ভারতকী উপ-রাস্ত্রপতি অমসুং রাজ্য সভাগী চেয়রমেন, শ্রী জগদীপ ধংখরবা পুৱারী ওইরবা ‘ভারত থাদোকউ ইহৌ’গী 81শুবা কুমওন লাকপদা ঐখোয়গী নিংতম লান্মীশিংগী মফমদা ঙসি ইকায় খুম্নবা উৎখ্রে। মহাক্না অপ্পর হাউস্তা থমখিবা ৱারোলদা লৈবাক্কী নিংতম্বা, অপুনবা শক্তম ঙাক্নবা ঐখোয়গী ৱাশক অমুক চেৎহল্লসি অমসুং ভারতকী সেবাগীদমক্তা ইশাবু অমুক্কা হন্না কত্থোক্লসি হায়না ফোংদোকখি।

থৌরম অসিদি ঐখোয়গী পার্লিয়ামেন্তকী মেম্বরশিংনা মশাগী থৌদাং অমুক্কা হন্না নীংশিংবগী তাঞ্জানি হায়রদুনা, মহাক্না লৈবাক সেবাগীদমক্তা ইশাবু থৱাই য়াওনা অমুক্কা হন্না কত্থোক্লসি, মীয়ামগী অপাম্বা ফংহন্নবা হোৎনরসি অমসুং লৈবাক ময়াম মরক্তা ভারতকী ইকায়খুম্ননীংঙাই ওইবা মফম অমা কল্লসি হায়না ফোংদোকখি।

হীরম অমগীদমক্তা খোঙফম চেৎনা অমসুং কত্থোকপগা লোয়ননা পুন্না হোৎনবা মতমদা, মদুমক ফংবা ঙম্বগী মীয়ামগী মতিক্কী খুদম অমা ইহৌ অসিনা ওইবনা, ‘ভারত থাদোকউ’ হায়বা খোল্লাওনা ঙসিগী অমৃত কাল অসিদা হেন্না চুনবা থৌওং অমা ওইরি হায়না মহাক্না মিৎয়েং চঙখি।  

মহাত্মা গান্ধীগী ‘পাংথোক্লসি নত্ত্রগা শিরসি’ হায়বা খোল্লাওবু নীংশিংলদুনা, শ্রী ধংখরনা অসুম্না হায়খি, “মসিনা মীয়ামদা অনৌবা পাঙ্গল অমা হাপখি, অমসুং মদুদগী মীয়াম্না লোইলম লৈঙাক্কী মাইয়োক্তগী নিংতম্বা ফংবা ঙমখিবনি”।

রাজ্য সভাগী চেয়রমেন্না মহাক্কী ৱারোলদা, লাইরবা মুত্থৎনবা, ইবা পাবা হেনগৎহন্নবা, হন্থনা য়েংবগী থৌওং মুত্থৎনবা, অমসুং সোসিএল ইনক্লুজিবিতী লৈহন্নবা নিংতম্বা ফংলবা মতুংদা পাংথোকখিবা থবকশিংবু শকখঙখি। ঐখোয়না ইং 2047দা নিংতম্বা ফংবগী চাম্মা শুবা চহিগীদমক্তা নুংঙাইবা ফোংদোক্নবগীদমক্তা চঙশিল্লিবা অসিদা লৈবাক অসিনা হীরমশিং অসিদা ফংলিবা মায় পাকপশিংদা লৈবাক্না চাউথোকচবা ফাওই হায়না মহাক্না ফোংদোকখি। 

রাজ্য সভাগী মেম্বর খুদিংমক্না নিংতম্বগীদমক্তা মথ্বাই কত্থোকখ্রবা অথৌবশিংবু ইকায় খুম্নবা উৎপা ওইনা হাউস্তা তুমিন্না ঙৈহাক লেপখি।

মখাগী অসিদি চেয়রমেনগী মপুং ওইবা ৱারোলদুনিঃ

“ইকায়খুম্ননীংঙাই ওইরবা মেম্বরশিং, ঙসি, ওগস্ত 9, 2023 অসিদি মহাত্মা গান্ধীনা ‘ভারত থাদোকউ ইহৌ’ হৌদোকখিবা ইং 1942গী পুৱারী ওইরবা নুমিৎ অদুগী 81শুবা কুমওন্নি।

লৈবাক্কী মপানা থমখিবা ‘পাংথোক্লসি নত্ত্রগা শিরসি’ হায়বা খোল্লাও অদুনা মীয়ামদা অনৌবা পাঙ্গল অমা হাপখি, অমসুং মদুদগী মীয়াম্না লোইলম লৈঙাক্কী মাইয়োক্তগী নিংতম্বা ফংবা ঙমখিবনি।

নিংতম্বা ফংলবা মতুংদা, লাইরবা মুত্থৎনবা, ইবা পাবা হেনগৎহন্নবা, হন্থনা য়েংবগী থৌওং মুত্থৎনবা, অমসুং সোসিএল ইনক্লুজিবিতী লৈহন্নবা থবক কয়া পাংথোকখিবসি য়াম্না নুংঙাইবা ৱাফম অমনি।

লৈবাক অসিনা অমৃত কালগী মতমসিদা হীরম কয়াসিদা ফংখিবা মায় পাকপশিংগীদমক্তা চাউথোকচরি অমসুং, ঐখোয়না হৌজিক ইং 2047দা নিংতম্বা ফংবগী চাম্মা শুবা চহিগী নুংঙাইবা ফোংদোক্নবগীদমক্তা চঙশিল্লি। মতম অসি ফাওবদা, ঐখোয়গী মায় পাকপশিংসু য়াম্না হেনগৎলগনি।

ইকায়খুম্ননীংঙাই ওইরবা মেম্বরশিং, ঙসিগী য়াইফরবা নুমিৎ অসিদা, লৈবাক্কী নিংতম্বগীদমক্তা মশাগী পুন্সি কত্থোকখ্রবা অথৌবশিংগী মফমদা ঐখোয়না থম্মোই শেংনা ইকায় খুম্নবা উৎচরি।

ঐখোয়না পার্লিয়ামেন্তকী মেম্বর অমা ওইনা, ঙসিগী নুমিৎ অসিদি ইশাগী থৌদাং অমুক্কা হন্না নীংশিংবা, লৈবাক সেবাগীদমক্তা ইশাবু থৱাই য়াওনা অমুক্কা হন্না কত্থোকপা, মীয়ামগী অপাম্বা ফংহন্নবা হোৎনবা অমসুং লৈবাক ময়াম মরক্তা ভারতকী ইকায়খুম্ননীংঙাই ওইবা মফম অমা কনবগী তাঞ্জানি।

ঐহাক্না মেম্বরশিংনা মশাগী মফমদগী অমুক্তা হৌগত্তুনা নিংতম্বগীদমক্তা মথ্বাই কত্থোকখ্রবা অথৌবশিংবু ইকায় খুম্নবা উৎসি হায়না হায়জরি।

*****