ماہی گیری، مویشی پروری اور ڈیری کے مرکزی وزیر جناب پرشوتم روپالا کی قیادت میں ماہی گیری، مویشی پروری اور ڈیری کے وزیر مملکت ڈاکٹر ایل مورگن سمیت ایک اعلیٰ سطحی وفد 21 اگست سے 24 اگست 2023 تک ناروے کا دورہ کرے گا۔ وفد میں جوائنٹ سکریٹری (میرین فشریز) اور محکمہ ماہی گیری کے دیگر سینیئر افسران بھی شامل ہوں گے۔

اس دورے کا بنیادی مقصد ماہی گیری اور آبی زراعت کے شعبے میں ہندوستان اور ناروے کے درمیان دو طرفہ تعاون کو مضبوط بنانا ہے، جیسا کہ مارچ 2010 میں دونوں ممالک کے درمیان مفاہمت کی یادداشت پر دستخط کیے گئے تھے۔

وفد ناروے کے ماہی پروری اور سمندری پالیسی کے وزیر جناب جورنار سیلنیس، محترمہ کرسٹینا سگورسدوتیر ہینسین اور ریاستی سکریٹری، وزارت تجارت، صنعت اور ماہی پروری، ناروے کے دیگر اہم حکام کے ساتھ ماہی گیری کی ترقی، وسائل کے انتظام، تحقیق، جدت اور تجارت کے مختلف پہلوؤں پر دو طرفہ بات چیت کرے گا۔

یہ وفد ایکوا نور 2023 میں بھی شرکت کرے گا، جو 22 سے 24 اگست 2023 تک ناروے کے تھرونہائم میں ہونے والی دو سالہ آبی زراعت کی نمائش اور تجارتی میلہ ہے، جو کہ آبی زراعت کی ٹیکنالوجی اور اختراع کے لیے دنیا کے سب سے بڑے تجارتی شو میں سے ایک ہے۔ یہ نمائش پائیدار اور منافع بخش آبی زراعت کے لیے تازہ ترین پیش رفت اور حل پیش کرے گی۔ وفد ناروے کے مختلف اداروں کے ساتھ بات چیت کرے گا جو ماہی پروری اور آبی زراعت کے مختلف پہلوؤں میں مہارت رکھتے ہیں، جیسے کہ مچھلی کی صحت، خوراک، جینیات، آلات، پروسیسنگ اور مارکیٹنگ وغیرہ۔

وفد ناروے میں ماہی گیری اور آبی زراعت سے متعلق کچھ جدید ترین سہولیات جیسے ماہی گیری کے جہاز، ماہی گیری بندرگاہوں، کیج فارموں اور سمندری خوراک کی پروسیسنگ یونٹ کا بھی دورہ کرے گا۔ وفد ناروے کے تجربے سے سیکھے گا اور ان شعبوں میں تعاون اور سرمایہ کاری کے امکانات تلاش کرے گا۔

یہ وفد ناروے میں مقیم ہندوستانی باشندوں کے ساتھ بھی بات چیت کرے گا اور انہیں ماہی گیری کے شعبے میں حکومت ہند کے اقدامات اور کامیابیوں سے آگاہ کرے گا اور ان کی تجاویز اور آرا طلب کرے گا۔

اس دورے سے ماہی گیری کے شعبے میں ہندوستان اور ناروے کے درمیان باہمی مفاہمت اور دو طرفہ تعاون کو بڑھانے اور مستقبل میں شراکت داری کے ذریعے خاطر خواہ ترقی کی راہ ہموار کرنے کی امید ہے۔

************

ش ح۔ ف ش ع- م ف

U: 8595