগী মীরোলশিং ইথিল পীগনি। ভারতকী গনতন্ত্রগী খোঙচৎতা মসি সনাগী তাঙ্কক অমা ওইরগনি।
প্রধান মন্ত্রীনা হায়খি অমৃত কালগী অহানবা মঙালদা নৌনা থাজবা, মাইপাকপা অমসুং তৌবা ঙম্বশিং য়াওরে অমসুং মালেম্না ভারতকী মরমদা অমসুং ভারতকী মাইপাকপশিংগী মরমদা ৱারি শানরে। মসি ঐখোয়গী চহি ৭৫ গী সংসদকী পুৱারিগী অপুনবা থবক্কী ফল অমনি।
চন্দ্রয়ান-৩ মাইপাকপগী মতাংদা শ্রী মোদীনা হায়খি মসিনা অনৌবা থবক, সাইন্স, তেক্নোলোজি অমসুং ঐখোয়গী সাইন্তিস্তশিংগী তৌবা ঙম্বা অমসুং ভারতমচা করোর ১৪০গী থৌনা য়াওনা ভারতকী তৌবা ঙম্বশিংগী অতোপ্পা মশক অমা উৎলে। মখোয়গী মাইপাকপগীদমক সাইন্তিস্তশিংদা হাওস অমসুং লৈবাক মীয়াম্না থাগৎপা অদু প্রধান মন্ত্রীনা পাউদমখি।
প্রধান মন্ত্রীনা হায়খি মমাঙদা নাম মীফম পাংথোকপদা লৈবাক অসিগী মীয়াম্না হোৎনখিবশিং হাওসনা থাগৎপা ফোঙদোকখি অমসুং জি-২০ মাইপাকপদা চিয়ারনা থাগৎপা ফোঙদোকচরি। জি-২০ মাইপাকপা অসি ভারতমচা করোর ১৪০গী মাইপাকপনি অমসুং মসি অকক্নবা মীওই অমা নত্ত্রগা দল অমগী মাইপাকপা নত্তে। ভারতকী মফম ৬০ হেনবদা থৌরম ২০০ হেন্না মাইপাকপা অসি ভারতকী খেন্নবশিং মাইপাকপা উৎথোকপা অমনি। লৈবাক অসিনা প্রসিদেন্ত ওইরিঙৈদা জি-২০দা অফ্রিকান য়ুনিয়ন য়াওহনবগীদমক ভারতনা মতম পুম্নমক্তা চাউথোকচবা ফাওগনি।
ভারতকী তৌবা ঙম্বশিংদা চিংনবা পোকহল্লিবা মীওই খরগী ফত্তবা ৱাখলশিং পুথোক্লদুনা, প্রধান মন্ত্রীনা হায়খি জি-২০ দিক্লারেসন অমসুং মফম অসিদা শেমখিবা তুংগী লম্বীগী মতাংদা য়ানবা অমা পুরকখ্রে। ভারতনা জি-২০গী প্রসিদেন্ত ওইবগী নবেম্বরগী অরোইবা তারিখ ফাওবা লৈবাক অসিনা মসি মপুংফানা শীজিন্নগনি অমসুং মহাক্না চিয়ারমেন ওইবগী মখাদা পি-২০ মীফম(পর্লিয়ামেন্তরি ২০) অমা পাংথোক্নবা স্পিকরগী ৱারেপ শৌগৎলে।
মহাক্না হায়খি ভারতনা মশামক বিশ্বামিত্র অমা ওইনা মফম অমা কনবা অসি পুম্নমক্কী চাউথোকপা অমনি অমসুং মালেম শীনবা থুংনা ভারত অসি মরুপ অমা ওইনা উরে। মসিগী মরমদি বেদা অমসুং বিবেকানন্দদগী ঐখোয়না ফংখিবা ঐখোয়গী সংস্কারশিং অদুনা ওইহনবনি। সবকা সাথ সবকা বিকাসকী লাইৱানা মালেম অসি ঐখোয়দা পুশিল্লক্লে।
ইমুং অমা অনৌবা য়ুম অমদা হোংজিল্লকপগা চাংদম্নরদুনা, প্রধান মন্ত্রীনা হায়খি অরিবা সংসদকী শঙলেন থাদোক্লম্বা অসি য়াম্না পুক্নিং নুংশিবা মিকুপ অমনি। চহি কয়া অসিদা থেংনখিবা থৌদোক কয়া হাওসকী মেম্বর পুম্নমক্কী নিংশিংবা ওইনা লিদুনা থমহৌরগনি। মসিগী মাইপাকপা অসি ঐখোয় খুদিংমক্কীনি। মসিগী সংসদকী হাওস অসিগী চহি ৭৫গী পুৱারিদা অনৌবা পুৱারি অমা শেম্বগা মরী লৈনবা মশিং থিঙমদ্রবা থৌদোক কয়া লৈবাক অসিনা থেংনখ্রে অমসুং ঙসি অসি ভারতকী মীচম মীয়ামদা ইকায়খুম্নবা উৎনবা খুদোংচাবা অমনি।
প্রধান মন্ত্রীনা হায়খি অহানবা এম.পি ওইনা মহাক সংসদতা লাকখি অমসুং শঙলেন অসিদা মহাক্না ইকায়খুম্নবা উৎখি। মসি পুক্নিং নুংশিবা মীকুপ অমনি অমসুং ভারতকী গনতন্ত্রগী শক্তিনা মরম ওইদুনা রেলৱে স্তেসন অমদা হিংনবা শেন তাল্লিবা লায়রবা অঙাং অমনা সংসদ য়ৌরকখিবনি। লৈবাক অসিনা ঐঙোন্দা অসুক য়াম্বা নুংশিবা, ইকায়খুম্নবা অমসুং থৌজাল পীগনি হায়বা ঐ কৈদৌঙৈদা থাজখিদে।
সংসদকী থোঙ্গালদা হক্তুনা ইরিবা উপনিষদকী ৱাহৈ পরেং অমা পল্লদুনা, প্রধান মন্ত্রীনা হায়খি মীয়ামগীদমক থোং হাংদোক্নবা অমসুং কমদৌনা মখোয়গী হকশিং ফংবগে হায়বা য়েংনবা মুনিশিংনা হায়খি। হৌজিক্কী অমসুং হৌখ্রবা হাওসকী মেম্বরশিংনা মসিগী মরী লৈনবা অচুম্বশিং উবা ফংলে।
প্রধান মন্ত্রীনা হায়খি মতমগী মতুংইন্না হাওসতা অহোংবা লাকপদগী মসিদা খুন্নাইগী কাংলুপশিং হেন্না পুল্লে। অপুনবা ফিবম অসিনা মীয়ামগী অনিংবশিং অকনবা শক্তিগা লোয়ননা ফোঙদোক্লে। হাওসকী চিংলেম্বা হেনগৎহনবদা সংসদকী নুপী মেম্বরশিংনা মতেং কয়া পাংখ্রে।
প্রধান মন্ত্রীনা হায়খি হাওস অনিমক্তা মীয়ামগী মীহুৎ ৭৫০০ হেন্না মীয়ামগী থবক তৌখ্রে অমসুং মসিগী মনুংদা চাউরাক্না নুপী মীহুৎ ৬০০ রোম য়াওরি। শ্রী ইন্দ্রজিৎ গুপ্ত জি হাওস অসিদা চহি ৪৩ মীয়ামগী সেবা তৌখি অমসুং শ্রী সাফিগুর রহমননা চহি ৯৩ ফাওবা থবক তৌখি। চহি ২৫ শুবদা হাওস অসিদা চন্দ্রানি মুর্মু কারকখি।
প্রধান মন্ত্রীনা হায়খি হাওসতা য়েৎনবা অমসুং চরাংনবা কয়া থোকচরবসু ইমুং-মনুং অমগী ৱাখল্লোন্দা লৈখি অমসুং মসিগী খোইখা-লিনখা থম্নদবা অসি হাওসকী অচৌবা গুন অমনি। লাইচৎকী অৱাবা মতমদা ফাওবা মখোয়গী মথৌশিং পাংথোক্নবা মেম্বরশিং হাওসতা লাক্নখি। নিংতম্বা ফংবগী অহানবা চহি খরদা অনৌবা লৈবাক অমা ওইনা হিংবা ঙমগদরা হায়বগী চিংনবা লৈখি। সংসদকী থৌনানা পুম্নমক অরানবনি হায়না উৎখি।
হাওস অসিদা কন্তিতুয়েন্ত এশেমব্লিগী মীফমশিং চহি ২গা থা ১১ চুপ্না পাংথোকখিবা অমসুং সংবিধান শেমখিবা অমসুং চৎনবা হৌখিবা অদু নিংশিংলদুনা প্রধান মন্ত্রীনা হায়খি চহি ৭৫ অসিদা, খ্বাইদগী চাউনা মাইপাকপদি মীচম মীয়াম্না মখোয়গী সংসদতা থাজবা হেনগৎলকপা অসিনি। রাস্ত্রপতিশিং দোক্তর রাজেন্দ্র প্রসাদ, দোক্তর কলাম, শ্রী রামনাথ কোবিন্দ অমসুং শ্রী দ্রৌপতি মুর্মুগী ৱারোলশিং হাওসনা কান্নবা কয়া ফংখ্রে।
পন্দিৎ জৱাহরলাল নেহরু, লাল বহাদুর শাস্ত্রি, অতল বিহারি বাজপায়ি অমসুং দোক্তর মনমোহন সিংহগী মতমশিং নিংশিংলদুনা, প্রধান মন্ত্রীনা হায়খি মখোয়গী লুচিংবা মখাদা লৈবাক অসিদা মখোয়না অনৌবা মাইকৈ তাক্লমখি অমসুং ঙসি অসি মখোয়গী মাইপাকপশিং ফোঙদোক্নবা থৌরম অমনি। সাদার ভাল্লাবভাই পতেল, রাম মনোহর লোসিয়া, চন্দ্র সেখর, লাল কৃষ্ণ এদভানি অমসুং অতোপ্পশিংনা হাওসদতা খন্ন-নৈনবগী থবক মপুংফাহনখি অমসুং মীয়াম মীয়ামগী খোল্লাউশিং পুখৎলকখি। মপান লৈবাকশিংগী লুচিংবশিংনা হাওসতা ৱা ঙাংখিবা অদুনা মখোয়না ভারত ইকায়খুম্নবা উৎপনি হায়বা মশক তাকপনি।
নেহরুজি, শাস্ত্রিজি অমসুং ইন্দিরাজিনা থবক পায়দুনা প্রধান মন্ত্রী ওইরিঙৈদা লৈখিদবদা থেংনখিবা অৱাবা অদু মহাক্না নিংশিংখি।
খুদোংচাদবা কয়া থেংনরবসু স্পিকরশিংনা হাওস ফজনা মথৌ পাংথোকহনখিবা অদু নিংশিংলদুনা প্রধান মন্ত্রীনা হায়খি মখোয়গী ৱারেপশিংনা রিফরেন্স পোইন্ত কয়া শেমখি। শ্রী মাভলানকার, শ্রীমতি সুমিত্রা মহাজন অমসুং শ্রী ওম বিরলা ফাওবদা নুপী অনি য়াওনা স্পিকর ১৭না শিংথাবা য়াবা থবকশিং পাংথোকখ্রে। সংসদকী স্তাফশিংনা পাংথোকখিবা থবকশিংশু প্রধান মন্ত্রীনা থাগৎপা ফোঙদোকখি।
সংসদতা তেরোরিস্তশিংনা লান্দারকখিবা অদু নিংশিংলদুনা প্রধান মন্ত্রীনা হায়খি মসি শঙলেন্দা লান্দবা নত্তে, গনতন্ত্রগী মমাদা লান্দাবনি। মসি ভারতকী থৱায়দা লান্দারকপনি। হাওসকী মেম্বরশিং ঙাকথোক্নবা হাওস অমসুং তেরোরিস্তশিংগী মরক্তা লেপখিবা থৌনা ফরবশিংগী মফমদা মহাক্না ইকায়খুম্নবা উৎখি।
অনৌবা তেক্নোলোজিশিং শীজিন্নদ্রবসু সংসদকী মীফমশিং পাউদম্না মখোয় পুন্সি কৎথোকখিবা পাউমীশিং নিংশিংলদুনা প্রধান মন্ত্রীনা হায়খি হাওস অসিগী মেম্বরশিংদগী হেন্না মখোয়না সংসদকী শঙলেন অসিগা নক্নবা মরম্না অরিবা সংসদকী শঙলেনগা কাইনবা অসি মখোয়গীদমক অরুবা থবক অমা ওইগনি।
মফম অসিদা খন্ন-নৈনবা লেপখ্রবসু মীয়ামগী মীহুৎ ৭৫০০গী খোন্থাংশিংনা সংসদ অসি লাইফম অমা ওইহল্লে হায়না প্রধান মন্ত্রীনা ফোঙদোকখি।
মহাক্না হায়খি সংসদ অসিদা ভাগত সিংহ অমসুং বাতুকেশ্বর দত্তনা মখোয়গী থৌনানা বৃতিসশিংগী মরক্তা অকিবা পোকহনখি। পন্দিৎ জৱাহরলাল নেহরুগী ‘স্তোক ওফ মিদনাইত’কী খোন্থাংনা ভারতকী নাগরিকশিং মখা তানা ইথিল পীগনি। অতল বিহারি বাজপায়ীনা হায়রমখি, ‘ সরকারশিং লাক্কনি অমসুং চৎখিগনি। দলশিং শেমগনি অমসুং মুৎখিগনি। লৈবাক অসি হিংগনি, লৈবাক অসিগী গনতন্ত্র হিংগনি’।
অহানবা কাউন্সিল ওফ মিনিস্তরশিং নিংশিংলদুনা শ্রী মোদীনা হায়খি বাবা সাহেব অম্বদকারনা মালেমগী খ্বাইদগী ফবা থবকশিং পুশিল্লকখি। নেহরুগী মন্ত্রীমন্দলদা বাবা সাহেবনা খ্বাইদগী ফবা ঈশিংগী থৌশিল শেমখি। দলিতশিং য়াইফনবা উদোগ চাউখৎনবা থবকশিংদা বাবা সাহেবনা মীৎয়েং চঙখি অমসুং অহানবা উদোগ মন্ত্রী ওইনা দোক্তর শ্যামা প্রসাদ মুখর্জিনা অহানবা ইন্দস্ত্রিএল পোলিসি শেমখি।
প্রধান মন্ত্রীনা হায়খি ১৯৬৫ কী লাল মনুংদা হাওস অসিদা লাল বহাদরু শাস্ত্রিনা ভারতকী লান্মীশিংগী থৌনা হাপখি। শাস্ত্রি জিনা গ্রিন রিভোলুসনগী য়ুম্ফম থোল্লমখি। শ্রীমতি ইন্দিরা গান্ধীগী লুচিং মখাদা হাওস অসিনা মরম ওইদুনা বাংলাদেস নিংতম্বগী লাল মাইপাকখিবনি। ইমর্জেন্সিগী মতমদা গনতন্ত্রদা শিংনখি অমসুং ইমর্জেন্সি লৌথোক্লবা মতুংদা মীয়ামগী শক্তি অমুক হঞ্জিল্লকখি।
প্রধান মন্ত্রীনা হায়খি হান্নগী প্রধান মন্ত্রী চরন সিংহগী মখাদা রুরেল দিবলপমেন্ত মিনিস্ত্রি শেমখি। হাওস অসিদা ভোৎ থাদবা য়াবগী চহি ২১দগী চহি ১৮দা হন্থহনখি। লৈবাক অসিনা শেন-থুমগী অৱাবা মায়োক্নরিঙৈ মনুংদা পি.ভি নরসিমহা রাওগী লুচিং মখাদা লৈবাক অসিনা অনৌবা শেন-থুমগী থৌশিল চৎনবা হৌখি। অতল বিহারি বাজপায়ীনা ‘সর্ভ সিক্ষ অভিয়ান’ হৌদোকখি, ত্রাইবেল এফেয়ার্স মিনিস্ত্রি শেমখি অমসুং মহাক্কী লুচিং মখাদা নিউক্লিয়ারগী থবকশিং পাংথোকখি। হাওসনা ‘কেস ফোর ভোৎস’ স্কাম থেংনখি।
চহি কয়া পন্দুনা লৈরক্লবা কয়া পুৱারি ওইনা ৱারেপ লৌদুনা য়ানবা পুরকখিবা কয়া প্রধান মন্ত্রীনা পনখি। আর্তিকল ৩৭০, ৱান রেঙ্ক ৱান পেন্সন অমসুং লায়রবশিংগী চাদা ১০ রিজার্বেসন পীবা হায়রিবা ৱাফমশিং য়ানবা পুরকখি।
প্রধান মন্ত্রীনা হায়খি হাওস অসিনা মীয়ামগী থাজবা উরে অমসুং গনতন্ত্রগী অকা-অকুম মরক্তা থাজবগী মফম অমা ওইরে। ভোৎ অমদা অতল বিহারিগী সরকার তুখিবা অদু প্রধান মন্ত্রীনা নিংশিংখি। তোঙান-তোঙানবা মফমশিংদগী দল কয়া থোরকখিবা অদু মহাক্না পনখি।
প্রধান মন্ত্রীনা হায়খি অতল জিগী লুচিং মখাদা ছতিসগর, উত্তরখন্দ অমসুং ঝরাখন্দ রাজ্য অহুম শেমখি অমসুং তেলাঙ্গানা শেম্বদা শক্তি লান্না শীজিন্ননবা হোৎনখিবা অদুদা নুংঙাইতবা ফোঙদোকখি। পুকচেল শেংদবা ৱাখল্লোন অমদা অনি থোক্না খায়দোকখিবা মরম্না রাজ্য অনিমক হরাওবা ফোঙদোকখিদে।
কন্সতিতুয়েন্ত এশেমব্লিনা মসিগী নোংমগী এল্লাউয়েন্স হন্থহনখিবা অমসুং হাওসনা মসিগী মেম্বরশিংদা কান্তিনগী সবসিদি পীবা তোকখিবা অদু শ্রী মোদীনা নিংশিংখি। মেম্বরশিংনা মখোয়গী এম.পি.এল.এ.দিদগী লাইচৎ মনুংদা লৈবাক্কী মতেং পাংখি অমসুং তোলব চাদা ৩০ ককথখি। রিপ্রসেন্তেসন ওফ দি পিপল এক্তা অহোংবশিং পুরক্তুনা মেম্বরশিংদা থকশি-খাসি চৎনহনখিবা অদু মহাক্না নিংশিংখি।
প্রধান মন্ত্রীনা হায়খি হয়েংদগী অরিবা শঙলেন বিদায় পীরগদবা মরম্না হৌজিক লৈরিবা হাওসকী মেম্বরশিং হৌখ্রবা অমসুং তুংগী শম্নবা অমা ওইবগী খুদোংচাবা মখোয়না ফংলে। সংসদকী ফক্লাংশিংদগী ইথিল ফংলবা মীয়ামগী মীহুৎ ৭৫০০গী চাউথোকচনবা ঙসিগী থৌরম অসি তাঞ্জা অমনি।
লোইশিল্লকপদা প্রধান মন্ত্রীনা হায়খি মেম্বরশিংনা হরাও-তয়াম্না অনৌবা শঙলেন অসিদা লেংশিনগনি হায়বগী থাজবা থম্লি অমসুং হাওসগী পুৱারি ওইরবা থৌদোকশিং নিংশিংনবা খুদোংচাবা পীবগীদমক স্পিকর থাগৎপা ফোঙদোকখি।
****
(Release ID: 1958750)
Visitor Counter : 104
Read this release in:
Khasi
,
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam