மத்திய உள்துறை அமைச்சரும், கூட்டுறவுத் துறை அமைச்சருமான திரு. அமித் ஷா, சி.ஆர்.சி.எஸ்-சஹாரா ரீஃபண்ட் போர்ட்டல் மூலம் சஹாரா குழும கூட்டுறவு சங்கங்களின் உண்மையான வைப்புத்தொகையாளர்களுக்கு நிதி பரிமாற்றத்தை புதுதில்லியில் இன்று தொடங்கி வைத்தார். இந்நிகழ்ச்சியில், மத்திய கூட்டுறவுத் துறை இணையமைச்சர் திரு பி.எல்.வர்மா, முன்னாள் உச்ச நீதிமன்ற நீதிபதி திரு.ஆர்.சுபாஷ் ரெட்டி, கூட்டுறவு அமைச்சகத்தின் செயலாளர் திரு ஞானேஷ் குமார், பணத்தைத் திரும்பப் பெறும் செயல்முறைக்கு உதவ நியமிக்கப்பட்ட நான்கு சிறப்பு கடமை (ஓ.எஸ்.டி) மூத்த அதிகாரிகள் மற்றும் பணத்தைத் திரும்பப் பெற்ற சில வைப்புத்தொகையாளர்களும் கலந்து கொண்டனர்.

பிரதமர் திரு. நரேந்திர மோடியின் தலைமையின் கீழ், நாட்டின் ஒவ்வொரு ஏழை மற்றும் நடுத்தர மக்களின் உரிமைகளைப் பாதுகாக்கவும், சமூகத்தின் ஏழ்மையான மற்றும் பின்தங்கிய பிரிவினரின் பிரச்சினைகளைத் தீர்க்கவும் மத்திய அரசு உறுதிபூண்டுள்ளது என்று திரு அமித் ஷா தனது உரையில் கூறினார். இந்த திசையில் கூட்டுறவு அமைச்சகம் இன்று ஒரு பெரிய வெற்றியை அடைந்துள்ளது. டெபாசிட்தாரர்களின் டெபாசிட் பணத்தை சாதனை நேரத்தில் திரும்பப் பெற அனைத்து நிறுவனங்களும் பாராட்டத்தக்க பணிகளைச் செய்துள்ளன, இதன் மூலம் வைப்புத்தொகையாளர்கள் தங்கள் பணத்தைத் திரும்பப் பெறுகிறார்கள் என்று அவர் கூறினார். ஜூலை 18, 2023 அன்று சி.ஆர்.சி.எஸ்-சஹாரா ரீஃபண்ட் போர்ட்டல் தொடங்கப்பட்டபோது, போர்ட்டலில் பதிவு செய்த 45 நாட்களுக்குள் உண்மையான வைப்புத்தொகையாளர்களுக்கு இந்த தொகை செலுத்தப்படும் என்று தெரிவிக்கப்பட்டது, ஆனால் உச்ச நீதிமன்றம் மற்றும் மத்திய அரசின் அனைத்து முகமைகளும் இணைந்து செயல்பட்டு பாராட்டத்தக்க பணிகளைச் செய்துள்ளன.  கடந்த ஒரு மாதத்திற்குள், 112 பயனாளிகளின் வங்கி கணக்கில், 10 ஆயிரம் ரூபாய் டெபாசிட்  செய்யப்படுகிறது. கூட்டுறவு அமைச்சகத்தின் இந்த முன்முயற்சி கோடிக்கணக்கான முதலீட்டாளர்களின் மனதில் திருப்தியையும் நம்பிக்கையையும் ஏற்படுத்தியுள்ளது என்று திரு. ஷா கூறினார்.

கூட்டுறவு அமைச்சகம் உருவாக்கப்பட்டபோது, கூட்டுறவு கட்டமைப்பை மறுசீரமைப்பது, சுமார் 75 ஆண்டுகளுக்கு முன்பு இயற்றப்பட்ட கூட்டுறவு சட்டங்களில் சரியான நேரத்தில் மாற்றங்களைச் செய்வது, மக்கள் மத்தியில் கூட்டுறவு சங்கங்கள் மீது இழந்த நம்பிக்கையை மீண்டும் நிறுவுவது போன்ற பல்வேறு சவால்கள் அமைச்சகத்திற்கு இருந்தன. இந்த சவால்கள் அனைத்திற்கும் தீர்வு காண கூட்டுறவு அமைச்சகம் செயல்பட்டுள்ளது. கடந்த 15 ஆண்டுகளாக சஹாரா குழுமத்தின் நான்கு கூட்டுறவு சங்கங்களில் சிக்கித் தவிக்கும் கோடிக்கணக்கான ரூபாயை நாட்டின் கோடிக்கணக்கான முதலீட்டாளர்களுக்கு  திருப்பித் தருவதற்கான முயற்சிகள் மேற்கொள்ளப்பட்டன. சிஆர்சிஎஸ்-சஹாரா ரீஃபண்ட் போர்ட்டலில் சுமார் 33 லட்சம் முதலீட்டாளர்கள் பதிவு செய்யப்பட்டுள்ளதாக திரு ஷா கூறினார்.

சுமார் ஒரு வருடத்திற்கு முன்பு, சஹாரா குழுமத்தின் நான்கு கூட்டுறவு சங்கங்களில் சிக்கித் தவிக்கும் முதலீட்டாளர்களின் பணத்தைத் திருப்பித் தர கூட்டுறவு அமைச்சகம் தொடர்ச்சியான கூட்டங்களைத் தொடங்கியது என்று திரு அமித் ஷா கூறினார். அனைத்து தரப்பினரையும் ஒருங்கிணைத்து, கூட்டுறவு அமைச்சகம், அனைத்து துறைகளுடன் இணைந்து, உச்ச நீதிமன்றத்தில் மனு தாக்கல் செய்தது.முன்னாள்  உச்ச நீதிமன்ற நீதிபதி தலைமையில் குழு அமைக்கப்படும் என்றும், உண்மையான டெபாசிட்தாரர்களுக்கு பணத்தை திருப்பி அளிக்கும் நடைமுறை, வெளிப்படையான முறையில் மேற்கொள்ளப்பட வேண்டும் என்றும், உச்ச நீதிமன்றம் வரலாற்று சிறப்புமிக்க தீர்ப்பை வழங்கியது.

இன்று 112 முதலீட்டாளர்களுக்கு ரூ.10,000  பணம் செலுத்தப்படுகிறது, ஏனெனில் சிறு முதலீட்டாளர்களுக்கு திருப்பித் தரப்பட வேண்டிய தொகையில் முதல் உரிமை உள்ளது. ஆனால் வரும் காலங்களில், அனைத்து முதலீட்டாளர்களும் தங்கள் பணத்தைத் திரும்பப் பெறுவது உறுதி. தணிக்கை செயல்முறை நிறைவடைந்துள்ளதால் அடுத்த தவணை பணம் விடுவிக்க இன்னும் குறைவான நேரம் எடுக்கும் என்று அவர் கூறினார். நாட்டின் ஒவ்வொரு குடிமகனின் வைப்புத்தொகையையும் பாதுகாப்பதும், சட்டம் இயற்ற அரசியலமைப்பின் கீழ் உள்ள உரிமைகளைப் பயன்படுத்துவதன் மூலம் அவர்களின் சிக்கித் தவிக்கும் வைப்புத் தொகையைத் திருப்பித் தருவதும் நாட்டின் அரசு மற்றும் நிர்வாகத்தின் பொறுப்பாகும் என்று திரு ஷா கூறினார். சஹாரா குழுமத்தின் கூட்டுறவு சங்கங்களின் முதலீட்டாளர்கள் தாங்கள் கஷ்டப்பட்டு சம்பாதித்த ஒவ்வொரு ரூபாயையும் திரும்பப் பெற மோடி அரசு தொடர்ந்து முயற்சிகளை மேற்கொண்டு வருவதாக திரு ஷா உறுதியளித்தார். பிரதமர் திரு. நரேந்திர மோடியின் தலைமையிலும், மத்திய உள்துறை அமைச்சரும், கூட்டுறவுத் துறை அமைச்சருமான திரு. அமித் ஷாவின் வழிகாட்டுதலிலும், தங்கள் பணத்தைத் திருப்பித் தருவதற்காக கூட்டுறவு அமைச்சகம் மேற்கொண்ட முயற்சிகளுக்கு சஹாரா குழுமத்தின் டெபாசிட்தாரர்கள் தங்கள் நன்றியைத் தெரிவித்தனர்.

*****

(வெளியீட்டு ஐடி: 1945763)