ভারতকী প্রধান মন্ত্রী নরেন্দ্র মোদীনা ঙসি মফম অসিদা বিশ্বকর্ম জয়ন্তীগী থৌরমদা ত্রেদিস্নেল আর্তিসানশিং অমসুং খুৎহৈবা মীওইশিংগীদমক ‘পি.এম. বিশ্বকর্ম স্কিম’ হৌদোকখ্রে। প্রধান মন্ত্রীনা পি.এম. বিশ্বকর্ম লোগো, তেগলাইন অমসুং পোর্তেলসু হৌদোকখি। থৌরম অসিদা মহাক্না কস্তমাইজ স্তাম্প শীত অমা, তুক কিৎ ই-বুকলেত অমা অমসুং ভিদীওসু রিলিজ তৌখি। প্রধান মন্ত্রীনা বেনেফিসরী ১৮দা বিশ্বকর্ম সর্তিফিকেৎশিং য়েন্থোকখি।

তিনখিবা মীয়ামদা ৱা ঙাংলদুনা প্রধান মন্ত্রীনা বিশ্বকর্ম জয়ন্তী থৌরমদা মহাক্কী ওইবা য়াইফ পাউজেল পীখি অমসুং মসি ত্রেদিস্নেল আর্তিসানশিং অমসুং খুৎহৈবা মীওইশিংদা কত্থোক্লি হায়না ফোংদোকখি। লৈবাক পুম্বদগী বিশ্বকর্ম মিলিয়ন কয়াগা লোয়ননা কনেক্ত তৌবগী তাঞ্জা ফংবদা মহাক্না নুংঙাইবা ফোংদোকখি। থৌরম অসিদা উৎলিবা একজিবিসন য়েংবা অমসুং আর্তিসানশিং অমসুং খুৎহৈবা মীওইশিংগা উনদুনা ৱারী শান্নবগী এক্সপরিয়েন্স অদুসু মহাক্না ফোংদোকখি। থৌরম অসি চৎতুনা য়েংনবগীদমক মহাক্না নাগরিকশিংদসু তকশিনখি। প্রধান মন্ত্রীনা হায়খি মদুদি আর্তিসান লাখ কয়া অমসুং মখোয়গী ইমুং মনুংগীদমক পি.এম. বিশ্বকর্ম স্কিম অসি আশাগী মঙাল অমগুম লাক্লি।

প্রধান মন্ত্রীনা লৈবাক্কী নুংতিগী ওইবা পুন্সিদা বিশ্বকর্মশিংগী থৌদাং অমসুং মরুওইবা অদু পনখি। মহাক্না হায়খি মদুদি তেক্নোলোজীনা ফনা য়াম্না চাউখৎচরবসু সমাজদা বিশ্বকর্মশিংগী মরুওইবা অদুদি মতম পুম্নমক্তা লৈরগনি। মহাক্না হায়খি মদুদি বিশ্বকর্মশিংবু শকখংবা অমসুং তেংবাংবগী মতম অদু লাক্লে।

শ্রী মোদীনা হায়খি মদুদি “সরকারনা বিশ্বকর্মশিংগী ইকায় খুম্নবা অৱাংবা থাক্তা পুখৎনবা, কেপেবিলিতী হেনগৎনবা অমসুং চাউখৎহন্নবা পার্তনর অমা ওইনা মাংলোমদা চংশিল্লি।” আর্তিসান অমসুং খুৎহৈবা মীওইশিংদা মীৎয়েং থম্বা লম ১৮দা ৱাফম থম্লদুনা প্রধান মন্ত্রীনা খংহনখি মদুদি উশুবশিং, য়োৎশুবশিং, শনাশাবশিং, মুর্তী শাবশিং, চফু শাবশিং, মোচীশিং, ফী তুবশিং, চেকশুবশিং, হায়রদ্রেসরশিং, ৱাশরমেন অসিনচিংবা পি.এম. বিশ্বকর্ম স্কিমগী মনুং চলহল্লে অমসুং চাদিং অসি লুপা করোর ১৩,০০০ ওইগনি।

প্রধান মন্ত্রীনা খুৎনা শাবা পোত্থোকশিংগী হেনগৎলক্লিবা দিমান্দগী মতাংদা ফোংদোকখি। মহাক্না হায়খি মদুদি মালেমগী অচৌবা কম্পেনীশিংনা মখোয়গী থবকশিং অপিকপা ইন্তরপ্রাইজশিংদা শিন্নরি। প্রধান মন্ত্রীনা হায়খি, “মসিগী আউতসোর্স থবকশিং ঐখোয়গী বিশ্বকর্ম মরূপশিংনা ফংগদবনি অমসুং মখোয় গ্লোবেল সপ্লাই চেনগী মরুওইবা শরুক অমা ওইগদবনি, ঐখোয়না মসিগীদমক থবক তৌরি। মরম অদুননি স্কিম অসিনা বিশ্বকর্ম মরুপশিংবু মোদর্ন এজদা পুশিন্নবা হোৎনরিবা।”

স্কিল লৈরবা আর্তিসানশিং অমসুং প্রোফেসনশিংদা ত্রেনিং ফংহন্নবা খোংথাংদা ৱা ঙাংলদুনা প্রধান মন্ত্রীনা হায়খি মদুদি “হোংলক্লিবা মতম অসিদা, ত্রেনিং, তেক্নোলোজী অমসুং তুলশিং অসি বিশ্বকর্ম মরূপশিংগীদমক মরু ওই।” মহাক্না খংহনখি মদুদি ত্রেনিং মতম মনুংদা বিশ্বকর্ম মরূপশিংদা নুংতিগী লুপা ৫০০ এলাৱেন্স ফংহনগনি। মোদর্ন তুলকীৎগীদমক লুপা লিশিং ১৫গী ওইবা তুলকীৎ ভৌচর অমসু পীগনি অমসুং পোৎথোকশিংগী ব্রেন্দিং, পেক্কেজিং অমসুং মার্কেতিংদা সরকারনা মতেং পাংগনি হায়নসু মহাক্না ফোংদোকখি। তুলকিৎশিং জি.এস.তি. রেজিস্তার তৌবা দুকানশিং খক্তদগী লৈনবা অমসুং তুলশিং অদু মেদ ইন ইন্দিয়া ওইগদবনি হায়না মহাক্না খংহনখি।

পোর্তস, শিপ্পিং অমসুং ৱাতরৱেজ অমসুং অয়ুশকী কেন্দ্র মন্ত্রী শ্রী সর্বনন্দ সোনোৱালনা গুৱাহাতিদগী পি.এম. বিশ্বকর্ম য়োজনাগী থৌরম অসিদা প্রধান মন্ত্রীগা শরুক য়াখি।

থৌরম অসিদা ৱা ঙাংলদুনা শ্রী সোনোৱালনা হায়খি, “পি.এম. বিশ্বকর্ম য়োজনা অসি ঐখোয়গী দাইনামিক লীদর প্রধান মন্ত্রী শ্রী নরেন্দ্র মোদী জীনা লৈবাক মীয়ামগী য়াইফনবগীদমক পায়খৎলিবা থবকশিংগী মনুংদা অমনি অমসুং প্রধান মন্ত্রীগী সমাজদা পুম্নমকপু মথকলোমদা পুখৎনবা ৱাফম অদু পাংথোকপনি। সবকা সাথ, সবকা বিকাসকী ওইবা মোদী জীগী মীৎয়েংনা পি.এম. বিশ্বকর্মগী ৱাখল্লোন ইনর্জাইজ তৌরি। য়োজনা অসিনা ঐখোয়গী লৈবাক্কী শোত্থরবা সেক্সনবু নেসন বিলদিংগী এক্তিব মেম্বর অমা ওইহনবদা মতেং পাংবা খক্তা নত্তনা আত্মনির্ভর ভারতিয়গী অনৌবা ইকোসিস্তেম অমা শেমগৎপদসু মতেং পাংলগনি। পি.এম. বিশ্বকর্ম য়োজনাগী থোংদা ঐখোয়গী ত্রেদিস্নেল আর্তিসানশিংবু শক্তি লৈহনবনা, প্রধান মন্ত্রী শ্রী নরেন্দ্র মোদীগী লীচিং মখাদা ভারত আত্মনির্ভর ভারত অমা ওইরকপগী মায়কৈদা অতোপ্পা খোংথাং অমা মাংলোমদা চংশিল্লে।”

শ্রী সোনোৱালগা লোয়ননা অসাম সরকারগী ইন্দস্ত্রীজ & কম্মর্স অমসুং পব্লিক ইন্তরপ্রাইজেস, অমসুং কলচরেল এফিয়ার্সকী মন্ত্রী বিমল বোরা; গুৱাহাতিগী এম.পি. (লোক সভা) ক্বীন ওজা; সিতাগী ভাইস চিয়ারমেন রামেন দেকা; এম.পি. (রাজ্য সভা) পবিত্র মার্ঘেরিতা; গুৱাহাতি ম্যুনিসিপাল কোর্পোরেসনগী মেয়র মৃগেন সারানিয়া অমসুং অতোপ্পা মকোকথোংবা ওফিসিয়েল কয়াসু শরুক য়াখি। থৌরম অসিদা পি.এম. বিশ্বকর্ম য়োজনাগী কানবা ফংবা য়ারবা মশিং য়াম্লবা আর্তিসানশিং অমসুং ৱার্কমেনশিংসু শরুক য়াখি।

***