وزیر دفاع جناب راج ناتھ سنگھ نے 19 جون 2023 کو نئی دہلی میں ویتنام کے قومی دفاع کے وزیر جنرل فان وان گیانگ کے ساتھ بات چیت کی۔ اس ملاقات کے دوران دونوں ممالک کے درمیان دفاعی تعاون کے مختلف اقدامات پر ہونے والی پیش رفت کا جائزہ لیا گیا۔ دونوں اطراف نے اس سمت میں جاری کوششوں پر اطمینان کا اظہار کیا۔

دونوں وزرا نے تعاون کے موجودہ شعبوں بالخصوص صنعتی تعاون، میری ٹائم سیکورٹی اور کثیر قومی تعاون کو بڑھانے کے ذرائع کی نشان دہی کی۔ وزیر دفاع نے دیسی ساختہ ان سروس میزائل کارویٹ آئی این ایس کرپان کو تحفے میں دینے کا بھی اعلان کیا۔ یہ کرپان ویتنام پیپلز نیوی کی صلاحیتوں کو بڑھانے میں سنگ میل ثابت ہوگا۔

ویتنام کے وزیر دفاع نے ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) کے ہیڈ کوارٹر کا بھی دورہ کیا اور دفاعی تحقیق اور مشترکہ پیداوار میں تعاون کے ذریعے دفاعی صنعتی صلاحیتوں کو بڑھانے کے طریقوں پر تبادلہ خیال کیا۔

اس سے قبل دن میں جنرل فین وان گیانگ نے قومی جنگی یادگار پر پھول چڑھائے اور شہید ہونے والے ہیروز کو خراج عقیدت پیش کیا۔ جنرل فان وان گیانگ 18 جون کو دو روزہ دورے پر ہندوستان پہنچے تھے۔ ویتنام ہندوستان کی ایکٹ ایسٹ پالیسی اور ہند – بحر الکاہل خطے میں ایک اہم شراکت دار ہے۔

**************

ش ح۔ ف ش ع-  م ص

U: 6269