ভারতকী রাস্ত্রপতী, শ্রীমতী দ্রৌপদী মুরমুনা ঙসি (জুন ১২, ২০২৩) রাস্ত্রপতী ভবন্দা পার্তিকুলরলী ভল্নরেবল ত্রাইবেল গ্রুপ (পি.ভি.তি.জি.)শিংগী মেম্বরশিংগা উনদুনা ৱারী ৱাতায় শানখ্রে‍। মহাক্না বিহারগী মাল পহারিয়া, গুজরাতকী সিদ্দী, কেরলাগী ইরুলা, রাজস্থানগী সহারিয়া, মধ্য প্রদেশকী বাইগা পরধৌনী অমদি ওরিসাগী বুরিগলী য়াওনা নাৎকী ওইবা জগোয় ঈশৈ কয়া থৌরমদুদা মীৎয়েঙ তাখি‍।

তিল্লিবা মীয়ামগী মফমদা ৱা ঙাংলদুনা, রাস্ত্রপতীনা পি.ভি.তি.জি. ৭৫মক্কী মেম্বরশিংগা উনবা ফংবদা মহাক নুংঙাইবা ফাওই হায়খি‍। মখোয়বু মহাক্না রাস্ত্রপতী ভবন্দা তরাম্না ওকখি‍। মখোয়শিংগী মরক্তা কয়া অমদি মখোয় মখোয়গী খুলদগী অহানবা ওইনা থোরকপনি হায়বা ৱাফমসু মহাক্না থমখি‍। মখোয় খুদিংমক মখোয় মখোয়গী ফুরূপকী মীহুৎ অমম্নি হায়না মহাক্না হায়খি‍। মহাক্না মখোয়গী মফমদা মখোয়গী ফুরূপকী মীওইশিংগী মরমদা ৱাফম কয়া থম্নবা হায়বগা লোয়ননা লৈঙাক্না পায়খৎলিবা য়াইফ-থৌরাংশিংগী মতাঙদসু মখোয়দা খঙহনখি‍।

রাস্ত্রপতীনা পি.ভি.তি.জি. মেম্বরশিংদা মহৈ মশিং তম্বদা খ্বায়দগী মরুওইবা মীৎয়েঙ চঙনবা হায়খি‍। পি.ভি.তি.জি. ফুরূপকী মহৈরোয়শিংগীদমক এক্লবিয়া মোদেল রেসিদেন্সিএল স্কুলশিংদা মফম কন্ননবা অখন্নবা থৌরাং লৈ হায়না মহাক্না হায়খি‍। মসিগী মথক্তা, নেস্নেল ফষলোসিপ অমদি ওভরসিজ স্কোলারসিপ স্কীমদা মখোয়গী ওইবা মফম তোখাইনা কন্দুনা থম্লি‍। মহাক্না পি.ভি.তি.জি.গী নুপীশিংগী মফমদসু ত্রাইবেল ৱুমেন ইম্পৱারমেন্ত স্কীম য়াওনা তোঙান তোঙানব স্কীমশিংগা কান্নবা লৌননবা ৱাফমসু থমখি‍।

ত্রাইবেল সপ-প্লানগী মখাদা, ভারত লৈঙাক্কী মন্ত্রালয় অমদি দিপার্তমেন্ত ৪১না মখোয়গী বজেৎকী শরুক অমা পি.ভি.তি.জি.শিং য়াওনা ত্রাইবেল ফুরূপকী য়াইফনবগীদমক কাইথোকই হায়না রাস্ত্রপতীনা হায়খি‍। পি.ভি.তি.জি. চাওখৎহন্নবগীদমক লৈঙাক্না ‘প্রধান মন্ত্রী পি.ভি.তি.জি. দিভেলপমেন্ত মিসন’ হৌদোকখিবদা মহাক্না নুংঙাইবা ফোঙদোকখি‍।

ইং ২০৪৭ ফাওবগী মনুংদা সিকল সেল এনেমিয়া মুত্থৎনবগীদমক হন্দক্কী বজেত্তা লাউথোকখিবা কেম্পেন অসি য়াম্না মরুওইবা খোঙথাঙ অমনি হায়না রাস্ত্রপতীনা হায়খি‍।

হৌখিবা চহি খরসিদা ত্রাইবেল ফুরূপশিংদগী হৈথোই শিংথোইরবা মীওই কয়াবু তোঙান তোঙানবা হীরমশিংদা মখোয়না লৌরিবা শিংথানিংঙাই ওইরবা থৌদাংশিংগীদমক পদ্ম এৱার্দ পীদুনা ইকায়খুম্নদুনা লাক্লি হায়না রাস্ত্রপতীনা হায়খি‍। পি.ভি.তি.জি. খুন্নাইগী মীওই লাখ ২৮ য়াওনা ত্রাইবেল ফুরূপকী মীওই করোর ১০ হেনবনা মখোয়গী হৈশিংবগী চাং হেনগৎহন্দুনা খুন্নাই অমদি লৈবাক্কীদমক মখোয়না ঙমজবা থাক্তা থৌদাং য়াহন্নিংবগী অপাম্বসু মহাক্না ফোঙদোকখি‍।

ত্রাইবেল ফুরূপকী মীওইশিংনা মমা লৈবাক্কীদমক অমদি লৈবাকসিগী মহৌশাগী অমদি নাৎকী লনথুম ঙাক্নবগীদমক থৱায় কয়া কত্থোকখ্রে হায়না রাস্ত্রপতীনা হায়খি‍। তুং কোইগদবা চাওখৎ থৌরাংগী পান্দম ফংনবগীদমক, ঐখোয় পুম্নমক্না ত্রাইবেল খুন্নাইদগী মতৌ তমজবা য়াই‍। মখোয়গী শক্তম অমদি ফুরূপশিংবু ঙাকপগা লোয়ননা মখোয়দা চাওখৎপা পুরক্নবা হোৎনবা হায়বসিনা মীপুম খুদিংমক্কী, মরুওইনা পি.ভি.তি.জি. য়াওনা ত্রাইবেল মীওইশিংগী থৌদাং অমদি অনিংবা অপাম্বনি‍। পি.ভি.তি.জি.গী মেম্বরশিংনা ঐখোয়গী লৈবাকসিগী পুম্নমক চাওখৎমিন্নবগী খোঙচৎ অসিদা মাঙদা চঙশিল্লকখিগনি হায়না মহাক্না থাজবা ফোঙদোকখি‍।

ঙল্লিঙৈদা, পি.ভি.তি.জি.শিংগী মেম্বরশিংনা রাস্ত্রপতী ভবন অমদি অমৃৎ উদ্যানগী গাইদেত তুর অমা চৎখি‍। তুর অদুগী মতুংদা, রাস্ত্রপতীনা মখোয়গা অমৃৎ উদ্যান্দা উনদুনা ৱারী ৱাতায় শানখিবনি‍।

রাস্ত্রপতীগী ৱারোল য়েংনবগীদমক মফমসিদা নম্বিয়ু -

***