Ka jingbteng ia ka North East Special Infrastructure Development Scheme (NESIDS) da ka jingmang tyngka ba la mynjur kaba T. 8139.50 klur na ka bynta ka samoi naduh u 2022-23 haduh 2025-26 kadei kaba la ai jingmynjur da ka kynhun Myntri, bad kane ka dei kaba don ar bynta kiba long ka NESIDS-Road bad NESIDS-Other Than Road Infrastructure (OTRI). Kane ka dei ka skhim ba bei tyngka pura da ka Sorkar Pdeng. Ki rai jong ka Sorkar kiba kynthup ia ka jingpyniasoh jong ka North East Road Sector Development Scheme (NERSDS) kaba mynshuwa sha ka NESIDS-Road component bad kiwei kiwei ka la wanrah ia ka jingdonkam ia ki kyndon treikam ba thymmai ban pyniaid bad pyntreikam ia ka NESIDS kaba la pynkylla ha ka samoi kaba dang sah jong ka 15th Finance Commission. Kumta ki kyndon treikam ba thymmai ban pyniaid bad pyntreikam ia baroh ar tylli ki bynta ka NESIDS ki dei kiba la pyllait mynta hadien ka jingiamir jingmut bad kito kiba don bynta ha kane ka kam bad ki jingiakren kiba bniah. Ka thong jong ka NESIDS ka dei ban ai jingkyrshan ia ka jingkyntiew ia ki jingdon jingem ha ki kam bapher bapher ba kynthup ruh ia ki lad ka leit ka wan ha ki jylla ka thain shatei lammihngi.

Ka Kynhun Myntri jong ka Sorkar Pdeng ka la ai mynjur ruh ban bteng ia ki ‘Skhim jong ka NEC’ na ka bynta ka samoi naduh 2022-23 haduh 2025-26 da ka jingmang tyngka kaba T. 3202.7 klur. Hadien ka jingiaphylliew jingmut kaba sani bha, la pyllait ruh ia ki kyndon treikam ba thymmai na ka bynta ki “Skhim jong ka NEC”.

Ki jingthmu jong kitei ki skhim ba la kdew haneng jong ka MDoNER kilong ban kyntiew ia ki sienjam jong ki Tnat sorkar pdeng bad ki Tnat ha kawei ka liang bad ka jingsngew ia ki jingdonkam jong ki jylla ka thain shatei lammihngi ha kawei pat ka liang, na ka bynta ki kam ba iadei bad ka bha ka miat. Ki skhim jong ka MDoNER ki iarap ban pyndap ia ki jaka ba suda ban kyrshan ia phra tylli ki jylla ka thain shatei lammihngi katkum ki jingdonkam jong ki, da kaba sdang ia ki projek, nuksa na ka bynta ka jingkyntiew ia ki jingdon jingem ban pynsuk ia ka leit ka wan bad ki jingduna ha ka imlang sahlang bad kyntiew ia ki lad kamai kajih bad ki lad ioh kam ioh jam ha ka thain.

Kine ki kyndon ba dang shu pyllait ha ryngkat bad ki sienjam jong ka tnat bad ruh ka jingkyrshan na ki jylla ka thain shatei lammihngi kin plie lad ia ka jingurlong ki thong ha ka rukom kaba shai bad kaba iaid stet.

******