প্ৰধানমন্ত্ৰী শ্ৰী নৰেন্দ্ৰ মোদীয়ে আজি ‘বিশ্বকৰ্মা জয়ন্তী’ উপলক্ষে পৰম্পৰাগত কাৰিকৰ আৰু হস্তশিল্পীসকলৰ বাবে 'প্ৰধানমন্ত্ৰী বিশ্বকৰ্মা আঁচনি' মুকলি কৰে। প্ৰধানমন্ত্ৰীয়ে ‘প্ৰধানমন্ত্ৰী বিশ্বকৰ্মা’ৰ ‘লগো’, ‘টেগলাইন’ আৰু ‘পৰ্টেল’-ও মুকলি কৰে। তেওঁ অনুষ্ঠানটোত এটা ‘অনুকূলিত ষ্টাম্প শ্বীট’, এটা ‘টুল কিট ই-বুকলেট’ আৰু ভিডিঅ' মুকলি কৰা হয়। প্ৰধানমন্ত্ৰীয়ে ১৮ গৰাকী হিতাধিকাৰীক বিশ্বকৰ্মাৰ প্ৰমাণপত্ৰ বিতৰণ কৰে।

সমবেত সকলক সম্বোধন কৰি প্ৰধানমন্ত্ৰীয়ে ‘বিশ্বকৰ্মা জয়ন্তী’ উপলক্ষে শুভেচ্ছা জ্ঞাপন কৰে আৰু মন্তব্য কৰে যে এইখন আঁচনি পৰম্পৰাগত কাৰিকৰ আৰু হস্তশিল্পীসকলৰ বাবে সমৰ্পিত। তেওঁ সমগ্ৰ দেশৰ লাখ লাখ বিশ্বকৰ্মাৰ সৈতে সংযোগ স্থাপনৰ সুযোগ লাভ কৰি আনন্দ প্ৰকাশ কৰে। তেওঁ অনুষ্ঠানটোত আয়োজিত প্ৰদৰ্শনীখন পৰিদৰ্শন কৰা আৰু কাৰিকৰ আৰু শিল্পীসকলৰ সৈতে বাৰ্তালাপ কৰাৰ অনন্য অভিজ্ঞতা সন্দৰ্ভতো আলোকপাত কৰে। তেওঁ নাগৰিকসকলক অনুষ্ঠানটো পৰিদৰ্শন কৰিবলৈও আহ্বান জনায়। প্ৰধানমন্ত্ৰীয়ে কয় যে লাখ লাখ শিল্পী আৰু তেওঁলোকৰ পৰিয়ালসমূহৰ বাবে প্ৰধানমন্ত্ৰী বিশ্বকৰ্মা আঁচনিখন আশাৰ ৰশ্মি হিচাপে সমাগত হৈছে।

প্ৰধানমন্ত্ৰীয়ে দেশৰ দৈনন্দিন জীৱনত বিশ্বকৰ্মাসকলৰ অৱদান আৰু গুৰুত্বৰ কথা উল্লেখ কৰে। তেওঁ কয় যে প্ৰযুক্তিবিদ্যাৰ ক্ষেত্ৰত যিয়েই নহওঁক কিয় বিশ্বকৰ্মাসকল সমাজত সদায় গুৰুত্বপূৰ্ণ হৈ থাকিব। তেওঁ কয় বিশ্বকৰ্মাসকলক স্বীকৃতি দিয়া আৰু সমৰ্থন কৰাটো হৈছে সময়ৰ আহ্বান।

"সন্মান উন্নত কৰা, সামৰ্থ্য বৃদ্ধি কৰা আৰু বিশ্বকৰ্মাৰ সমৃদ্ধি বৃদ্ধিৰ বাবে চৰকাৰে অংশীদাৰৰ ৰূপত আগবাঢ়ি আহিছে", শ্ৰী মোদীয়ে মন্তব্য কৰে। কাৰিকৰ আৰু শিল্পীসকলৰ ১৮টা গুৰুত্বপূৰ্ণ ক্ষেত্ৰ সন্দৰ্ভত আলোকপাত কৰি প্ৰধানমন্ত্ৰীয়ে জানিবলৈ দিয়ে যে প্ৰধানমন্ত্ৰী বিশ্বকৰ্মা আঁচনিত কাঠমিস্ত্ৰী, লোহাৰ, সোণোৱাল, ভাস্কৰ্যশিল্পী, কুমাৰ, মুচি, দৰ্জী, মিস্ত্ৰী, হেয়াৰড্ৰেছাৰ, ৱাছাৰমেন আদি অন্তৰ্ভুক্ত কৰা হৈছে আৰু ইয়াৰ ব্যয় হ'ব ১৩,০০০ কোটি টকা।

প্ৰধানমন্ত্ৰীয়ে হস্তনিৰ্মিত সামগ্ৰীৰ বৰ্ধিত চাহিদাৰ সম্পৰ্কতো আলোকপাত কৰে। তেওঁ কয় যে সমগ্ৰ বিশ্বতে ডাঙৰ কোম্পানীসমূহে তেওঁলোকৰ কাম ক্ষুদ্ৰ উদ্যোগসমূহৰ জৰিয়তে উপ-অনুমতি প্ৰদানেৰে কৰাই লয়। "এই আউটছৰ্চ কৰা কাম আমাৰ বিশ্বকৰ্মা বন্ধুসকলৰ ওচৰলৈ আহিব লাগে আৰু তেওঁলোক যাতে গোলকীয় যোগান শৃংখলাৰ অংশ হৈ পৰিব পৰে আমি তাৰ বাবে কাম কৰি আছো। সেয়েহে এই আঁচনিখন হৈছে ‘বিশ্বকৰ্মা’ বন্ধুসকলক আধুনিক যুগলৈ লৈ যোৱাৰ এক প্ৰয়াস", প্ৰধানমন্ত্ৰীয়ে কয়।

"এই পৰিৱৰ্তনশীল সময়ত বিশ্বকৰ্মা বন্ধুসকলৰ বাবে প্ৰশিক্ষণ, প্ৰযুক্তি আৰু সঁজুলি গুৰুত্বপূৰ্ণ," দক্ষ শিল্পী আৰু বৃত্তিসমূহক প্ৰশিক্ষণ প্ৰদানৰ ব্যৱস্থাৰ বিষয়ে বৰ্ণনা কৰি প্ৰধানমন্ত্ৰীয়ে মন্তব্য কৰে। তেওঁ জনায় যে প্ৰশিক্ষণৰ সময়ত বিশ্বকৰ্মা বন্ধুসকলক প্ৰতিদিনে ৫০০ টকা ভাট্টা প্ৰদান কৰা হ'ব। তেওঁ লগতে কয় যে আধুনিক টুলকিটৰ বাবে ১৫ হাজাৰ টকাৰ এটা ‘টুলকিট ভাউশ্যাৰ’-ও দিয়া হ'ব আৰু চৰকাৰে সামগ্ৰীসমূহৰ ‘ব্ৰেণ্ডিং, পেকেজিং আৰু বিপণন’ত সহায় কৰিব। তেওঁ কয় যে ‘টুলকিট’বোৰ কেৱল ‘জিএছটি পঞ্জীভুক্ত’ দোকানৰ পৰাহে ক্ৰয় কৰিব লাগিব আৰু এই সঁজুলিবোৰ ভাৰতত নিৰ্মিত হোৱা উচিত।

"কেন্দ্ৰৰ চৰকাৰে বঞ্চিতসকলৰ বিকাশক অগ্ৰাধিকাৰ দিয়ে", প্ৰধানমন্ত্ৰীয়ে কয় যে তেওঁ 'এক জিলা, এক সামগ্ৰী' আঁচনি সন্দৰ্ভত আলোকপাত কৰে যিয়ে প্ৰতিখন জিলাৰ পৰা অনন্য উৎপাদিত সামগ্ৰীক উৎসাহিত কৰে। তেওঁ লগতে প্ৰধানমন্ত্ৰী স্বনিধি আঁচনিৰ জৰিয়তে পথৰ দাঁতিত ব্যৱসায় কৰা বিক্ৰেতাসকলৰ বাবে বেংকৰ দুৱাৰ মুকলি কৰাৰ লগতে 'দিব্যাংগ'সকলৰ বাবে বিশেষ সুবিধা সৃষ্টি কৰাৰ কথাও উল্লেখ কৰে। "যাৰ কথা চিন্তা কৰিবলৈ কোনো নাথাকে তেওঁলোকৰ কাষত থিয় দিয়ে মোদীয়ে", প্ৰধানমন্ত্ৰীয়ে কয়। তেওঁ কয় যে তেওঁ ইয়াত সেৱা আগবঢ়াবলৈ, মৰ্যাদাপূৰ্ণ জীৱন দিবলৈ আৰু নিশ্চিত ভাবে সেৱা প্ৰদান কৰিবলৈ আহিছে। "এয়া হৈছে মোদীৰ গেৰাণ্টী", তেওঁ লগতে কয়।

প্ৰধানমন্ত্ৰীয়ে কয় যে ‘জি-২০ ক্ৰাফ্ট বজাৰ’ত প্ৰযুক্তি আৰু পৰম্পৰাৰ সংমিশ্ৰণৰ ফল বিশ্বই প্ৰত্যক্ষ কৰিছে। আনকি ভ্ৰমণকাৰী গণ্যমান্য ব্যক্তিসকলৰ বাবে উপহাৰৰ টোপোলাত বিশ্বকৰ্মা বন্ধুসকলে প্ৰস্তুত কৰা সামগ্ৰী আছিল। তেওঁ কয়, "লোকেলৰ বাবে ভোকেল’ৰ প্ৰতি এই সমৰ্পণ হৈছে সমগ্ৰ দেশৰে দায়িত্ব"। 'প্ৰথমে আমি ‘স্থানীয়ৰ বাবে কণ্ঠস্বৰ হ'ব লাগিব’ আৰু তাৰ পিছত আমি ‘স্থানীয়ক গোলকীয় কৰিব লাগিব', তেওঁ লগতে কয়।

গণেশ চতুৰ্থী, ধনতেৰাছ, দীপাৱলী আদি দেশৰ আগন্তুক উৎসৱসমূহৰ কথা উল্লেখ কৰি প্ৰধানমন্ত্ৰীয়ে দেশৰ প্ৰতিগৰাকী নাগৰিকক স্থানীয় সামগ্ৰী ক্ৰয় কৰিবলৈ আহ্বান জনায়, বিশেষকৈ যিবোৰত দেশৰ বিশ্বকৰ্মাই অৱদান আগবঢ়াইছে।

গুৱাহাটীৰ পৰা কেন্দ্ৰীয় বন্দৰ, জাহাজ পৰিবহণ আৰু জলপথ তথা আয়ুষ মন্ত্ৰী শ্ৰী সৰ্বানন্দ সোণোৱালে ‘প্ৰধানমন্ত্ৰী বিশ্বকৰ্মা যোজনা’ৰ এই মহৎ প্ৰচেষ্টাত প্ৰধানমন্ত্ৰীৰ সৈতে যোগদান কৰে।

এই উপলক্ষে ভাষণ প্ৰদান কৰি শ্ৰী সোণোৱালে কয়, "সমাজৰ সকলোৰে উন্নতিক যে আমাৰ গতিশীল নেতা প্ৰধানমন্ত্ৰী শ্ৰী নৰেন্দ্ৰ মোদীজীয়ে সৰ্বোচ্চ প্ৰাথমিকতা প্ৰদান কৰি আহিছে তাৰ আন এক সাক্ষ্য হৈছে প্ৰধানমন্ত্ৰী বিশ্বকৰ্মা যোজনা। সবকা সাথা, সবকা বিকাশৰ মোদীজীৰ দৃষ্টিভংগীয়ে প্ৰধানমন্ত্ৰী বিশ্বকৰ্মাৰ ধাৰণাক উজ্জীৱিত কৰিছে। এই যোজনাই কেৱল আমাৰ দেশৰ প্রান্তিক অংশক ৰাষ্ট্ৰ নিৰ্মাণৰ সক্ৰিয় সদস্য হোৱাতে সহায় নকৰে, লগতে বিশ্বৰ সৰ্বশ্ৰেষ্ঠ সকলৰ সৈতে প্ৰতিযোগিতাত অৱতীৰ্ণ হবলৈকো আত্মনিৰ্ভৰ ভাৰতীয়সকলৰ এক নতুন পৰিৱেশ তন্ত্ৰ গঢ়ি তোলাত সহায় কৰিব। এই যোজনাই আমাৰ শিল্পীসকলক তেওঁলোকৰ শিল্পকলাত "শ্ৰেষ্ঠ" হ'বলৈ সামৰ্থ্য প্ৰদান কৰিব, আনহাতে কিউৰেটেড পৰিস্থিতিতন্ত্ৰই তেওঁলোকক পৃথিৱীৰ সৈতে প্ৰতিযোগিতাত অৱতীৰ্ণ হোৱাত সহায় কৰিব। প্ৰধানমন্ত্ৰী নৰেন্দ্ৰ মোদীজীৰ দূৰদৰ্শী নেতৃত্বত ভাৰত বিশ্বৰ পঞ্চম সৰ্ববৃহৎ অৰ্থনীতি হিচাপে পৰিগণিত হৈছে, আনহাতে ই সন্মান আৰু মৰ্যাদাৰ এক গোলকীয় স্থিতি লাভ কৰি আহিছে যিটো আগতে কেতিয়াও হোৱা নাছিল। প্ৰধানমন্ত্ৰী বিশ্বকৰ্মা যোজনাৰ জৰিয়তে আমাৰ পৰম্পৰাগত শিল্পীসকলৰ সৱলীকৰণৰ লগতে প্ৰধানমন্ত্ৰী শ্ৰী নৰেন্দ্ৰ মোদীজীৰ দূৰদৰ্শী নেতৃত্বত ভাৰতে আত্মনিৰ্ভৰ ভাৰত হোৱাৰ দিশত আৰু এক পদক্ষেপ আগবঢ়ালে।"

শ্ৰী সোণোৱালৰ সৈতে অসম চৰকাৰৰ উদ্যোগ আৰু বাণিজ্য তথা ৰাজহুৱা উদ্যোগ আৰু সাংস্কৃতিক পৰিক্ৰমা মন্ত্ৰী বিমল বৰা; গুৱাহাটীৰ সাংসদ (লোকসভা) কুইন ওজা; চিটা-ৰ উপাধ্যক্ষ ৰমেন ডেকা; সাংসদ (ৰাজ্যসভা) পাবিত্ৰ মাৰ্ঘেৰিটা; গুৱাহাটী পৌৰ নিগম (জিএমচি)ৰ ’মেয়ৰ’ মৃগেন শৰণীয়া, লগতে অন্যান্য বিষয়াসকলো উপস্থিত থাকে। অনুষ্ঠানটোত বহুতো শিল্পী আৰু কৰ্মী উপস্থিত আছিল যিসকলে ‘প্ৰধানমন্ত্ৰী বিশ্বকৰ্মা যোজনা’ৰ সুবিধা লাভ কৰিব।

***

MJPS/NSK/KB