നമസ്കാരം!

ഈ 'ആസാദി കാ അമൃത്‌കാല'ത്തിൽ രാജ്യത്തിന്റെ സ്വാതന്ത്ര്യത്തിന്റെ സംരക്ഷകരും കോടിക്കണക്കിന് രാജ്യക്കാരുടെ സംരക്ഷകരുമായി മാറിയതിന് നിങ്ങൾക്കെല്ലാവർക്കും എന്റെ ഹൃദയംഗമമായ അഭിനന്ദനങ്ങൾ. ഇന്ന് നിയമന കത്തുകൾ ലഭിക്കുന്ന യുവാക്കൾ രാജ്യത്തെ സേവിക്കുക മാത്രമല്ല, രാജ്യത്തെ പൗരന്മാരെ സംരക്ഷിക്കുകയും ചെയ്യും എന്നതിനാലാണ് ഞാൻ നിങ്ങളെ 'അമൃത് രക്ഷകർ' എന്ന് വിളിക്കുന്നത്. അതുകൊണ്ടാണ് ഒരു തരത്തിൽ നിങ്ങൾ ജനങ്ങളുടെ സംരക്ഷകരും 'അമൃത്കാല'ത്തിന്റെ 'അമൃത് രക്ഷകരും'.

എന്റെ കുടുംബാംഗങ്ങളേ ,

രാജ്യം അഭിമാനവും ആത്മവിശ്വാസവും നിറഞ്ഞ അന്തരീക്ഷത്തിലാണ് ഇത്തവണ റോസ്ഗാർ മേള സംഘടിപ്പിക്കുന്നത്. നമ്മുടെ ചന്ദ്രയാനും അതിന്റെ റോവർ പ്രഗ്യാനും ചന്ദ്രനിൽ നിന്നുള്ള ചിത്രങ്ങൾ തുടർച്ചയായി അയയ്‌ക്കുന്നു, അത് ചരിത്രം സൃഷ്‌ടിക്കുന്നു. അഭിമാനത്തിന്റെ ഈ നിമിഷത്തിൽ, നിങ്ങൾ നിങ്ങളുടെ ജീവിതത്തിലെ ഏറ്റവും പ്രധാനപ്പെട്ട യാത്ര ആരംഭിക്കാൻ പോകുകയാണ്. വിജയിച്ച എല്ലാ ഉദ്യോഗാർത്ഥികൾക്കും അവരുടെ കുടുംബങ്ങൾക്കും ഞാൻ എന്റെ ആശംസകൾ നേരുന്നു.

സുഹൃത്തുക്കളേ 

പട്ടാളത്തിൽ ചേരുക, പ്രതിരോധ സേനയിൽ ചേരുക, പോലീസ് സർവീസിൽ ചേരുക, രാജ്യരക്ഷയുടെ കാവൽനായ് മാറാനാണ് ഓരോ യുവജനവും സ്വപ്നം കാണുന്നത്. അതിനാൽ നിങ്ങൾക്ക് വലിയ ഉത്തരവാദിത്തമുണ്ട്. അതുകൊണ്ടാണ് നിങ്ങളുടെ ആവശ്യങ്ങളിലും ഞങ്ങളുടെ ഗവൺമെന്റ് വളരെ ഗൗരവമായി പെരുമാറുന്നത്.

കഴിഞ്ഞ കുറച്ച് വർഷങ്ങളായി, അർദ്ധസൈനിക വിഭാഗങ്ങളുടെ റിക്രൂട്ട്‌മെന്റ് പ്രക്രിയയിൽ ഞങ്ങൾ നിരവധി പ്രധാന മാറ്റങ്ങൾ വരുത്തിയിട്ടുണ്ട്. അപേക്ഷ മുതൽ തിരഞ്ഞെടുപ്പ് വരെയുള്ള നടപടികൾ വേഗത്തിലാക്കി. അർദ്ധസൈനിക വിഭാഗങ്ങളിലേക്കുള്ള റിക്രൂട്ട്‌മെന്റിനുള്ള പരീക്ഷ ഇപ്പോൾ 13 പ്രാദേശിക ഭാഷകളിലും നടത്തുന്നു. നേരത്തെ ഇത്തരം പരീക്ഷകളിൽ ഹിന്ദിയോ ഇംഗ്ലീഷോ തിരഞ്ഞെടുക്കാനുള്ള ഓപ്ഷൻ ഉണ്ടായിരുന്നെങ്കിലും ഇപ്പോൾ മാതൃഭാഷയ്ക്ക് പ്രാധാന്യം നൽകിയിട്ടുണ്ട്. ഈ മാറ്റം ലക്ഷക്കണക്കിന് യുവാക്കൾക്ക് തൊഴിൽ ലഭിക്കാൻ അവസരമൊരുക്കി.

കഴിഞ്ഞ വർഷം ഛത്തീസ്ഗഡിലെ നക്സൽ ബാധിത ജില്ലകളിൽ നൂറുകണക്കിന് ആദിവാസി യുവാക്കളെ നിയമിച്ചിരുന്നു. നിയമങ്ങൾ ലഘൂകരിച്ച് പ്രതിരോധ സേനയിൽ റിക്രൂട്ട് ചെയ്യാനുള്ള അവസരം അവർക്ക് നൽകി, അങ്ങനെ അവർ വികസനത്തിന്റെ മുഖ്യധാരയുമായി ബന്ധപ്പെട്ടിരിക്കുന്നു. അതുപോലെ, അതിർത്തി ജില്ലകളിലെയും തീവ്രവാദ ബാധിത ജില്ലകളിലെയും യുവാക്കൾക്കുള്ള കോൺസ്റ്റബിൾ റിക്രൂട്ട്‌മെന്റ് പരീക്ഷയിൽ ക്വാട്ട വർദ്ധിപ്പിച്ചു. സർക്കാരിന്റെ ശ്രമഫലമായി, അർദ്ധസൈനിക വിഭാഗങ്ങൾ തുടർച്ചയായി ശക്തിപ്പെടുത്തുകയാണ്.

സുഹൃത്തുക്കളേ ,

രാജ്യത്തിന്റെ വികസനം ഉറപ്പാക്കുന്നതിൽ നിങ്ങൾ ഒരു പ്രധാന പങ്ക് വഹിക്കുന്നു. സുരക്ഷയുടെയും ക്രമസമാധാനത്തിന്റെയും അന്തരീക്ഷം വികസനത്തിന്റെ വേഗത വർദ്ധിപ്പിക്കുന്നു. നിങ്ങൾക്ക് യുപിയുടെ ഉദാഹരണം എടുക്കാം. ഒരുകാലത്ത് യുപി വികസനത്തിന്റെ കാര്യത്തിൽ വളരെ പിന്നിലായിരുന്നു, കുറ്റകൃത്യങ്ങളുടെ കാര്യത്തിൽ വളരെ മുന്നിലായിരുന്നു. എന്നാൽ ഇപ്പോൾ നിയമവാഴ്ച സ്ഥാപിക്കപ്പെട്ടതോടെ യുപി വികസനത്തിന്റെ പുതിയ ഉയരങ്ങൾ തൊടുകയാണ്. ഒരുകാലത്ത് ഗുണ്ടകളുടെയും മാഫിയകളുടെയും ഭീതിയിൽ ജീവിച്ചിരുന്ന ഉത്തർപ്രദേശിൽ ഭയരഹിത സമൂഹം സ്ഥാപിക്കപ്പെടുകയാണ്. ഇത്തരം ക്രമസമാധാനം ജനങ്ങളിൽ ആത്മവിശ്വാസം വളർത്തുന്നു. കുറ്റകൃത്യങ്ങൾ കുറഞ്ഞപ്പോൾ യുപിയിലും നിക്ഷേപം വർധിക്കാൻ തുടങ്ങി; നിക്ഷേപം ഒഴുകാൻ തുടങ്ങി. നേരെമറിച്ച്, കുറ്റകൃത്യങ്ങളുടെ നിരക്ക് ഏറ്റവും ഉയർന്ന സംസ്ഥാനങ്ങളിൽ, നിക്ഷേപം ആനുപാതികമായി കുറയാൻ തുടങ്ങുന്നതും നാം കാണുന്നു. ഉപജീവനത്തിനുള്ള എല്ലാ ജോലികളും നിലച്ചു.

എന്റെ കുടുംബാംഗങ്ങളേ ,

ലോകത്ത് ഏറ്റവും വേഗത്തിൽ വളരുന്ന സമ്പദ്‌വ്യവസ്ഥ ഇന്ത്യയാണെന്ന് ഇക്കാലത്ത് നിങ്ങൾ നിരന്തരം വായിക്കുന്നു. ഈ ദശകത്തിൽ ഏറ്റവും മികച്ച 3 സമ്പദ്‌വ്യവസ്ഥകളിൽ ഇന്ത്യയും ഇടംപിടിക്കും. ഞാൻ നിങ്ങൾക്ക് ഈ ഉറപ്പ് നൽകുമ്പോൾ, അല്ലെങ്കിൽ മോദി തന്റെ രാജ്യക്കാർക്കും കുടുംബാംഗങ്ങൾക്കും ഈ ഉറപ്പ് നൽകുമ്പോൾ, അത് ഒരു വലിയ ഉത്തരവാദിത്തത്തോടെയാണ് ചെയ്യുന്നത്. എന്നാൽ ഇതിനെക്കുറിച്ച് വായിക്കുമ്പോൾ, നിങ്ങളുടെ മനസ്സിൽ ഒരു ചോദ്യം ഉയർന്നുവരുന്നു: രാജ്യത്തെ സാധാരണ പൗരന്മാരിൽ ഇത് എന്ത് സ്വാധീനം ചെലുത്തും? ഈ ചോദ്യം വളരെ സ്വാഭാവികമാണ്.

സുഹൃത്തുക്കളേ,

ഏതൊരു സമ്പദ്‌വ്യവസ്ഥയും മുന്നോട്ട് പോകണമെങ്കിൽ, രാജ്യത്തിന്റെ എല്ലാ മേഖലകളും വികസിക്കേണ്ടത് ആവശ്യമാണ്. ഭക്ഷ്യമേഖല മുതൽ ഫാർമ വരെ, ബഹിരാകാശം മുതൽ സ്റ്റാർട്ടപ്പുകൾ വരെ, ഓരോ മേഖലയും മുന്നോട്ട് പോകുമ്പോൾ സമ്പദ്‌വ്യവസ്ഥയും മുന്നോട്ട് പോകും. ഫാർമ വ്യവസായത്തിന്റെ ഉദാഹരണം എടുക്കാം. പാൻഡെമിക് സമയത്ത് ഇന്ത്യയുടെ ഫാർമ വ്യവസായം വളരെയധികം വിലമതിക്കപ്പെട്ടു. ഇന്ന് ഈ വ്യവസായത്തിന്റെ മൂല്യം 4 ലക്ഷം കോടിയിലേറെയാണ്. 2030 ആകുമ്പോഴേക്കും ഇന്ത്യയുടെ ഫാർമ വ്യവസായം ഏകദേശം 10 ലക്ഷം കോടി രൂപ മൂല്യമുള്ളതായിരിക്കുമെന്ന് പറയപ്പെടുന്നു. ഇപ്പോൾ ഈ ഫാർമ വ്യവസായം മുന്നോട്ട് പോകുമ്പോൾ എന്താണ് അർത്ഥമാക്കുന്നത്? ഇതിനർത്ഥം ഈ ദശകത്തിൽ ഫാർമ വ്യവസായത്തിന് ഇന്നത്തെതിനേക്കാൾ പലമടങ്ങ് യുവാക്കളെ ആവശ്യമുണ്ട്. നിരവധി പുതിയ തൊഴിലവസരങ്ങൾ സൃഷ്ടിക്കപ്പെടും.

സുഹൃത്തുക്കളേ ,

ഇന്ന്, രാജ്യത്തെ ഓട്ടോമൊബൈൽ, ഓട്ടോ ഘടകങ്ങൾ വ്യവസായങ്ങളും അതിവേഗ വളർച്ചയ്ക്ക് സാക്ഷ്യം വഹിക്കുന്നു. നിലവിൽ ഈ രണ്ട് വ്യവസായങ്ങൾക്കും 12 ലക്ഷം കോടിയിലധികം മൂല്യമുണ്ട്. വരും വർഷങ്ങളിൽ ഇത് ഇനിയും കൂടുമെന്നാണ് പ്രതീക്ഷിക്കുന്നത്. ഈ വളർച്ച കൈകാര്യം ചെയ്യാൻ, ഓട്ടോമൊബൈൽ വ്യവസായത്തിനും ധാരാളം പുതിയ യുവാക്കളെ ആവശ്യമായി വരും. പുതിയ തൊഴിലാളികളെ ആവശ്യമായി വരും, എണ്ണമറ്റ തൊഴിലവസരങ്ങൾ സൃഷ്ടിക്കപ്പെടും. ഈ ദിവസങ്ങളിൽ ഭക്ഷ്യ സംസ്കരണ വ്യവസായത്തിന്റെ പ്രാധാന്യത്തെക്കുറിച്ച് ധാരാളം ചർച്ചകൾ നടക്കുന്നത് നിങ്ങൾ കണ്ടിരിക്കണം. ഇന്ത്യയുടെ ഭക്ഷ്യ സംസ്കരണ വിപണി കഴിഞ്ഞ വർഷം ഏകദേശം 26 ലക്ഷം കോടി രൂപയായിരുന്നു. അടുത്ത 3-3.5 വർഷത്തിനുള്ളിൽ ഈ മേഖലയുടെ മൂല്യം 35 ലക്ഷം കോടി രൂപയാകും. അതായത്, അത് കൂടുതൽ വികസിക്കുമ്പോൾ, കൂടുതൽ യുവാക്കളെ ആവശ്യമായി വരും, കൂടുതൽ തൊഴിലവസരങ്ങൾ സൃഷ്ടിക്കപ്പെടും.

സുഹൃത്തുക്കളേ 

അടിസ്ഥാന സൗകര്യങ്ങൾ ഇന്ന് ഇന്ത്യയിൽ അതിവേഗം വികസിച്ചുകൊണ്ടിരിക്കുന്നു. കഴിഞ്ഞ 9 വർഷത്തിനിടെ കേന്ദ്രസർക്കാർ അടിസ്ഥാന സൗകര്യ വികസനത്തിനായി 30 ലക്ഷം കോടി രൂപയിലധികം നിക്ഷേപിച്ചിട്ടുണ്ട്. ഇത് രാജ്യത്തുടനീളം കണക്റ്റിവിറ്റി വിപുലീകരിക്കുന്നു; അത് ടൂറിസം, ഹോസ്പിറ്റാലിറ്റി മേഖലകളിൽ പുതിയ സാധ്യതകൾ സൃഷ്ടിച്ചു. പുതിയ സാധ്യതകൾ അർത്ഥമാക്കുന്നത് കൂടുതൽ കൂടുതൽ തൊഴിലവസരങ്ങൾ സൃഷ്ടിക്കപ്പെടുന്നു എന്നാണ്.

സുഹൃത്തുക്കളേ ,

2030 ആകുമ്പോഴേക്കും നമ്മുടെ സമ്പദ്‌വ്യവസ്ഥയിൽ ടൂറിസം മേഖലയുടെ സംഭാവന 20 ലക്ഷം കോടി രൂപയിലധികം വരുമെന്നാണ് കണക്കാക്കുന്നത്. ഈ വ്യവസായത്തിൽ നിന്ന് മാത്രം 13 മുതൽ 14 കോടി ആളുകൾക്ക് പുതിയ തൊഴിലവസരങ്ങൾ ലഭിക്കാൻ പോകുന്നുവെന്ന് വിശ്വസിക്കപ്പെടുന്നു. ഈ ഉദാഹരണങ്ങളിൽ നിന്ന്, ഇന്ത്യയുടെ വികസനം കേവലം അക്കങ്ങളുടെ ഓട്ടമല്ലെന്ന് നിങ്ങൾക്ക് മനസ്സിലാക്കാനാകും. ഈ വികസനം ഇന്ത്യയിലെ ഓരോ പൗരന്റെയും ജീവിതത്തിൽ സ്വാധീനം ചെലുത്തും. ഇതിനർത്ഥം വലിയ തോതിൽ തൊഴിലവസരങ്ങൾ സൃഷ്ടിക്കപ്പെടുന്നു എന്നാണ്. ഇത് വരുമാനത്തിലും ജീവിത നിലവാരത്തിലും വർദ്ധനവ് ഉറപ്പാക്കുന്നു. കർഷകരുടെ ഒരു കുടുംബത്തിനുള്ളിൽ, നല്ല വിളവുണ്ടായാൽ, അവരുടെ വിളകൾക്ക് നല്ല വില ലഭിക്കുകയാണെങ്കിൽ, ആ വീട് സന്തോഷത്താൽ നിറയുന്നത് നാം കാണുന്നു. അവർ പുതിയ വസ്ത്രങ്ങൾ വാങ്ങുന്നു; പുറത്തിറങ്ങി പുതിയ സാധനങ്ങൾ വാങ്ങാൻ അവർക്ക് തോന്നുന്നു. കുടുംബത്തിന്റെ വരുമാനം വർദ്ധിക്കുകയാണെങ്കിൽ, കുടുംബാംഗങ്ങളുടെ ജീവിതത്തിലും നല്ല മാറ്റമുണ്ടാകും. കുടുംബത്തിലെന്നപോലെ നാട്ടിലും അങ്ങനെ തന്നെ. രാജ്യത്തിന്റെ വരുമാനം വർദ്ധിക്കുന്നതിനനുസരിച്ച് രാജ്യത്തിന്റെ ശക്തി വർദ്ധിക്കുന്നു, സമ്പത്ത് വർദ്ധിക്കുന്നു; രാജ്യത്തെ പൗരന്മാരും സമ്പന്നരാകാൻ തുടങ്ങും.

സുഹൃത്തുക്കളേ ,

കഴിഞ്ഞ 9 വർഷത്തെ ഞങ്ങളുടെ ശ്രമങ്ങൾക്കൊപ്പം, മാറ്റത്തിന്റെ മറ്റൊരു പുതിയ ഘട്ടം പ്രത്യക്ഷപ്പെടാൻ തുടങ്ങിയിരിക്കുന്നു. കഴിഞ്ഞ വർഷം റെക്കോർഡ് കയറ്റുമതിയാണ് ഇന്ത്യ നടത്തിയത്. ലോകവിപണിയിൽ ഇന്ത്യൻ ഉൽപ്പന്നങ്ങളുടെ ആവശ്യം തുടർച്ചയായി വർധിക്കുന്നതിന്റെ സൂചനയാണിത്. ഇതിനർത്ഥം നമ്മുടെ ഉൽപ്പാദനം വർദ്ധിച്ചു, അതേ സമയം ഉൽപ്പാദന പ്രക്രിയയിൽ പുതിയ യുവാക്കളുടെ ആവശ്യകത കാരണം ജോലികളും വർദ്ധിച്ചു എന്നാണ്. കൂടാതെ, സ്വാഭാവികമായും, കുടുംബത്തിന്റെ വരുമാനവും വർദ്ധിക്കുന്നു. ഇന്ന് ലോകത്തിലെ ഏറ്റവും വലിയ രണ്ടാമത്തെ മൊബൈൽ ഫോൺ നിർമ്മാതാക്കളാണ് ഇന്ത്യ. രാജ്യത്ത് മൊബൈൽ ഫോണുകളുടെ ആവശ്യവും തുടർച്ചയായി വർദ്ധിച്ചുകൊണ്ടിരിക്കുകയാണ്. സർക്കാരിന്റെ ശ്രമങ്ങൾ മൊബൈൽ നിർമ്മാണവും പലമടങ്ങ് വർദ്ധിപ്പിച്ചു. ഇപ്പോൾ രാജ്യം മൊബൈലുകൾക്കപ്പുറം മറ്റ് ഇലക്ട്രോണിക് ഉപകരണങ്ങളിലും  ശ്രദ്ധ കേന്ദ്രീകരിക്കുന്നു.

ഐടി ഹാർഡ്‌വെയർ ഉൽപ്പാദനരംഗത്തും മൊബൈൽ മേഖലയിൽ നേടിയ അതേ വിജയം ആവർത്തിക്കാൻ പോവുകയാണ്. ഇന്ത്യയിൽ നിർമ്മിച്ച മികച്ച നിലവാരമുള്ള ലാപ്‌ടോപ്പുകളും ടാബ്‌ലെറ്റുകളും പേഴ്‌സണൽ കമ്പ്യൂട്ടറുകളും മൊബൈലുകൾ പോലെ ലോകമെമ്പാടും നമ്മുടെ പ്രതാപം വർദ്ധിപ്പിക്കുന്ന ദിവസം വിദൂരമല്ല. വോക്കൽ ഫോർ ലോക്കൽ എന്ന മന്ത്രം പിന്തുടർന്ന്, മെയ്ഡ് ഇൻ ഇന്ത്യ ലാപ്‌ടോപ്പുകളും കമ്പ്യൂട്ടറുകളും പോലുള്ള നിരവധി ഉൽപ്പന്നങ്ങൾ വാങ്ങുന്നതിന് ഇന്ത്യാ ഗവൺമെന്റ് ഊന്നൽ നൽകുന്നു. തൽഫലമായി, ഉൽപ്പാദനം വർദ്ധിക്കുകയും യുവാക്കൾക്ക് പുതിയ തൊഴിലവസരങ്ങൾ സൃഷ്ടിക്കപ്പെടുകയും ചെയ്യുന്നു. അതുകൊണ്ടാണ് ഞാൻ ഒരിക്കൽ കൂടി ആവർത്തിക്കുന്നത്, നിങ്ങൾക്കെല്ലാവർക്കും വലിയ ഉത്തരവാദിത്തമുണ്ട്, അത് സമ്പദ്‌വ്യവസ്ഥയുടെ ഈ മുഴുവൻ ചക്രവും കൈകാര്യം ചെയ്യുകയും സംരക്ഷിക്കുകയും ചെയ്യുക എന്നതാണ്. നിങ്ങളെല്ലാവരും സെക്യൂരിറ്റി ജീവനക്കാരായി ആരംഭിക്കുമ്പോൾ, നിങ്ങൾക്കുള്ള ഉത്തരവാദിത്തം നിങ്ങൾക്ക് ഊഹിക്കാവുന്നതാണ്.

എന്റെ കുടുംബാംഗങ്ങളേ,

പ്രധാനമന്ത്രി ജൻധൻ യോജന 9 വർഷം മുമ്പ് ഈ ദിവസം ആരംഭിച്ചു. ഗ്രാമങ്ങളുടെയും പാവപ്പെട്ടവരുടെയും സാമ്പത്തിക ശാക്തീകരണത്തിലും തൊഴിലവസരങ്ങൾ സൃഷ്ടിക്കുന്നതിലും ഈ പദ്ധതി വലിയ പങ്കുവഹിച്ചിട്ടുണ്ട്. 9 വർഷം മുമ്പ് രാജ്യത്ത് വലിയൊരു വിഭാഗം ആളുകൾക്ക് ബാങ്ക് അക്കൗണ്ട് പോലും ഇല്ലായിരുന്നു. എന്നാൽ ജൻധൻ യോജന കാരണം കഴിഞ്ഞ 9 വർഷത്തിനിടെ 50 കോടിയിലധികം പുതിയ ബാങ്ക് അക്കൗണ്ടുകൾ തുറന്നു. ഈ പദ്ധതി പാവപ്പെട്ടവർക്കും ഗ്രാമീണർക്കും സർക്കാർ ആനുകൂല്യങ്ങൾ നേരിട്ട് നൽകുന്നതിന് സഹായിക്കുക മാത്രമല്ല, സ്ത്രീകൾ, ദളിതർ, പിന്നോക്കക്കാർ, ആദിവാസികൾ എന്നിവർക്ക് തൊഴിലിലും സ്വയംതൊഴിലും കാര്യത്തിലും വളരെയധികം കരുത്ത് പകരുകയും ചെയ്തു.

ഓരോ ഗ്രാമത്തിലും ബാങ്ക് അക്കൗണ്ട് തുറന്നപ്പോൾ ലക്ഷക്കണക്കിന് യുവാക്കൾക്ക് ബാങ്കിംഗ് കറസ്‌പോണ്ടന്റായും ബാങ്ക് മിത്രയായും ജോലി ലഭിച്ചു. ഞങ്ങളുടെ ആയിരക്കണക്കിന് ആൺമക്കൾക്കും പെൺമക്കൾക്കും ബാങ്ക് മിത്ര, ബാങ്ക് സഖി രൂപങ്ങളിൽ തൊഴിൽ ലഭിച്ചു. ഇന്ന്, 21 ലക്ഷത്തിലധികം യുവസുഹൃത്തുക്കൾ എല്ലാ ഗ്രാമങ്ങളിലും ബാങ്കിംഗ് കറസ്‌പോണ്ടന്റുമാരായോ ബാങ്ക് മിത്രയോ ബാങ്ക് സഖിയോ ആയി സേവനം ചെയ്യുന്നു. വലിയൊരു വിഭാഗം ഡിജിറ്റൽ സഖികൾ സ്ത്രീകളെയും മുതിർന്ന പൗരന്മാരെയും ബാങ്കിംഗ് സേവനങ്ങളുമായി ബന്ധിപ്പിക്കുന്നു.

അതുപോലെ, ജൻധൻ യോജന, തൊഴിലിനും സ്വയംതൊഴിൽക്കുമായി മറ്റൊരു ബൃഹത്തായ കാമ്പെയ്‌നിന് ആക്കം കൂട്ടി, അതാണ് മുദ്ര യോജന. സ്ത്രീകൾ ഉൾപ്പെടെയുള്ള വിഭാഗങ്ങൾക്ക് ചെറുകിട ബിസിനസ്സുകൾക്കായി വായ്പ എടുക്കുന്നത് ഇത് എളുപ്പമാക്കി, മുമ്പ് ഒരിക്കലും ചിന്തിക്കാൻ പോലും കഴിയില്ല. ഈ ആളുകൾക്ക് ബാങ്കുകൾക്ക് നൽകാൻ ഒരു ഗ്യാരണ്ടിയും ഉണ്ടായിരുന്നില്ല. ഇത്തരമൊരു സാഹചര്യത്തിൽ സർക്കാർ തന്നെ അവരുടെ പേരിൽ ഗ്യാരണ്ടി എടുത്തു. മുദ്ര യോജനയ്ക്ക് കീഴിൽ ഇതുവരെ 24 ലക്ഷം കോടി രൂപയിലധികം വായ്പ നൽകിയിട്ടുണ്ട്. ഗുണഭോക്താക്കളിൽ 8 കോടിയോളം പേർ ആദ്യമായി ബിസിനസ് ആരംഭിച്ചിട്ടുണ്ട്. പ്രധാനമന്ത്രി സ്വാനിധി പദ്ധതി പ്രകാരം 43 ലക്ഷം തെരുവ് കച്ചവടക്കാർക്ക് ആദ്യമായി ബാങ്കുകളിൽ നിന്ന് യാതൊരു ജാമ്യവുമില്ലാതെ വായ്പ അനുവദിച്ചു. മുദ്രയുടെയും സ്വനിധിയുടെയും ഗുണഭോക്താക്കളിൽ ധാരാളം സ്ത്രീകളും ദളിതരും പിന്നാക്കക്കാരും എന്റെ ആദിവാസി യുവാക്കളുമുണ്ട്.

ഗ്രാമങ്ങളിലെ വനിതാ സ്വയം സഹായ സംഘങ്ങളെ ശക്തിപ്പെടുത്തുന്നതിനും ജൻധൻ അക്കൗണ്ടുകൾ ഏറെ സഹായിച്ചിട്ടുണ്ട്. ഇക്കാലത്ത് ഗ്രാമത്തിൽ പോകുമ്പോൾ വനിതാ സ്വാശ്രയ സംഘങ്ങളിലെ സഹോദരിമാരെ കാണുമ്പോൾ പലരും വന്ന് ‘ഞാനൊരു ലക്ഷപതി ദീദിയാണ്’ എന്ന് പറയും. ഇതുമൂലം എല്ലാം സാധ്യമായി. സർക്കാർ നൽകുന്ന ധനസഹായം ഇപ്പോൾ നേരിട്ട് വനിതാ സ്വാശ്രയ സംഘങ്ങളുമായി ബന്ധപ്പെട്ട സ്ത്രീകളുടെ ബാങ്ക് അക്കൗണ്ടിൽ നിക്ഷേപിക്കുന്നു. രാജ്യത്തെ സാമൂഹികവും സാമ്പത്തികവുമായ മാറ്റങ്ങൾ വേഗത്തിലാക്കുന്നതിൽ ജൻ ധൻ യോജന വഹിച്ച പങ്ക് തീർച്ചയായും മികച്ച സർവകലാശാലകളുടെ ഗവേഷണ വിഷയമാണ്.

സുഹൃത്തുക്കളേ ,

റോസ്ഗാർ മേളയുടെ വിവിധ പരിപാടികളിൽ ഞാൻ ഇതുവരെ ലക്ഷക്കണക്കിന് യുവാക്കളെ അഭിസംബോധന ചെയ്തിട്ടുണ്ട്. ആ ചെറുപ്പക്കാർക്ക് പൊതു സേവനത്തിലോ മറ്റ് മേഖലകളിലോ ജോലി ലഭിച്ചു. ഗവൺമെന്റിലും ഭരണത്തിലും മാറ്റം കൊണ്ടുവരാനുള്ള ദൗത്യത്തിലെ എന്റെ ഏറ്റവും വലിയ ശക്തിയാണ് യുവ സുഹൃത്തുക്കളെ. എല്ലാം ഒരു ക്ലിക്ക് മാത്രം അകലെയുള്ള ആ തലമുറയിൽ പെട്ടവരാണ് നിങ്ങളെല്ലാം. അതിനാൽ, എല്ലാ സേവനങ്ങളും വേഗത്തിൽ ഡെലിവറി ചെയ്യാൻ ആളുകൾ ആഗ്രഹിക്കുന്നുവെന്ന് നിങ്ങൾക്ക് മനസ്സിലാക്കാനാകും. ഇന്നത്തെ തലമുറ പ്രശ്‌നങ്ങൾക്കുള്ള പരിഹാരങ്ങൾ ആഗ്രഹിക്കുന്നില്ലെന്ന് നിങ്ങൾക്ക് നന്നായി അറിയാം. ശാശ്വതമായ പരിഹാരമാണ് അവർ ആഗ്രഹിക്കുന്നത്. അതിനാൽ, പൊതുപ്രവർത്തകരായ നിങ്ങൾ അത്തരം തീരുമാനങ്ങൾ എടുക്കുകയും അത്തരം ഉത്തരവാദിത്തങ്ങൾ നിറവേറ്റുകയും ദീർഘകാലാടിസ്ഥാനത്തിൽ ജനങ്ങൾക്ക് പ്രയോജനകരമാകുന്ന വിധത്തിൽ ഓരോ നിമിഷവും തയ്യാറാകുകയും വേണം.

നിങ്ങൾ ഉൾപ്പെടുന്ന തലമുറ വിജയം കൈവരിക്കാൻ തീരുമാനിച്ചു. ഈ തലമുറ ആരുടെയും പ്രീതി ആഗ്രഹിക്കുന്നില്ല. അത് ഒരു കാര്യം മാത്രം ആഗ്രഹിക്കുന്നു, അതായത്, അവരുടെ വഴിയിൽ ആരും തടസ്സമാകരുത്. അതിനാൽ, പൊതുജനങ്ങളെ സേവിക്കാനും പൊതുജനങ്ങളുടെ അഭിലാഷങ്ങൾ നിറവേറ്റാനും സർക്കാർ എപ്പോഴും ഉണ്ടെന്ന് പൊതുപ്രവർത്തകരായ നിങ്ങൾ മനസ്സിലാക്കേണ്ടത് വളരെ പ്രധാനമാണ്. ഇത് മനസ്സിൽ വെച്ചാണ് നിങ്ങൾ പ്രവർത്തിക്കുന്നതെങ്കിൽ, ക്രമസമാധാനപാലനം നിങ്ങൾക്ക് എളുപ്പമാകും.

സുഹൃത്തുക്കളേ ,

അർദ്ധസൈനിക വിഭാഗത്തിൽ നിങ്ങളുടെ പ്രധാന ഉത്തരവാദിത്തം നിറവേറ്റുമ്പോൾ, തുടർച്ചയായ പഠന മനോഭാവവും നിങ്ങൾ നിലനിർത്തണം. നിങ്ങളെപ്പോലുള്ള കർമ്മയോഗികൾക്കായി IGoT കർമ്മയോഗി പോർട്ടലിൽ 600-ലധികം വ്യത്യസ്ത കോഴ്സുകൾ ലഭ്യമാണ്. സർട്ടിഫിക്കറ്റ് കോഴ്സുകളുണ്ട്. 20 ലക്ഷത്തിലധികം സർക്കാർ ജീവനക്കാർ ഈ പോർട്ടലിൽ രജിസ്റ്റർ ചെയ്തിട്ടുണ്ട്. അവർ ഓൺലൈനിൽ പഠിക്കുകയും പരീക്ഷ എഴുതുകയും ചെയ്യുന്നു.

ആദ്യ ദിവസം മുതൽ ഈ പോർട്ടലിൽ ചേരാൻ ഞാൻ നിങ്ങളോട് അഭ്യർത്ഥിക്കുന്നു, ആദ്യ ദിവസം മുതൽ നിങ്ങൾ പരമാവധി ശ്രമിക്കണം, കഴിയുന്നത്ര സർട്ടിഫിക്കറ്റ് കോഴ്സുകൾ പൂർത്തിയാക്കുക, കഴിയുന്നത്ര സർട്ടിഫിക്കറ്റുകൾ നേടുക. നിങ്ങൾ പഠിക്കുന്നതും അറിയുന്നതും മനസ്സിലാക്കുന്നതും പരീക്ഷയിൽ മാത്രം ഒതുങ്ങുന്നതല്ല. എന്നാൽ നിങ്ങളുടെ ജീവിതത്തിൽ നിങ്ങളുടെ കടമകൾ ഏറ്റവും മികച്ച രീതിയിൽ നിർവഹിക്കുക എന്നതാണ്. ഇത് നിങ്ങൾക്ക് ഒരു മികച്ച അവസരമായി മാറാനുള്ള കഴിവുണ്ട്.

സുഹൃത്തുക്കളേ ,

നിങ്ങളുടെ മേഖല  യൂണിഫോമുകളുടെ ലോകത്തിന്റേതാണ്. നിങ്ങളുടെ ജോലി ഒരു പ്രത്യേക സമയപരിധിയിൽ മാത്രം ഒതുങ്ങാത്തതിനാൽ ശാരീരിക ക്ഷമതയിൽ ഒട്ടും വിട്ടുവീഴ്ച ചെയ്യരുതെന്ന് ഞാൻ നിങ്ങളോട് എല്ലാവരോടും അഭ്യർത്ഥിക്കുന്നു. കാലാവസ്ഥയുടെ എല്ലാ വ്യതിയാനങ്ങളെയും നിങ്ങൾ അഭിമുഖീകരിക്കേണ്ടതുണ്ട്. നിങ്ങളുടെ വകുപ്പിൽ ജോലി ചെയ്യുന്നവർക്ക് ശാരീരിക ക്ഷമത വളരെ പ്രധാനമാണ്. ജോലിയുടെ പകുതിയും  കായിക ക്ഷമതയുമായി  ബന്ധപ്പെട്ടതാണ് . നിങ്ങൾ ശക്തമായി നിൽക്കുകയാണെങ്കിൽ ക്രമസമാധാനപാലനത്തിന് അധികമായി ഒന്നും ചെയ്യേണ്ടതില്ല; അവിടെ നിങ്ങളുടെ സാന്നിധ്യം മാത്രം മതി.

രണ്ടാമതായി, നിങ്ങളുടെ ഡ്യൂട്ടി സമയത്ത് നിങ്ങൾക്ക് ചില സമ്മർദ്ദകരമായ നിമിഷങ്ങൾ നേരിടേണ്ടി വന്നേക്കാം. ചെറിയ കാര്യങ്ങളിൽ സമ്മർദ്ദം ഉണ്ടാകാം. എന്റെ അഭിപ്രായത്തിൽ, യോഗ നിങ്ങളുടെ ജീവിതത്തിൽ ദൈനംദിന പരിശീലനമായിരിക്കണം. സമതുലിതമായ മനസ്സ് നിങ്ങളുടെ ജോലിയെ വളരെയധികം വർദ്ധിപ്പിക്കുമെന്ന് നിങ്ങൾ കാണും. യോഗ ഒരു ശാരീരിക വ്യായാമം മാത്രമല്ല. ആരോഗ്യമുള്ള മനസ്സിനും സമതുലിതമായ മനസ്സിനും നിങ്ങളെപ്പോലുള്ളവർക്ക് ഡ്യൂട്ടി സമയത്ത് സമ്മർദ്ദം ഒഴിവാക്കാനും ഇത് ജീവിതത്തിന്റെ ഭാഗമാക്കേണ്ടത് വളരെ പ്രധാനമാണ്.

സുഹൃത്തുക്കളേ ,

2047-ൽ രാജ്യം സ്വാതന്ത്ര്യത്തിന്റെ 100 വർഷം ആഘോഷിക്കുമ്പോൾ, നിങ്ങൾ  ഗവൺമെന്റിൽ  വളരെ ഉയർന്ന സ്ഥാനത്ത് എത്തുമായിരിക്കും . രാജ്യത്തിന്റെ 25 വർഷവും നിങ്ങളുടെ ജീവിതത്തിന്റെ ഈ 25 വർഷവും വളരെ മികച്ച ബന്ധമാണ്! അതിനാൽ, നിങ്ങൾ ഇപ്പോൾ ഈ അവസരം നഷ്ടപ്പെടുത്തരുത്. നിങ്ങളുടെ പൂർണ്ണ ശക്തി, കഴിവ്, നിങ്ങൾക്ക് കഴിയുന്നത്ര വികസിപ്പിക്കുക, നിങ്ങൾക്ക് കഴിയുന്നത്ര സ്വയം സമർപ്പിക്കുക. സാധാരണക്കാരന് വേണ്ടി എത്രത്തോളം നിങ്ങളുടെ ജീവിതം സമർപ്പിക്കുന്നുവോ അത്രത്തോളം നിങ്ങൾക്ക് ജീവിതത്തിൽ സംതൃപ്തി അനുഭവപ്പെടും; അത് നിങ്ങൾക്ക് അത്ഭുതകരമായ സന്തോഷം നൽകും. നിങ്ങളുടെ വ്യക്തിപരമായ ജീവിതത്തിലെ വിജയം നിങ്ങൾക്ക് മൊത്തത്തിലുള്ള സംതൃപ്തി നൽകും.

നിങ്ങൾക്ക് എന്റെ ആശംസകൾ, നിങ്ങളുടെ കുടുംബാംഗങ്ങൾക്ക് നിരവധി അഭിനന്ദനങ്ങൾ! വളരെ നന്ദി.

--ND--