مرکزی وزیر داخلہ اور امدادِ باہمی کے وزیر جناب امت شاہ نے آج ویڈیو کانفرنسنگ کے توسط سے آندھرا پردیش کے کرنول میں بھگوان شری رام کے 108 فٹ بلند مجسمے کا سنگ بنیاد رکھا۔

جناب امت شاہ نے اپنے خطاب میں کہا کہ آج کرنول میں واقع منترالیم میں بھگوان شری رام کے عظیم الشان مجسمے کا سنگ بنیاد رکھا گیا ہے جسے 500 کروڑ روپئے سے زائد کی لاگت سے تعمیر کیا جائے گا۔ انہوں نے کہا کہ بھگوان رام کا یہ 108 فٹ بلند مجسمہ جسے منترالیم میں نصب کیا جائے گا، ملک اور دنیا بھر میں ویشنو روایت کو مضبوطی فراہم کرے گا اور کئی ادوار تک پوری دنیا کے لیے ہمارے سناتن دھرم کا پیغام دے گا۔ جناب شاہ نے کہا کہ 108 ہماری ہندو ثقافت میں ایک ازحد مقدس نمبر ہے۔

امورِ داخلہ اور امدادِ باہمی کے مرکزی وزیر نے کہا کہ یہ پروجیکٹ دریائے تنگ بھدر کے ساحل پر واقع منترالیم گاؤں میں 10 ایکڑ اراضی پر پھیلا ہوا ہے اور یہ ڈھائی برسوں میں مکمل ہو جائے گا۔ انہوں نے کہا کہ منترالیم گاؤں راگھویندر سوامی مندر کے لیے بہت مشہور ہے۔ یہ جگہ تاریخی اہمیت کی حامل ہے۔ عظیم وجے نگر سلطنت کی شروعات دریائے تنگ بھدر کے ساحل پر ہوئی تھی، اس نے پورے جنوبی خطے سے حملہ آوروں کو باہر نکال کر سوادیش اور سوادھرم کو ازسر نو قائم کیا۔ جناب شاہ نے کہا کہ منترالیم داس ساہتیہ پراکلپ کے تحت، ہاؤسنگ، اَن دانم، پرن دانم، ودیہ دانم، پینے کے پانی اور گایوں کے تحفظ جیسی متعدد پہل قدمیاں انجام دی گئی ہیں۔

جناب امت شاہ نے کہا کہ وزیر اعظم جناب نریندر مودی نے سنگ بنیاد رکھ کر ایودھیا میں شری رام مندر کی تعمیر کے لیے راستہ ہموار کیا جو کئی برسوں سے زیر التوا تھا۔ اب، جلد ہی شری رام مندر میں رام للا کی مورتی نصب کر دی جائے گی اور سینکڑوں برسوں کے بعد ایک مرتبہ پھر بھگوان رام اپنی جگہ پر ہوں گے۔ منترالیم میں شری رام کے عظیم الشان مجسمے کا سنگ بنیاد رکھے جانے کےموقع پر، مرکزی وزیر داخلہ اور امداد باہمی کے وزیر نے مٹھ کے مٹھادھیش، ازحد محترم سنت مادھوچاریہ جی، سنت راگھویندر سوامی جی، جنوبی ہند کی ازحد مالامال  ویشنو روایت اور اس کے تمام سنتوں کے تئیں خراج عقیدت پیش کیا۔

**********

 (ش ح –ا ب ن۔ م ف)

U.No:7380