ସ୍ଵରାଷ୍ଟ୍ର ବ୍ୟାପାର ମନ୍ତ୍ରଣାଳୟ
କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଭୁବନେଶ୍ୱର ଠାରେ ଆଜି ୭୬୧ କୋଟି ଟଙ୍କା ବ୍ୟୟରେ ନିର୍ମିତ କାମାକ୍ଷାନଗର-ଡୁବୁରୀ ରାଜପଥର ୪ ଲେନ୍ ବିଶିଷ୍ଟ ପ୍ରଶସ୍ତିକରଣ କାର୍ଯ୍ୟକୁ ଲୋକାର୍ପଣ କରିବା ସହିତ ୩୪ କୋଟି ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ମୋଟେର-ବାନେର ଭାୟା ଲଡ଼ୁଗାଁ ସଡ଼କର ଉନ୍ନତିକରଣ ପ୍ରକଳ୍ପ ପାଇଁ ଶିଳାନ୍ୟାସ କଲେ
୨୦୧୯ ମସିହା ଆଜିର ଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ ଐତିହାସିକ ନିଷ୍ପତ୍ତି ଗ୍ରହଣ କରି ଧାରା ୩୭୦ ଉଚ୍ଛେଦ ସହିତ କାଶ୍ମୀରକୁ ସବୁଦିନ ପାଇଁ ଭାରତ ସହିତ ଯୋଡ଼ିବା ପାଇଁ ପଦକ୍ଷେପ ନେଇଥିଲେ
ଆଜି କାଶ୍ମୀର କେବଳ ମୁଖ୍ୟଧାରାରେ ସାମିଲ ହୋଇନାହିଁ ବରଂ ଏଠାରେ ଶାନ୍ତି ଓ ବିକାଶ ପାଇଁ ବାଟ ଖୋଲିଛି
ଦେଶର ବିକାଶ ଓ ଅର୍ଥବ୍ୟବସ୍ଥାର ଅଭିବୃଦ୍ଧି ରାଜପଥ ସହ ଯୋଡ଼ି ହୋଇ ରହିଥାଏ, ପ୍ରଧାନମନ୍ତ୍ରୀ ମୋଦୀ ବିଗତ ୯ ବର୍ଷ ମଧ୍ୟରେ ରାଜପଥର ବିକାଶ ପାଇଁ ଅନେକ କାର୍ଯ୍ୟ କରିଛନ୍ତି
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ବିଗତ ୯ ବର୍ଷ ମଧ୍ୟରେ ଦେଶରେ ଭିତ୍ତିଭୂମି ବିକାଶ ପ୍ରତି ବିଶେଷ ଗୁରୁତ୍ୱ ଦିଆଯାଇଛି ଏବଂ ଏଥିପାଇଁ କୌଣସି ପ୍ରକାରରେ ବଜେଟ୍ର ଅଭାବ ରଖାଯାଇନାହିଁ
ପ୍ରଧାନମନ୍ତ୍ରୀ ମୋଦୀଙ୍କ ବିଚାରରେ ଭିତ୍ତିଭୂମି ବିକାଶ ବିନା ଦେଶର ବିକାଶ ହୋଇପାରିବ ନାହିଁ, ରାଜପଥ ନିର୍ମାଣ ଦ୍ୱାରା ସ୍ୱାଭାବିକ ଭାବେ ଦେଶରେ ଆର୍ଥିକ ଗତିବିଧି ତ୍ୱରାନ୍ୱିତ ହେବ
୨୦୧୪ରେ ପ୍ରଧାନମନ୍ତ୍ରୀ ମୋଦୀ କହିଥିଲେ ଯେପର୍ଯ୍ୟନ୍ତ ଦେଶର ପୂର୍ବାଞ୍ଚଳର ବିକାଶ ହେବ ନାହିଁ, ସେପର୍ଯ୍ୟନ୍ତ ଦେଶର ସମ୍ପୂର୍ଣ୍ଣ ବିକାଶ ସମ୍ଭବ ନୁହେଁ, ପ୍ରଧାନମନ୍ତ୍ରୀ ମୋଦୀ ସବୁବେଳେ ପୂର୍ବ ଭାରତକୁ ଗୁରୁତ୍ୱ ଦେଇ ଆସିଛନ୍ତି
ଏକଦା ଏହି ସମ୍ପୂର୍ଣ୍ଣ କ୍ଷେତ୍ର ନକ୍ସଲ ପ୍ରଭାବିତ ଥିଲା, କିନ୍ତୁ ବିଗତ ୯ ବର୍ଷ ମଧ୍ୟରେ ନରେନ୍ଦ୍ର ମୋଦୀ ସରକାର ରାଜ୍ୟ ସରକାରଙ୍କ ସହ ମିଶି, ନକ୍ସଲବାଦ ଉପରେ ଅଙ୍କୁଶ ଲଗାଇବାକୁ ସଫଳ ପ୍ରୟାସ କରିଛନ୍ତି ଏବଂ ଏହାର ପରିଣାମ ମଧ୍ୟ ଦେଖିବାକୁ ମିଳିଛି
ନକ୍ସଲବାଦ ଉପରେ ଅଙ୍କୁଶ ଲଗାଇବାରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ସବୁବେଳେ କେନ୍ଦ୍ର ସରକାରଙ୍କୁ ସମର୍ଥନ ଦେଇଛନ୍ତି, ମୋଦୀ ସରକାର ନକ୍ସଲବାଦ ବିରୋଧରେ ମଜବୁତ ଲଢ଼େଇ ପାଇଁ ସଂକଳ୍ପବଦ୍ଧ ଅଛନ୍ତି
ବିପର୍ଯ୍ୟୟ ପରିଚାଳନା ପାଇଁ ମୋଦୀ ସରକାରଙ୍କ ସବୁ ଯୋଜନାକୁ ଶ୍ରୀ ନବୀନ ପଟ୍ଟନାୟକ ତୃଣମୂଳସ୍ତରରେ କାର୍ଯ୍ୟକାରୀ କରିଛନ୍ତି ଏବଂ ନିଜେ ମଧ୍ୟ ଅନେକ ପଦକ୍ଷେପ ଗ୍ରହଣ କରି ସାରା ଦେଶକୁ ଦେଖାଇ ଦେଇଛନ୍ତି ଯେ କେନ୍ଦ୍ର ଓ ରାଜ୍ୟ ସରକାର ସାଥୀ ହୋଇ କାମ କଲେ ପ୍ରାକୃତିକ ବିପର୍ଯ୍ୟୟକୁ ନିୟନ୍ତ୍ରଣ କରିବା ସମ୍ଭବ ହୋଇପାରିବ
୧୯୯୯ରେ ଓଡ଼ିଶାରେ ଆସିଥିବା ମହାବାତ୍ୟା ଯୋଗୁ ହଜାର ହଜାର ଲୋକ ପ୍ରାଣ ହରାଇଥିଲେ କିନ୍ତୁ ଆଜି ଯେତେବେଳେ ଓଡ଼ିଶାକୁ ବାତ୍ୟା ଆସୁଛି, ଏଠାରେ ଶୂନ୍ୟ ମୃତ୍ୟୁହାର ଦେଖିବାକୁ ମିଳୁଛି, ଯାହାକୁ ସାରା ବିଶ୍ୱରେ ପ୍ରଶଂସା କରାଯାଉଛି
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏନଡିଆରଏଫ, ଏନଡିଏମଏ ମାଧ୍ୟମରେ ବିପର୍ଯ୍ୟୟ ପରିଚାଳନାକୁ ପ୍ରଶାସନର ସ୍ୱଭାବରେ ପରିଣତ କରିଛନ୍ତି ଏବଂ ଓଡ଼ିଶା ସରକାର ଏଥିରେ ସମ୍ପୂର୍ଣ୍ଣ ସମର୍ଥନ ଦେଇଛନ୍ତି
Posted On:
05 AUG 2023 4:08PM by PIB Bhubaneshwar
କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ଭୁବନେଶ୍ୱର ଠାରେ ୭୬୧ କୋଟି ଟଙ୍କା ବ୍ୟୟରେ ନିର୍ମିତ ୫୩ ନମ୍ବର ଜାତୀୟ ରାଜପଥର କାମାକ୍ଷାନଗର-ଡୁବୁରୀ ସେକ୍ସନର ୪ ଲେନ୍ ବିଶିଷ୍ଟ ସମ୍ପ୍ରସାରଣ କାର୍ଯ୍ୟକୁ ଲୋକାର୍ପଣ କରିବା ସହିତ ୩୪ କୋଟି ଟଙ୍କା ବ୍ୟୟରେ ତିଆରି ହେବାକୁ ଥିବା ମୋଟେର-ବାନେର ଭାୟା ଲଡ଼ୁଗାଁ ରାସ୍ତାର ପ୍ରଶସ୍ତିକରଣ ଓ ଉନ୍ନତିକରଣ ପ୍ରକଳ୍ପ ପାଇଁ ଶିଳାନ୍ୟାସ କରିଛନ୍ତି । ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ କେନ୍ଦ୍ର ଶିକ୍ଷା ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ ।
![](https://static.pib.gov.in/WriteReadData/userfiles/image/image001DPEN.jpg)
କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଥିଲେ, ୨୦୧୯ ମସିହା ଆଜିର ଦିନରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏକ ଐତିହାସିକ ନିଷ୍ପତ୍ତି ଗ୍ରହଣ କରି ଧାରା ୩୭୦ ଉଚ୍ଛେଦ ସହିତ କାଶ୍ମୀରକୁ ସବୁଦିନ ପାଇଁ ଭାରତ ସହିତ ଯୋଡ଼ିବା ପାଇଁ ପଦକ୍ଷେପ ନେଇଥିଲେ । ଆଜି କାଶ୍ମୀର କେବଳ ମୁଖ୍ୟଧାରାରେ ସାମିଲ ହୋଇନାହିଁ ବରଂ ଏଠାରେ ଶାନ୍ତି ଓ ବିକାଶ ପାଇଁ ବାଟ ଖୋଲିଛି ।
ଶ୍ରୀ ଅମିତ ଶାହ କହିଥିଲେ ଯେ, ଆଜି ଏଠାରେ କାମାକ୍ଷାନଗର-ଡୁବୁରୀ ସେକ୍ସନରେ ଚାରି ଲେନ୍ ବିଶିଷ୍ଟ ରାଜପଥ ପ୍ରଶସ୍ତିକରଣ କାମ ଲୋକାର୍ପଣ କରାଯାଇଛି । ୫୧ କିଲୋମିଟର ଲମ୍ବ ଏହି ସଡ଼କ ପାଇଁ ୭୬୧ କୋଟି ଟଙ୍କା ଖର୍ଚ୍ଚ ହୋଇଛି । ଏହି ରାଜପଥ ଓଡ଼ିଶାର ଖଣିଜ ସମୃଦ୍ଧ ଜିଲ୍ଲା ଅନୁଗୁଳ ଓ ଢେଙ୍କାନାଳ ଜିଲ୍ଲାକୁ ରାଜ୍ୟର ଅବଶିଷ୍ଟ ଭାଗ ସହିତ ଯୋଡ଼ିବ । ଏହାଛଡ଼ା ଜାତୀୟ ରାଜପଥ ମାଧ୍ୟମରେ ଦେଶର ଅବଶିଷ୍ଟ ଭାଗ ସହିତ ଦୁଇ ଜିଲ୍ଲାକୁ ଯୋଡ଼ିବାରେ ପ୍ରମୁଖ ଭୂମିକା ନିର୍ବାହ କରିବ । ସେ କହିଥିଲେ ଯେ, ଦେଶର ଭାଗ୍ୟ, ବିକାଶ, ଅର୍ଥବ୍ୟବସ୍ଥାର ବିକାଶ ରାଜପଥ ସହ ଯୋଡ଼ି ହୋଇ ରହିଛି । ଶ୍ରୀ ଶାହ କହିଥିଲେ, ପ୍ରଧାନମନ୍ତ୍ରୀ ମୋଦୀ, ବିଗତ ୯ ବର୍ଷ ମଧ୍ୟରେ ରାଜପଥର ବିକାଶ ପାଇଁ ଅନେକ କାର୍ଯ୍ୟ କରିଛନ୍ତି । ଆଜି କଳାହାଣ୍ଡିର ମୋଟେର ଠାରୁ ବାନେର ପର୍ଯ୍ୟନ୍ତ ଭାୟା ଲଡ଼ୁଗାଁ ହୋଇ ଏକ ସଡ଼କର ପ୍ରଶସ୍ତିକରଣ ଓ ଉନ୍ନତିକରଣ କାମ ମଧ୍ୟ ଆରମ୍ଭ ହୋଇଛି । ପାଖାପାଖି ୧୫ କିଲୋମିଟର ଲମ୍ବା ଏହି ରାଜପଥ ପ୍ରକଳ୍ପ ପାଇଁ ୩୪ କୋଟି ଟଙ୍କା ଖର୍ଚ୍ଚ କରାଯିବ ।
![](https://static.pib.gov.in/WriteReadData/userfiles/image/image002LHVQ.jpg)
କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ କହିଥିଲେ ଯେ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ବିଗତ ୯ ବର୍ଷ ମଧ୍ୟରେ ଦେଶରେ ଭିତ୍ତିଭୂମି ବିକାଶ ପ୍ରତି ବିଶେଷ ଗୁରୁତ୍ୱ ଦିଆଯାଇଛି ଏବଂ ଏଥିପାଇଁ କୌଣସି ପ୍ରକାରରେ ବଜେଟ୍ର ଅଭାବ ରଖାଯାଇନାହିଁ । ସେ କହିଥିଲେ, ପ୍ରଧାନମନ୍ତ୍ରୀ ମୋଦୀଙ୍କ ବିଚାରରେ ଭିତ୍ତିଭୂମି ବିକାଶ ବିନା ଦେଶର ବିକାଶ ହୋଇପାରିବ ନାହିଁ, ରାଜପଥ ନିର୍ମାଣ ଦ୍ୱାରା ସ୍ୱାଭାବିକ ଭାବେ ଦେଶରେ ଆର୍ଥିକ ଗତିବିଧି ତ୍ୱରାନ୍ୱିତ ହେବ । ଶ୍ରୀ ଶାହ ଆହୁରି କହିଥିଲେ ଯେ ମୋଦୀ ସରକାର ଫାଷ୍ଟଟ୍ୟାଗ ଜରିଆରେ ଟୋଲ୍ ସଂଗ୍ରହକୁ ଦ୍ରୁତ କରିଛନ୍ତି, ଜମି ଅଧିଗ୍ରହଣ ପ୍ରକ୍ରିୟାରେ ଦକ୍ଷତା ଆସିଛି, ବିବାଦର ଶୀଘ୍ର ସମାଧାନ, ସୂଚନା ପ୍ରଯୁକ୍ତି ଉପରେ ଗୁରୁତ୍ୱ, ପାଣ୍ଠି ଯୋଗାଣର ବିକଳ୍ପ ଉପାୟ ଖୋଜିବା ଆଦି ବୈଜ୍ଞାନିକ ସମନ୍ୱୟ ଆଣି ରାଜପଥ ନିର୍ମାଣର ଗତିକୁ ତ୍ୱରାନ୍ୱିତ କରିଛନ୍ତି । ରାଜପଥ ନିର୍ମାଣ ଦ୍ୱାରା ସ୍ୱାଭାବିକ ଭାବେ ଦେଶରେ ଆର୍ଥିକ ଗତିବିଧି ତ୍ୱରାନ୍ୱିତ ହେବ ବୋଲି ସେ କହିଥିଲେ ।
ଶ୍ରୀ ଶାହ କହିଥିଲେ ଯେ ଓଡ଼ିଶା ପାଇଁ ମୋଦୀ ସରକାର ଅନେକ ବିକାଶ ପ୍ରକଳ୍ପ ଆରମ୍ଭ କରିଛନ୍ତି, ଯାହାଦ୍ୱାରା ରାଜ୍ୟର ଅର୍ଥବ୍ୟବସ୍ଥା ଗତିଶୀଳ ହୋଇଛି । ସେ କହିଥିଲେ ଯେ ନରେନ୍ଦ୍ର ମୋଦୀ ୨୦୧୪ରେ କହିଥିଲେ ଯେପର୍ଯ୍ୟନ୍ତ ଦେଶର ପୂର୍ବାଞ୍ଚଳର ବିକାଶ ହେବ ନାହିଁ, ସେପର୍ଯ୍ୟନ୍ତ ଦେଶର ସମ୍ପୂର୍ଣ୍ଣ ବିକାଶ ସମ୍ଭବ ନୁହେଁ । ପ୍ରଧାନମନ୍ତ୍ରୀ ମୋଦୀ ସବୁବେଳେ ପୂର୍ବ ଭାରତକୁ ଗୁରୁତ୍ୱ ଦେଇ ଆସିଛନ୍ତି । ସ୍ୱରାଷ୍ଟ୍ର ମନ୍ତ୍ରୀ କହିଥିଲେ, ଦେଶର ପୂର୍ବ ଓ ପଶ୍ଚିମ କ୍ଷେତ୍ରର ବିକାଶର ସ୍ତର ଏକସମାନ ହେଲେ ଦେଶର ବିକାଶ ହୋଇପାରିବ । ଏଥିପାଇଁ ନରେନ୍ଦ୍ର ମୋଦୀ ସରକାର ସବୁବେଳେ ପୂର୍ବ ଭାରତକୁ ଏବଂ ଓଡ଼ିଶାକୁ ବିଶେଷ ଗୁରୁତ୍ୱ ଦେଇ ଆସିଛନ୍ତି । ଶ୍ରୀ ଶାହା କହିଥିଲେ, ଏକଦା ଏହି ସମ୍ପୂର୍ଣ୍ଣ କ୍ଷେତ୍ର ନକ୍ସଲ ପ୍ରଭାବିତ ଥିଲା, କିନ୍ତୁ ବିଗତ ୯ ବର୍ଷ ମଧ୍ୟରେ ନରେନ୍ଦ୍ର ମୋଦୀ ସରକାର ରାଜ୍ୟ ସରକାରଙ୍କ ସହ ମିଶି ନକ୍ସଲବାଦ ଉପରେ ଅଙ୍କୁଶ ଲଗାଇବାକୁ ସଫଳ ପ୍ରୟାସ କରିଛନ୍ତି ଏବଂ ଏହାର ପରିଣାମ ମଧ୍ୟ ଦେଖିବାକୁ ମିଳିଛି । ନକ୍ସଲବାଦ ଉପରେ ଅଙ୍କୁଶ ଲଗାଇବାରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ସବୁବେଳେ କେନ୍ଦ୍ର ସରକାରଙ୍କୁ ସମର୍ଥନ ଦେଇଛନ୍ତି । ମୋଦୀ ସରକାର ନକ୍ସଲବାଦ ବିରୋଧରେ ମଜବୁତ ଲଢ଼େଇ ପାଇଁ ସଂକଳ୍ପବଦ୍ଧ ଅଛନ୍ତି ।
![](https://static.pib.gov.in/WriteReadData/userfiles/image/image003GDUZ.jpg)
କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ କହିଥିଲେ ଯେ, ନରେନ୍ଦ୍ର ମୋଦୀ ସରକାର ଓଡ଼ିଶା ପାଇଁ ଅନେକ କାର୍ଯ୍ୟ କରିଛନ୍ତି । ସେ କହିଥିଲେ ଯେ କେନ୍ଦ୍ରରେ ଥିବା ପୂର୍ବ ସରକାରଙ୍କ ସମୟରେ ହସ୍ତାନ୍ତରଣ ବା ଡିଭୋଲ୍ୟୁସନ୍ ଏବଂ ଗ୍ରାଣ୍ଟ ଇନ୍ ଏଡ୍ ବା ଅନୁଦାନ ଆକାରରେ ଓଡ଼ିଶାକୁ ୧,୧୪,୦୦୦ କୋଟି ଟଙ୍କା ମିଳିଥିଲା। ମୋଦୀ ସରକାର ଉଭୟ ଉତ୍ସରୁ ୪,୫୭,୦୦୦ କୋଟି ଟଙ୍କା ଦେଇଛନ୍ତି । ଏହା ବ୍ୟତୀତ ମୋଟ୍ ଆବଣ୍ଟନକୁ ୩ ଲକ୍ଷ କୋଟି ଟଙ୍କାରୁ ବୃଦ୍ଧି କରି ୧୮ ଲକ୍ଷ କୋଟି ଟଙ୍କା କରିବାର କାର୍ଯ୍ୟ ମୋଦୀ ସରକାର କରିଛନ୍ତି, ଯାହାକି ୬ ଗୁଣ ଠାରୁ ମଧ୍ୟ ଅଧିକ । ସେ କହିଥିଲେ ଯେ, ପ୍ରଧାନମନ୍ତ୍ରୀ ମୋଦୀ ଓଡ଼ିଶାରେ ରେଳବାଇ ପାଇଁ ୧୦ ହଜାର କୋଟି ଟଙ୍କା ଦେଇଛନ୍ତି, ୮୦୦ କୋଟି ଟଙ୍କାରେ ଇଣ୍ଡିଆନ ଅଏଲ୍ ପାଇପଲାଇନ କାମ କରିଛନ୍ତି, ଆଇଆଇଟି ଭୁବନେଶ୍ୱର ଏବଂ ଏମ୍ସ ନିର୍ମାଣ କରିଛନ୍ତି । ଭାରତୀୟ ବିଜ୍ଞାନ ଶିକ୍ଷା ଓ ଗବେଷଣା କେନ୍ଦ୍ର ମଧ୍ୟ ଏଠାରେ ଖୋଲାଯାଇଛି । ଭୁବନେଶ୍ୱର ଇଏସଆଇ ହସ୍ପିଟାଲର ଉନ୍ନତିକରଣ ଏବଂ ୧୫୦୦ ଶଯ୍ୟା ବିଶିଷ୍ଟ ଭୁବନେଶ୍ୱର ଏମ୍ସର ମଧ୍ୟ ପ୍ରତିଷ୍ଠା କରାଯାଇଛି ।
![](https://static.pib.gov.in/WriteReadData/userfiles/image/image0044NGQ.jpg)
ଶ୍ରୀ ଅମିତ ଶାହା କହିଥିଲେ ଯେ କେନ୍ଦ୍ରର ନରେନ୍ଦ୍ର ମୋଦୀ ସରକାର ଓଡ଼ିଶାର ବିକାଶରେ ଆଦୌ ହେଳା କରିବାକୁ ଚାହୁଁ ନାହିଁ ଏବଂ ସବୁ ପ୍ରକାରର ପଦକ୍ଷେପ ଗ୍ରହଣ କରୁଛନ୍ତି । ସେ କହିଥିଲେ ଯେ କିଷାନ ସମ୍ମାନ ନିଧି ଯୋଜନା ଅଧୀରେ ରାଜ୍ୟର ୪୦ ଲକ୍ଷ ଚାଷୀ ଲାଭବାନ ହୋଇଛନ୍ତି । ଜଳ ଜୀବନ ମିଶନ ଅଧୀନରେ ୫୪ ଲକ୍ଷ ଘରକୁ ବିଶୁଦ୍ଧ ପାନୀୟ ଜଳ ପହଞ୍ଚି ପାରିଛି । ୯୦ ଲକ୍ଷ ଶୌଚାଳୟ ନିର୍ମାଣ କରାଯାଇଛି । ୩ କୋଟି ୨୫ ଲକ୍ଷ ଲୋକଙ୍କୁ ମାସିକ ୫ କିଲୋଗ୍ରାମ ମାଗଣା ଚାଉଳ ମିଳୁଛି, ୬ ଲକ୍ଷ ଉଜ୍ଜ୍ୱଳା ସଂଯୋଗ ଦିଆଯାଇଛି ଏବଂ ୧୭ ଲକ୍ଷ ଗ୍ରାମୀଣ ପରିବାରକୁ ଆବାସ ଯୋଗାଣ ଭଳି କାମ ମୋଦୀ ସରକାର କରି ଦେଇଛନ୍ତି । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ, ଓଡ଼ିଶା ପ୍ରାକୃତିକ ବିପର୍ଯ୍ୟୟ ପ୍ରଭାବିତ ରାଜ୍ୟ କିନ୍ତୁ ବିପର୍ଯ୍ୟୟ ପରିଚାଳନା ପାଇଁ ମୋଦୀ ସରକାରଙ୍କ ସବୁ ଯୋଜନାକୁ ଶ୍ରୀ ନବୀନ ପଟ୍ଟନାୟକ ତୃଣମୂଳସ୍ତରରେ କାର୍ଯ୍ୟକାରୀ କରିଛନ୍ତି । ନିଜେ ମଧ୍ୟ ଅନେକ ପଦକ୍ଷେପ ଗ୍ରହଣ କରି ସାରା ଦେଶକୁ ଦେଖାଇ ଦେଇଛନ୍ତି ଯେ କେନ୍ଦ୍ର ଓ ରାଜ୍ୟ ସରକାର ସାଥୀ ହୋଇ କାମ କଲେ ପ୍ରାକୃତିକ ବିପର୍ଯ୍ୟୟକୁ ନିୟନ୍ତ୍ରଣ କରିବା ସମ୍ଭବ ହୋଇପାରିବ ।
ଶ୍ରୀ ଶାହ କହିଥିଲେ ଯେ, ୧୯୯୯ରେ ଓଡ଼ିଶାରେ ଆସିଥିବା ମହାବାତ୍ୟା ଯୋଗୁ ହଜାର ହଜାର ଲୋକ ପ୍ରାଣ ହରାଇଥିଲେ କିନ୍ତୁ ଆଜି ଯେତେବେଳେ ଓଡ଼ିଶାକୁ ବାତ୍ୟା ଆସୁଛି, ଏଠାରେ ଶୂନ୍ୟ ମୃତ୍ୟୁହାର ଦେଖିବାକୁ ମିଳୁଛି ଯାହାକୁ ସାରା ବିଶ୍ୱରେ ପ୍ରଶଂସା କରାଯାଉଛି । ସେ ଆହୁରି କହିଥିଲେ ଯେ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏନଡିଆରଏଫ, ଏନଡିଏମଏ ମାଧ୍ୟମରେ ବିପର୍ଯ୍ୟୟ ପରିଚାଳନାକୁ ପ୍ରଶାସନର ସ୍ୱଭାବରେ ପରିଣତ କରିଛନ୍ତି ଏବଂ ଓଡ଼ିଶା ସରକାର ଏଥିରେ ସମ୍ପୂର୍ଣ୍ଣ ସମର୍ଥନ ଦେଇଛନ୍ତି ।
******
P.S.
(Release ID: 1946044)
Visitor Counter : 115