রাজ্য/য়ু.তি ১১ শীনবা থুংনা লুপা করোর ২,৯০০ হেন্না চঙনা শেমগৎপা বি.আর.ও ইনফ্রাস্ত্রকচর প্রোজেক ৯০ রক্ষ মন্ত্রী শ্রী রাজনাথ সিংহনা জাতিদা কৎথোকখ্রে। সেপ্তেম্বর ১২, ২০২৩দা জম্মুদা পাংথোকপা থৌরম অমদা প্রোজেকশিং অদু রক্ষ মন্ত্রীনা শঙ্গাখিবনি। প্রোজেকশিংগী মনুংদা অরুনাচল প্রদেসতা নেচিফু তন্নেল, নোংচুপ বেঙ্গলদা এয়রফিল্দ অনি, হেলিপেদ অনি, লম্বী ২২ অমসুং থোং ৬৩ য়াওরি। প্রোজেক ৯০ অসিগী মনুংদা অরুনাচল প্রদেসতা ৩৬; লাদাখতা ২৬; জম্মু অমসুং কাস্মিরদা ১১; মিজোরমদা ৫; হিমাচল প্রদেসতা অহুম; সিক্কিম, উত্তরখন্দ অমসুং নোংচুপ বেঙ্গলদা ২/২ অমসুং নাগালেন্দ, রাজস্থান অমসুং অন্দমান অমসুং নিকোবর ইথৎশিংদা ১/১ নি।

অনৌবা তেক্নোলোজি শীজিন্নদুনা থবক শুবগী মতম অমা খক্তদা হায়রিবা মরুওইবা প্রোজেকশিং অসি বি.আর.ওনা অপীবা মতমগী মনুংদা লোইশিনখি। মহাক্কী ৱারোলদা শ্রী রাজনাথনা হায়খি বি.আর.ও অসি আর্মদ ফোর্সশিংগী ব্রো(ব্রোদর)নি। বি.আর.ওনা লৈবাক অসিগী ঙমখৈ  শরুকশিং ঙাক-শেনবা খক নত্তনা মনুং-হুঞ্জিনবা মফমশিংগী খুন্নাই অমসুং শেন-থুম চাউখৎহনবদা মরুওইবা থৌদাং অমা লৌরি।

শ্রী রাজনাথ সিংহনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা বি.আর.ওগী মীওইশিংনা কৎথোকপগা লোয়ননা থবক কন্না শুবদগী মতম চানা লোইশিনবা ঙম্বনি। বি.আর.ওগা লোয়ননা, ঐখোয়না লৈবাক অসি অশোই-অঙাম থোকহন্দ্রে অমসুং ঙমখৈগী শরুক চাউখৎহল্লে। ঙমখৈগী শরুকশিংদা ইনফ্রাস্ত্রকচর প্রোজেকশিং মতম চানা লোইশিনবা হায়বসি অনৌবা ভারতকী অনৌবা চৎনবীনি।

দেবাক থোং

বিসনাহ-কাউলপুর-ফুলপুর লম্বীদা দেবাক থোংদা পাংথোকপা থৌরম অমদা রক্ষ মন্ত্রীনা থোং অসি শঙ্গাখি। মিতর ৪২২.৯ শাংবা ক্লাস ৭০ আর.সি.সি দেবাক থোং অসি লান্মীগী ওপরেসনগী শেম-শাবা অমসুং লমদম অদুগী খুন্নাই অমসুং শেন-থুম চাউখৎপা হেনগৎহনগনি।

নেচিফু তেন্নেল

রক্ষ মন্ত্রীনা শঙ্গাখিবা মরুওইবা প্রোজেক অমদি অরুনাচল প্রদেসতা বালিপুরা-চারদুৱার-তৱাং লম্বীদা লৈবা মিতর ৫০০ শাংবা নেচিফু তন্নেল অসিনি। হৌজিক শেমগৎলিবা সেলা তন্নেলগা লোয়ননা তন্নেল অসিনা তৱাং লমদমদা নোংজু-নুংশাগী ফিবম খুদিংমক্তা চৎপা য়ারবা লম্বী ফংহল্লগনি। মসিনা লমদম অসিগী লান্মীশিং অমসুং তৱাংদা কোইবা লাকপা মীওইশিংদা খুদোংচাবা পীরগনি। ওক্তোবর ২০২০দা তন্নেল অসি রক্ষ মন্ত্রীনা উরেপ-উয়ুং তমখিবনি।

বাগদোগ্রা অমসুং বারাকপুর এয়রফিল্দশিং

নোংচুপ বেঙ্গলদা নৌনা শেমগৎলবা বাগদোগ্রা অমসুং বারাকপুর এয়রফিল্দশিং জাতিদা কৎথোকখ্রে। হায়রিবা এয়রফিল্দশিং অসি লুপা করোর ৫০০ হেন্না চঙনা শেমগৎপনি অমসুং মসিনা ইন্দিয়ান এয়রফোর্সগী শেম-শাবা ফগৎহনবতা নত্তনা লমদম অসিদা কম্মর্সিয়েল ফ্লাইতশিং পাইবগী খুদোংচাবশু হেনগৎহল্লগনি।

য়োমা এয়রফিল্দ

মসিগী মথক্তা, ইস্তর্ন লাদাখতা য়োমা এয়রফিল্দ শানবা ভর্চুএল ওইনা শ্রী রাজনাথনা উরেপ-উয়ুং তমখ্রে।  লুপা করোর ২০০ রোম চঙনা শেমগৎকদবা এয়রফিল্দ অসিনা লাদাখতা এয়র ইনফ্রাস্ত্রচর ফগৎহনগনি অমসুং অৱাং থংবা ঙমখৈদা আই.এফ.কী তৌবা ঙম্বা হেনগৎহনগনি। শ্রী রাজনাথনা হায়খি মদুদি এয়রফিল্দ অসি মালেমদা খ্বাইদগী ৱাংবা অমা ওইগনি অমসুং মসিনা লান্মীগী থবক-থৌরমশিংদা অচৌবা অহোংবা অমা পুরক্কনি।

শ্রী রাজনাথ সিংহনা হায়খি ফিত ১৫,৮৫৫ ৱাংবা মফমদা মালেমদা খ্বাইদগী ৱাংবা তন্নেল, সিমকু লা তন্নেল শেমগৎতুনা বি.আর.ওনা অতোপ্পা রেকোর্দ অমা থম্লগনি। তন্নেল অসিনা হিমাচলদা লাহুল-স্পিতি অমসুং লাদাখতা জাস্কার ভেল্লি শম্নগনি। ঙমখৈগী শরুকশিংদা ইনফ্রাস্ত্রকচর শেমগৎপা অমসুং লৈবাক অসি ঙাক-শেনবদা অচৌবা থৌদাং লৌবগীদমক মহাক্না বি.আর.ও থাগৎখি।

শ্রী রাজনাথ সিংহনা হায়খি ঙমখৈগী শরুকশিংদা ইনফ্রাস্ত্রকচর শেমগৎপা অসিনা লৈবাক্কী ঙাক-শেনগী থবক মপুংফাহনবা খক নত্তনা মসিনা য়ুম্লোন্নরিবা লৈবাক অমগা চৎথোক-চৎশিন ফগৎহল্লি অমসুং ভারতকা লোয়ননা মতেং পাংনবগী ৱাখল্লোন অমদা থবক তৌহল্লি। বি.আর.ওনা ম্যন্মার অমসুং ভুতানদা অসিগুম্বা ইনফ্রাস্ত্রচর প্রোজেকশিং পায়খৎলে অমসুং মখোয়গী মতেং পাংলি।

সিবিল-মিলিতরি পুন্না চৎমিন্নবা: মতম অসিদা তঙাইফদবা

বি.আর.ওগী প্রোজেকশিং অমসুং থবক মওং অসি সিবিল-মিলিতরি পুন্না থবক তৌমিন্নবগী ময়েক লারবা খুদম অমনি হায়না রক্ষ মন্ত্রীনা ফোঙদোকখি। মহাক্না হায়খি লৈবাক্কী ঙাক-শেনগী থৌদাং অসি লান্মীশিং খক নত্তনা মীচম মীয়াম্নসু লৌবা মরম্না সিবিল-মিলিতরি পুন্না চৎমিন্নবা অসি মতম অসিদা তঙাইফদবনি। পুন্না থবক তৌমিন্নবা অসিনা ঙমখৈগী ইনফ্রাস্ত্রকচর শেমগৎপদা সনাগী পন্দুব কয়া ইরগনি।

মহাক্না হায়খি বি.আর.ওনা লোকেল বোদিশিংগা পুন্না থবক তৌমিন্নগদবনি অমসুং মীয়ামগী দরকার ওইবশিং খঙনা থবক তৌগদবনি। অদোমগী থবক অসি লম্বী শেম্বা খক নত্তে। অদোমগী থবকশিংনা মীয়ামগী থম্মোয়শিং শম্নহল্লি। মীয়ামগীদমক, মীয়ামগী অমসুং মীয়াম্না হায়বা ৱাখল্লোন অসিদা শেমগৎ-শাগৎপগী থবকশিং পায়খৎকদবনি।

বি.আর.ওনা থবক তৌবা মতমদা অকোয়বগী ফিবম শোকহন্দনবা অমসুং অনৌবা তেক্নিকশিং অমসুং তেক্নোলোজিশিং শীজিন্নবগীদমক শ্রী রাজনাথনা থাগৎপা ফোঙদোকখি। মহাক্না হায়খি হৌজিক ফাওবদা ঐখোয়না শেন খজিক্তং থাদরগা থবক য়াম্না তৌবা হায়বা লাইৱা অসিদা থবক তৌরি। হৌজিক ঐখোয় মহৌশাগী অকোয়বগী ফিবম য়াম্না কায়হন্দবা, লৈবাক্কী ঙাক-শেনগী থবক খ্বাইদগী চাউনা, খ্বাইদগী নুংঙাই-য়াইফবা হায়বা লাইৱা অসিদা থবক তৌবা দরকার ওইরে।

থৌরম অদুদা সাইন্স অমসুং তেক্নোলোজিগী রাজ্য মন্ত্রী(মনিংতম্বা); পি.এম.ও, পর্সোনেল, পব্লিক গ্রিভান্সেস, পেন্সন্স, স্পেস অমসুং এতোমিক ইনর্জিগী রাজ্য মন্ত্রী দোক্তর জিতেন্দ্র সিংহ, জম্মুগী এম.পি শ্রী জুগাল কিশোর শর্মা, বি.আর.ওগী দি,জি লেপ্তনেন্ত জেনেরেল রজিব চৌধুরি অমসুং ৱেস্তর্ন এয়র কমান্দগী এয়র ওফিসার কমান্দিং-ইন-চীফ এয়র মার্সেল পঙ্কজ মোহন সিনহা শরুক য়াখি। থৌরম অদুদা ভর্চুএল ওইনা অরুনাচল প্রদেসকী চীফ মিনিস্তর শ্রী পেমা খান্দুশু শরুক য়াখি।  

ঙসি লুপা করোর ২,৯০০গী প্রোজেক ৯০ শঙ্গাখিবা অসিগা লোয়ননা, ২০২১দগী রেকোর্দ ওইনা লুপা করোর ৮০০০ রোমগী বি.আর.ও প্রোজেক ২৯৫ জাতিদা কৎথোকখ্রে। ২০২২দা লুপা করোর ২,৯০০গী প্রোজেক ১০৩ শঙ্গাখি, ২০২১দা লুপা করোর ২,২০০ হেনবগী প্রোজেক ১০২ মীয়ামদা কৎথোকখ্রে।

***