প্রধান মন্ত্রী, শ্রী নরেন্দ্র মোদীনা রাজস্থানগী জয়পুরদা পাংথোকপা G20 ত্রেদ অমসুং ইনভেস্তমেন্তকী মন্ত্রীশিংগী মীফমদা ঙসি ভিদিও লিঙ্ককী খুত্থাংদা ৱা ঙাঙখ্রে।

প্রধান মন্ত্রীনা ঙসি তিনখিবা মীয়াম পুম্নমকপু জয়পুরগী লৈ মচুগী শহরদা তরাম্না ওক্লদুনা লমদম অসিদি মসিগী মতিক-মগুন লৈবা অমসুং কারবারগী ৱাখল্লোন চেনবা মীয়ামগীদমক্তা মমিং চৎলি হায়না ফোংদোকখি। ত্রেদনা পুৱারী পুম্বদা ৱাখল্লোন, চৎনবী অমসুং তেক্নোলোজী লান্নবগী থৌওং পাংথোকহনবগা লোয়ননা মীয়াম্বুসু নকশিন্ননা পুরক্তুনা লাক্লি। “ত্রেদ অমসুং গ্লোবেলাইজেসন্না মীওই মিলিয়ন কয়াবুসু খম থেংনা লাইরবগী খয়াত্তগী চীংথোকখ্রবনি”, শ্রী মোদীনা মখা তাখি।

ভারতকী শেন্মিৎলোন্দা মালেম্না থাজবা থম্লিবা অসিদা মিৎয়েং চঙলদুনা, প্রধান মন্ত্রীনা ভারত অসি ৱাখল চাউথোকপা, খুদোংচাবা অমসুং অপাম্বা খনবা য়াবা হীরম কয়াগী অপুনবা শক্তম অমা ওইনা উরি হায়না পাউদমখি। ঐখোয়গী লেপ্তবা হোৎনজমন্না মরম ওইরগা ভারতনা মমাংগী চহি মাপ্নসিদা মালেমগী খ্বাইদগী মঙাশুবা চাউবা শেন্মিৎলোন ওইবা ঙমখি হায়না প্রধান মন্ত্রীনা হায়খি। “ঐখোয়না ইং 2014দা ‘রিফোর্ম, পরফোর্ম অমসুং ত্রান্সফোর্ম’গী লম্বীদা খোঙদাখি”, প্রধান মন্ত্রীনা হায়রদুনা খুদম কয়া পীখি অমসুং চাংয়েংনবগী থৌওং, নুং-পান ফাওনা উবা, দিজিতাইজেসনগী থবক-থৌরম হেনগৎলক্লিবা অমসুং ইন্নোভেসনবু পুক্নিং থৌগৎপগী ৱাফমসু পনখি। ভারতনা অখন্নবা পান্দমগা লোয়নবা ফ্রৈত কোরিদোর অমসুং ইন্দস্ত্রীএল জোন কয়া শেমখ্রে হায়না প্রধান মন্ত্রীনা মখা তাখি। “ভারতনা রেদ তেপ্তগী লাপথোক্তুনা রেদ কার্পেতকী মাইকৈদা খোঙদারে অমসুং FDI ইনফ্লোবু কাঙলোন চুমহল্লে”, শ্রী মোদীনা হায়খ্রে। মহাক্না মেন্যুফেকচরিংবু খুমাং চাউশিলহনখিবা মেক ইন ইন্দিয়া অমসুং আত্মানির্ভর ভারতকী খোঙথাংগী মতাংদা পনবগা লোয়ননা লৈবাক অসিদা পোলিসীগী স্তেবিলিতী লৈরিবা অসিদসু মীয়ামগী পুক্নিং চীংশিনখি। প্রধান মন্ত্রীনা মখোয়গী সরকারনা মথংগী চহি খরগী মনুংদা ভারতপু মালেমগী খ্বাইদগী অহুমশুবা চাউবা শেন্মিৎলোন ওইহন্নবা খোঙফম চেৎলি হায়না পাউদমখি।

প্রধান মন্ত্রীনা মালেম্না হৌজিক মাইয়োক্নরিবা শিংনবা কয়াদা মিৎয়েং চঙলদুনা মসিনা মালেমগী শেন্মিৎলোনগী চাংয়েং লৌরি অমসুং ঐখোয়না G20গী লৈবাক অমা ওইনা মালেমগী ত্রেদ অমসুং ইনভেস্তমেন্ততা অমুক্কা হন্না থাজবা পুরকপা হায়বসিগী থৌদাং লৌগদবনি হায়খ্রে। তুংগী মতমগী শিংনবা কয়াগা মাইয়োক্নবা ঙমগদবা নীংহন্নবা লৈতবা অমসুং ইনক্লুসিব ওইবা মালেমগী ভেল্যু চেন অমা শেমগৎপগী তঙাই ফদবা লৈ হায়না মহাক্না হায়খি। হীরম অসিগা মরী লৈননা, খুদোংচাদবা য়েংশিন্নবা, রিস্ক হন্থহন্নবা অমসুং নীংহন্নবা লৈতবগী মতৌ হেনগৎহন্নবা গ্লোবেল ভেল্যু চেন মেপ্পিং তৌনবা জেনেরিক ওইবা ফ্রেমৱর্ক অমা শেম্বগী ৱাহৌদোক অমা ভারতনা থমখিবা অদুগী মরু ওইবদা প্রধান মন্ত্রীনা মীয়ামগী পুক্নিং চীংশিনখি।

“ত্রেদতা অওনবা অমা পুরক্নবা তেক্নোলোজীদা লৈরিবা পাঙ্গল অসিদি লাইথোকপা য়ারোই”, প্রধান মন্ত্রীনা হায়খি অমসুং ইন্তর-স্তেত ত্রেদপু খুমাং চাউশিলন্নবা সিঙ্গল ইন্তর্নেল মার্কেত অমা শেম্বদা তেংবাংখিবা ওনলাইন সিঙ্গল ইন্দাইরেক্ত তেক্স, GSTবু ভারতনা শিজিন্নবা হৌখিবগী খুদম পীখি। ত্রেদ লোজিস্তিক্সপু হেন্না হোঙহনখিবা অমসুং নুং-পান ফাওনা উবা হেনলহনখিবা ভারতকী য়ুনিফাইদ লোজিস্তিক্স ইন্তর-ফেস প্লেতফোর্মগী মতাংদসু মহাক্না পনখি। মহাক্না ‘ওপন নেতৱর্ক ফোর দিজিতেল কম্মর্স’কী মতাংদসু মহাক্না পনখি অমসুং মসিবু দিজিতেল মার্কেতপ্লেস ইকোসীস্তেম্বু দেমোক্রেতাইজ তৌগদবা গেম চেঞ্জর অমনি হায়না পাউদমখি। “ঐখোয়গী শেল থীবগী পথাপকী য়ুনিফাইদ পেমেন্ত ইন্তর্ফেস্কী খুত্থাংদা ঐখোয়না মসিমক পাংথোকখ্রে”, মহাক্না মখা তাখি। দিজিতাইজেসন তৌবা অমসুং ই-কম্মর্স শিজিন্নবগী থৌওংশিংদা মার্কেত এক্সেস হেন্না ফগৎহনবা ঙম্বগী মতিক লৈ হায়না প্রধান মন্ত্রীনা হায়খি। গ্রুপ অসিনা ‘ত্রেদ দোক্যুমেন্তশিংবু দিজিতেলদা ওন্থোকপগী হাই লেভেল প্রিন্সিপল’গী মতাংদা থবক তৌরিবা অসিদা মহাক্না নুংঙাইবা ফোংদোকখি। প্রধান মন্ত্রীনা মখা তাবদা, হায়রিবা প্রিন্সিপলশিং অসিনা লৈবাকশিংদা ক্রোস-বোর্দর ইলেক্ত্রোনিক ত্রেদকী থবক পায়খৎপা অমসুং কম্পাইএন্সকী পোৎলুম হন্থহনবদা তেংবাংবা ঙমগনি। ক্রো বোর্দর ই-কম্মর্সকী শাহৌ লৌবদা তেংনবা শিংনবশিংদা মিৎয়েং চঙলদুনা, প্রধান মন্ত্রীনা ঐখোয়না পুন্না হোৎনমিন্নদুনা পোৎ য়োনবা অপীকপা অমসুং অচৌবা কাঙলুপশিংগী মরক্তা চাং মান্ননা চাংয়েংনবগী ফিভম অমা শেমগৎসি হায়বা ৱাফম থমখি। ফেয়র প্রাইস দিস্কবরী অমসুং গ্রাইভেন্স হেন্দলিং মেকানিজমগা মরী লৈনবা শিংনবা কয়া কঞ্জ্যুমরশিংনা থেংনরিবা অসিগী ৱারোইশিন পুরকপগী তঙাই ফদবা লৈরিবা অসিদসু মহাক্না মিৎয়েং চঙখি।

ভারতনা WTOনা ময়োলদা লৈবা কাঙলোন্দা য়ুম্ফম ওইবা, ওপন, ইনক্লুসিব ওইবা অমসুং মলতিলেতরেল ত্রেদিং সীস্তেমদা থাজবা থম্মি হায়না প্রধান মন্ত্রীনা হায়খি। ভারতনা গ্লোবেল সাউথকী অপাম্বশিংবু 12শুবা WTO মিনিস্তরিএল কনফরেন্সতা পুথোকখি অমসুং মসিদা মেম্বরশিংনা লৌমী অমসুং অপীকপা কারবার তৌবা মিলিয়ন কয়াগী অপাম্বা ঙাকপগী হীরমদা য়ানবা পুরকপা ঙমখি হায়না প্রধান মন্ত্রীনা পাউদমখি। MSMEশিংনা মালেমগী শেন্মিৎলোন্দা লৌরিবা মরু ওইবা থৌদাং খঙদুনা মসিদা অহেনবা মিৎয়েং চঙফম থোকই হায়না মহাক্না হায়খি। “MSMEশিংনা ইমপ্লোয়মেন্তকী হীরমদা চাদা 60-70গী শরুক তম্লি অমসুং মালেমগী GDPদা চাদা 50গী শরুক তম্লি”, প্রধান মন্ত্রীনা হায়খিবগা লোয়ননা মখোয়গী পাঙ্গল হাপ্পনা খুন্নাইগী পাঙ্গল হাপ্পগা মান্নবা ওইবনা ঐখোয়না মখোয়বু লেপ্পা লৈতনা তেংবাংগদবনি হায়নসু ফোংদোকখি। “ঐখোয়গী ওইনদি, MSMEনা মেক্সিমম সপ্পোর্ত তু মাইক্রো, স্মোল অমসুং মীদিয়ম ইন্তর্প্রাইস হায়বনি”, প্রধান মন্ত্রীনা হায়খি। ভারতনা MSMEবু ওনলাইন প্লেতফোর্ম অমা ওইরিবা গবর্নমেন্ত ই-মার্কেতপ্লেসকী খুত্থাংদা পব্লিক প্রোক্যুরমেন্তকী মনুং চলহনখ্রে অমসুং অকোয়বগী ফিভমদা ‘জিরো দিফেক্ত’ অমসুং ‘জিরো ইফেক্ত’কী ইথোস লৈহন্নবগীদমক্তা MSME সেক্তরগা থবক তৌমিন্নরি হায়না মহাক্না হায়খি। মখোয়না মালেমগী ত্রেদতা শরুক য়াবগী চাং হেনগৎলক্লিবা অসিদা মহাক্না মিৎয়েং চঙবগা লোয়ননা গ্লোবেল ভেল্যু চেন হায়বসিনা ইন্দিয়ন প্রসিদেন্সীগী খ্বাইদগী মকোক্তা লৈবা প্রাইওরিতীনি হায়না পাউদমখি। ‘MSMEশিংদা ই-পাউ য়ৌহনবগী থৌওংবু মওং-মরিল চুমহনবগী জয়পুরগী খোঙথাং’ অমগী ৱাহৌদোক থম্লিবা অসিগী মতাংদা প্রধান মন্ত্রীনা ৱা ঙাঙবদা মসিনা MSMEনা মার্কেতকী এক্সেস মতিক চানা ফংদবা অমসুং কারবারগী মরী লৈনবা ই-পাউ মরাং কায়না ফংদবগী শিংনবা মাইয়োক্নরিবা অসিগী ৱারোইশিন পুরক্লগনি হায়না ফোংদোকখি। গ্লোবেল ত্রেদ হেল্প দেস্ক অপগ্রেদ তৌবনা MSMEশিংনা গ্লোবেল ত্রেদতা শরুক য়াবগী চাং হেনগৎহনগনি হায়বগী থাজবা লৈরে হায়না প্রধান মন্ত্রীনা পাউদমখি।

প্রধান মন্ত্রীনা মহাক্কী ৱারোল লোইশিনবা ওইনা, মালেমগী ত্রেদ অমসুং ইনভেস্তমেন্ততা অমুক্কা হন্না থাজবা পুরকহন্নবগীদমক্তা G20 মেম্বরশিংনা ইমুং অমা ওইনা পুন্না থৌদাং লৌমিন্নগদবনি হায়না প্রধান মন্ত্রীনা হায়খি। ৱর্কিং গ্রুপ অসিনা তুংলমচৎকী মাইকৈদা পুন্না খোঙদামিন্নগনি অমসুং গ্লোবেল ত্রেদিং সীস্তেম্না রিপ্রজেন্তেতিব অমসুং ইনক্লুসিব হেন্না ওইবা তুংগী মতম অমদা ত্রাঞ্জিসন তৌগনি হায়বগী থাজবা লৈ হায়না মহাক্না ফোংদোকখি।

Sharing my remarks at the G20 Trade and Investment Ministers Meeting. @g20org https://t.co/Y6Mub2ms4G

— Narendra Modi (@narendramodi) August 24, 2023

***