ভারতকী ‘এক ইস্ত পোলিসি’ মখা তানা ফগৎনবা অমসুং মালেসিয়াগা লৈনা লৈবাক অনিগী মরীশিং মপাঙ্গল কনখৎহন্নবা রক্ষ মন্ত্রী শ্রী রাজনাথ সিংহনা মহাক্কা ফম মান্নবা মালেসিয়াগী দাতো সেরি মোহমদ হাসানগা কোলা লাম্পুরদা জুলাই ১০,২০২৩দা ৱারি শানখ্রে। মহাক্না প্রধান মন্ত্রী ৱাই.বি দাতো সেরি অনৱার বিন ইব্রাহিম উনখি, মসিগী মথক্তা মহাক্না ফোরেন এফেয়ার্সকী মিনিস্তর দাতো সেরি দিরাজা দোক্তর জামব্রি অবদ কাদিরসু উনখি।

জুলাই ৯,২০২৩দা কোলা লাম্পুরদা থুংলবা মতুংদা, শ্রী রাজনাথ সিং মালেসিয়াগী দিফেন্স মিনিস্ত্রিনা গার্দ ওফ ওনর পীদুনা ইকায়খুম্নবা উৎখি। তুংদা রক্ষ মন্ত্রী শ্রী রাজনাথ সিংহনা মহাক্কা ফম মান্নবা মালেসিয়াগী দাতো সেরি মোহমদ হাসানগা নাকল অনিগী ওইবা ৱারি শানখি।

উদোগকী লমদা মতেং পীনবা হেনগৎহনবা য়াওনা লৈবাক অনিগী ঙাক-শেনগী মরীশিং মখা তানা পাকথোক-চাউথোক্নবা লম্বীশিংগী মতাংদা খন্নখি। অমনা অমবু থাজনবা, নাকল অনিমক্না পাম্নবা হিরমশিং অমসুং গনতন্ত্র অমসুং নিয়মগী গুনশিং শরুক য়ামিন্নবদা য়ুম্ফম ওইদুনা অচেৎপা মরুপ-মপাং ওইবা মরীশিং মখা তানা ফগৎহন্নবা লুচিংবশিংনা অমুক হন্না ৱারেপ লৌখি।

চহি অসিদা ভারত্তা মথংগী মালেসিয়া-ইন্দিয়া দিফেন্স কোওপরেসন কম্মিতি মীফম পাংথোকপা হায়না লুচিংবা অনিনা য়ানখি। মালেসিয়া আর্মদ ফোর্স মতমগা চুনবা মওংদা শেমগৎনবা অমসুং শেমজিন-শাজিনবগী থবকশিংদা ভরতকী দিফেন্স ইন্দস্ত্রিনা মতেং পাংনবা লৈরিবা খুদোংচাবশিংগী মতাংদা শ্রী রাজনাথনা ফোঙদোকখি।

 ‘একচেঞ্জ ওফ লেত্তরস’গী খুৎথাংদা ১৯৯৩দা ভারত অমসুং মালেসিয়াগী মরক্ত ঙাক-শেনগী মতেং পীন্নবা খুৎয়েক পীনখিবা এম.ও.য়ু অদু এমেন্দ তৌবদা মিনিস্তর অনিমক্না য়ানখি। এমেন্দমেন্ত অসিনা লৈবাক অনিনা পাম্নবা হিরমশিংদা নাকল অনিগী ওইবা ঙাক-শেনগী মতেং পীনবা পাকথোক-চাউথোকহনবা ঙমগনি।

তুংদা, শ্রী রাজনাথ সিংহনা মালেসিয়াগী প্রধান মন্ত্রী ৱাই.বি দাতো সেরি অনৱার বিন ইব্রাহিম উনখি অমসুং প্রধান মন্ত্রী শ্রী নরেন্দ্র মোদীগী য়াইফ-পাউজেল পাউদমখি। মহাক্না ২০১৯দা ভারত্তা লাকখিবা খোঙচৎ অদু নিংশিংলদুনা প্রধান মন্ত্রীনা ভারতকী মীয়াম নুংশিজবা অমসুং প্রধান মন্ত্রী শ্রী নরেন্দ্র মোদী অসি মহাক্কী মরুপ অমনি হায়না পাউদমখি।

লৈবাক অনিগী মরক্তা লৈনরিবা নাৎকী অকনবা মরীশিং অদু মালেসিয়াগী প্রধান মন্ত্রীনা অপেনবা ফোঙদোকখি। মহৈ য়ানবা অমসুং কান্নবা ঙাক-শেনগী ৱারি শানখিবা অদুগী মতাংদা শ্রী রাজনাথ সিংহনা মালেসিয়াগী প্রধান মন্ত্রীদা পাউদমখি। অচেৎপা মরুপ-মপাং ওইবা মরী অসি মপুংফানা শীজিন্ননবা পাম্বৈশিং থিনবা মীফম অদুদা মীৎয়েং থমখি।

শ্রী রাজনাথ সিংহনা মালেসিয়াগী ফোরেন এফেয়ার্সকী মিনিস্তর দাতো সেরি দিরাজা দোক্তর জামব্রি অবদ কাদিরসু উনখি অমসুং মখোয়না লৈবাক অনিগী মরুওইবা ৱাফমশিং অমসুং মালেমগী ওইনা মতেং পীনবগী মতাংদা ৱাখল্লোনশিং ফোঙদোক্নখি। অসিয়ান্না মরুওইবা থৌদাং লৌবা অমসুং ইন্দো-পেসিফিক লমদমদা শান্তি, তুংদু লৈতাবা অমসুং নুংঙাই-য়াইফবা পুরকপগী মরুওইবগী মতাংদা খন্নখি। মালেসিয়া দিফেন্স ইন্দস্ত্রিনা মশাগী মরোমদোম লেপচবা ঙম্নবা লৈবাক অসিনা পায়খৎলিবা থবক য়াঙশিন্নবা মতেং পীনবা হায়না ভারতনা থাজবা পীদুনা মীফম অদু লোইশিনখি।

তুংদা, শ্রী রাজনাথ সিংহনা, বর্মা বোর্দরদা নেতাজি সুভাস চন্দ্রা বোসকা লোয়ননা লাল শোক্নখিবা চহি ৯৯শুরবা আই.এন.এগী লান্মী সেকেন্দ লেপ্তনেন্ত সুন্দারাম ইকায়খুম্নবা উৎখি।

২০১৫দা প্রধান মন্ত্রী শ্রী নরেন্দ্র মোদীগী মালেসিয়া খোঙচৎ মনুংদা লাউথোকখিবা স্ত্রাতেজিক পার্তনর্শিপ মতুংদা হন্দক্কী খোঙচৎ অসি লৈবাক অনিগী মরক্তা পাংথোকপা অহানবা খোঙচৎনি।

****