ঙসি নিউ দিল্লিদা আই.সি.এ.আর, নেসনেল এগ্রিকলচরেল সাইন্স সেন্তরদা পাংথোকপা থৌরম অমদা ভারতকী রাস্ত্রপতি শ্রীমতী দ্রৌপতি মুর্মুনা লৌমীশিংগী হকশিংগী মালেমগী অহানবা সিম্পোসিয়ম হৌদোকখ্রে। রাস্ত্রপতিনা ভারতকী লৌমীশিংদা ‘প্লান্ত জেনোম সেভিয়র কম্মুনিতিস এৱার্দ’(৬) অমসুং ‘প্লান্ত জেনোম ফারর্মস রিৱার্দ’(১৬) অমসুং ‘প্লান্ত জিনোম সেভিয়রস ফারমর্স রিককনিসন’(৪) য়েন্থোকখ্রে। হায়রিবা মনাশিং অসি পি.পি.ভি.এফ.আর এক্ত,২০০১গী প্রোবিজনশিং মতুংইন্না পি.পি.ভি.এফ.আর ওথোরিতিনা লিংখৎপনি। মহাক্না পি.পি.ভি.এফ.আর ওথোরিতিগী নৌনা শাগৎপা প্লান্ত ওথোরিতি ভাবনসু শঙ্গাখি অমসুং ওনলাইন প্লান্ত ভেরাইতি রেজিস্ত্রেসন পোর্তেল অমসু শঙ্গাখি। থৌরম অদুদা এগ্রিকলচর অমসুং ফারমর্স ৱেলিফিয়ারগী য়ুনিয়ন মিনিস্তর শ্রী নরেন্দ্র সিংহ তোমার, রাজ্য মন্ত্রী শ্রী কাইলাস চৌধুরি অমসুং সেক্রেতরি শ্রী মনোজ অহুজা শরুক য়াখি।

মহাক্কী ৱারোলদা শ্রীমতি দ্রৌপতি মুর্মুনা হায়খি লেমজনিঙাই ওইরবা মীফম অসি পাংথোক্নবা ভারত খনবগীদমক থৌরম অসি শীল্লিবা এফ.এ.ও অমসুং ইন্তরনেসনেল ত্রিতি ওন প্লান্ত জিনেতিক রিছোসের্স ফোর ফুদ এন্দ এগ্রিকলচর(ত্রিতি) থাগৎপা ফোঙদোকচরি। মহাক্না ভসুধাইব কুতুম্বকমগী লমদম অসিদা দেলিগেদশিং তরাম্না ওকখি।

মহাক্না হায়খি লৌমীশিংনা অরিবা মহৈ-মরোং মখল কয়া য়োকখৎতুনা অনৌবা মতমগী মহৈ-মরোং পুথোক্নবা য়ুম্ফম থোল্লি, মসিনা মীওইবা অমসুং শা-ষনশিংগী চীঞ্জাক অমসুং মচি ওইবা ফংহল্লি। লৌমীশিং ‘অন্নাদাত্তা’নি অমসুং চানবা লৈরিবদি হকচাং লৈগনি, হকচাং লৈরিবা থবক অমা হেক্তা পাংথোকপা ঙমগনি, মরম অদুনা লৌমীশিং ইকায়খুম্নবা উৎপা দরকার ওইরিবনি অমসুং মখোয়গী হকশিং অমসুং তুংলমচৎ ঙাক-শেনবা হায়বসি ঐখোয়গী থৌদাংনি।

ভারতকী রাস্ত্রপতি তরাম্না ওক্লদুনা এগ্রিকলচর অমসুং ফারমর্স ৱেলিফিয়ারগী য়ুনিয়ন মিনিস্তর শ্রী নরেন্দ্র সিংহ তোমারনা, প্রোতেক্সন ওফ প্লান্ত ভেরাইতিস এন্দ ফারমর্স রাইতস(পিপিভিএফআর) ওথোরিতি, আই.সি.এ.আর, আই.সি.এ.আর-ইন্দিয়ান এগ্রিকলচরেল রিছার্স ইন্সতিতুৎ, আই.সি.এ.আর-এন.বি.পি.জি.আরনা এগ্রিকলচর অমসুং ফারমর্স ৱেলিফিয়ার দিপার্তমেন্তগা লোয়ননা নিউ দিল্লিদা (সেপ্তেম্বর ১৭২৪,২০২২) দা এফ.এ.ও ইন্তরনেসনেল ত্রিতিগী গভর্নিং বোদিগী ৯শুবা সেসন পাংথোকখিবদা হরাওবা ফোঙদোকখি।

মহাক্না হায়খি লৌউ-শিংউগী থবকশিং য়োকখৎপা হায়বসি থৌদাং অমা খক ওইবতা নত্তনা হিংনবগী তঙাইফদবা অমনি। য়াম্না চেকশিন্না পাম্বী মখল কয়া য়োকখৎলিবা ঐখোয়গী লৌমীশিংনা হোৎনবদগী ঐখোয়গী লৈবাক্কী ইনাকখুল্লবা লৌউ-শিংউগী লনগৈ-পুক্কৈ লৈরিবনি। পাম্বী মখলশিং অসিনা হিংনবা পাম্বৈ পীবতা নত্তনা মহৌশা অমসুং নাৎকা অচেৎপা মরী লৈনবগী অহিংবা খুদম অমনি।

এগ্রিকলচর অমসুং ফারমর্স ৱেলিফিয়ার দিপার্তমেন্তগী সেক্রেতরি শ্রী মনোজ অহুজানা হায়খি লৈবাক অসিগী প্রোতেক্সন ওফ প্লান্ত ভেরাইতিস এন্দ ফারমর্স রাইতস(পিপিভিএফআর) এক্ত, ২০০১গী মখাদা প্লান্ত ভেরাইতি রেজিস্ত্রেন তৌনবা লৌমীশিংগী হক ফংবা মালেমদা অহানবা লৈবাক ভারতনা ওইরে। পি.পি.ভি.এফ.আর ওথোরিতিগী চিয়ারপর্সন দোক্তর তি.মোহপাত্রানা শক্নাইরবশিং অমসুং লৌমীশিং তরাম্না ওকখি।

থৌরম অদুদা সেক্রতরি(দিয়ার) অমসুং দাইরেক্তর জেনেরেল(আইসিএআর) দোক্তর আর.এস পারোদা, চিয়ারমেন তাস অমসুং আই.সি.এ.আরগী হান্নগী সেক্রেতরি কেন্ত নাদোজি, আই.তি.পি.জি.আর.এফ.এগী সেক্রেতেরি অমসুং এফ.এ.ওগী ভারতকী মীহুৎ তাকায়ুকি হাগিৱারা শরুক য়াখি।

সেপ্তেম্বর ১২-১৫,২০২৩ ফাওবা ভারতনা য়ুম্বু ওইদুনা পাংথোক্লিবা জি.এফ.এস.আরদা লৈবাক ৫৯গী মীহুৎ ৭০০ শরুক য়ারি। শরুক য়ারিবশিংগী মনুংদা মালেম শীনবা থুংবগী লৌমীশিংগী লুপশিং, থৌশিল শেম্বশিং, সাইন্তিস্তশিং, উদোগকী মীহুৎশিং, সরকারগী ওফিসারশিং, সরকারগী অমসুং সরকারগী নত্তবা লুপশিং, আইনগী অখঙ-অহৈশিং অমসুং সিবিল সোসাইতিশিং য়াওরি।

মখল অসিগী অহানবা সিম্পোসিয়ম অসিনা অফবা থৌশিলশিং, অফবা থবকশিং, লৌশিং অমসুং লৌমীশিংগী হকশিং ফংহনবগি থবকশিং পীথোক-পীশিন তৌনদুনা লৌমীশিংগী হকশিং ফংহন্নবা পান্দম থম্লি। এগ্রোবাইওদাইভর্সিতি য়োকখৎনবা অমসুং মালেমগী চীঞ্জাক ৱাৎতনবা থবক তনবা লৌমীশিং ইকায়খুম্নবা উৎনবা গ্লোবেল সিম্পোসিয়ম অসিনা মফম অমা পীগনি।

*****