রাজস্থানগী রাজ্যপাল কলরাজ মিশ্রা জি, কেন্দ্রগী মন্ত্রী শ্রী নিতি ন গদকরি জি, অরজুন মেঘৱাল জি, গজেন্দ্র শেখাৱত জি, কৈলাশ চৌধরী জি, পার্লিয়ামনে্ততা ঐহাক্কা পুন্না থবক তৌমিন্নরিবা, লেজিসলতরশিং অমসুং দাইসতা লেংশিনবীরিবা ঐহাক্কী নুংশিজরবা ইচিল ইনাওশিং!

মমিং লৈরবা মীওই কয়ামরুমগী হৌরকফম ওইরিবা রাজস্থানগী লমদম অসিবু ইকাই খুম্নবা উৎচরি! মসিগী লমদম অসিনা হন্না হন্না চাউখৎ থৌরাংদা কত্থোক্লবা মীওইশিংবু খৌরাংনা ঙাইরি অমসুং চেপাউসু পীরক্লি। অদুগা লৈবাক অসিগী মহুৎ শিল্লদুনা ঐহাক্না মসিগী ভীরধারা অসিগী খুয়াদা চাউখৎ থৌরাংগী অনৌবা খুদোলশিং পুদুনা লাক্লি। ঙসিদি বিকানের অমসুং রাজস্থানগী লুপা করোর লিশিং ২৪গী চাউখৎ থৌরাংগী প্রোজেক্তশিং মফম অসিদা শঙ্গারে। রাজস্থান্না থা খরাগী মমাংদা লেন তরুক্কী এক্সপ্রেসৱে অনি ফংখ্রে। ফেব্রুৱারীগী থাদা ঐহাক্না দিল্লী-মুম্বাই এক্সপ্রেস কোরিদোর  অমসুং মসিগী দিল্লী-দোসা-লালসো সেক্সন শঙ্গাখি। অদুগা ঙসিদি জাতি অসিদা অমৃতসর-জামনগর এক্সপ্রেসৱে অসিগী কিলোলীতর ৫০০গী সেক্সন অসি কৎথোকপগী খুদোংচাবা অমা ঐঙোন্দা ফংলে। মসি রাজস্থান্না এক্সপ্রেসৱেগী মরমদা দবক সেঞ্চুরী লৌবগা মান্নরে।

মরুপশিং,

ঙসিদি, রাজস্থান অসি রিন্যুৱেবল ইনর্জীগী লমদা মাংজিল থানবা গ্রীন ইনর্জী কোরিদোর অসিসু শঙ্গারে। বিকানেরগী ইসিক হোস্পিতালগী থবকশিংসু লোইশিল্লে। বিকানের অমসুং রাজস্থানগী মীয়াম্বু মসিগী চাউখৎ থৌরাংগী থবকশিং অসিগীদমক্তা থাগৎপা ফোঙদোকচরি। 

মরুপশিং,

রাজ্য অমহেক্তনা মখোয়গী তৌবা ঙম্বগী শক্তি অদু মশক উৎলকপা মতমদা চাউখৎ থৌরাংগী লমজেলদা মাংজিল থারকই। রাজস্থান অসি তৌবা ঙম্বা অমসুং ওইথোকপা য়াবা কয়ামরুমগী হৌরকফমনি। রাজস্থানদা চাউখৎ থৌরাংগী লমদা খোংজেল য়াংখৎলকপা য়াবাগী ওইথোকপা লৈবনা ঐখোয়না মফম অসিদা রেকোর্দ ওইনা ইনভেস্তমেন্ত তৌরিবনি। রাজস্থানদা ইন্দস্ত্রীএল দিভেলপমেন্তগী ওইথোকপা য়াবা কয়ামরুম লৈবনা ঐখোয়না হাই-তেক ওইবা কন্নেক্তিবিতীগী ইনফ্রাস্ত্রকচর শেমগৎলিবনি। হাই স্পীদ এক্প্রেসৱে অমসুং রেলৱেজনা রাজস্থান পুম্বা তুরিজমগী খুদোংচাবা হেনগৎহল্লগনি। মসিগী খ্বাইদগী চাউবা খুদোংচাবা ফংগদৌরিবা অসি রাজস্থানগী ইচা ইশুশিংনি।

মরুপশিং,

ঙসি শঙ্গারিবা গ্রীনফিল্দ এক্সপ্রেসৱে কোরিদোর অসিনা রাজস্থানগা হরিয়ানা, পঞ্জাব, গুজরাত অমসুং জম্মু অমসুং কশ্মীরগা শম্নগনি। অঔবা কম্মর্সিএল সী-পোর্তশিং হায়বদি জামনগর অমসুং কন্দলাগুম্বা অসিগা রাজস্থান অমসুং বুকানেরগা হকথেংননা শম্নরগনি। মসিগা লোয়ননা বিকানেরদগী অমৃতসর অমসুং জোধপুর ফাওবগী অরাপ্পা অসি হন্থরগনি মসিগা লোয়ননা জোধপুরদগী জালোর অমসুং গুজরাতকী অরাপ্পা অসিসু হন্থরগনি। মসিগী অপুনবা মফম অসিগী লৌমীশিং অমসুং ললোনবশিংনা চাউনা কান্নবা ফংলগনি। মসিগী এক্সপ্রেসৱে অসিনা নোংচুপথংবা ভারত্তা লোলোন ইতক্কী থবক থৌরমদা অনৌবা পাঙ্গল অমা হাপ্লগনি। লৈবাক অসিগী ওইল ফিল্দ রিফাইনরীশিং অসি মসিগী খুত্থাংদা শম্নরগনি অমসুং সপ্লাই চেনসু মপাঙ্গল কনখৎলগনি অমসুং লৈবাক অসিনা শেন্মীৎলোনগী ওইনা শাহৌ অমা ফংবা ঙম্লগনি।

মরুপশিং,

ঙসিদি বিকানের-রতমগরহগী রেল লাইন শরুক অনি পাকথোকপগী থবক অসি হৌখ্রে। ঐখোয়না রাজস্থান্দা রেলৱেজকী চাউখৎ থৌরাং পুরক্না অহানবা মীয়েং চংলি। ২০০৪দগী ২০১৪ ফাওবগী মরক্তা রাজস্থান্না রেলৱেজকী ওইনা চহি খুদিংগী ওইনা লুপা করোর লিশিং অমদগী তানা ফংখি। অমরোমদা ঐখোয়গী সরকার অসিনা রাজস্থান্দা চহি খুদিংগী রেলৱেজকী চাউখৎ ধৌরাংগী লুপা করোর লিশিং ১০দগী হেন্না পীথরি। ঙসিদি অনৌবা রেল লাইনশিং শেমগৎলে অমসুং রেল ত্রেক্তশিং অসি খোঙজেল য়াংনা ইলেক্ত্রিফাইদ তৌরে।

মরুপশিং,

মসিগী ইফ্রাস্ত্রকচরগী চাউখৎ থৌরাং অসিদগী অপীকপা ললোল ইতিক তৌবশিং অমসুং অপীকপা ইন্দস্ত্রীশিংনা খ্বাইদগী কান্নবা ফংগনি। বিকানের অসি পিকল, পাপর, নমকীন অমসুং মসিগুম্বা পোত্থোক খুদিংমক্কী লৈবাক পুম্বদা মমিং চৎলি। করিগুম্বা কন্নেক্তিবিতী অসিনা ফরবদি মসিগী অপীকপা ইন্দস্ত্রীশিং অসিগী পোত্থোকশিং অসি লৈবাক অসিগী মফম খুদিংমক্তা অহোংবা মমলদা য়ৌহনবা ঙম্লগনি।

মরুপশিং,

হৌখিবা চহি ৯ অসিদা ঐখোয়না রাজস্থান্দা চাউখৎ থৌরাং পুরক্নবা কন্না হোৎনরি। চহি দিকেদ কয়াদগী মীরাইবীদুনা লাক্লবা ঙমখৈগী মফমশিং অসিদা ঐখোয়না ভাইব্রেন্ত ভিলেজ স্কিম হৌদোকখ্রে। ঐখোয়না মসিগী খুঙ্গংশিং অসি লৈবাক অসিগী অহানবা খুঙ্গংশিংনি হায়না লাউথোকখ্রে। মসিগী চাউখৎ থৌরাংশিং অসি মফম অসিদা লাকপনা মরম ওইদুনা লৈবাক অসিগী মীয়াম্না ঙমখৈগী মফমশিং অসিদা খুন্দা লৈতবগী মশিং হেনগৎলক্লি।  

মরুপশিং,

সলাসর বালাজী অমসুং কর্নি মাতানা ঐখোয়গী রাজস্থান্দা খুদোংচাবা কয়ামরুম পীখ্রে। মসিনা মরম ওইদুনা চাউখৎ থৌরাংদসু মকোক্তা লৈগদবনি। ঙসিদি, মসিগী থৌনা অসিগা লোয়ননা ভারত সরকার অসিনা চাউখৎ থৌরাংগী থবকশিংদা অহেনবা মীৎয়েং চংলি অমসুং মসিদা থৌনা পুম্বা থাদরি। ঐখোয়না পুন্না রাজস্থানগী চাউখৎ থৌরাং অসি খোংজেল য়াংনা মাংলোমদা পুখৎলগনি। ঐহাক্না অমুক্কা হন্না নখৌয় পুম্নমক্তা য়াইফ-মঙ্গোল পীজরি। হন্না হন্না থাগৎচরি।

***