Ha ka sienjam ka ban wanrah ia ka jingkylla kaba khraw ha ka jingioh ia ki lad jingsumar bad ka jingkdup ia baroh ha ka ri, ka President jong ka ri India, ka Droupadi Murmu kan plié paidbah ia ka prokram 'Ayushman Bhav' ha ka 13 tarik u Nailur, 2023. Ia kane yn leh lyngba ki lad digital, bad kan long ka sienjam kaba heh na ka bynta ka jingpynurlong ia ka thong ban plié lad ia baroh ban ioh ia ki jingsumar bad ka jingpynthikna ba baroh ki ioh ia ki lad jingsumar.

Ha kane ka prokram plié paidbah, yn iadon lang u Myntri Sorkar pdeng ba dei khmih ia ka tnat ka koit ka khiah, u Dr. Mansukh Mandaviya, ki Myntri Khynnah ba dei khmih ia ka tnat ka koit ka khiah, ka Dr. Bharati Pravin Pawar bad u Prof. SP Singh Baghel, Dr. VK Paul, Member (Health), NITI Aayog, katto katne ngut ki MP bad ruh ki ophisar na ka tnat ka koit ka khiah. Ki Lat, ki Myntri Rangbah, ki Myntri na ki Jylla bad ki ophisar jong ki ki dei kiba la khot sngewbha ban wan iashim bynta lang lyngba ki lad digital na baroh ki Jylla bad ki Union Territory. Yn don ruh ka jingiashim bynta jong ki nongmihkhmat, kito kiba ioh jingmyntoi bad ki nongiashim bynta na ki distrik, ki block bad ki Health and Wellness Centre na ki shnong bapher bapher.

Ka prokram 'Ayushman Bhav', kaba la sdang da ka tnat ka koit ka khiah jong ka Sorkar India ka dei ka sienjam ha kylleng ka ri na ka bynta ka koit ka khiah kaba thmu ban pynpoi sha baroh ki jaka ia ki lad ai jingsumar ha kaba yn poi sha baroh ki shnong bad ki nongbah ha ka ri. Kane ka sienjam ka wan hadien ka jingjop jong ka prokram Ayushman Bharat bad ka dei ka dak jong ka jingkylla ba khraw ha ki kam ai jingsumar.

Kane ka prokram, ka ban pyntreikam ha ka 'Seva Pakhwada' naduh ka 17 tarik u Nailur haduh ka 2 tarik u Risaw, 2023, kan long ha ka rukom ka jingtreikam jong baroh kawei ka ri bad baroh kawei ka imlang sahlang. Ka pyniasoh ia ki tnat Sorkar, ki kynhun ha ka imlang sahlang bad ruh ki briew hapoh kawei ka kam ban pynthikna ba baroh ki briew ki ioh ia ki lad jingsumar khlem da don kano kano ka jingiapher ne ka jingklet iano iano.

Ka prokram Ayushman Bhav ka dei ka sienjam jong ka jingiatreilang ba ialam lynti da ki Gram Panchayat ha ka jingiatreilang jong ka tnat ka koit ka khiah, kiwei kiwei ki tnat Sorkar bad ki kynhun nongmihkhmat ha ki jaka nongkyndong bad ki jaka sor. Ki thong kiba kongsan ki long ban pynbiang ia ki lad ioh jingsumar sha baroh ki shnong bad ki nongbah da kaba klet ia u pud u sam bad ban pynthikna ba ym don mano mano ba shah ieh dien.

Kane ka rukom trei lyngba ka jingiatreilang ka thmu ban pynbiang ia ki lad ioh jingsumar lyngba ki lai tylli ki bynta jong ka kiba long ka Ayushman - Apke Dwar 3.0, ki Ayushman Mela ha ki Health and Wellness Centre (HWC) bad ki Community Health Centre (CHCs) bad ki Ayushman Sabha ha baroh ki shnong bad ki panchayat:

Ayushman Apke Dwar 3.0: Kane ka sienjam ka thmu ban pynbiang ki Ayushman card sha kito ki nongioh jingmyntoi kiba dang sah kiba don hapoh ka skhim PM-JAY, kaba pynthikna ba kiba ioh lad ban ioh jingsumar ki kham bun shuh shuh.

Ki Ayushman Mela ha ki HWC bad ki CHC: Kine ki Mela ha ki Ayushman Bharat- HWC bad ki CHC kin plié lad ia ka jingsdang ia ki ABHA ID (Ki ID ka koit ka khiah) bad ka jingsam ia ki Ayushman Bharat Card. Kin pynthikna ruh ia ka jingwad mardor ia ki jingpang, ki lad ai jingsumar ba nyngkong, ki teleconsultation bad kiba la pyntbit ha ki jait ai jingsumar bapher bapher, bad ka jingphah sha ki doctor kiba iadei bad ki jingpang kiba lap.

Ki Ayushman Sabha: Kine ki jingialang ha man ki shnong bad ki Panchayat kin don ka bynta kaba khraw ha ka jingsam ia ki Ayushman card, ka jingsdang ia ki ABHA ID, bad ka jingai jingtip shaphang ki skhim ka koit ka khiah bad ki jinglong jong ki jingpang kum ki jingpang bym iabit, ka tuberculosis (Nikshay Mitra), ka jingpang sickle cell ha ryngkat ki prokram ai mon sngewbha ia ka snam bad ki dkhot met.

Ka prokram Ayushman Bhav ka iadei bad ka thong ban don ki ‘Shnong ba koit ba khiah’ bad ki ‘Gram Panchayat ba koit ba khiah’ ka ban buh nongrim ia ka jingurlong ka jingplie lad ia baroh ha ka ri ba kin ioh jingsumar. Ki Panchayat kiba lah ban pyntreikam lut ia ki skhim ka koit ka khiah kin ioh ia ka nam 'Ayushman Gram Panchayat' lane 'Ayushman Urban Ward,' ka ban long ka dak jong ka jingtrei shitom jong ki na ka bynta ka jingioh lad jingsumar kaba ryntih.

U Myntri Sorkar Pdeng ba dei khmih ia ka tnat ka koit ka khiah, u Dr Mansukh Mandaviya u la iakren bad ki Myntri ka koit ka khiah bad ki ophisar na ki Jylla bad ki UT lyngba ki lad digital mynta ka sngi ban peit ia ki jingpynkhreh ia ka jingsdang jong ka Ayushman Bhav.

U Dr Mandaviya u la ban jur halor ka jingdonkam jong ka sienjam Ayushman Bhav ia baroh ki Jylla bad ki UT. U la bthah ia baroh ki Jylla /UT ba kin pynlong ia ki Health Mela ha ki Health and Wellness Centre man u snem bad u la kyntu ia baroh ki medical college ba kin pynlong ia ka Health Camp ha ki block. U la ong ba kane kan pynthikna ba kito kiba wan sha kine ki Health Mela kin ioh ia ka jingsumar ha ka por kaba biang ha kine ki Health Mela.

Da kaba ban jur halor ka jingiadei jong ka jingkhuid bad ka koit ka khiah, u la kyntu ia baroh ki jylla ban pynthikna ba baroh ki shnong ki pynlong ia ka Swachchta Drive ha ka 2 tarik u Risaw. U la ban jur ruh halor ka jingdonkam jong ka jingai mon sngewbha ia ka snam bad ki dkhot met ia kiba la kynthup dang shen kum ki rishot ba hynriew bad hynniew jong ka Sirnjam Ayushman Bharat.

****