وزیر اعظم جناب نریندر مودی 13 سے 15 جولائی، 2023 تک فرانس اور متحدہ عرب امارات (یو اے ای) کا سرکاری دورہ کریں گے۔

فرانس کے صدر جناب ایمانوئل میکراں کی دعوت پر وزیر اعظم 14-13 جولائی، 2023 تک پیرس کا دورہ کریں گے۔ وزیر اعظم 14 جولائی، 2023 کو بیسٹل ڈے پریڈ میں مہمان اعزازی ہوں گے، اس پریڈ میں تینوں افواج کے ہندوستانی مسلح دستوں کی ایک ٹکڑی بھی حصہ لے گی۔

اپنے اس دورہ کے دوران وزیر اعظم مودی، صدر میکراں سے  باقاعدہ بات چیت کریں گے۔ صدر میکراں وزیر اعظم کے اعزاز میں  ریاستی دعوت کے ساتھ ساتھ ایک ذاتی عشائیہ کی میزبانی کریں گے۔

وزیر اعظم مودی اپنے اس سفر میں فرانس کے وزیر اعظم کے ساتھ ساتھ فرانس کی سینیٹ اور نیشنل اسمبلی کے صدور  سے بھی ملاقات کریں گے۔ وہ فرانس میں ہندوستانی  کمیونٹی، ہندوستانی اور فرانسیسی کمپنیوں کے  چیف ایگزیکٹو آفیسرز اور اہم فرانسیسی شخصیات کے ساتھ انفرادی طور پر بات چیت کریں گے۔

اس سال ہند-فرانس اسٹریٹجک پارٹنرشپ کی 25ویں سالگرہ ہے اور وزیر اعظم کا یہ دورہ  اسٹریٹجک، ثقافتی، سائنسی، تعلیمی اور اقتصادی تعاون  جیسے مختلف شعبوں میں مستقبل کے لیے شراکت داری کا خاکہ تیار کرنے کا موقع فراہم کرے گا۔

اس کے بعد، وزیر اعظم 15 جولائی کو ابو ظہبی کا دورہ کریں گے۔ وزیر اعظم متحدہ عرب امارات کے صدر اور ابو ظہبی کے حکمراں ہز ایکسی لینسی شیخ محمد بن زاید ال نحیان کے ساتھ بات چیت کریں گے۔ ہند-یو اے ای اسٹریٹجک پارٹنرشپ لگاتار مضبوط ہو رہی ہے اور وزیر اعظم کا یہ دورہ توانائی، تعلیم، صحت کی دیکھ بھال، غذائی تحفظ، فن ٹیک، دفاع اور ثقافت جیسے مختلف شعبوں میں اسے آگے بڑھانے والے وسائل کی نشاندہی کرنے کا موقع فراہم کرے گا۔ یہ عالمی امور پر تعاون سے متعلق بات چیت کرنے کا بھی موقع فراہم کرے گا، خاص طور پر یو این ایف سی سی سی کے سی او پی-28 میں یو اے ای کی صدارت اور ہندوستان کی جی-20 صدارت کے سلسلے میں، جس میں یو اے ای ایک خاص طور پر مدعو کیا گیا رکن ہے۔

*****

ش ح – ق ت – ت ع

U: 6957