ঙসি উত্তর প্রদেসকী বরানাসীদা জি-২০ কলচর মিনিস্তরশিংগী মীফমদা ভিদিও লিঙ্কগী খুৎথাংদা প্রধান মন্ত্রী শ্রী নরেন্দ্র মোদীনা ৱা ঙাংখ্রে।

কাসি হায়না খঙনবা বরানাসীদা শক্নাইরবশিং প্রধান মন্ত্রীনা তরাম্না ওকখি অমসুং মহাক্কী পর্লিয়ামেন্তরি কেন্দ্র ওইরিবা সহর অসিদা জি-২০গী কলচর মিনিস্তরশিংগী মীফম পাংথোকপদা অপেনবা ফোঙদোকখি।  কাসি খ্বাইদগী লিরবা সহরশিংগী মনুংদা অমনি হায়না ফোঙদোক্লদুনা প্রধান মন্ত্রীনা হায়খি সরনাথ সহরগী ময়াদা ভাগবন বুদ্ধনা মহাক্কী অহানবা পাউজেল শন্দোকপা হৌখি। কাসি অসি লৌশিং, মথৌ পাংথোকপা অমসুং অচুম্বগী পুক্কৈ অমা ওইনা খঙনরে অমসুং সহর অসি তশেংনবা ভারতকী নাৎ অমসুং স্পিরিচুএলগী কোনুংনি। শক্নাইরবশিংনা গঙ্গা আর্তি থৌরম য়েংনবা, সরনাথ য়েংনবা অমসুং কাসিগী মথেলশিং মহাও য়েংনবা মহাক্না তকশিনখি।

প্রধান মন্ত্রীনা হায়খি নাৎনা ঐখোয় অমতা ওইনা পুনশিন্নবগী শক্তি লৈরি অমসুং তোঙান-তোঙানবা ফিবমশিং অমসুং মীৎয়েংশিং ঐখোয়না খঙবা ঙমহল্লি। জি-২০ কলচর মিনিস্তরশিংগী মীফম্না পাংথোকপা থবকশিংনা অপুনবা মীওইবা খুন্নাই কান্নবা য়াম্না পীগনি। ঐখোয়গী লোইবা নাইদবা অমসুং মখল কয়াগী নাৎকীদমক ঐখোয় ভারতমচাশিংনা চাউথোকচরি। ঐখোয়গী মমল য়াম্লবা নাৎকী পুক্কৈ ঐখোয়না মগুন লৈনা লৌরি। লৈবাক অসিগী নাৎ অমসুং চৎনবীশিংগা মরী লৈনবা মফমশিং ঙাক-শেন্নবা অমসুং অমুক হন্না শেমগৎনবা ভারতনা থবক পায়খৎলি। জাতিগী থাক্তা অমসুং খুঙ্গংগী থাক্তা লৈবাক অসিগী নাৎকী লনশিং অমসুং কলাকারশিং মেপ্প লৌবগী থবক পায়খৎলে।

মহাক্না হায়খি ভারতকী নাৎ উৎনবা সেন্তর কয়া শেমগৎলে অমসুং ভারতকী ত্রাইবেলশিং ফজরবা নাৎশিং উৎনবা লৈবাক্কী তোঙান-তোঙানবা মফমশিংদা ত্রাইবেল মিউজমশিং শেমগৎলে। ভারতকী গনতন্ত্রগী শক্তমশিং উৎনবা মখল অমা ওইনা প্রাইম মিনিস্তরস মিউজম নিউ দিল্লিদা লিংখৎলে। ‘য়ুগে য়ুগীন ভারত’ নেসনেল মিউজম শেমগৎলি, মসি লোইশিল্লকপদা মালেমদা খ্বাইদগী চাউবা মিউজম ওইদুনা চহি ৫০০০ হেনবগী ভারতকী পুৱারি অমসুং নাৎ উৎকনি।

প্রধান মন্ত্রীগী মপুংফাবা ৱারোলগীদমক মফম অসিদা নম্বীয়ু

মহাক্কী হৌদোকপগী ৱারোলদা জি-২০ লৈবাকশিংগী মিনিস্তরশিং, চেবাউ পীদুনা শরুক য়ারিবা লৈবাকশিং অমসুং মালেমগী লুপশিংগী মীহুৎশিং মালেমদা লেপ্তনা মীওইবনা হিংলক্লিবা খ্বাইদগী লিরবা সহরশিংগী মনুংদা অমা ওইরিবা বরানাসীদা তরাম্না ওক্লদুনা শ্রী জি.কে কিসন রেদ্দিনা হায়খি বরানাসী অসি ভারতকী ইনাকখুল্লবা নাৎকী পুক্কৈগী খুদম অমনি।

মহাক্না হায়খি প্রধান মন্ত্রী শ্রী নরেন্দ্র মোদীনা পর্লিয়ামেন্তদা বরানাসী কেন্দ্রদগী কারকপা অসি চাউথোকচনিংঙাই ওইবা অমনি। গঙ্গা মপান্দা লৈরিবা সহর অমা ওইনা, বরানাসী অসি নাৎ, কলা অমসুং চৎনবীশিংগী পুনফম্নি অমসুং মফম অসিদা জি-২০ কলচর মিনিস্তরশিংগী মীফম পাংথোক্লি।

জি.কে রেদ্দিনা হায়খি নাৎকী পুক্কৈ অসি হৌখ্রবা মতমগী য়ুম্বী অমনি অমসুং তুংগী লম্বী অমনি। জি-২০গী কলচর ৱার্কিং গ্রুপকী মখাদা খন্ন-নৈনবা অসি খুদিংমক কোনশিনবা অমসুং মতেং পীনবগী থবক অমনি। মালেমগী ওইবা থৌশিলশিং শেম্বদা কলচরনা মরুওইবা মফম লৌদুনা থবক ওইনা পাংথোকপা য়াগদবা মরুওইবা হিরম মরিদা ঐখোয়না খন্নখ্রে। জি-২০ লৈবাকশিংদগী পীরকপা ৱাখল্লোনশিং, পাউতাকশিংনা ঐখোয়গী ৱারি শানবা অসি হেন্না ফগৎহল্লে।

শ্রী জি.কে রেদ্দিনা হায়খি ভারতনা প্রদিদেন্ত ওইরিবা অসিগী মখাদা অমসুং প্রধান মন্ত্রী মোদীগী লমজিং মখাদা ঐখোয়গী অপুনবা পান্দমগী মখাদা ঐখোয়না থবক পায়খৎনবা খন্নরে। থা ৮ চুপ্না পাংথোকরকপা কলচর ৱার্কিং গ্রুপকী মীফম ৪দা, রোম অমসুং বালি দিক্লারেসনশিং থবক ওইনা পাংথোক্নবা মাইকৈদা থাংজিনবা খোঙথাং অমদা, ঐখোয়না মপাঙ্গল কনবা দোকুমেন্ত অমা পুথোকপা ঙম্লে।

মহাক্না হায়খি মীফম অসিদা খন্নখিবা ৱাফমশিং অমতা ওইনা য়ানরে। নাৎনা অমতা ওইনা পুনশিল্লি হায়বা মীফম অসিনা তাক্লে। মসিগী মাইপাকপা অসি কাসি কলচরেল পাথৱে হায়না মমিং থোন্নবা ঐনা অদোমগী মফমদা হায়জরি। নাৎকী ওইবা পোৎলমশিং অমুক হন্না শেমগৎপা হায়বসি খুন্নাইগী অচুম্বা পুরক্নবা থবক অমনি অমসুং মসিগী থবক অসিগীদমক ফিবমশিং শেমগৎনবা ৱারি শানবা অমা পাংথোক্নবা জি-২০ মেম্বরশিংদা ঐখোয়না থাজবা থম্লি।

ভারতনা জি-২০গী প্রসিদেন্ত ওইরিবা অসিগী মখাদা,  ‘জি-২০ কলচর: সেপ্পিং দি গ্লোবেল নেরেতিপ ফোর ইনক্লুসিপ গ্রোথ’ কৌবা রিপোর্ত অমা জি-২০ কলচর ৱার্কিং গ্রুপনা ফোঙলে। ভারতনা প্রসিদেন্ত ওইদুনা পাংথোকখিবা গ্লোবেল থিমেতিক ৱেবিনারশিংদগী ফংলকপা ৱাখল্লোনশিং অমসুং খ্বাইদগী ফবা থবকশিংগী মতাং য়াওরি।

পাংথোকখিবা ৱেবিনারশিং অদুদা তোঙান-তোঙানবা কলচরগী অখঙ-অহৈ ১৫৯ শরুক য়াখি। মালেমগী ওইবা থৌশিল শেম্বদা নাৎকী থৌদাংগী মতাংদা খন্ন-নৈনখি। জি-২০ লৈবাকশিংগী মীহুৎশিং, অখঙ-অহৈশিং, চেবাউ পীবদগী শরুক য়াখিবা লৈবাকশিং, মালেমগী লুপশিং অমসুং অতোপ্পা মরী লৈনবশিংনা হিরমশিংদা খন্নখি অমসুং রিপোর্ত পুথোকখি।

ভারতনা জি-২০গী প্রসিদেন্ত ওইরিবা অসিগী কলচর ৱার্কিং প্রুপকী মখাদা ‘নাৎনা খুদিংমক পুনশিল্লি’ হায়বা কেম্পেনগী খোঙচৎ হরাওবা ফোঙদোকপা ওইনা অখন্নবা পোস্তেচ স্তাম্প অমা ফোঙখি।

****