భారతీయ యువత ఇప్పుడు ఆకాంక్షల బందీ గా లేదని, ఎందుకంటే ఇప్పుడు అందుబాటులో ఉన్న అనేక కొత్త అవకాశాలు వారి అంతర్లీన అభిరుచికి అనుగుణంగా జీవనోపాధి అవకాశాలను అందిస్తున్నాయని కేంద్ర సైన్స్ అండ్ టెక్నాలజీ శాఖ సహాయ మంత్రి (స్వతంత్ర హోదా) పి ఎం ఒ, పర్సనల్, పబ్లిక్ గ్రీవెన్స్, పెన్షన్స్, అటామిక్ ఎనర్జీ అండ్ స్పేస్ శాఖల సహాయ మంత్రి డాక్టర్ జితేంద్ర సింగ్ అన్నారు.

స్టార్టప్ విధానం, జాతీయ విద్యా విధానం (ఎన్ ఇ పి ) 2020, అంతరిక్ష రంగం, డ్రోన్ నియంత్రణలు, కొత్త జియోస్పేషియల్ పాలసీ, నేషనల్ రీసెర్చ్ ఫౌండేషన్ వంటి ప్రధాని నరేంద్ర మోదీ తీసుకువచ్చిన అద్భుతమైన సంస్కరణల వల్ల ఇది చాలా వరకు సాధ్యమైందని ఆయన ఆన్నారు.

న్యూఢిల్లీలో జరిగిన కె ఎ ఎం పి ప్రతిభా ఉత్సవ్-2023లో డాక్టర్ జితేంద్ర సింగ్ ప్రసంగిస్తూ, ఇది భారతదేశంలో ఇది శుభ సమయం అని, చంద్రయాన్ -3 విజయవంతంగా ప్రయోగించడం భారతీయ విద్యార్థులలో ప్రపంచ ఆకాంక్షలను రేకెత్తించిందని అన్నారు. చంద్రయాన్ -3 తరువాత సూర్యుడిని అధ్యయనం చేసే  మొదటి అంతరిక్ష ఆధారిత భారతీయ మిషన్ ఆదిత్య ఎల్ 1 ప్రయోగం జరిగిందని, ఇంకో రెండు రోజుల్లో భారతదేశం ఢిల్లీలో చారిత్రాత్మక జి 20 శిఖరాగ్ర సమావేశానికి ఆతిథ్యం ఇవ్వనుందని, వీటన్నింటి ఘనత  మన దార్శనిక ప్రధాని శ్రీ నరేంద్ర మోదీకి చెందుతుందని ఆయన అన్నారు.

భారతదేశంలో విద్యార్థులు , యువతకు కొత్త కెరీర్ , వ్యవస్థాపక అవకాశాలను తెరిచే వాగ్దానంతో కొత్త జాతీయ విద్యా విధానం (ఎన్ఇపి -2020)  కు తోడు స్టార్టప్ ఎకోసిస్టమ్ ను  కూడా ప్రధాని మోదీ తీసుకువచ్చారని డాక్టర్ జితేంద్ర సింగ్ చెప్పారు.

మల్టిపుల్ ఎంట్రీ/ఎగ్జిట్ ఆప్షన్ ను అందించడం హర్షించదగ్గ విషయమని, ఈ అకడమిక్ ఫ్లెక్సిబిలిటీ విద్యార్థులపై వారి అంతర్గత అభ్యాసం , అంతర్లీన అభిరుచిని బట్టి వివిధ సమయాల్లో విభిన్న కెరీర్ అవకాశాలను పొందడానికి సంబంధించి సానుకూల ప్రభావాన్ని చూపుతుందని డాక్టర్ జితేంద్ర సింగ్ అన్నారు. భవిష్యత్తులో ఉపాధ్యాయులకు కూడా ఈ ఎంట్రీ/ఎగ్జిట్ ఆప్షన్ ను ఎంచుకోవచ్చని, కొన్ని పాశ్చాత్య దేశాలు, అమెరికా తరహాలో వారికి కెరీర్ సౌలభ్యం, అప్ గ్రేడేషన్ అవకాశాలు లభిస్తాయని మంత్రి తెలిపారు.

ఎన్ ఇ పి - 2023 లక్ష్యాల్లో ఒకటి విద్య నుంచి డిగ్రీని తొలగించడం అని చెప్పిన డాక్టర్ జితేంద్ర సింగ్, డిగ్రీలను విద్యతో అనుసంధానం చేయడం వల్ల మన విద్యావ్యవస్థతో పాటు సమాజంపై కూడా తీవ్ర ప్రభావం పడిందని, విద్యావంతులైన నిరుద్యోగుల సంఖ్య పెరగడానికి  ఇది కూడా ఒక కారణం అని ఆయన అన్నారు. 

తొమ్మిదేళ్ల మోదీ పాలనను ప్రస్తావిస్తూ, దేశ యువతకు సాధారణ ప్రభుత్వ రంగ ఉద్యోగాలతో పాటు, ప్రభుత్వ రంగం వెలుపల స్టార్టప్ లు, ముద్రా స్కీమ్, పిఎం స్వనిధి వంటి లక్షలాది ఉపాధి అవకాశాలను సృష్టించారని డాక్టర్ జితేంద్ర సింగ్ తెలియ చేశారు.

2020 జూన్ లో ప్రధాన మంత్రి శ్రీ నరేంద్ర మోదీ అంతరిక్ష రంగాన్ని తెరిచిన తరువాత, స్పేస్ స్టార్టప్ ల సంఖ్య కేవలం 04 నుండి 150 స్టార్టప్ లకు పెరిగిందని, వాటిలో ఎక్కువ భాగం సైన్స్ విద్యార్థులు, పరిశోధకులు పారిశ్రామికవేత్తల  నాయకత్వం లో ఉన్నాయని డాక్టర్ జితేంద్ర సింగ్ అన్నారు.

2014కు ముందు కేవలం 350 స్టార్టప్ లు మాత్రమే ఉండేవని, కానీ ప్రధాని మోదీ తన స్వాతంత్ర్య దినోత్సవ ప్రసంగంలో ఎర్రకోటపై నుంచి పిలుపునిచ్చి 2016లో ప్రత్యేక స్టార్టప్ స్కీమ్ ను ప్రారంభించిన తర్వాత ఇప్పుడు 1.25 లక్షలకు పైగా స్టార్టప్ లు, 110కి పైగా యూనికార్న్ లతో గణనీయమైన పెరుగుదల నమోదైందని డాక్టర్ జితేంద్ర సింగ్ తెలిపారు. అదేవిధంగా బయోటెక్ రంగంలో 2014లో 50కి పైగా స్టార్టప్ లు ఉండగా, ఇప్పుడు 6,000 బయోటెక్ స్టార్టప్ లు ఉన్నాయని తెలిపారు.

డాక్టర్ జితేంద్ర సింగ్ ఈ సందర్భంగా యువ సాధకులను సన్మానించారు. యువత లో ప్రతిభను రాబట్టడం లో తనకు ఎల్లప్పుడూ విశ్వాసం ఉందని, ఆశించిన ఫలితాలను పొందడానికి ఐదవ తరగతి నుండి పదవ తరగతి వరకు విద్యార్థులపై దృష్టి పెట్టాలని కెఎఎంపికి సూచించారు. ఆప్టిట్యూడ్ నుంచి మ్యాథమెటిక్స్, మెకానికల్ ఇంజినీరింగ్ వరకు ఎనిమిది ప్రాథమిక అంశాలతో మరింత శాస్త్రీయ పద్ధతిలో కోర్సును రూపొందించిన నిర్వాహకులను అభినందించారు. విద్యార్థులకు సరైన మెంటర్ షిప్ అవసరాన్ని కూడా  ఆయన నొక్కి చెప్పారు.

సిఎస్ఐఆర్-ఎన్ఐఎస్ సిపిఆర్ డైరెక్టర్ డాక్టర్ రంజనా అగర్వాల్ స్వాగతం చెబుతూ, "వన్ వీక్ వన్ ల్యాబ్" ప్రచారం ఒక ప్రత్యేకమైన వేదిక, ఇది ప్రతి సిఎస్ఐఆర్ ప్రయోగశాల తన వారసత్వం, సాంకేతిక పురోగతి , విజయ గాథలను మన సమాజంలోని వివిధ భాగస్వాములకు ఆవిష్కరించడానికి వీలు కల్పిస్తుంది” అన్నారు. వారం రోజుల ల్యాబ్ క్యాంపెయిన్ అనేది సైన్స్ టెక్నాలజీ మంత్రి మానస పుత్రిక అని ఆమె అన్నారు. “ఆయన మద్దతు, దార్శనికత ఈ ప్రచారాన్ని సాకారం చేయడంలో కీలక పాత్ర పోషించాయి” అని చెప్పారు. 

సిఎస్ఐఆర్-ఎన్ఐఎస్ సిపిఆర్ వన్ వీక్ వన్ ల్యాబ్ కార్యక్రమం 2023 సెప్టెంబర్ 11 నుండి 16 వరకు నడుస్తుంది, ఈ సమయంలో సిఎస్ఐఆర్-ఎన్ఐఎస్ సిపిఆర్  తన విభాగాలను సందర్శించడానికి,  తన విద్యా , పరిశోధన కార్యక్రమాలను తెలుసుకోవడానికి ప్రజలకు అవకాశం కల్పిస్తుంది. సైన్స్ కమ్యూనికేషన్, ఎస్ అండ్ టీ ఆధారిత పాలసీ రీసెర్చ్ కు సంబంధించిన వివిధ అంశాలపై ప్రముఖుల ఉపన్యాసాలు, ప్రదర్శనలు, వర్క్ షాప్ లు, తోలుబొమ్మలాట ప్రదర్శనలు, క్విజ్ లు, పోటీలు, ఎగ్జిబిషన్లు కూడా ఈ కార్యక్రమంలో ఉంటాయి. దేశవ్యాప్తంగా విస్తరించి ఉన్న 37 సి ఎస్ఐఆర్ ప్రయోగశాలల్లో ప్రతి ఒక్కటి తమ కృషిని, విజయాలను ప్రదర్శించడానికి ఇది అనుమతిస్తుంది.

***