খুরুমজরি,

অজাদি কা মহোৎসব অসিদা, লৈবাক অসিগী নিংতম্বা অমসুং লৈবাক্কী মীওই  কয়াগী অমৃত ঙাক-শেন্নবা মীওই ওইরকপদা ময়াম পুম্নমক নুংঙাইবা ফোঙদোকচরি। ঙসি এপোইন্তমেন্ত লেত্তরশিং ফংলবা নহারোলশিংনা লৈবাক অসিগী মীয়ামগী থবক তৌগদবা মরম্না ঐনা মখোয়  অমৃত রক্ষ হায়না কৌরে। অদোম অমৃত কলা অসিদা অমৃত রক্ষ ওইরে।

ঐগী নুংশিরবা ইমুং-মনুংগী মীওইশিং,

লৈবাক অসি চাউথোকচবা অমসুং থাজবনা পীক থল্লবা মতমদা রোজগার মেলা অসি পাংথোক্লি। চন্দ্রয়ন-৩ অমসুং প্রাগ্যান রোভরনা লেপ্তনা থাগী শক্তমশিং থারক্লি। মসিগী তাংলবা তাঞ্জ অসিদা, নৌনা থবক খল্লবশিং মখোয়গী পুন্সিগী মরুওইবা খোঙচৎ হৌরে।  নৌবা থবক খল্লবশিং অমসুং মখোয়গী ইমুং-মনুংগী মীওইশিং ঐনা য়াইফ-পাউজেল পীজরি।

মরুপশিং,

লান্মী, সেকুরিতি ফোর্সশিং, পুসিল সর্বিসতা শরুক য়াদুনা লৈবাক অসি ঙাক-শেনবা মীওই অমা ওইবা হায়বসি নহারোল খুদিংমক্কী মঙলান্নি। মরম অদুনা অদোমগী থৌদাং য়াম্না লৈরি। মরম অদুনা নখোয়গী দরকার ওইবশিংদা ঐখোয়গী সরকারনা য়াম্না মরুওইনা লৌরি।

হৌখিবা চহি খরদা পেরামিলিতরি ফোর্সশিং থবক হাপ্পদা অচৌবা অহোঙবশিং পুরক্লে। এপ্লিকেসন থাজিনবদগী হৌরগা থবক লৌবা য়াংনা পাংথোক্লে। হৌজিক লম লমগী লোল ১৩দা পেরামিলিতরি ফোর্সশিং লৌনবা পরিক্ষা পাংথোক্লে। মমাঙদা অসিগুম্বা পরিক্ষাদা হিন্দী নত্ত্রগা ইংলিস খক খনবগী খুদোংচাবা লৈরমখি,হৌজিক ইমালোলগী মরুওইবা হেনগৎলক্লে। মসিনা নহারোল লাখ কয়া থবক ফংনবা লম্বী শেম্লে।

হৌখিবা চহিদা নেক্সালনা শোকহল্লবা ছতিসগরগী জিলাশিংদা ত্রাইবেল নহারোল চা কয়া থবক পীখ্রে। মখোয় জতিগী ইচেলদা তিনবা ঙম্নবা, নিয়মশিং কোমথোক্তুনা সেকুরিতি ফোর্সশিং থবক চংনবা খুদোংচাবা অমা মখোয়দা পীখ্রে। মসিগা চপ মান্না, ঙমখৈদা লৈবা জিলাশিং অমসুং লালহৌবনা শোকহল্লবা জিলাশিংগী নহারোলশিং কন্সতেবল খন্নবগী পরিক্ষাদা কোতা হেনগৎলে। সরকারগী থবকশিং অসিনা মরম ওইদুনা, পেরামিলিতরি ফোর্সশিংগী লেপ্তনা মপাঙ্গল কনখৎলে।

মরুপশিং,

লৈবাক অসি চাউখৎহনবদা অদোমগী চাউরবা থৌদাং অমা লৈরি। ঙাক-শেনগী ফিবম ফবা অমসুং  নিয়মগী মতুংইন্না লৈবাক ঙাকপা অসিনা চাউখৎপগী খোঙজেল য়াংখৎহল্লি। অদোম্না য়ু.পি অসি খুদম অমা ওইনা লৌবা য়াই। মতম অমদা য়ু.পি চাউখৎপদা মনিংদা লৈহৌখি অমসুং মীহাৎ-মীপুনগী থবকশিংদা মাঙজিল থাখি। অদুবু হৌজিক নিয়মগী মতুংইন্না লৈবাক ঙাকপদগী, য়ু.পি চাউখৎপগী অনৌবা থাকশিং য়ৌবা ঙম্লে। মতম অমদা গুন্দাশিংগী অকিবা মরক্তা হিংলম্বা য়ু.পিদা হৌজক অকিবা লৈতবা খুন্নাই অমা লৈরে। হিংশাগী থবক হন্থরকপা মতমদা য়ু.পিদা শেন থাদবা হেনগৎলকখি। মসিগী ওন্ন-তৈনবদা, হিংশা য়াম্না থোকপা রাজ্যশিংদা শেন থাদবা হন্থরকপা অমসুং হিংনবগী লম্বীশিং ফংদবা ঐখোয়না উরে।

ঐগী নুংশিরবা ইমুং-মনুংগী মীওইশিং,

মালেমদা ভারত য়াংনা চাউখৎলক্লিবা শেন্মীৎলোন অমা ওইরে  হায়বা হৌজিক অদোম্না লেপ্তনা পারে অমসুং উরে। চহি ১০ অসিগী মনুংদা মালেমগী মকোক থোঙবা শেন্মীৎলোন অহুমগী মনুংদা ভারত য়াওরগনি। মসিগী থাজবা অসি ঐগী লৈবাক্কী মীয়ামদা মোদীনা পীবা থাজবনি। মসি অদোম্না পাবা মতমদা, মসিনা লৈবাক অসিগী মীচম মীয়ামদা কয়া য়াম্না কান্নবা পীগনি হায়বা ৱাহং অমা অদোমগী পুক্নিংদা শোইদনা হংলক্কনি। মসি হংফম থোকপা ৱাহংনি।

মরুপশিং,

শেন্মীৎলোন চাউখৎনবগীদমক, লৈবাক অসিগী হিরম খুদিংমক চাউখৎপা তঙাইফদে। চীঞ্জাক্কী থবকশিংদগী হৌরগা ফার্মা ফাওবা, স্পেসতগী স্তার্দঅপ ফাওবা, হিরম খুদিংমক চাউখৎলবা মতমদা, শেন্মীৎলোন চাউখৎলক্কনি। ফার্মা উদোগকী খুদম য়েংসি। লাইচৎ মনুংদা ভারতকী ফার্মা উদোগ  য়াম্না থাগৎনখি। ঙসিগী মসিগী উদোগ অসি লুপা করোর লাখ ৪ হেল্লে। ২০৩০ ফাওবগী মনুংদা, ভারতকী ফার্মা উদোগ অসি চাউরাক্না লুপা করোর লাখ ১০ য়ৌরগনি। হৌজিক ফার্মা উদোগ অসি চাউখৎলে, মসিনা করি হায়রিবনো? মসিনা তাক্লি মদুদি চৎলিবা চহি ১০ অসিদা ফার্মা উদোগনা ঙসি দরকার ওইরিবা অসিগী শরুক কয়া হেন্না নহারোলশিং দরকার ওইগনি হায়রি। অনৌবা থবক কয়া পীগনি।

মরুপশিং,

ঙসি লৈবাক অসিদা ওতোমোবাইল অমসুং ওতোমোবাইলগী মচাকশিং শাবগী উদোক য়াংনা চাউখৎলে। হৌজিক উদোগ অনিমক অসি লুপা করোর লাখ ১২ হেল্লে। মথং চহি খরদা মসি মখা তানা হেনগৎলক্কনি হায়বগী থাজবা থম্লি। ওতোমোবাইল উদোগ অসি মশিং য়াম্লবা নহারোল কয়া দরকার ওই অমসুং অনৌবা মীওই কয়া থবক পীগনি। চীঞ্জাক শেম-শাবগী উদোগকী মরুওইবগী মতাংদা খন্নবা কয়া অদোম তারে। হৌখিবা চহিদা ভারতকী ফুদ প্রোসেসিং মার্কেত অসি চাউরাক্না লুপা করোর লাখ ২৬ ওইখি। মথং চহি ৩.৫দা সেক্তর অসি চাউরাক্না লুপা করোর লাখ ৩৫ রোম ওইগনি। মসি পাকথোক-চাউথোকপা মতমদা নহারোল কয়া দরকার ওইগনি, অনৌবা থবক কয়া পীগনি।

মরুপশিং,

ঙসি ভারত্তা ইনফ্রাস্ত্রকচর য়াংনা চাউখৎলে। হৌখিবা চহি ৯ দা, কেন্দ্র সরকারনা ইনফ্রাস্ত্রকচরগী লুপা করোর লাখ ৩০ হেন্না চাদিং তৌখ্রে। মসিনা লৈবাক শীনবা থুংনা চৎথোক-চৎশিনগী লম্বী-থোং হেনগৎহল্লে অমসুং তুরিজম অমসুং হোস্পিতেলিতি সেক্তরদা অনৌবা খুদোংচাবশিং পীরে। অনৌবা খুদোংচাবশিং হায়বদি অনৌবা অমসুং অহেনবা থবক কয়া ফংহনবা অদুবুনি।

মরুপশিং,

২০৩০ ফাওবদা, ঐখোয়গী শেন্মীৎলোন্দা তুরিজম সেক্তরনা লুপা করোর লাখ ২০ হেন্না মতেং পাংগনি হায়না পানরি। মসিগী উদোগ মথন্থনা মীওই করোর ১৩ দগী করোর ১৪ ফাওবা অনৌবা থবক পীগনি হায়না থাজৈ। মসিগী চাউখৎপা অসিনা ভারতকী মীওই খুদিংমক্কী পুন্সিদা কান্নবা ফংগনি। মসিনা তাকপদি য়াম্লবা থবকশিং ফংগনি হায়বনি। মসিনা শেন্থোক হেনগৎহনগনি অমসুং পুন্সিগী মগুন হেনগৎহনগনি। ঐখোয়না ইমুং অমদা য়েংবা মতমদা, করিগুম্বা ঐখোয় লৌমীশিং ওইরবদি, পোৎথোকশিং হেন্না পুথোক্তুনা, য়ুম অদু নুংঙাইগনি। করিগুম্বা য়ুম অমদা শেন্থোক হেনগৎলবদি, য়ুম অদুগী মীওইশিংগী পুন্সিদা অহোঙবা অমা লাক্কনি। ইমুং অমদা ওইরিবা অসিগুম, মসি চপ মাননা লৈবাক অমদা থোক্কনি। লৈবাক অমগী শেন্থোক হেনগৎলকপা মতমদা, লৈবাক অদুগী শক্তি হেনগৎলকই, মদুদগী লৈবাক অদুগী মীয়ামগী পুন্সি নুঙাইবা হৌরকই।

মরুপশিং,

হৌখিবা চহি ৯ দা ঐখোয়না পায়খৎলিবা থবকশিংনা অনৌবা অহোংবশিং পুরক্লে। হৌখিবা চহিদা ভারতনা রেকোর্দ ওইনা মপান্দা থাদোকখি। মসিনা তাকপদি মালেমগী কৈথেলশিংদা ভারতকী পোৎ-চৈশিং পাম্বা হেনগৎলক্লে হায়বনি। পোৎথোক পুথোকপদা অনৌবা নহারোলশিং শরুক য়াবদগী পোৎথোক হেনগৎলে হায়বা তাকপনি , থবক ফংবসু হেনগৎলে অমসুং মশা মরোমদোম ইমুং-মনুংগী শেন্থোকশু হেনগৎলে। ঙসি ভারত মালেমদা অনিশুবা খ্বাইদগী চাউবা মোবাইল ফোন শাবা লৈবাক ওইরে। লৈবাক অসিদা মোইবাল শীজিন্নবশু লেপ্তনা হেনগৎলক্লি। সরকারগী থবকশিংনা মোবাইল শাবগী থবকশু হেনগৎলে। হৌজিক লৈবাক অসি মোবাইল খক নত্তনা অতোপ্পা ইলেক্ত্রোনিক্স গেজেদশিংদশু মীৎয়েং চঙলে। মোবাইলগী লমদা মাইপাকপ অসিগুম্না ঐখোয় আই.তি হার্দৱায়র পুথোকপদা মাইপাক্লে। ভারত্তা শাবা লেপ্তোপ, তেব্লেত অমসুং পর্সোনেল কম্পুতরশিংনা মালেমদা ঐখোয়গী চাউথোকচবা হেনগৎলক্কদবা মতম অদু ইকুই কুইদ্রে। ভোকেল ফোর লোকেলগী লাইৱা ইন্দুনা, ভারত্তা শাবা লেপ্তোপ, কম্পুতরগুম্বা পোৎথোক কয়া লৈনবা ভারত সরকারনা তকশিল্লি। থবক অসিনা মরম ওইদুনা পোৎথোক পুথোকপা হেনগৎলে অমসুং নহারোলশিংদা অনৌবা থবক কয়া ফংহল্লে। অপুনবা শেন্মীৎলো অমা শেমগৎপদা অদোমগী চাউরবা থৌদাং অমা লৈরি হায়না  ঐনা অমুক হন্না নিংশিংলি।

ঐগী নুংশিরবা ইমুং-মনুংগী মীওইশিং,

ঙসিগী নুমিৎ অসিদা চহি ৯গী মমাঙদা প্রধান মন্ত্রী জন ধন য়োজনা হৌদোকখি। খুঙ্গংশিং অমসুং লায়রবশিংগী শেন-থুমগী ফিবম ফগৎহনবা অমসুং  থবক ফংহনবদা স্কিম অসিনা মরুওইবা থৌদাং অমা লৌখি। চহি ৯গী মমাঙদা, লৈবাক অসিগী মশিং য়াম্লবা মীওইশিং বেঙ্ক একাউন্ত অমা ফাওবা লৈরমদে, লায়রবশিং বেঙ্কগী থোং ফাওবা উরমদে। জন ধন য়োজননা মরম ওইদুনা, হৌখিবা চহি ৯ দা অনৌবা বেঙ্ক একাউন্ত করোর ৫০ হাংদোক্লে। মসিগী স্কিম অসিনা সরকারগী কান্নবশিং খুঙ্গংগী লায়রবশিংদা হকথেংননা য়ৌহনবা খক নত্তনা, মসিনা নুপীশিং, দলিতশিং, শোৎথরবশিং অমসুং ত্রাইবেলশিং থবক ফংবা অমসুং মশানা মশাবু থবক পীজবা হেনগৎহল্লে।  খুঙ্গং খুদিংমক্তা বেঙ্ক একাউন্তশিং হাংদোকপা মতমদা, নহারোল লাখ কয়া বেঙ্কিং করেসপোন্দেন্তশিং ওইনা থবক ফংলে। ঐখোয়গী ইচানুপা অমসুং ইচানুপী লিশিং কয়া বেঙ্ক মিত্র ওইনা থবক ফংলে। হৌজিক খুঙ্গং খুদিংমক্তা,নহারোল লাখ ২১ হেন্না বেঙ্ক মিত্র নত্ত্রগা বেঙ্ক সখি ওইনা থবক তৌরে। মশিং য়াম্লবা দিজিতেল সখিশিংনা নুপীশিং অমসুং অহলশিং বেঙ্কগী খুদোংচাবশিং ফংহল্লে। জন ধন য়োজননা মুদ্রা য়োজনা মপাঙ্গল হাপ্লে। য়োজনা অসিনা কৈদৌঙৈদা লোন ফংগনি হায়বা খল্লমদবা নুপীশিং য়াওনা অপীকপা ললোন-ইতিক পাংথোকপা মীওইশিং লাইনা লোন ফংহল্লে। হায়রিবা মীওইশিং অসি বেঙ্কশিংদা পীনবা গরেন্তি অমতা লৈতে। পি.এম শ্বানিধি স্কিমগী মখাদা,অহানবা ওইনা বেঙ্ক গরেন্তি অমতা য়াওদনা লম্বীগী মতাইদা পোৎ-চৈ য়োনবা মীওই লাখ ৪৩ রোমদা লোনশিং পীরে। মুদ্রা অমসুং শ্বানিধিগী কান্নবা ফংলবশিংগী মনুংদা মশিং য়াম্লবা নুপীশিং, দলিতশিং, তোল্লবশিং অমসুং ত্রাইবেলশিং য়াওরি।

খুঙ্গংশিংদা নুপী সেল্ফ হেল্প গ্রুপশিং  ফগৎহনবদা জন ধন একাউন্তশিংনা য়াম্না চাউনা মতেং পাংলে। ঐনা খুঙ্গংশিংদা চৎপা মতমদা অমসুং নুপী সেল্ফ হেল্প গ্রুপশিংগী ইচলশিং উনবা মতমদা, য়োজনা অসিগী মপান্দগী ঐ লাখপতি ওইরে হায়না মখোয় কয়ানা ঐঙোন্দা হায়খি। হৌজিক সরকারনা পীরিবা শেন্থং নুপী সেল্ফ হেল্প গ্রুপশিংগী বেঙ্ক একাউন্তশিংদা হকথেংননা হাপচিল্লে। লৈবাক অসিদা খুন্নাই অমসুং শেন-থুমগী অহোংবা পুরকপদা জন ধন য়োজননা লৌরিবা থৌদাং অসি তশেংনা ঐখোয়গী অচৌবা য়ুনিভর্সিতিশিংনা থিজিনগদবা হিরম অমা ওইরে।

মরুপশিং,

রোজগার মেলা কয়াদা হৌজিক ফাওবদা ঐনা নহারোল লাখ কয়াদা ৱা ঙাংখ্রে। হায়রিবা নহারোলশিং অদু সরকার নত্ত্রগা অতোপ্পা সেক্তরশিংদা থবক ফংখ্রে। সরকার অমসুং লৈবাক ঙাকপদা অহোংবশিং পুরক্নবা পান্দমদা নহারোলশিং অসি ঐগী থৌনানি। ঙসিগী মীরোলনা ৱাথোকশিং মতম খরগী ওইনা ৱারোইশিন  পুরকপা পামদে, মখোয়না তুংকোইবা ৱারোইনশিন পুরকপা পাম্মী হায়বা অদোম খঙলে। মরম অদুনা, সরকারগী থবক তৌবা মীওই অমা ওইনা, তুংকোইনা মীয়ামগী কান্নবা পুরক্কদবা লম্বী অমদা ৱারেপ লৌনবা অদোম্না থৌদাং লৌগদবনি।

নখোয়গী মীরোল অসিনা করিগুম্বা অফবা থবক খরনা পাংথোক্নবা ৱারেপ লৌগদবনি। মীরোল অসিনা কনাগুম্বা অমগী থৌজাল পামদে, মখোয়গী লম্বীদা কনাগুম্বা অমনা অপনবা পীদবা মীরোল অসিনা পাম্মী। মরম অদুনা, নহাক সরকারগী থবক তৌবা অমা ওইনা, সরকার লৈরিবা অসি মীয়ামগী থবক তৌনবা অমসুং মীয়ামগী অনিংবশিং থুংহন্নবা লৈবনি হায়বা অদোম খঙগদবনি। করিগুম্বা অদোম্না মসি খঙলবদি, লো অমসুং ওর্দর ঙাকপদা নহাক্না চাউনা মতেং পাংগনি।

মরুপশিং,

পেরামিলিতরি ফোর্সশিংদা অদোমগী মরুওইবা থৌদাংশিং পাংথোকপা মতমদা, অদোম্না মখা তানা হৈনিংবা অমসুং তম্নিংবগী ৱাখল্লোনশু চেনগদবনি। অদোমগুম্বা মীওইশিংগীদমক আইগোত কর্মায়োগী পোর্তেলদা মখল কয়াগী কোর্স ৬০০ হেন্না ফংলে। সর্তিফিকেদ কোর্সশিং য়াওরে। পোর্তেল অসিদা সরকারগী থবক তৌবা মীওই লাখ ২০ হেন্না রেজিস্তার তৌরে। মখোয় ওনলাইন্দা তম্লি অমসুং পরিক্ষাশিং থারি।

ঙসিদগী পোর্তেল অসিদা শরুক য়ানবা ঐনা অদোমগী মফমদা হায়জরি। ঐগী ঙমজবীদা থবক তৌগদবনি, সর্তফিকেদ কোর্সশিং য়াম্না য়াওগদবনি, সর্তিফিকেদ য়াম্না পায়খগদবনি। নহাক্না তম্লিবা অসি পরিক্ষা খক্তগী নত্তে। নহাক্কী পুন্সিদা নথৌ ফজনা পাংথোকউ। মসি অচৌবা খুদোংচাবা অমা ফংনবা খুদোংচাবনি।

মরুপশিং,

নহাক্কী থবক অসি য়ুনিফোর্মগী থবক্নি। অদোমনা নোংজু-নুংশাগী অৱাবা কয়া থেংনগনি। অদোমগী বিভাগ অসিদা থবক তৌরিবশিং অসি হকচাং ফবা য়াম্না মরুওই। থবক তঙ্খায় অমদি হকচাংনা পাংথোকপনি। নহাক্না চুম্না লেপ্লবদি, লো অমসুং ওর্দর ঙাক্নবা তৌগদবা থবক অমতা লৈতে, লেপ্পা খক্তনা মতিক চারবনি।

অনিশুবদা, অদোম্না থবক তৌরকপা মতমদা, শাউনিংবা অমসুং লাংতক্নবা মতম কয়া লাক্কনি হায়বগী ঐগী ৱাখল্লোন্নি। নহাক্কী পুন্সিদা নুমিৎ খুদিংগী য়োগ শানগদবনি। পুক্নিং-ৱাখল ফনা থম্বনা নহাক্কী থবক্তা পাঙ্গল হাপকনি। য়োগ অসি শুপ্নগী হকচাং শাজেল অমা নত্তে, মসি পুক্নিং-ৱাখল ফনা থম্নবা পুন্সিগী শরুক অমনি। অদোমগুম্বা মীওই থবক তৌবদা লাংতক্নবা ফহনগনি।

মরুপশিং,

২০৪৭দা লৈবাক অসিনা নিংতম্বা চহি ১০০শুবা থৌরম পাংথোকপা মতমদা, অদোম সরকারগী অৱাংবা ফম অমা পায়রগনি। লৈবাক্কী চহি ২৫গী মতম অমসুং নহাক্কী চহি ২৫গী মতম অসি অদোমগী পুন্সিদা অঙকপা অমা ওইগনি, মসিগী খুদোংচাবা অসি নহাক্না মাঙহল্লোইদবনি। মীচম মীয়ামগী য়াইফনবা নহাক্কী মতম হেন্না কাইথোক্লিবমখৈ, নহাক্কী পুন্সিদা অপেনবা অমসুং হরাওবা ফংগনি। নহাক্কী লনাই পুন্সিদা মাইপাকপা অসিনা নহাক্কী অপেনবা ওইগনি।

অদোমগী ইমুং-মনুংগী মীওইশিং অমসুং অদোমগী মফমদা ঐগী য়াইফ-পাউজেল পীজরি। অদোম অমুক হন্না থাগৎচরি।

****